#مُعــاويــة
:: 33 ::
قعمز مقابلني بعد قعمزت ع الصالون .. حاط ايديه ع ركابه ومش قادر يحط عينه في عيني
لاحظت ارتباكه: عندك كلام بتقولهولي ؟
رفع عيونه فيا: انت عرفت كل شي ؟
قدمتله راسي: قصدك عندك علم وماقلتليش ؟
حذيفة ارتبك: اصبر شويا نفهمك
وقفت وانا متعصب: نوض درق وجهك .. ع اساس انت خوي ورفيقي ادس عليا موضوع زي هذا ؟
وقف حذيفة بخوف: معاوية اسمعني
شديته من ذراعه وقدمت بيه للباب: وجهك معاش نبي نشوفه .. كلكم كلاب كلكم خوانين ولعبتو عليا .. الله لا تربحكم .. وانت ع اساس شيخ وفاهم الدين
حذيفة دفرني: سكر فمك واسمعني
دفيته بالقوة وبصوت عالي : مانبيش نسمع حد درق وجهك وخلوني
كنت عاصر ع كتافه وطلعته برا الشقة وقربعت ع وجهه الباب بالقوة
خبطت بظهري ع الباب معاد فيا حيل .. سندت راسي وكنت مخنوق .. نجبد في رقبة التيشرت ومش قادر نتنفس .. طحت ع الارض وحطيت ايديا ع عيوني وبديت نبكي .. اي والله لو عمري كله نبكي مانوفيه الموقف يللي انحطيت فيه .. مش كذب .. لالا شفت كل شي بعيوني .. يانصابة نصبتي عليا بسلاسة لاني طيب ومشيت معاك بنية صافية .. ضحكتي عليا .. قبضت ايدي وخبطت ع صدري بالقوة وبديت نشهق بالكلمة ( ضحكتي عليا .. ضحكتي عليا )
لميت شتات نفسي ووقفت بصعوبة .. كنت نهد ركبة بركبة وصلت للدار فتحت الدولاب ولوحت اي شي متعلق بيها .. كانت عندي دار مصكرة بحكم انها فاضية وع اساس بنعمرها لولدي .. مش ولدك يامعاوية .. هادي خاينة .. خديت كل شي وحذفته في الدار .. سكرت الدار بالقوة وانهرت .. حالة الانهيار يللي انا فيها توصل للموت .. لولا قوة الايمان كنت ذبحت روحي ذبح وخليت دمي ينزف نستاهل نتعذب لاني مضحكة .. لولا قوة الايمان كنت مزقت روحي تمزيق ولا نخليك تعلّمي عليا يابنت مسعود .. حطيت ايديا ع عيوني .. وينك ياأمي ؟
وبديت نعيط باعلا صوت : ياكسرتي في اماليا .. ياكسرتي فيك ياأمي .. نوضي حني عليا نوضيلي ماتخلينيش بروحي .. حتى اللي كنت معتبرهم خوت طلعو ذياب ياأمي .. علاش كلكم مشيتو وخليتوني علاش ماموتش معاكم ( بديت نخبط ع صدري ) يارب نلحقكم ونرتاح يارب
حطيت راسي ع ركابي وغميته بايديا .. كرهتك يادنيا .. الطيب ديما تلعبي بيه
.................
