#مُعــاويــة
:: 19 ::
وقعمز جنبنا عبد الكريم صاحب بوي وبدي الشيخ يقول
إن الحمد لله نحمده ونستعينه ونستغفره، ونعوذ بالله من شرور أنفسنا ومن سيئات أعمالنا، من يهده الله فلا مضل له ومن يضلل فلا هادي له، وأشهد أن لا إله إلا الله وحده لا شريك له، وأشهد أن محمدًا عبدالله ورسوله
تلفت لوكيلها بوها: قل زوّجتك إبنتي رغد مسعود &@& ع سنة الله ورسوله وع مهر مقداره ربع دينار ليبي
تكلم بصوت واضح وبكامل حشمة: زوّجتك ابنتي رغد مسعود &@&
بعدين تلفتلي وقاللي : قل قبلت الزواج
ابتسمت وبصوتي رعشة غير العادة بلعت ريقي بصعوبة : قبلت الزواج
تلفت الشيخ : أين الشهود ؟
عطاهم الملف يوقعو وكان الشهود خوتها الزوز وخوتي الزوز
وكنت متوتر ومازلت مش مستوعب انه فاتحتي وعقد قراني تم بفضل الله والناس يللي حواليا .. سلم عليا الشيخ وباركلي وسلم ع الشهود وبوها .. جاني غسان : نوض سلم ع نسيبك وباركله
همستله: شن باركله ماباركله هوا المفروض يباركلي ولاه ؟
نخصني ع جنبي: عريس حمار
وطلع يحوس مع باقي الشباب ووزعو ع كل الحاضرين الضيافة .. نضت وقفت وبدو يجو يباركولي من كل حدب وصوب ..
مدلي طارق طاسة روزاطة : هاك برد ع قلبك من امبكري نشوف فيك ترعش
ضحكت: تو نشوفوك ( شربتها دفعة وحدة ) بنته مليحة
ضحك: انت قرطعتها تقول حليب
وقفو باردين الوجه والملامح الجافة مروان وخوه رضوان
مروان: مبارك عليك
ابتسمت: يبارك فيك يارب
رضوان: مبارك
سلمت عليه بس ضغط ع ايدي: تمام
طلعت هالكلمة عفويا نتيجة ضغط وارتباك .. شبحلي شبحة حقد وطلع
ادارك الموقف عمي مسعود مد ايده سلم عليا: مبارك عليك ياولدي .. ماتحطش في بالك هادم من يومهم وجوه بومة
ضحكت: لالا ماادور شي .. بارك الله فيك
وجاني بعده الشيخ سلم عليا: مبارك ياولدي .. انا نعرف الحاج خيري من زمان ماتوقعتش نشوفه بهالحالة
ابتسمت وسلمت عليه: الحمد لله ع كل حال
ابتسم وسلم عليا: ربي يعين ياولدي وزواجة الدهر يارب .. فوّت يومين تلاتة وتعالا خود عقد الزواج بعد يتصدق في المحكمة
ابتسمت : تمام باذن الله بارك الله فيك
ابتسم الشيخ: خير الحاج خيري مغرقنا كلنا ياولدي وهادي أقل حاجة انديرها ( مدلي ظرف ) هادم فلوسك وربي يهنيك
خديت الظرف قلبته وكيف بنردهوله ونحلفله لقيته طالع من الجامع ..
مديت الظرف لحذيفة : خود خليه معاك
حذيفة : تمام
عمي عبد الكريم جي وقف بحداي وسلم : مبارك عليك وربي يهنيك ويسعدك يامعاوية تستاهل كل خير
ابتسمت: بارك الله فيك عقبال ولادك يارب
مدلي ظرف: هذا برا خود بيه هدية للعروسة
رديته عليه: لا والله ..
قطع عليا: ماتحلفش اسكت .. ( ضغط بالظرف ع ايدي ) برا خودلها حتى خاتم دهب هدية والا حديدة هدية الفاتحة
ابتسمت: بارك الله فيك ( حطيته في جيبي ) نردهولك في الافراح
طبطب ع كتفي: ربي يهنيك يارب
وطلع .. وطلعو كل المعزومين قعدو الشباب في سياراتهم يراجو فيا .. شطب حذيفة الجامع وركب في سيارته
استغربت بوي مش معاه اتصلت بيه : حذيفة وين بوي ؟
حذيفة: عمي عبد الكريم روح بيه معاي مسكين لقاه متكي في الجامع خداه النوم
اضايقت: وانتم وين عليه ؟
حذيفة: اظني خليته معاه ياعريس
تذكرت لما كان مقعمز معاي وانا من ارتباكي خليته واقف جنبي يسلم ع المعازيم بعدين انسبهت عليه
انا: تمام امتى نروحو بيه ؟
حذيفة: عمي قال خللي يقعد كملو حوسة العرس نجيبه معاي ونروح بيه معاي انتم توا مش لاهيين بيه
انا: وحوايجه ؟
حذيفة: واااك يامعاوية واضحة يعني بنرفعوله حوايجه الهى في روحك توا
انا: نلهى في روحي وننسى بوي ؟
حذيفة: بتخليني نسب شكلك .. والله بنرفعوله حوايجه اطمن بس
ابتسمت: تمام هي اطلعو انا وراكم
حذيفة: اطلع طول بعد غسان انت
انا: تمام هي
ولعت سيارتي وطلعت والكل طلعو وراي وبدي فيها كلاكس وهياجة لين وصلنا للاستراحة
..............
بدلت حوايجي ولبست توتة عادية وبدو الشباب يدربكو ويغنو بحكم حذيفة مايسمعش في الاغاني ولا مقتنع بالفرقك الفنية يللي يجيبو فيهت الشباب .. مش حاب نكسر بخاطره اولاً وثانياً نبتعدو ع الحرام بقدر المستطاع لا نوبة ولا فرقة بسس اغانينا ومطربنا المفضل غسانو .. ع سيرة غسان حسيت بيه يبي يلهي نفسه في اي شي وكل شي ماريتاش مقعمز يايهيج يايعوّل .. هل فاقد نهال والا نساها ؟
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
