مُعــاوية

Part 26

#مُعــاويــة

:: 26 ::

.. وهيا نازلة حست بفقدان توازنها شدت في ايدي
شبحتلها: خيرك ؟
رغد: مانعرفش .. شكلني نضت ع غفلة هذا باش
ابتسمت وشديت ايدها: حتى امس ماكليتي شي والصبح فطرتي طاسة حليب زي القطوس
ضحكت: هذا ماطلع معاك قطوس ؟
وصلت اخر دروج رخيت ايدها: حولي ساد
ضحكت: بتخدش رجولتك كان شافوك شادني
ابتسمت: هي تعالي ياام لسان
ركبنا السيارة وانطلقنا
................
روحت بيها : ناخدلك شاورما والا طابونا ؟
كانت تقلب في اوراقها: اممم خودلي بيتزا نحبها
ايتسمت: من عيوني
وقفت ع مقهى ونزلت خديت بيتزا .. ونراجي فيها قعدت نتأمل فيها في السيارة .. انسانة مكافحة وراقية وبسيطة لابعد حد
خديت البيتزا وركبت: تفضلي هي
خدت الباكو: يسلم ايديك
ضحكت: ع اساس انا اللي درتها ؟
ضحكت عليا: باه صحيت .. نحس في راسي مصدع من المحاضرة
خديت السيارة لاقرب زاوية ودرستها: كولي براحتك هنا
ضحكت: لو تقدر ترفعني للربع الخالي ماعندكش مشكلة
فتحت الباكو وخديت طرف وانا ناكل : المشكلة اني مانعرفاش وين كان هذا راني رفعتك
بدت تاكل: ماحكيتلكش ؟
شبحتلها باستغراب: شنو ؟
رغد تنفست بقوة: ياحنة كنت راكبة للدروج عادي جتني زي الدوخة مرة تانية
ركزت في عيونها: من قلة الماكلة يابنت
رفعت كتافها: وممكن نكون حامل
فتحت عيوني وشبحتلها: كيف حامل ؟
خبطتني ع رجلي: شن كيف عاد !
اربتكت: قصدي كيف عرفتي ؟
ابتسمت: قلتلك ممكن .. خلينا نشوفو دكتورة
ابتسمت وولعت السيارة: توا نمشو نشوفوها توا
ضحكت بصوت عالي: مجنون
راجيت بعيد عن الغرفة بحكم كانو الحوامل والنساء معبيات الممر .. وكل شويا نطبس نشوفها خشت لدورها او طلعت والا شن صار فيها ؟
شويا وشفتها طالعة تجري من الغرفة وسعيدة .. عرفت ان خبر حملها فعلي وبنولي بابا
شدت ايدي ومدتلي الروشيتا: قلتلك حامل ولاه !
ضحكت: بجديات ؟ ( قلبت الروشيتا ) هادي شنو ؟
رغد: هادم فيتامينات .. قالتلي حامل ليك شهر تقريبا وانا مش عارفة ريت ولاه !
عيوني ع الروشيتا: عارفك غبية .. مش المفروض في تحليل ؟
رفعت كتافها: سألتني هلبا وبعدين قالتلي تعالي نديرلك الجهاز نثبت المعلومة وخلاص
رفعت عيوني فيها بامتنان: الحمد لله يارب جبرت خاطرنا
شهقت بالشويا: اسكت اللي يسمعك يقول ليهم سنين متزوجين
ضحكت: عادي اي وقت المهم جبران خاطر اسمه .. هي نروحو نفرحو بوي وخوتي
شدت ذراعي: لا فكني نتحشم
ضحكت: تي شن بيشدوها جرتك وبعدين اتصلي ببوك وقوليله
لفت بعيونها للناس وشبحتلي: احمد ربي قلتها توا كلن قلتها في الحوش راك سمعت ماكتب ربي
حطيت الروشيتا في جيبي : هي بالك خللي نروحو عطلنا
في الطريق كانت تقلب في شيتاتها: باه اسمع كيف نقدر نحضر مع ولدي ؟
ضحكت: طول ولدي ؟
رغد: هي بلا برادة كيف بنحضر ؟
ابتسمت: عادي نديرو راي
رغد خبطت جبهتها: اسمع حق قالتلي ديري تحليل كامل واشبح شنو شفت الروشيتا قريتها وفي ورقة تانية معاها ؟
هزيت راسي: تو تكلمي في دكتور معاوية ؟
قلبت عيونها: مبردك .. المهم شوف شن تبي خللي نديرو .. اااخ يامعاوية بنولي ماما
ضحكت: الله نحسابك بتولي بابا
فنصت عيونها: معااااوية !