فقت ع اذان الظهر العالي صوته .. سندت روحي بالشويا .. وقفت دوشت وكنت متمني لو المية تغير حالي ووضعي .. كنت متمني القطرات اللي تنزل بسرعة تتسابق ع وصولها لكتافي وراسي تنسيني اوجاعي .. توضيت والوضاء طهارة للبشرية ويلي زي رغد لو المية تقعد محاديتها مستحيل تكون طاهرة .. اول ماكبرت للصلاة .. كبرت بصوت عالي
( الله اكبر .. الله اكبر )
شعوري في الصلاة شعور المحتاج .. الضعيف .. المكسور ومامن يجبره غيرك يااالله .. داويني .. عافيني .. انت سندي الوحيد .. يارب كون معاي وهوّنها عليا .. بدال مانكره الصلاة لظرف انحطيت فيه يعتبر بلاء او امتحان من الله بالعكس زدت تعلقت بيها .. تعمقت في دعواتي ويامجيب أجبهم
تلوحت ع سريري بنرقد ونهرب من واقع مهين .. بس شميت ريحتها العافنة .. ريحة الخيانة .. قعمزت مسحت ع وجهي وطلعت من الدار .. تلوحت ع الصالون وبديت نسبح لعل وعسى ننساها .. نرحم عقلي من التفكير فيها
رن تليفوني وكان المتصل غسان يطمن عليا
غسان: غلط يامعاوية اللي قاعد ادير فيه ره
بصعوبة وثقل لسان: قالك المريض ع كل شي ولاه ؟
نفي غسان: لا والله .. بس قاللي انك رفعتها لاماليها
سندت روحي وقعمزت كويس: اركبلي نبيك
ماهيا الا خمس دقائق وكان غسان جنبي ع الصالون
غسان: والله غير صيام راني عرفت كيف نكلمك
ابتسمت بهزوة: انكسرت بيا ياغسان
تنهد : احكيلي ياصاحبي
شبحتله بوجع: حذيفة ورغد
انصدم غسان: شنو ؟ ( وقف ) شن تقول انت ؟
زفرت بضيق: بالله قعمزلي وريحي روحك .. مش زي مافكرت .. الزوز خانوني بطريقة مختلفة
قعمزت وتنهد براحة: خلعتني ياراجل ( شبحلي )شن في ؟
تنهدت : ريت الكلب اللي اسمه صلاح ؟
هز راسه بالايجاب: اي خيره ؟
غمضت عيوني استصعبت الكلمة: خلاص فوت
غسان بانتباه: تي تكلم خيرك ؟
شبحتله: بوي وين ؟
غسان: لوطة خليته راقد
وقفت نفضت حوايجي: انزل نقعدو معاه
غسان: مش كنت موجوع وتبي تفضفضلي ؟
شديته من ذراعه وقفته: نوض مش وقته توا
وقف وقعد يصفق في ايديه: والله ماك طبيعي فيك حاجة
نزلنا لوطة واول مافتحت الباب استقبلني بوي جاني وبصوت حنون: معاوية ولدي وينك عليا ؟
فتحلي ايديه .. زي الطفل بالزبط اللي فاقد عصفوره .. مشيت نجري وتغمرته .. اجهشت بالبكاء .. ماقدرتش نتحكم في نفسي كان يطبطب عليا وكأن حاس بيا موجوع حاس بيا مضايق ومخنوق .. اللي كابرت وحبسته في وجود غسان انهرت هنا وتوا ..
غسان: خلاص معاوية مافهمتش خيرك ؟
سندت ظهري ومسحت دموعي: ولا حاجة مخنوق بس
بوي: قعمز ياولدي قعمز .. اميمتك ماتت ؟
في داخلي ( اي امي ماتت واليوم جدد عزاها وعزيني يابوي )
قعمزت ع الصالون وقعمز بوي وبدي يتلو في آيات من كتاب الله .. كنت مستمع بانتباه وجسمي يرجف .. وقلبي نبضه متلخبط بين ضعف وقوة .. سندت راسي ع الصالون ومعاش حسيت الا بالنوم واخدني لعالمه الخيالي
( معاوية انا نحبك انت .. حياتي ليك .. كلي ليك .. هذا ولدك يامعاوية .. هذا كِنان )
فزعت من نومي لقيت الدنيا عصر .. مسحت ع وجهي ورددت الاستغفار ع لساني .. مانبيش ندكرها نبي ننساها ياالله
..................
في الليل ركبت لشقتي مانبيش نتلاقى مع حذيفة رغم اصرار غسان نقعد ونتحاور معاه .. نبي نقعد بروحي ونفكر لحل لمصيبتي
المتصل ( هنادي )
سكرت الخط وقلبت التليفون .. مش ناوية تخليني .. خربتي بيتي شن مازال تبي ؟
المتصل ( رغد )
مسكينة انتي .. متوقعة مني نرد عليك .. ضحكت ع جنب ( والله لما نطلعها من عينك ) قلتها بصوت واضح ومش خايف لو طيفها سمعني
..............
