مُعــاوية

Part 35

#مُعــاويــة

:: 35 ::

لما روحنا كانت طايرة في الفرحة بعكسي انا اللي خايف مانتجاوزش صراحتها ومانتقبلهاش بعد اللي قالاته .. بس الشي الوحيد يللي مفرحني انه ربي خدي حق كِنان بدون مجهود منا رغم تكثيف دعواتنا بس كان الغل معبي قلوبنا عليه ..
مرت الايام لا جديد يذكر ولا قديم يعاد
تعاملي مع رغد كان بلطف مافيش مشاحنات .. وهي تتفادى النظر في عيوني حياءاً من اللي صار .. وجي اليوم يللي بنودعو فيه شخص غالي ع قلبنا .. حذيفة .. خوي الاصغر قبل كِنان .. كان الفراق جداً صعب مش قادر نرفع عيوني فيه لاني حابس الدموع بالغصب وياخوفي ينزلو ويفضحوني .. تربينا ع دمعة الراجل ماتنزلش مهما كان الا ع وفاة والديه بس انا توفو والديا قبل مانجمع دموع اصلا ونبني مشاعر في قلبي مكنونة ليهم .. ماحسيتش بلوعتهم لاني صغير ومانعرفش .. لوعة كِنان .. لوعة فقد الاهلية لبوي خيري .. واليوم فراق حذيفة للقاء يتجدد بعون الله بعد سنتين .. ويارب مانفارق حبيب وغالي في المستقبل .. ديما كان شعوري ان لو يكون يومي قبل يومهم أهون ليا وأخف .. والله اعلم هل في راحة بعد الموت ام لا ف العلم عند الله .. بس مانبيش نعيش يوم واحد من غيرهم .. مانبيش نخسر اكتر ماخسرت في حياتي .. غسان يقدر يسافر لانجلترا وين ماكان عايش بوه ويجدد أمجاد بوه العظيمة يللي تستحي أن تذكر ويدوّر ع اخته بس فضّل يقعد في بلاده ويواصل درب بوي خيري الخيري
رغد: فاش سارح ؟
تلفتلها لقيتها جنبي في السيارة: كملتي ؟
ابتسمت: اي
ولعت السيارة: شن ان شا الله جاوبتي ؟
ضحكت: يعني ..  الله اعلم شن رايه الدكتور بعد يشوف اجابتي
تنهدت: شدي حيلك مادابيك لما تجيبي تكوني مصفية موادك ويقعدلك سيمستر بس
ضحكت بصوت عالي: اما سيمستر ؟ قول سنة هكي سنتين ممكن
ضحكت : ايوااه .. عادي عادي تو نديرو راي
حطت ايدها ع بطنها بخجل: والله نراجي في يوم ينوّرلي حياتي كِنان مانبي شي تاني
ابتسمت: ع خير يارب
رغد: تفكر في حذيفة ولاه ؟
تنهدت بوجع: مش هاين عليا يسيبنا ويسافر والله
ابتسمت: بس لمصلحته وهوا راغبها السفرة
ابتسمتلها : اي ربي يوفقه
وصلنا للحوش .. نزلت وخدت وراقيها وللشقة طول .. وانا خشيت لحوشنا
غسان: آهو جي معاوية
سكرت الباب: تراجو فيا ؟
حذيفة ابتسم: اي بنسألك قوللي شن نرفع تاني اقسم بالله توترت ونحس في روحي متلخبط
ضحكت وبوست ع راس بوي: ع اساس مقطعها سفر انا
غسان ضحك: المفروض سافرت انا باش وريتك شن ترفع وشن ادير .. لكن الله غالب البزنس اهم
ضحك حذيفة ويراقب في شنطته: والله ماني عارف شن ندير
شبحتله: ارفع الضروري واللي مستحقه ولو احتجت تاني اشري من غادي شن يعني تحساب السعودية صحراء ؟
ضحك: لا عارف السعودية بلاد وفيها كل خير
غسان: شحن تليفونك واللابتوب وشوية حوايج داخليات وسورايك الطوال طبعا وخود معاك قهوة مرات قهوتهم ماتعجبكش
ضحك حذيفة: ع اساس انا ندور فيها القهوة .. باه نرفع معاي كبوط او شي ؟
رديت عليه: اي اكيد مرات الجو يصقع رغم انه شتاهم اخف من شتانا ره يعني ماتتوقع صقع يثلج غادي وارفع حاجات قطنية خفيفة