ضحكت وطبطبت ع رجلها: خلاص اسف ( شوفتلها بحب ) اهم شي يارغودتي توا تحافظي ع روحك تمام ! مش تقعدي تلهدي يمين يسار تقول فرس وبعدين تقولي ها تعبانة ووه عيانة وو بنموت وو بنجيب
خبطتني ع رجلي: ياسر وانت توهوه
ضحكت: كلب قالولك .. شن قريتي كويس ؟
رغد: يعني .. الدكتور مستفز هلبا وأسئلته صعبة طبعا
شبحتلها: شن عرفك ؟
رغد ضحكت: تي ماهو المادة معاودتها
ابتسمت: هذا كله من العمل يللي مدايرينهولك .. كان هذا راك متفوقة ومكملة
شبحتلي باستغراب: عمل ! .. عمل شنو ؟
تنهدت: نبي نعرف بس علاش الانسان مايذكرش ربي لما يشوف شي يعجبه ؟ .. وبعدين معقولة درجة الحسد توصل بيهم لين يسحروك ؟
شدت ايدي وشبحتلي بتركيز: سحر شنو ؟ .. من قالك مسحورة انا ؟
عيوني توسعو وقريب درت حادث: تي شن من قالك ؟ .. سر هوا ؟
رغد: لا مش سر لانه اساسا مش موجود لا سحر لا عين ولا هم يحزنون
درست السيارة وتلفتلها: شن قصدك ؟
رغد رفعت كتافها: قصدي مش مسحورة انا ولا في منها الدوة شن شن قصدك ؟
شديت ايدها بقوة: كيف ؟ والشيخ اللي جابهولك حذيفة ؟
ضحكت بهزوة: دسكة من خوتي طبعا
عقدت حواجبي: وضحيلي !
رغد تنهدت: انا مش مسحورة .. انا مظلومة وانظلمت هلبا في حياتي .. قصة طويلة يامعاوية
مسحت ع وجهي: لو مش حابة تحكيلي مش ضروري
ضمت شاربها: اي تو يجي يوم ونحكيلك
تنهدت: براحتك .. بس بنطلب منك طلب
رغد ابتسمت: عيوني ليك
ابتسمتلها: ماتكدبيش عليا بكل
هزت راسها وشدت ايدي بحنان: حاضر من هادي قبل هادي ( أشرت ع عيونها ) نحبك انا
ابتسمت: انا اكتر والله
ضحكت ووجهت عيونها للطريق ببلاهة .. وحاس بيها سارحة وتفكر هل تصارحني او ادس عليا مشاكلهم العائلية اللي ماخصنيش فيها ؟
...............
نتأمل فيها راقدة من شدة التعب او ارهاق الحمل الله اعلم .. ابتسمت وخشيت للمطبخ بندير قهوتي وبننزل للولاد .. حطيت البكرج ع النار وفتحت روشن المطبخ كان مطّل ع الجنان سمعت صوت غريب ودوشة .. طفيت النار ونزلت نجري
غسان: تي اطلع درق وجهك
غسان متعصب وحذيفة شاده يهدي فيه بينما الهادي وبنته واقفين بعاد ع عتبة الباب الخارجي
جيته: انت خيرك جايه مش قلنالك مايبيكش ؟
دفني بايده: اسكت انت ( قرب منه ) انا ماحطيتك في الدار هما باعوك
دفه غسان بالقوة شده حذيفة: تي عيب ياراجل اهدا
غسان: اطلع برا .. قولوله يطلع برااا
شديت الهادي من ذراعه: لو سمحت اطلع حتى ع خاطر بنتك شوفها
تلفت لبنته يللي كانت غارقة في دموعها : calm down
جاته تجري وتغمراته: let's go back .. please
( لنعود .. ارجوك )
تغمرها ونزل لمستواها: He's Gassan .. your brother my dear
( هذا غسان .. أخاك عزيزتي )
نفت براسها : I don't have brothers.. Dad please .. I want Mamy
( لا أملك اخوة .. بابا ارجوك اريد ماما )
مسح ع راسها ووقف شبحلنا: ارجوكم ساعدوني .. بنتي خافت وتبي امها
رفع راسه غسان: فيلم هذا كله .. اطلع برا
حذيفة: اسكت ياراجل خللي نفهمو
الهادي: انا مريض بالوباء الكبدي ايامي محدودة بنتي هادي لو نرجعها لامها بتكون ملحدة اكيد او بضيع مني
غسان بهزوة: لاش جايبها ؟ .. مادامك مش راجل علاش تجيب صغار وترميهم في الايام السود .. زي انا زي هيا علاش ؟
حذيفة عصر ع ذراع غسان: اهدا بالله عليك
غسان دفر ايده وجي قدم من بوه: توا لما بتموت تفكرتنا ؟ .. تفكرت بنتك يللي بضيع منك وولدك يللي لوحته وماتندري عليه كيف عاش ووقف ع رجليه ؟ ( تلفت لبوي يللي كان يشبح والدمعة في عينه ومش فاهم شن اللي صاير ) هذا بوي ريته ولاه .. خيري الراجل هذا بوي انا اما انت وبنتك ولا تعنولي ورد بالك تفكر تولي هنا
الهادي: قد ماتطلب فلوس انا عندي
ضحك بهزوة غسان: فلوس شنو ؟ .. تي انت لو توهبني حياتك كلها ماتخلصنيش
حذيفة تنهد: غسان !