مرّ ع الموضوع يومين ::
وانا مازلت ع نفس الحال وممكن اسوء .. في هاليومين زارني طارق وأعلمته اني تعبان ومريض وصعب نشتغل في الصيام فقرر ياخد عليا الشغل .. غسان يركبلي في فطوري ويزورني كل ساعة وتانية في محاولة يهديني ويفهم مني بس كل محاولاته بائت بالفشل .. رغد كترة اتصالاتها تزيد تعبي قلبي منها ويسوّد اكثر وماراعيتها في حملها من نفسية وهرمونات .. نتهرب من اي شي يذكرني بيها .. حاضن نفسي ونحاول نهديها وهذا اقصى اهدافي ..
طق الباب ع موعد السحور في بالي انه غسان جاي يطمن عليا وجايبلي سحوري .. بس سمعت صوته تلفتله
بصوت حاد ومغلول: شن جاي تبي ؟
حذيفة سكر باب الشقة وقدم عليا: انا مسافر دورة في السعودية بعد العيد
بعدم مبالاة: تسافر حتى لجهنم الحمراء شن دخلي ؟
تنهد بوجع: يعني مازال مضايق مني ؟ ( رفع عيونه فيا ) راك فاهم غلط يامعاوية
قعمزت ع الصالون وطلعت سيجارة وولاعة بنولع .. جاني يجري فكهم مني: معاوية خشيت ع الدخان ؟
عيوني شرار: مادخلكش فيا نخش حتى ع الشرب
لوحهم ع طول ايده تحت رجليا: ماتوقعتكش ضعيف
وقفت وشبحتله بنظرة حادة: عادي ضعيف مش خاين .. مهبول اي ( أشرت بايديا ع راسي ) ومريض نفسي المهم مش خاين ( خبطت ع صدري ) اعتبرتك خوي تربينا مع بعض الزفت تي علاش ادير هكي علاش ؟
غمض عيونه بوجع وبلع ريقه بصعوبة: انت والله ماك فاهم حاجة ( حط ايديه ع كتافي دفرته ) اسمعني باه
قعمزت بقوة ع الصالون: شن عندك ماتبرر ؟ .. معيشني مع وحدة فاسدة بنت شوارع
بالقوة حط ايده ع فمي: سكر فمك اسكت معاوية
دفيته: علاش خونتني ؟ علاش دسيت عليا ياحذيفة انت الوحيد وثقت فيك وقلتلك أسأللي عليها كنت عارف علاش ماتقولش ؟ برايك بعد نجيب منها عرم صغار وقتها بتقوللي ؟ ( وقفت وضربته ع صدره ) ترضاها لروحك ترضاها ؟
حذيفة متألم قعمز وشبحلي بتوسل: اهدا واسمعني تربح
تمالكت نفسي وضغطت ع كف ايدي : ماعاد فيها هداوة بعد اللي شفته منك ياشيخ ياسيد العارفين .. يللي كلامك قال الله وقال الرسول
لفت وجهه للجيهة الثانية بألم
وانا استرسلت: الدين كنت واخده تستر ولا واثقين فيك هلبا لدرجة باعتينك دورة في السعودية انت خونت خوك ماتخونش بلاد ؟ ..( نخبط ع صدري بالقوة وبوجع ونار تحرق داخلي ماانطفت ) كسرتني .. كسرتني ياحذيفة الله لا تربحك
تنهد ووقف: انت غلطك مالاول ماسألتش عليها يامعاوية وبعد البنت تزوجاتك وحملت تبيني نخربلك بيتك ونقولك كانت ع علاقة قديمة بخو مرت خوها ؟ .. البنت في وقتها كانت صغيرة وطايشة ومش عارفة مصلحتها اكيد .. ( صوته يرجف ) انا مش عارفة شن تبريراتها لموقفها هدا ولا عارف علاش تصرفت هكي وخدعاتك ؟ .. بس يامعاوية ماتتسماش خديعة هادي ولا تتسمى خيانة .. لانها مسيباته من قبل ماتعرفك بهلبا
شبحتله وضغطت ع سنوني: لعلمك بوها اللي طلبني لبنته مش العكس
حذيفة تفاجأ: برضو مايهمش .. اسمع منها يامعاوية بالله عليك ماتظلمها
شبحتله بغل: والصور والفيديوات والتسجيلات كله كذب يعني اللي بتقوله هذا بس الحق ؟
تنهد حذيفة: مانعرفش شن شفت بالزبط ومانلومكش .. بس قلتلك لما سألت عليها قالولي هكي وقالو انها
سكت ..
