#مُعــاويــة
:: 30 ::
شبحت فوق: انت متاكد من القيمة ؟
شبحلي بعبط: تو مش قلتلك هكي كاتبلي في الورقة ؟
تنهدت: غدوا نمشو وين مانعتك ونتأكدو وبعدين نقولك شن يصير
يلعب بالمية برجله: والله نفكر ندير مدرسة خاصة بالايتام شن رايك ؟
شبحتله: مهتم هلبا بالايتام حسيتك
ضحك: ماهو انا منهم .. حتى من شهرين لغو لقب اليتيم مني بس توا رجعلي بقوة
حطيت ايدي ع كتفه وضغطت عليه: كلامنا غدوا ان شا الله
ابتسم: ان شا الله خير
..................
مقعمزين في الصالة بعد الفطور لما حذيفة قال:
بنصلي بيهم باقي التراويح هكي الشيخ قاللي
غسان: الله يبارك عليك ياولد وين ماتحل تنزل البركة ويحبوك الناس
ضحك حذيفة وقعد يستفز في غسان ويعدل في تيشرته: تي منظم وراقي ومؤدب اكيد بيحبوني
حذفه بالمخدة: خلاص قطعتنا
حذيفة شد المخدة وضحك: اي وهذا هوا شن رايكم ؟
حولت الكاميرا ع جنب: والله ياخوي وين ماخاطرك تشوف روحك توكل ع الله
ابتسم حذيفة ووقف فتح الروشن: انا نتخايل في روحي إمام في الحرم
غسان: وسعت منك
ضحكت : لا عادي اللي عند الله مش بعيد ياغسان
حذيفة: اي ونعم بالله
حذيفة انسان طموح .. لاهي في نفسه بس مايهماش اي شي طالما الله راضي عنه باذن الله .. ابتسمت وأسريت دعوة ليه ( ربي يوفقك ويباركلك في سعيك ياخوي )
أما غسان ف كان فاقد الشغف في كل شي .. تقدرو تقولو عايش ومش عايش يبي الدنيا تزهاله ومايبيش يسعى .. قد اي يكون موضوع بوه ونهال أربكله حياته وزاد حطمه خصوصا كان مغّتر بجماله وماله مش بالشكل الواضح لكن ماكانش متوقع موضوع اليتم يحطمله أماله وبرضو .. أسريت دعوة ليه ( ربي يوفقه ويهديه ويصلح رايه )
حالة رغد ليست ببعيدة عن غسان ديما متحطمة وراكبينها هواجس من الحياة .. خوتها .. نساوينهم .. وبوها ديما في بالها واطبق في قوانين مهزوزة باش حياتها تستمر وماترجعش لحياتها الاولى .. تخاف من فقداني وفي ذات الوقت توضح انها مش خايفة من شي في الدنيا اصلا .. تبي تكون مسيطرة عليا بطريقة عنيفة .. بس وقت ينهز كيانها وشخصيتها من صوتي وكلامي الموجع تتراجع وتعتذر ع اللي صار وانها لاغنى عني .. شي مؤسف قاعد يصير في حياتنا لكن مطّر نستمر باسم الحب وبإسم المودة والرحمة يللي بينا تولدها الايام
ودارت الايام ورمضان كان شهر بركة وخير .. كنا مستمرين انا وخوتي واحيانا معانا بوي في صلاة التراويح
وفي يوم ::
فتحت الباب وكيف بناديها كالعادة جتني تجري مخلوعة وترعش وتبكي في نفس الوقت بكاها حار عمري ماريتها تبكيه
تغمرتني وشهقاتها وصلو لنقطة ضعف فيها ونسيت انها مضايقتني الصبح ع نفس الموضوع
رغد: مات وخلاني يامعاوية الغالي مات
كنت عاصرها ع صدري ومش فاهم ع من تحكي : شن في ؟
رفعت راسها بالشويا: بوي مات يامعاوية بابا مشي وخلاني
مسحت ع ظهرها بلطف: خلاص حبيبتي اهدي ادعيله بس ماينفعه شي غير دعاك توا
مسحت دموعها بالقوة: شن تعني حياتي من غيره ؟
كان خاطري نقوللها حسيتي بشعور غسان رغم انه اللاشعور وقتها بس في نهاية بوه