تنهد وحط ايديه في نصه وشاف لشنطته: ع الحال هذا بنرفع الدولاب كله
غسان تنهد وابتسم بألم: ياحظك بتمشي تزور النبي وبيت الله
قعمز حذيفة وتعبو عيونه دموع: كل مانذكر انه بعتوني عمرة ع حسابهم قريب نبكي من الفرحة
تنهدت وعلقت عيوني في السماء وقلت في داخلي ( يارب اكتبها ليا ولرغد ونمحو ذنوبنا ونرجعو بقلوب طاهرة ونقية ) وابتسمت وطلعت كلمة : يارب
ضحكو عليا
غسان: شكله الدعوة ليه ولبنت مسعود
حذيفة حط ايده ع كتفي: اكيد .. آمين يارب
غسان وقف : اما انا بندعي ليا ولبوي الغالي ( قعمز بحدا بوي ) يارب اكتبلنا عمرة انا وياك والا حتى حج يارب يارب
ابتسم بوي: امين يارب
شبحت لحذيفة: امتى طيارتك ؟
حذيفة: غدوا الساعة 11 الصبح باذن الله
ابتسمت ابتسامة حايرة: ع خير ( وقفت ) هي تبو شي ؟
غسان: لا سلامتك ( بعدين خبط ع جبهته ) حق معاوية طارق جي وجابلك غنائم رمضان
ضحكت: تمام هاتهم
مشي غسان جابلي ظرف: قاللي مرتب الامور وهادم حق معاوية صافي
شديت الظرف وابتسمت: جو في وقتهم السيارة تندب
ضحك حذيفة: انا اول شي بنديره اول مانوصل للكعبة بندعيلك تاخد سيارة صفار
فرحتني الدعوة: وانت قلتها خلاص اول ماتوصل ادعيلي واخلص النية تربح
ضحك: حاضر
خديت بعضي وركبت للشقة .. فتحتها بهدوء ع بالي انها راقدة .. بس كانت الشقة منورة وريحة المعطر والوراكينا معبية الدنيا .. ابتسمت .. فرحت شقتي بدت فيها الروح .. ومرآ ترأسها وقايمة بواجبها باخلاص .. خشيت للكوجينا لقيتها حاطة طنجرة ع النار
ابتسمت: الله الله .. من كتر صنة الوراكينا والمعطر ماشميتش الغدي
كانت تغسل في الاماعيين: اسكت اليوم غداكم بالكبير
اندفعت: ماتقوليش بازين
ضحكت لين وخرت راسها الخلف .. ضحكة خدت عقلي لعالم تاني: بالزبط .. شاطر معاوية
ضحكت وقربت منها: رغد .. قايلك قبل ان ضحكتك احلا شي فيك ؟
حطت ايديها في نصها: كيف ؟ .. يعني لا عيون لا شعر لا خدود ولا جسم .. احلا شي ضحكتي توا ولت ؟
ضحكت: اي لان اللي قلتيه كله بيزول مع الوقت .. شعرك بيضعف وبيطيح وجسمك بتختفي رشاقته والخدود والعيون بيذبلو وبنتهي مُهجة الجمال تدريجيا مع العمر بس ضحكتك لا .. مستحيل تختفي ولا تذبل ولا تنتهي بهجته نهائياً ولو يكون عمرك ألف عام
ابتسمت بخجل: وانا ضحكتي مستحيل تختفي طول ماانت معاي
شفشفتلها شعرها: هي شنو نعاونك ؟
حركت راسها وطلعت من سرحانها وتنهدت براحة: معاوية !
فتحت مغطة الطنجرة نستنشق ريحة طبخها الفايح: عيونه !
سيبت الاماعين وقربت مني وحضنتني: نحبك والله
طبطبت ع ظهرها: حتى انا
رفعت عيونها: توا قريب نسكرو عام متحشم تقولها ؟
ضربتها بالخفيف ع خشمها: خليها تجي مع الوقت احلا
ابتسمت وتباعدت: ان شا الله يجي يوم وتقوللي نحبك بصوت عالي وتحت الحوش وفاتح الاغاني بالقوية وواقف شاد باقة ورد كلها حمرا ولابس بدلة رسمية
قاطعتها وضربتها ع جبتها: هي هي وين مشيتي ؟ .. تحسابيني تركي ؟
مشت لاماعيينها وضحكت: لا عارفاتك ليبي واحرش
عقدت حواجبي : وليا الشرف مانيش مرخي ومتاع قراويط
ابتسمت: واحلا احرش فيك ياليبيا
ضحكت وحركت راسي بيأس: مش طبيعية بكل
.........................