شبحتله ووقفت مقابله: كمل انها شنو ؟
مسح ع وجهه واستصعب الكلام: كانت تطلع معاه
خبطت ع وجهي ومسحت ع شعري بالقوة وبديت نلف في مكاني
قرب مني وحط ايده بلطف: معاوية بالله عليك تصرف بعقل .. البنت بوها ميت وخوتها ماينشد بيهم الظهر لمن تبيها تقعد وكيف بتربي ولدك معاهم ؟
دفيتله ايده وقعمزت ع الارض
قعمز ع ركابه وطبس عليا: مانبيكش تتصرف تصرف تندم عليه عمرك كله .. ولو طلقتها صدقني ح يرجع يخطبها هداكا المريض وح يجبروها خوتها تتزوجه
شبحتله وكان خاطري نقتله: وتتزوجه شن تبيني ندير ؟
تنهد: معاوية .. خليك حقاني وبينك وبين نفسك البنت غلطت معاك ؟ قصرت معاك ؟ ماتحاسبهاش ع غلط صار في الماضي .. راهي عاشت لا في من ينصحها ولا من يفهمها
شبحتله متخدر من هول مانسمع: ودسكة السحر ؟ ونساوين خوتها الواعرات ؟ وتبطيل القراية ؟ وهنادي اللي حاسدتها ع ماخدتها ليا ؟ وع بوها المسكين المريض واللي خايف عليها من بعده ! ( قبضت ايدي وبديت نخبط في الحيط ) خودها يامعاوية استر عليها يامعاوية اتزبك فيها يامعاوية ( بديت نخبط ع وجهي ) ماك عيّل ومضحكة .. كيف بو يعرض بنته كيف ؟؟
شدني من كتافي: ماكنتش نبي نخربها عليك والله كان قصدي شريف .. انت ماسألتش نفسك علاش طلعو في حياتك يللي خربو بينك وبينها ؟ وتوا بعد حملت وقريب حتى يجيك ولدك ؟
نحرك في راسي يمين يسار: مايهمنيش .. مايهمنيش
غمض عيونه وابتسم: سلم وخيي اهدا واوزنها بالعقل وبالله عليك ماتتهورش
ناض وقف .. وطلع من الشقة بعد قال
( استودعك الله ياخوي )
حصرني في افكاري .. ضغطت ع راسي نبي نطلع بنتيجة بس هيهآآت .. وقفت ع المرآية تحت عيوني سواد اسود من الهم يللي انا فيه .. وجهي شاحب مظلم .. ولحيتي اطوالت ..
غابت مواجعي لما نادتني الصلاة ليها .. الصلاة مفتاح كل خير وصدّ للنفس عن كل باطل ..
لبست سوريتي وتوكلت للجامع .. كان قلبي اللي رافعني مش رجليا وصلت لمبتغاي .. وصلت لمرادي وهدفي .. الراحة تحرم من غير الصلاة .. طريقة وصل بين العبد وربه بدون حواجز بدون حجاب .. كبرت للصلاة وانقطعت عن العالم كلياً .. انعزلت تماماً
.......................
غسان: تي شن مازال ع العيد مايجيش هكي يامعاوية
قلبت عيوني: غسان صيام شن جاك تهدرز ؟
غسان: تربح رد المرآ وتهابك انت وياها المهم ماتعقدش هكي راهو مش ح ينحل الموضوع
شبحتله بتركيز وفضول: شن تعرفه الموضوع انت ؟
غسان: وحق ربي مانعرفه حتى حذيفة حلف بالله مايحكيلي .. ومانبيش نعرف غير برا صلّح وضعك الزفت ماتجيش هذا اول عيد
وبعمس يكاد يسمع: واسوء عيد
وقف مقابلني: استغفر ربك .. واغسل وجهك واليوم بعد الفطور روح بيها .. راهو البنت مكسورة بوها متوفي وزدتها انت
تنهدت بوجع: باهي يستر الله
رن تليفوني وكانت ( رغد ) المتصلة
رفع التليفون في وجهي: رد عليها ع خاطري تربح
ابتسمت بتفائل : حاضر
حطلي التليفون في ايدي وابتسم: نتلاقو بعدين
وطلع ..