رغد مستمرة في العياط وبدت تخبط ع وجهها شديتلها ايديها: تي لا خيرك حرام شن قاعدة اديري ؟
ومازالت تخبط وبصوت عالي وتبعد فيا: خلييني ياريتني نموت وراه
صفقت ايديا في بعض: لا حول ولا قوة الا بالله .. وتي روحك نرفعك
مسحت دموعها: تلقاهم قسمو حتى الورث
زفرت بضيق: بالله عليك ياسر بلا دوة زايدة وهيا
خشت لبست عبايتها ورجعتلي: والفطور ؟
ابتسمت رغم اني مضايق وزعلان عليها: خليه ماعليكش فيه
جهزت روحها وطلعتها كانت طول الطريق تبكي وشهقاتها تقطعلي في قلبي
رغد: منو بيا انا يامعاوية منو بيا ؟ .. ياريته بس شاف وليدي يامعاوية ياريته بس
شديت ع رجلها وعصرتها نطمن فيها: الله يرحمه حبيبتي خلاص بالله عليك
تنهدت: انا طول عمري مع بوي ومتعلقة بيه هلبا وكل من يشوفني يقول بنت بوها بعد توفت امي لقيته هوا امي وبوي وخوي وكل شي وحتى لما ظلموني خوتي كان ليا السند وعطاني ليك وانا عارفة انه هوا اللي كلمك وعرض عليك
جمدت في مكاني الدم وقف شبحتلها: كيف ؟
رغد ضحكت ع جنب: عارفه انه كلمك وعندي علم بكل شي .. ااااه يامعاوية ( شيعت عيونها في الفراغ ) احلا شي صار في حياتي واحلا قرار خداه عليا بابا انه زوجني ليك
اختلط شعوري وقتها لا عرفت نفرح بكلامها ولا نضايق انها حاسة روحها مكسورة ومذلولة قدامي .. ابتسمت وشبحتلها بحب وشديت ايدها بقوة : صدقيني انتي بالنسبة ليا كل شي رغد والله
ضحكت بهدوء والحزن في عيونها : يارب يكون كلامك حق
تنهدت بوجع: والله حق صدقيني طول ماانتي صادقة معاي تاخدي عيوني والله
شدت ايدي: مانبيش عيونك .. نبي معاوية يللي حبيته
ضحكت ع جنب وتنهدت .. خاطري نوعدك بكل شي حلو .. نتمنى تكوني زي مانا نبي .. الانسان مش كامل الكمال لله وحده .. بس في شي داخل اي انسان يشوف الكمال ليه .. معتبر انه ع خط المتسقيم وانه الصح ومش ظالم ولا غالط .. وصلنا للحوش حطيتها ومن الباب استقبلوها بالعياط اهلها وعيلتها .. شفت لحوشنا الاول ابتسمت ابتسامة وجع وضاق الخاطر .. اتصلت بخوتي وخبرتهم بالخبارة وخشيت للخيمة سلمت ع الحاضرين بس ماكانش بينهم مروان ورضوان .. خشيت للجنان الخلفي لقيتهم يحوسو وقفت سلمت عليهم
مروان: برا قعمز مع التريس بنمشو للمستشفى نجيبوه
استغربت: توا الدفينة ؟
ضحك بهزوة: مش ع اساس نسيبنا ؟
رفعت حواجبي: قصدي روحت من الخدمة وقالتلي رغد يعني من وين بنسمع لو ماحضرتك انت وخوك ماتقولوش
عوج فمه: صايم ماتخلينيش نفطر عليك
تعصبت .. وبرزو عروقي في قبضة ايدي .. خديت بعضي وطلعت قعمزت مع الرجال .. يللي كان حديثهم
: مسكين ليه اسبوع في المستشفى متلوح المرض قطعه تقطيع
: الله يرحمه ارتاح .. اهو الحمد لله صغاره كبرو وتهنى عليهم
شبحلي واحد منهم : انت نسيبهم ولاه ؟
هزيت راسي بالايجاب: اي ان شا الله
حط ايده ع رجلي : عظم الله اجركم ياولدي
تنهدت: شكر الله سعيكم
: انا استغربت وين شفتك ماريتكش في المستشفى يومها
: مسكين والله تمرمد في المستشفيات الحاج
مسحت ع وجهي: الله يرحمه