شبحله غسان بحرقة: تي ياسر غسان غسان غسان اسكت .. هذا انت ياحذيفة طيب تحساب الناس كلها هكي جايبلي الصايع افندي للحوش وتبيني نسامحه ؟ والله لو يموت ماح نسامحه الله
حذيفة: اهدا سلم وخيي ومعاش تحلف بس
كنت واقف ومتابع بصمت .. الهادي معاه حق هرب ببنته وخاف عليها من الكفر .. ع سيرة الكفر هل هو مسلم .. اي نعرف الهوية مسلم لكن هل دينه صحيح ؟ .. وغسان برضو معاه حق منين لمنين جاي يقول بوه ولو كان معاه مايثبت شن يثبت انه فعلا مظلوم من قواعد اسرته زمان وهروبه كان ع جهل بخلق غسان في رحم امه ؟
غسان خش للحوش يجري ولحقته ع طول .. جبد موس ( بو خوصة ) وطلع يجري
شحيته من تيشرته: تي شن قاعد ادير هكي هبلت ؟
يفك في روحه مني: حول والا قسما بالله نرشق روحي وترتاحو مني
شاده من كتافه: وراس وخيي اهدا بالله عليك
طلع يجري وماقدرتش نصده .. حذيفة وين شافه جاه يجري: معاوية تي شده ياراجل
البنت كانت في حالة هلع ودموع والهادي واقف صامد وماتحركش .. اول ماقرب منه غسان
الهادي بصوت ثابت: موتي وحياتي وحدة
زاد غل وحقد غسان عليه كان شاد الموس بتعصب قوي وايديه يرجفو ..
تكلمت بهدوء: غسان صلي ع النبي
ماردش عليا وكان يشبح لبوه بحرقة وفالت عيونه فيه .. ومش قادر يحكم تصرفاته ..
حذيفة: غسان هات ّاللي في ايدك تربح
غسان كان جامد كلياً.. قارن حواجبه .. وعيونه مع عيون بوه تلاقو والشرار وسطهم ..
الهادي: بتقتل بوك ؟
غسان ضحك بهزوة: زي ماانت قتلت امي وقتلتني
الهادي: اسمعني واحكم عليا
تكلمت: اسمعه ياغسان شويا اعطيه فرصة يبرر موقفه معاك
غسان: مانبيش نسمعه يطلع برا اللي بيني وبينك مات من اول ماجيت ع الدنيا .. مات قبل مايولد اصلا فلهذا احترم شيبتك واطلع
حذيفة : وسع بالك ياغسان مش هكي ره
غسان رفع الموس في وجهه: انت تسكر فمك .. من تحت راسك هذا جي هنا .. شن دخلك فيا نطيع بوي والا ندفنه انت شن دخلك ؟ علاش تخشش في روحك في مواضيع مش ليك ؟ هادي كلها شياخة ودين ؟
حذيفة: احترم نفسك غسان .. وبعدين من قالك انا اللي جبته هنا ؟
غسان شبحله بنظرة قاسية: جبته ولاه ؟ .. خلاص اطلع منها
بوي بهدوء تكلم: ياشباب اهدو شويا مش معقولة هكي
جي حذيفة بحدا بوي وهوا قارن حواجبه: تعالا معاي الداخل يابوي
غسان شبح لبوه: خود بنتك وتوكل انا مستحيل نعترف بيك
الهادي شد في كتفه بنته وابتسملها: let's go
طلع من الباب وسكره .. غسان لوح الموس وطاح ع ركابه يبكي .. اي يبكي ..
نزلت لمستواه وطبطبت ع كتفه : تعوذ من الشطان كل شي وليه حل
دفرني بايده: خليني بروحي
تنهدت وقعمزت ع الارض: وقت نهال رفضاتك خلينك براحتك اليوم لا مستحيل نخليك
شبحلي وعيونه حمر والدموع حارقات خدوده: علاش يصير معاي هكي ؟ .. لا في قرايتي نجحت ولا قدرت ناخد اللي نحبها ولا قدرت نعيش مع بوي وامي مرتاح ومتهني ؟
عصرت ع كتفه: ماتقولش هكي احني معاك
شبحلي والخيبة في عيونه: حتى انتم بتسيبوني .. يجي يوم وتخلوني بروحي انا ماخليتش لروحي حاجة باهية تحبوني بيها
طبطبت ع كتفه: ياراجل مش هكي الكلام .. اهدا توا ونوض صلي ركعتين العشاء قريب يأذن وادعي لربي يهدي سرك ياغالي
مسح دموعه: تمام .. خليني توا
قعمز وربع رجليه وحط ايديه ع راسه بوجع ويأن ..