رفعت التليفون ورديت: ايوا
رغد: معاوية
صوت مكسور .. صوت مجروح من الوجع .. صوتها واضح انها كانت تبكي
تنهدت: شنو؟
رغد: معاوية بالله عليك راك عذبتني .. حرام مقاطعني ومعذبني حرام عليك فهمني بس شن في ؟
رجع الحقد والغل لقلبي: وتي روحك تو نجيك
حسيت من صوتها الفرحة: تمام هي
وسكرت الخط عليها واستجمعت قواي .. وتنفست بقوة كأن نبي ناخد اكثر اكسجين لاني متوقع نفقده لما نشوفها ..
.................
درست السيارة شافتني لقيتها تشوف من شق الباب ضحكت بهزوة وفي داخلي قلت
( متوقع نشوفك هكي متعودة ع المياعة )
جت تجري وحطت شنطتها التالي وركبت وكيف بطبس عليا تسلم بالوجه باعدتها بايديا: خيرك هبلتي في الشارع احني وصيام ؟
ابتسمت: فرحانة واستاحشتك والله
حركت السيارة وطلعت .. كانت طول الطريق تفتح في مواضيع وانا بكلمة وحدة نسكرهم
رغد: جبت معاي مانفطرو .. تعرف نساوين خوتي هالايام لا راعوني حامل لا سو نزلو عليا سحن وترد ماخلوني نرتاح بكل .. ( قامت من قدامها الصونية ) شوف هآ درت سينابون حار وطاجين جبن وخبيرة وخلولي هالطريفات بس الباقي خدوه .. حق معاوية خالتي يومها جتني تنشد وهكي .. المهم قالتلي في محل جيهة @&$&@ يشكرو فيه هلبا شن رايك ترفعني ليه نشري لبسة عيد ؟
فقدت السيطرة ع روحي .. تلاشى الثقل والعقل اختفى وفقدت كل السيطرة وباعلي صوت: تي خلااااص ياااسر سادك تمثيل سادك كذب اسكتي اسكتي .. ماشبعتيش كذب ؟ .. احقر ماشافت عيني اقسم بالله
تعبو عيونها بالدموع .. وانا بديت نخبط ع الدركسيوني وانهرت فعلا .. فقدت السيارة توازنها وبدت تهز بينا يمين يسار لعند درستها في مكان آمن ولعت كل نيران الغضب اللي طفيتها من ساعات ..
رغد بكل ألم: هادي عين وخدتها يامعاوية
شبحتلها بغضب وعيوني بركان خامد: عين شنو ؟ .. هادم فعايلك يا.. ( سكتت ) اللهم أني صايم
ولعت السيارة: اسكتي ولا كلمة .. بعد الفطور عندي معاك كلام
فعلا نفذت ماوصيت وسكتت .. لين وصلنا للحوش ركبت للشقة وانا قعدت لوطة مع الولاد مش طايق وجهها ..
......................
اتصلت بيا هلبا وانا مارديتش .. خليتها تفطر بروحها وانا فطرت مع خوتي .. حذيفة يتعامل معاي عادي بس انا نحاول نتجنبه متحشم من اللي صار ..
وبرا ياوقت وتعالا ياوقت
وجت الساعة يللي لازم نركب فيها بعد صلاة التراويح وكل واحد خش لمكانه بيرتاح والتهى باشغاله ..
طق طق ودرجة درجة وصلت .. فتحت الباب وخشيت .. كانت مقعمزة ع الصالون وقدامها صفرة الفطور كما هي مش ماوكلة شي .. تجاهلت وجودها وقفت ووجهها احمر من البكي .. قربت مني وانا خشيت للكوجينا نشرب في امية
رغد: فهمني علاش تتصرف معاي هكي ؟ شن درتلك انا ؟ وخيره الحوش مقلوب ؟
ابتسمت بمكر: خليه الحوش في حاله تو تجي من تصونه وتقدره
فتحت عيونها ع كبرهم: شن يعني ؟
حطيت الطاسة ع الرخامة وابتسمت: يعني بنتزوج مرآ تصون هالحوش وتصون مولاه ( عليت درجة صوتي شويا ) مش خاينة وتلعب من وراه
شدت ايدي لما كنت طالع من الكوجينا: صبرت عليك هلبا معاوية .. لهنا وبس .. توا ياتفهمني يااطلقني ولو نبات في الشارع ( صوتها كان حاد وقوي ) .. في الشارع اقسم بالله معاد نرجعلك
شبحتلها ورفعت حاجبي: وليك عين تتكلمي معاي ؟
خبطتني ع صدري وبدت تعيط : فهمني .. كلمني مش حمارة انا مانيش كلبة
ضحكت بهزوة: بالشويا عليك ولدك يريح فيها
تعصبت اكتر: ولدي ؟ مش ولدك يعني ؟
رفعت كتافي: لا مش ولدي ( قدمت لراسها وهمست باستفزاز ) ولد صلاح
فتحت عيونها وشهقت: صلاح ؟؟
هزيت راسي: اي صلاح خيرك مستغربة والا تحسابيني مش ح نعرف والا تحسابي روحك بتضحكي عليا بشوية حركات واسلوب داروحني بنت ناس ونعرف الاصول !