واقفين في المطار ونراجو في اعلان موعد صعودهم للطيارة .. متوتر كان حذيفة وكل شويا يراجع في وراقيه هل كل شي بيمشي ع خير والا ناسي ومتلخبط في شي ..
غسان يضحك: تي خلاص ياراجل هادي سابع مرة تشوف لجوازك والتذكرة خلاص
بلع ريقه بصعوبة: ماتلومنيش اول مرة
ضحكت: ومش اخر مرة يارب .. طقت الاحداش ومازال مانادوش
خبطني غسان: اسكت توتر فيه زيادة
صوت النداء عبى المكان .. وعبى عيونا دموع وبدت تدريجياً تنزل وتحرق الخد بملوحتها العالية .. كل واحد فينا يحاول يصبر التاني بنظرة اضعف منه ..
تغمرني حذيفة وتمسك فيا: يارب نشوفك ع خير ياخوي يارب
حذيفة كان قلبه رهيف وضعيف ع اهون سبب دموعه يسبقوه .. وي محرّ موعد الفراق
نحاول نتظاهر باني اقوى منه بس كنت متاكد انه الاضعف في هذه الحلقة: حذيفة سامحني بالله عليك والله راك غالي عليا ووخيي وحبيبي ماتنسانا وطمنا عليك اول ماتوصل وربي يوفقك ياغالي
تغمرته وكأن هذا يوم الوداع النهائي .. مانضمن الدنيا وشن خافيتلنا بس ع الاقل حالياً يسافر وهوا راضي عليا ومسامحني
حذيفة مسح دموعه: معاوية .. ها الله الله ع زوجتك صونها وارعاها ورد بالك عليها وع كِنان المستقبلي .. بالله عليك البنت ماعندها غيرك وانسى ياخوي انسى راهو ماضي وماحد ليه القدرانية يغير شي في حياته .. يابال بنت كسروها خوتها مش البراني .. معاوية نوصيك بغسان وبوي ماعندهم غيرك حتى هما وغسان رد بالك عليه اقعد القريب ليه ماتخليشي يلجأ لحد وتخسره .. معاوية بالله عليك خلينا نقعدو زي زمان ماتنسانيش ولا انا في يوم ح ننساكم كلكم .. خللي نقعدو ايد وحدة زي قبل زي تالي
تغمرته بقوة وكان خاطري نحلفله مايسافر ويرجع معانا مش هاين عليا نفارقه ولا هاين عليا نروح للحوش ومانسمع حسه وهوا يتلو القرآن ..
مسحت دموعي وابتسمت بصعوبة خبطته ع كتفه بالقوة: اسكت ياراجل وانت تقول تودع .. تمشي وتجي بالسلامة وبعدين ماتنساش الحوش اللي احني فيه حوشك ومش ح ننسو كرمك ياغالي ماخليته نتبهدلو
ردلي الخبطة: تي اسكت اللي يسمع يقول انا معرّق عليه .. هذا حوشنا كلنا وباذن الله نرتب اموري ونروح نستقر هنا والحوش هذا يقعد حوش العيلة يلمنا كل جمعة بنساوينا وصغارنا يارب
ضحكت: امين يارب ( تلفتت حواليا ) وين مشي غسان ؟
حذيفة أشر براسه: مهما كان يتظاهر بالقسوة يقعد الاحن بينا .. شوفه كيف عاطي بالظهر
شفته كان خلف العرصة وعاطي بظهره مشاله حذيفة وماحبيتش نلحقه .. خليته يودعه براحته ويوصيه زي مايحب يوصيني
ورجع حذيفة تغمّر بوي يللي كان مش واعي ع اللي حواليه كان يردد في كلمة: جعان بس اعطوني ماناكل
باس ايديه وراسه حذيفة: ربي يخليك تاج راسنا ياغالي ويديمك لينا يارب
بخطوات حسينا انها سريعة تتسابق مع الساعات .. لوّح حذيفة بايديه لينا ويجر في شنطته وع كتفه شنطته اللاب واللي فيها كل وراقيه ومستلزماته الشخصية
