#مُعــاويــة
:: 3 ::
معاوية: ملّا عملة اديرها فينا ياحويج
ضحك وتلفتلي وحط صونية التمر والبسيسة قدام الكرسي يللي متعود يقعمز عليه: هكي خير لازم تعتمدو ع روحكم .. لامتى بنعيشلكم
ابتسمت: ربي يطول عمرك .. نطيبلك شاهي ؟
ضحك : لا بنشرب حليب بس
استغربت: في العادة تحب الشاهي !
قعمز ع كرسيه وصب طاسة حليب: بنغير عاداتي .. ( حط تمرة في فمه ) كول معاي !
خديت تمرة غطستها في البسيسة : كِنان مشي للمدرسة ؟
خيري: ناض بالسيف .. قال ساهر امس
ضحكت: انت ماتحبش الغياب عاد
خيري: امالا شنو .. خاصة هوا ظرفه غير
استغربت وحطيت ايديا ع بعض وركزت في عيونه: علاش ظرفه غير ؟
يتكلم وهوا لاهي في فطوره: كِنان شخصيته ضعيفة ولو خليته براحته يضيع اكتر ومعاش نقدر نشده
ابتسمت وتنهدت: صح ( شديت ايده بوستها ) هي تبي شي طالع
شرب طاسة الحليب في مرة: مامشيتش للورشة اليوم ؟
معاوية: اي .. بنمشي نشوف غسان
ابتسم: غسان حاله باهي
استغربت وشبحتله: كلمك ؟
خيري: لا .. لكن غسان يعرف يقيم روحه
ابتسمت وطبطبت ع ايده: ماتعرفش وين ممكن نلقاه ؟
بوي ياكل ويرد عليا: في الاستراحة
ضحكت: كيف عرفت ؟
خيري: ديما لما يضايق يمشي غادي من يومه يحب يقعد بروحه لما يضايق .. في الاول كان يقعد في الملحق يللي برا ووين كبر يمشي غادي
ماتستغربوش .. انا اول مرة نزعله بالطريقة هادي .. ابتسمت وخديت مفاتيحي وطول ع الاستراحة
...............
فتحلي الباب ويحك في راسه وين شافني جي بيسكر الباب شديته برجلي
معاوية: قعمز ياعيل بلا حركات
خلّا الباب مفتوح وخش .. كانت ريحة المكان دخان .. قعدت نمروح بايديا: يرزيك فيه
اتكي ع الصالون بلامبالة: شن تبي ؟
فتحت الرواشن وقعمزت مقابله: عارف روحي غالط جيت بنتكلم معاك
غسان وهوا يدخن: ماخاطريش نتكلم
وقفت وشديت رجليه وجبدته طيحته من الصالون عيط من الوجع: تي اركح يامريض ( وقف ورجع قعمز ) شن تبي جاي ؟
ضحكت وقعمزت في مكاني : غسان والله مانقصد .. انت عارف علاقتي ببوي خيري كيف ولاه!
غسان طفى دخانه: اصلا اليومين الجايات مخليك انت وبوك خيري زي ماقلت
استغربت: شن تقول ؟ .. وين بتمشي ؟
غسان ابتسم بوجع: مسافر لبوي الحقاني يللي باعني وسيبني
اضايقت: غسان سامحني ياراجل والله مانقصد .. مش لدرجة تمشي تسافر .. اصلا انت شن عرفك بوك وين ؟
غسان ضحك بهزوة: في جهنم الحمراء
نضت من مكاني قعمزت جنبه وطبطبت ع كتفه: وحّد الله وصلي ع النبي واسمعني
غسان قام عيونه ومسح وجهه بالقوة: عليه افضل الصلاة والسلام
ابتسمت: غسان .. انا نحس زي ماانت تحس بالزبط .. بوي خيري مش مزبوط ويتصرف تصرفات مش مفهومة .. لكن قاعد نكذب ع روحي ونوهم في روحي انه طبيعي الموضوع
غسان تلفتلي
رجعت كملت كلامي: انا والله ماهاين عليا زعلك .. قصدي قعدت متبهدل هنا بروحك
غسان: تو نتزوج
ضحكت وشديت راسه وتغمرته: ليك وحشة هي نوض معاي
ابتسم: خليني شويا تو نروح الليلة
معاوية: قاعد قلبك مش صافي ؟
غسان: انا عمري كله نحاول ننسى انه بوي سيبني .. سافر واختار صياعته عليا نستبعد فيها الفكرة هادي من كنت صغير .. نستبعد انه عمامي وعيلتي تبرو منه .. ونكره اليوم يللي جيت فيه ع الدنيا ( تلتفلي وابتسم ) شن تبي في النفخ الزايد انت ؟
ابتسمت: حقك عليا .. غسان انت خوي واللي يوجعك يوجعني .. صح اماليا كلهم ماتو بس حتى انا عمامي كلو رزقي ولوحوني في دار الايتام ولا خال نشد ولا خالة اطمنت عليا .. قطعوني كلهم
شد ايدي بالقوة: انا مانبيش نخسركم .. عارف روحي طبعي صعب وعنايدي وراسي مسكر لكن انتم اللي قعدتولي في هالدنيا مانبيش نخسركم
ابتسمت وطبطبت ع رجله: شطب امورك وتعالا نستنو فيك
ابتسم ورد: باذن الله
روحت للحوش وانا مطمن ع غسان الليلة بيبات معانا ..