شبحتلي مصدومة وعقلها مش مستوعب كمية حقدي عليها
بديت نعيط: تكلمي .. قولي شن تبرري خيانتك ليا .. اقسم بالله لولا الحرام راهو موتك كان ع ايدي
انهارت رغد وطاحت ع ركابها مانعرفش وجع الحمل والا هول الكلام .. شادة بطنها وتبكي من الوجع .. كانت ايدها اليسار ساندة بيها روحها ع الارض واليمين ماسكة اسفل بطنها وتصرخ وجعاً
وقتها استوعبت الموقف واداركته .. جيتها نجري في النهاية هذا عمل خيري ولو كانت بنت تانية في مكانها كنت ح نتصرف نفس التصرف ..
بخوف ودهشة: خيرك رغد شن تحسي ؟
بدت تتأوه وتنين: بنموت يامعاوية
نسيت الموقف ونسيت المشكلة ونسيت كل شي .. انا هنا في وضع لا يحتمل المكابرة والحقد .. ضربني شاهد العقل ورجعت للدار جبتلها عبايتها ووشاحها
وبديت نلبس فيها: ساعديني تربحي
كانت تتحرك بصعوبة : بنمووت
قمتها في غمري وطلعت نجري بيها .. ع وقفة غسان كان يغسل في سيارته يجهز فيها لقرب العيد شاف الوضع
واطى عيونه : تبي نساعدك معاوية ؟
حذفتله المفتاح بطرف صبعي: ولعها وارفعنا لاقرب مصحة بالله عليك
غسان التقط المفتاح: هيا هي
ركبنا وطرنا لاقرب مصحة .. خدوها مني الاسعاف وانا قعدت برا قدام العناية .. غسان واقف بعيد شويا .. لما شاف حالتي قدملي
باطمئنان: ادعيلها بس محتاجة دعائك
ابتسمت مجاملة: يارب عافيها يارب
تأخرت الدكتورة وانا روحي بتطلع .. كل شي نتوقع نديره في يوم من الايام الا القتل .. مساهمة في قتل انسان برئي مانحكيش ع رغد نحكي ع اللي بطنها .. رغد حامل في نهاية الخامس خايف ليصير اجهاض وانا السبب فيه .. وساهمت برضو في قتل رغد لو مهما يكون ذنبها مايوصل للقتل يامعاوية .. خيرك غبي واهوج وعقلك خفيف ؟
خبطت راسي ع عمود وسط مكان الانتظار .. جاني غسان حط ايده ع كتفي وعصره وابتسم يطمن فيا
خوك ضاع ياغسان
استمر وضعي بين مد وجزر لافكاري الواهية وانا نراجي في اي حد يطمني عليها بس
طلعت الدكتورة وجيتها نجري: طمنيني ؟
ابتسمت الدكتورة بس وجهها مايبشرش بخير: صارللها تسمم حمل
شبحلها غسان وشبحلي: شن واكلة مرتك !
الدكتورة ادخلت قبل مانتكلم لاني اساسا كنت جاهل باللي كلاته وعاشاته وانا غايب
الدكتورة: لالا مش قصة وكال .. ارتفاع ضغط الدم ووجع اسفل البطن والدوخة هادي كلها اعراض بس مازال نبو صورة لو تسمح تشوف الاستعالامات ويقولولك اللازم
خديت الورقة منها ورفعت عيوني بخوف: توا شن حالها ؟
ابتسمت الدكتورة : وضعها مستقر اطمن بس لازم لازم راحة
تنهدت: حاضر ( مديت الورقة لغسان ) برا شوف شن يبو
غسان خداها: تم
ومشي .. رجعت للدكتورة بعد فاتت بمسافة مش بعيدة
قربت منها: دكتورة
تلفتت وابتسمت: نعم !