( مروان ورضوان لو نحصل عليهم نذبحهم بلا قبلة .. نشوف فيهم يتحركو يمين يسار جاب ربي رمضان كان هذا راهم بهدلوني في الضيافة .. واضح عليهم الشر )
وقف عليا رضوان: شنو الامور ؟
من غير مانشوفله: باهي
جبد كرسي وقعمز جنبي .. يتظاهرو بالمحبة بينا اللي لا اساس لها ولا مرة جبتها لاماليها وطلعو ضيفوني بالعكس كانو يتهربو يإما يشوفوني يطلع عندهم مشوار ياسبحان الله
تنفست الصعداء وشبحتله بحدة: علاش ماقلتوش بوها مريض راني جبتها ! شن مقصر معاكم انا ؟
ضحك ع جنب وعيونه يلفو ع المقعمزين: تي هيا ماصدقت ع الله وتزوجت تبيها مازال تقبل ع هالحوش والا شكلك ماتندري ع حاجة
قرنت حواجبي: نندري مانندريش مش مهم هذا بوها معقولة ليه مريض فوق الاسبوع ماتقولوش ؟
قرب راسه ليا: انت متوقع انه رغد واجعها بوها ؟
غمضت عيوني وتنهدت: اسمعني جاي ماتخششنيش في مخاشيش مالياش فيها .. انت قول وخليها هيا تتصرف يوجعها مايوجعهاش مش موضوعي
تنهد وضحك ع جنب وبدي يقلب في الحاضرين .. التزمت الصمت وقمت بالواجب وجو خوتي وبوي
بوي: لا حول ولا قوة الا بالله .. مني ميت ياولدي ؟
رديت عليه بابتسامة: هذا جارنا ونسيبي عمي مسعود الله يرحمه ويغفرله
تنهد: هييي كلنا ليها ياولدي .. الدنيا هادي هكي طولها ( وأشر بالقصر بايديه الزوز ) مهما نعيشو فيها نحسو مازال بكري ع الموت .. اللهم احسن خاتمتنا
تنهدت وربعت ايديا: اي والله .. آمين
غسان: خير فيته رضوان يقلب شن مش عاجبه ؟
قلبت عيوني: ريحني منه اقسم بالله قريب نشد نعجنهم الزوز
حذيفة: تي اسكت انت وياه وادعو للراجل
تنهدت: الله يرحمه وخلاص
غسان تنهد: الله يرحمه .. كلمت المدام ؟
استدركت الوضع: لا والله من لما جينا معاش لهيت الحق
غسان حرك راسه بأسف: اطمن عليها ياراجل البنت حامل وتاعبة اكيد
ابتسمت ووقفت .. حطيت ع رقمها واتصلت
رغد بصوت مليان وجع وحسرة: آلو
تنهدت: كيف حالك توا ؟
تنهدت رغد : باهية الحمد لله
سادت لحظة صمت ومعاش عرفت شن نقوللها والا كيف نواسيها
رغد: علاش يامعاوية صار هكي ؟ .. شن درت انا تحت ربي ؟
اندفعت: اسس عيب عليك معاش تقولي هكي .. هذا شرك والعياذ بالله
سمعت تنهيدتها من الاعماق وسكتت
مسحت ع وجهي: فيها كيف نشوفك توا ؟
سكتت شويا وبعدين قالت: تعالا جيهة الباب الرئيسي
ابتسمت: حاضر
تلفتت وراي لقيت مروان ورضوان لاهيين في الناس .. سحبت روحي وطلعت للباب لقيتها لابسة ملاية الصلاة وواقفة جيتها من الخلف
بخخ
شهقت وحطت ايدها ع فمها: خلعتني خزي عليك
ضحكت : استاحشتك
حطت ايدها ع صدرها وبألم : معاوية انا موجوعة
مسحت ع راسها : الله يرحمه ويجمعنا بيه في الجنة
مسحت دموعها: بيدفنوه اليوم صح ؟
حركت راسي بالايجاب
تنهدت بوجع اكتر: تصدق ليه اسبوعين يتوجع وطالب يشوفني وماحدش قاللي
فتحت عيوني فيها: كيف عرفتي ؟
تنهدت وقعمزت ع حافة العتبة: مرت خالي قالتلي انه خوتي قالو رغد ماتجيش قداش ليها
قعمزت بحداها وشديت ايدها: حسيبهم ربي والله مايوجعك خاطرك ولا تتضايقي ربي يردهولهم اضعاف مضاعفة
اتكت ع كتفي: تعبانة معاوية