بوست ع راسه: ربي يهدي سرك
ونوضت ركبت لرغد .. لقيتها مدايرة نسكافي ومقعمزة تشرب فيه ..
قعمزت مقابلها: امتى نضتي ؟
رغد: توا مالياش هلبا
مددت ايديا: تعرفي نحس في روحي تاعب لين خلاص
ابتسمت: عندك الحق .. عاد الحرب العالمية كانت لوطة
شبحتلها باستغراب: علاش سمعتي شي انتي ؟
حطت النسكافي: اي سمعت .. مش حالة هادي يامعاوية ره
استغربت: مافهمتش ؟
رغد: غسان هلبا عصبي وصوته يسمع الجيران البعيد قبل القريب وانا بصراحة بديت نخاف من وضع زي هذا يتربى عليه ولدي
عدلت تقعميزتي وقدمت راسي: فهميني بالشويا .. ترا كيف الوضع هذا ؟
رغد شربت شويا من النسكافي: ماتفهمنيش غلط .. انا مش حابة نخوض معاك في نقاش من الصح ومن الغالط .. لكن عياط وتقربيع هذا مايناسبش البيئة للي نبي ولدي يعيش فيها
وقفت مذهول: والله !
رغد: اي والله .. انا لما تزوجتك اول شي فرحني انك يتيم وماعندك حد .. يعني ولائك بعد الله طبعا ليا انا وصغاري
شبحتلها مصدوم: خيرك تتكلمي هكي ؟
وقفت بحذر ووسعت عيونها فيا: بعد ماسمعت بالحمل المفروض تكون اكتر حزم ومسؤولية لان غدوا بيكون عندك ولد وبيطبع بطباعهم العوجة
فنصت عيوني وقربتلها: طباعهم العوجة ؟ توا ولالك غسان وحذيفة عوج ؟ وين كلامك خوتي ونخدمك بعيوني ووو .. شن ماكنتيش متوقعة روحك تحملي ؟ والا اللي واخدتيه مش راجل ؟
عقدت حواجبها: لا طبعا .. لكن هذا اول مرة نشوف هكي
عليت صوتي: لا احني ديما هكي عياط وتقربيع وبعدين شن ماعندك حد هادي من اول يوم شفتك فيه شرطت عليك بوي وخوتي
فنصت عيونها فيا اكتر: بس هادم مش بوك ولا هادم خوتك يامعاوية .. تكدب ع روحك بس ماتقدرش تكدب عليا
شديتها من ذراعها بقوة: مادامك تبي واحد بروحه خديتيه من الدار شن تلحقي فيا من مكان لمكان ؟
شهقت: انا نلحق فيك من مكان لمكان ؟
عيطت عليها: اي وبوك ماخلّى مادار باش نرضى بيك ياهانم يللي توا ماتبيش بوي وخوتي وشايفتيهم عالة عليك .. هذا من اول شهر وتلونتي .. يللي قبل كنت نشوفك بنت اصول مافيش زيك
عيونها تعبو دموع وصوتها جفل : مصدومة فيك انا
قرنت حواجبي : مش اكتر من صدمتي .. اسمعي يابنت الناس ( رفعت السبابة في وجهها ) هدا بوي وهادم خوتي .. عجبك باهي ماعجبكش حوش بوك يلمك
شهقت فيا: معاوية ؟
حطيت ايديا وتنهدت: هذا اخر كلام عندي وكانك ع الولد لو تبيه معاك خوديه سيوره يكبر ويجيني ولو ماتبيش تتحملي مسؤوليته والا بالك بيئة اماليك معفنة ف يتربى عندي انا نعرف كيف نطلعه راجل زي ماطلعت انا
حطت ايديها ع فمها والدموع سيل ع خدها
خديت مفاتيحي وبنطلع علت صوتها
رغد: معاوية .. ياأنا ياهما يامعاوية تسمع فيا ؟
شبحتلها وضحكت بهزوة: هما هما اطمني .. واصلا نازلهم توا واقعدي فيها
طاحت من طولها وبدت تبكي .. خليتها ونزلت للولاد .. غسان مش في الحوش وحذيفة مرقد بوي ولقيته يصلي في العشي لانه مالحقش ع الجامع
قعمزت نراجي فيه يكمل
حذيفة: خيره اصواتكم عالية ؟
حطيت راسي لوطة: موضوع فوتها توا .. غسان وين ؟
حذيفة يطبق في السجادة: شكله طلع
تنهدت: حذيفة بنقولك

#Dudu