ارتبكت: ااه بنقولك .. نقدر
قاطعتني: اي تقدر تشوفها بس بالله عليك اي ضغط والا توتر راهو مش لصالحها
ابتسمت مجاملة: تمام
رجعت نظرها ليا: ع فكرة انت ماسألتش ع ولدك ؟
غمضت عيوني بألم وقلت في داخلي ( خللي نتاكذ انه ولدي قبل ) بس ابتسمت: اهم شي هيا
ضحكت بحب: ربي يخليكم لبعض
الله لا يخليني لو نخليها تضحك عليا مرة تانية .. توا انقذها الوجع غدوا مش ح تسلك منها
خشيت للغرفة لقيتها راقدة والتغذية في ايدها وجهاز الاكسجين ع فمها .. تنهدت وقعمزت ع كرسي جنبها
لفتت وجهها ليا : معاوية شكرا
ماردتيش عليها
تنهدت وحولت الجهاز: شن قالتلك ع البيبي ؟
تنهدت بقلة صبر: باهي حاله
ابتسمت بفرح: الحمد لله ياربي أكرمتني بصحة وليدي الحمد لله
غضيت شاربي من الغل لين استطعمت الدم
رغد شبحتلي: مش وقته توا .. بس صدقني يامعاوية فاهم غلط
جيت قربت منها وقابض ايدي: شن اللي فاهمه غلط يابنت مسعود .. الصور والا الفيديوات والا الشات بينك وبين حبيب القلب .. احمدي ربي انك حامل ونقدك الوضع الصحي كان هذا راك ميتة من غلي عليك
كانت ترجف خايفة: بس الموضوع قديم .. كنت صغيرة يامعاوية مانعرف شي من الدنيا
رجعت لكرسيا : الغلط واضح .. تركبي وتنزلي معاه وماتعرفيش الشي هذا غلط ؟
دمعو عيونها: وهمني والله رسملي الدنيا وردية
تمالكت اعصابي وضغطت ع سنوني: بعد تجيبي مكانك في حوش اماليك والموضوع سكري امه مش طايق نسمعك
رغد حاولت تقعمز بصعوبة: تمام طلقني .. لكن ماتظلمني بالك تحسابني مازال نقدر نقعد معاك بعد اللي شفته منك .. تي اول مشكلة صارت بعتني انا وولدك
شبحتلها بحدة: مش ولدي
فنصت عيونها: انت احقر ماشافت عيني .. اطلع برا معاوية ( علت صوتها ) اطلع برا
شبحتلها باستفزاز: زيدي علي صوتك ماك متعودة ع العار والفضايح .. عاد طالعة تجري وبلا حجاب وتغمرتي راجل لا تعرفيه لا يعرفك
انصدمت وقت اذكرت موقفها وين طلعت خايفة واصطدمت فيا وانا قي الشارع
كان تلف براسها يمين يسار: والله ماتوقعتك هكي .. طحت من عيني اقسم بالله
جيت قربت منها وشديت حنكها: انتي اللي طحتي ومعاد تحلمي تركبي تاني .. انتي اللي دمرتي حياتي وحياتك .. انتي لعبتي لعبة الوسخة وجاية تبي ادبسيها فيا وتقلبي الطاولة عليا ولا تحلمي ولا تفكري مجرد التفكير ان معاوية مازال يحبك .. جيتك هنا كان فعل خير مش اكتر ( فكيتها بالقوة ) توا نخليك مع احلامك الوردية مع صلاح بعد انطلقك
حطت ايديها ع وجهها وبدت تبكي .. طلعت وقربعت الباب .. وسكرت باب هم انفتح ليه ايام ومعاد تسكر .. رجعت للشقة ودفعت للمصحة دفعة باش يشوفولها علاجها وشن لازمها
.............
غسان: وكيف تخليها بروحها ؟
تنهدت: مش طايقها وخليني ياغسان براحتي
تنهد غسان: تمام تصبح ع خير
خشيت لداري بنرقد .. وصلني مسج
( انا مانبي نضايقك بس وجعتني كيف ضحكت عليك )
#Dudu
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