تنهدت ومسحت ع راسها: ماعاش اللي بضايق رغودتي
ابتسمت بألم: الله يرحمك يابابا كنت ديما تقوللي فيها .. عاشو يابابا وعذبوني بيك
تنهدت وحطيت ايدي ع قلبها: اعوذ بكلمات الله التامة من كل شيطان وهامة ومن كل عين لامّة
: ياسلام تبوني نجيبلكم قهوة ؟
وقفت مفزوعة رغد ووقفت شبحتله بحدة: أظني مرتي
خبطني ع كتفي: مرتك في الحوش يابابا مش جاي هنا تتمعشق
فلتت عيوني فيها وقرنت حواجبي: تقريبا اللي مات بوها ومن حقي نوقف معاها ونواسيها ماداما مافيش من يحس بيها
ضغط ع سنونه وشبحله: درقي وجهك الداخل
كيف بتخش شديتها من ايدها: مانسمحلكش تهينها قدامي
بس هيا فكت ايدها وصوتها يرجف: معاوية خلاص
وعدلت الملاية عليها وخشت للحوش تجري
عقدت حواجبي وبصوتي جهوري: مروان خللي رغد في حالها
ضحك بهزوة: يعني المفروض نخاف ؟
شديته من حوايجه وقربته لوجهي: لتوا محترم كونك نسيبي والحالة حالة وفاة كان هذا راني وريتك كيف المفروض تخاف
فكيته وطلعت للسيارة ولعتها ومشيت بعتلها مسج
( حبيبتي لو صار معاك اي شي كلميني )
( اي اكيد )
كانت الجنازة العصر وانطلقنا لمراسم الدفن يللي خدي وقت طويل من مروان ورضوان لتمثيل افضل مسرحية شفتها في حياتي ..
( وين كان حي مشتاق البلحة وين مات علقوله عرجون )
لا يخلوالموقف من نظرات حادة بيني وبين مروان بس احتراما للناس ولمكانتي بينهم نتفادى الخوض في حديث معاه
قريت المسج وانا ع البحر والمغرب ع وشك الاذان .. اتصل بيا غسان وخبرني انهم في الحوش ويراجو فيا نجيهم ونفطر معاهم
....................
طالعين من المصرف وغسان في ايديه اوراق يقلب فيهم .. ركبنا للسيارة
غسان: مش مصدق اقسم بالله
ضحكت: ايواا غسان ولّا مليونير
ضحك: مليون واحد شن مليونير .. لكن بجديات خلينا نشوفو عمي عبد الكريم ويقترح علينا
ابتسمت: تم
ومشينا لعمي عبد الكريم .. قعد يشبح للاوراق ويقلب
وابتسم: كل شي قانوني وسليم .. انت الوريث الوحيد لبوك زي ماكاتبين يعني من حقك كل املاكه .. ( مد الاوراق ) مبارك عليك
ابتسم غسان وبارتباك: انا نبي نستثمرهم
استغرب عمي: شن في بالك ؟
غسان شبحلي وشبح لعمي عبد الكريم: نبي نبني مدرسة تخص الايتام وبس .. يعني اي يتيم يقرا مدفوع عليه كل التكاليف ونبي تكون هيئة التدريس ناس مقومة وتخاف ربي ومختصة
ابتسم بفخر: والله ياخيري عرفت تربي ( قدم براسه ) متوقع المليون تسد كل طموحاتك ؟
غسان حط ايديه وبدي في العد: اي ونبي نشري شقة في وسط البلاد
قاطعه عمي وبدي يضحك: ياولدي هلبا هكي .. صعب كل شي اديره مليون رقم صغير قدام طموحك .. شوف انا مستعد نساعدك بللي عندي يعني نكون شريكك
فرح غسان وشبحلي: شني ؟
ابتسمت وشبحت لعمي عبد الكريم: والله خير شريك معرفة الغالي راك
ابتسم ومد ايده: تمام تفاهمنا خللي نشوفلك التكلفة تامة ونواتيك بكل جديد
ابتسم غسان وصافحه: وانا في الانتظار
سلم عليه وطلعنا منه مستبشرين خير
لين رن رقمي المتصل رغد
#Dudu
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