...................
قعمزين في الصالة مع بعضنا .. كِنان شاد كتابه ويقرا وحذيفة يتصفح في كتاب التفسير للقرآن الكريم ويتناقش مع غسان .. وانا شاد مذكرة الحسابات ونراجع ونشوف في الاسعار للبضاعة الجديدة .. بوي يتابع في الاخبار ع التلفزيون
تلفت بوي لغسان يللي كان جنبه وقاله: انت من ؟
استغرب غسان وقاله: نعم بوي ؟
سكت بوي ووقف: انا تاعب بنخش نرقد ديرو دورة ع الحوش قبل ماترقدو
غسان مصدوم .. وانا وحذيفة رجعنا لاشغالنا
غسان: غدوا لازم نرفع نعاينه بوي
حذيفة تلفتله: خيره ؟
غسان: تي سألني ع اسمي توا ماسمعتاش
معاوية: بالك غير هكي علاش تكبر في الموضوع
غسان وقف: تمام حذيفة غدوا نكملو نحس في روحي نعست
ابتسم حذيفة: تصبح ع خير
...................
خشيت للكوجينا لقيت حذيفة يغسل في الاماعيين سألته: شن ادير ؟
حذيفة: درت كيكة شفتها ع النت عجبتني درتها
ضحكت: قلت راني جبتهالك واتية علاش تفسد في الحاجات
نفض ايديه: شن دخلك فيا ؟
طلعت تن من الثلاجة ودرت ساندويتش: والله كان يتزوج غسان يريحنا من هالبهدلة
ع خشة غسان يتكلم فرحان بصوت عالي: لقيتها لقيتها
تلفتنا انا وحذيفة: شن هيا ؟
قعمز ع الكرسي ومدلي تليفونه: شوف هآ
شفت صور أكلات خفيفة يعني نواشف وكيكات جافة وريتهم لحذيفة ورديتله التليفون
معاوية: مافهمتش
غسان خدي تليفونه : ياغبي انت وياه .. البنية اهيا منزلة تخدم فيهم
حذيفة تلفتلي وشبحله: شن يعني ؟ .. توا اغلب البنات بدو فالحات في الكيكات والحار وكل شي
غسان ضحك: وهذا المطلوب .. انا البنت اهيا هكي خشت خاطري
ضحك حذيفة بهزوة ووقف يشوف في كيكته في الكوشة
اما انا ضحكت: هيا والا تطييبها اللي خش خاطرك ياهيدوق
غسان بالامبالة: زيد تسهوك انت وياه .. عموما طلبت منها حاجات بعدين بنمشي نستلمهم منها ونذوقو
حذيفة طلع الطاجين ونشفطت ايده قعد ينفخ عليها وحطها تحت الشيشمة: ابرا ياغسان شن قاعد ادير انت ؟ .. وكان بعد ماتعشمها وتعشم روحك ماتعجبكش كيف بتعالجه الموضوع ؟
غسان: خيره اهوا ؟ .. مايهمنيش شكلها ولا هيا من تكون والا حتى عمرها .. نبيها فالحة وماكلتها مليحة بس
هز راسه حذيفة يمين يسار وغطى الكيكة وطلع من الكوجينا
معاوية: غسان اعقل لما تبدا فرحان ماتاخدش قرار
غسان مش عاجبه الكلام .. وحط عيونه في التليفون وفاتني
.................
في العشية طلع غسان لحوش البنية بيستلم الطلبية طلعله خوها .. خدي منه البوكس فتحه واستنشق ريحة الاكل مش عادية .. وسكره ومدله الفلوس
خوها كان اكبر من غسان في بداية الثلاثينات
..............
غسان: هآ شن رايكم بالله ؟
حذيفة وكِنان ياكلو اصلا مش مركزين معاه
معاوية: الله يبارك الحق
غسان تلفت لبوي: شني ياحويج اتملي فيها ؟
بوي: نتملك في شنو ؟
غسان ناض قعمز بحداه: فيها البنية حتى خوها هدرزت معاه عجبني الحق
ضحك بوي: ياودي مش هكي الامور شويا شويا .. خللي نتعرفو عليهم بالمزبوط قبل
فرح غسان : يعني ماعندكش مانع ؟
ضحك بوي: لالا .. اللي يبي الحلال عمره مايرفضوه
فرح غسان وتغمر بوي: بارك الله فيك
ناض غسان خش لداره وبعتلها مسج ع الفيسبوك ( وصلتني طلبيتي ومش اخر تعامل .. سلم ايديك )
خشيت عليه للدار سكر تليفونه وشبحلي : شنو ؟ .. خيرك هكي تشبحلي ؟
قعمزت بحداه: انا متاكد بعتلها مسج
ضحك بخجل واتكى وقام عيونه فوق: ياراجل خشت خاطري
ضحكت: من اول نتشة ؟
عدّل تقعميزته وفنص فيا: جاي تتسهوك ؟
ابتسمت: ياودي ربي يجيب اللي فيه الخير .. لكن عنذي نصيحة خليها تجيك بالحلال بلاش منها المقدمات لا تغلط فيها ولا فيك
غسان: شن تغلط فيا ؟ .. نقصفلها عمرها
معاوية: ياسلام آهو بدينا في الكلام الباهي
قطع علينا طق الباب وكان حذيفة: تجو تشربو قهوة بكيكتي والا معاش مستواك استاذ غسان
ضحك غسان وخبطني ع كتفي: جايين هي
نضت انا كيف بنطلع سمعت صوت مسج في تليفون غسان تلفتله .. شد تليفونه وابتسم وحطه في جيبه ( هي برا سقدني )
فرحت لفرحته .. معقولة الواحد يفكر في بطنه قبل كل شي ؟ .. هذا غسان !
..................
طقيت ع الباب استنيته لين فتحلي
قلتله وانا مستغرب : خيرك مسكر ع روحك الدار ؟
كِنان: مضايق
قعمزت ع كرسي مكتبته مقابله: شن اللي مضايقك ؟ .. وعلاش ديما مقعمز بروحك !
قعمز غ سريره وضم رجليه لبعض : مافي شي
أصريت اني نعرف السبب
كِنان: مضايق يامعاوية ( بدي يبكي ) نبي نقتل روحي .. خلاص كرهت روحي .. ماحدش ينادي فيا كِنان كلهم ينادو كِنانة حتى بعد ماحلقت .. ( تلفتلي ومسح دموعه ) وطمعو فيا الزفت
ضحكت بصوت عالي وطبطبت ع كتفه: خيرك مش واثق من روحك .. انت راجل تو تكبر وتسكرلهم افامهم كلهم
دفني ووقف وعلّا صوته :انت مش عارف شي .. خليني في حالي .. ( وخر شويا وعيونه مليانات دموع ) كرهتكم كلكم
ضربته كف مانعرفش علاش ضربته وكيف اصلا سمحتلي نفسي نضربه
شد مكان الكف وشبحلي: حتى استقويت عليا لان ماعندي حد .. كلهم استقوو عليا لان ماعنديش حيط يسندني ماعنديش حد في هالدنيا .. انا ولد شوارع وهذا اللي مخليهم يستوطو حيطي ( قف قدام المراية وحط ايديه ع رقبته ) يارب نموت معاش نبي نعيش .. حتى لو نموت ماحد يبكي عليا الا اللي كانو مستغلينّي
شديته بالقوة ونحيتله ايديه من رقبته وضربته بالقوة .. معاش حسيت بروحي لين شدلي ايدي حذيفة : اي خيرك ياراجل الولد بتقتله
دفني حذيفة وقام كِنان يللي كان خشمه ينزف دم ..
وانا داهش: هذا كله من الدلع .. اقسم بالله ناقص كفوف
حذيفة يطبطب ع كِنان: شن دار ؟
كِنان كان يبكي بحرقة وتمسك في حضن حذيفة وغمر راسه في صدره
شاد ايدي وكان نلقى نكسرها لاني مديتها ع خوي الصغير: يبي يقتل روحه الباشا
حذيفة بعده من غمره وشبحله بتعصب: شن الكلام هذا ؟ .. خيرك هبلت
دفه كِنان وطلع من الدار يجري .. تلفتلي حذيفة
حذيفة: الولد صغير وقاعد يتعلم
شبحت لروحي في المراية مازال في عيوني شرار وعروقي قريب يتقطعو من الاعصاب
معاوية: كل مايضايق نهدرز معاه ونغيرله جو معاش بطل كل شويا شادلي الدار ويبكي زي البنت .. تو بعد الطريحة اهيا يفيق ع عمره
حذيفة: ربي يهديه .. بالك صاير معاه شي !
تنهدت: ماصاير شي نفس الدسكة يوميا .. دلع زايد
حذيفة طبطب ع كتفي: ادعيله وبرا استسمح منه
هزيت راسي بمعنى باه .. ومشيت لداري تلوحت ع سريري وحسيت روحي فاشل مش قادر نحرك جسمي كله من كثر الاعصاب
.................
غسان: اي هكي خشيتي خاطري سبحان الله
نهال: يعني عجبك تطييبي ؟
غسان: خيرك ماتبيش تفهمي ان عجبتيني انتي
نهال ضحكت: ياسيدي اعتبرني فهمت .. تبي طلبية بالبلاش شكلك
غسان ضحك: عينك .. من هنا وغادي اصلا بتبدي تحسبيني في كل شي .. قلتلك بوي مسقدها الطباخة وحاصل انا وخوتي في الكوجينا ومافيش حد شدت معاه .. حذيفة نوعا ما فالح ونفسه حلو لكن معاوية الله لا يذوقك ماكلته .. ترجعي طول من الصنة
ضحكت: ربي يحفظكم لبعض .. توا انت مخلي خوك الصغير مقعمز وتهدرز عليا ؟
ضحك غسان: عندك الحق .. سكري وسلميلي ع مروان
شهقت: تبيه يقتلني
غسان: ايييح علاش ع خاطر تكلمي فيا ؟
نهال: ماهو ماعندكش خوات هذا علاش تتكلم هكي
غسان: اي ممكن .. خلاص بنسكر ماتبي شي
نهال: سلامتك
سكر غسان التليفون وتلفت لقي كِنان قاعد مقعمز في مكانه وسارح .. جاه خبطه ع جبهته
غسان: خيره الباهي ؟
كِنان: مزهزه ع خاطر الحب
غسان ضحك: حب عينك .. اول مرة نكلمها تعرفت عليها بس
كِنان: شن اسمها ؟
غسان خبطه ع راسه: عيب نتكلم ع المرآ .. المهم خيرك مع معاوية ؟
كِنان شبحله: حكالك ؟
غسان: اي حكالي قاللي يبي يتأسف ومش قادر .. المهم هوا معاوية مش قصده يضربك ولا شي انت كلامك مستفز .. معقولة تقول ماعنديش حد وانا ولد شارع وكلام طلعه عن طوره
كِنان بتأثر: كلام الحق .. انا كاره روحي والحياة وكل شي
شدله راسه وغمره في صدره: ياراجل صلي ع النبي كل شي ليه حل .. تكبر تو تنسى وتولي سيدهم كلهم .. وبعدين انا وحذيفة ومعاوية وبوي خيري بطوبته معاك انت في كفة واحني كلنا في كفة بالنسبة ليه .. بيع النكد ياخوي واشري راحة بالك كان ع صحابك في المدرسة اقطع علاقتك بيهم ولو ع الشارع انا نرفعك ونجيبك شن رايك ؟
كِنان ابتسم: معاش بنمشي
بعده عن حضنه: علاش ؟
كِنان: بنرتاح شويا
ابتسم غسان: ياسيدي مش لازماتك بكل القراية كان بتعبك هكي
شبحله بتركيز: نبيك تضربهم كلهم اللي أذوني
ضحك غسان: من هما ؟
كِنان: ولاد الشارع كلهم و
سكت شويا وتنهد وبعدين قال: وعمي فاتح
غسان: فاتح راجل كبير يبصر عليك بس
فنص عيونه كِنان ووقف: مش بصارة هادي .. هادي قلة اخلاق تأذي ولد ند ولدك ممكن
غسان مستغرب: تمام خلاص انا نتصرف اهدا بس
قعمز كِنان وبعدين قال: بنمشي نرقد .. ( وقف ) تصبح ع خير
غسان ومازال مستغرب: وانت بخير وخيي
..................
ليلتها رقد كِنان عند بوي خيري .. جيت طبست ع شق الباب لقيته مرقده في حضنه ويهدرزله ابتسمت وقلت ( تو الصبح يصبح باهي .. خللي يرتاح الليلة غدوا نكلمه )
#Dudu
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