وسافر شيخنا .. سافر يللي كان شايل الهم علينا .. الحنون والمعطاء .. سافر من كان يرقي فينا لما نمرضو او نتعبو نفسياً .. سافر من كان يوعظ ويوصي فينا ع صلاتنا وقرآنا .. من اليوم بيجهز فطورنا وابتسامته المليانة تفاؤل وحب .. من اليوم يللي يهوّن علينا الشدائد .. صح فراقه مؤقت وله عودة باذن الله بعد عامين .. بس والله 24 شهر ح يمرو بصعوبة وربي يهوّن علينا فراقه ونشوفه بصحة وعافية وع خير يارب
رجعنا للحوش .. وكل واحد فينا شايل هم الدموع اللي مابو يَكِفو
خش بوي للدار ورقد .. وانهد حلينا ع الصالون وكل واحد ياما شايل من شوق لحذيفة من الساعات الاولى .. رفعنا العيون وتقابلو
غسان: ريت بالله ودعنا كِنان وودعنا عقل ورجاحة بوي بعد الزهايمر واليوم ودعنا حذيفة وياعالم غدوا من بيودع من ؟
تنهدت: عيلتنا تنقص بالشويا
غسان سند راسه ع الكرسي: لالا شد الهمة وجيبلنا عشرة ولاد ع الاقل يملو حياتنا
ضحكت بدموعي: تحرض فيا وخيرك انت ماتتزوج وبعدين عبي حياتك مالك ومالي
ابتسمت بوجع: تحسابه ماعنديش نية ؟ .. لكن ربي يفرج
ابتسمت ابتسامة مبهمة: انت غير قول يارب وانسالي بنت الضابط المتخلف هداكا وبعدين كله يجي
ابتسم: نسيتها نسيتها صدقني .. ااااه يامعاوية قعدت غير انا وياك
مسحت ع وجهي بالقوة: غمض عين وافتح عين تلقى حذيفة قدامك شن تحسابه السنين تجري ره
غسان: ربي يوفقه .. والله الولد اصلي الله يرحم والديه
ضحكت بألم: شن شاف منهم والديه .. سبحان الله الهداية من ربي .. ربي يوفقه ويهدينا
غسان: امين .. بنرقد نحس في روحي فاشل نايض بكري باش نفطر مع حذيفة ونخلي معاه ذكريات باهية بينا
ايتسمت: تمام ارتاح .. بنركب انا ( وقفت ) السلام عليكم
مشيت ركبت لشقتي .. لقيت رغد شادة شيتاتها تقرا
حطيت المفاتيح ع الطاولة: شنو عندك امتحان ؟
ابتسمت: اي بعد غدوا
تنهدت: ربي يوفقك
شبحتلي باستغراب: وصل حذيفة ؟
نفيت براسي
ابتسمت: يلا ربي يوفقه ويسعده ويرجعلك سالم ورافعلكم راسكم بالشهادة
فرحت بدعوتها: امين يارب .. جت النية في العمرة
ابتسمت: قول الحج .. قريب موسم الحج
تبو الحق فرحت لانها تعرف موسم الحج : فرحتيني تصدقي !
ضحكت: عارفة ( حطت شيتاتها ) تعبت من القراية شن رايك نديرلك عصير فراولة هكي يبرد قلبك ومنه تنزل لغسونة وعمي ؟
ضحكت بصوت عالي: يعطيك دعوة منين جبتيها غسونة ؟
خشت للكوجينا طلعت فراولة من الفريز: زي مايقول لحذيفة زمان حذوفة
ضحكت: الله يبارك ماتنسيش
حطت الفراولة ع جنب وبدت تعبي في المية: اللي يحاديك ياعمري عمره ماينسى اللحظات الحلوة
تنهدت بسعادة: رغد ؟
بدون تردد: عيونها
رفعت عيوني فيها: اوعديني
حطت ايدها ع فمي: وعدتك تم
رفعت حواجبي: بشنو هي ؟
ابتسمت وكملت العصير: معاوية انا ماعنديش غيرك .. فللي تبيه انا فيه ونوعدك بان مافي شي يفرقنا ولا ح نحاول يوم ندير شي يضايقك ويزعلك .. ( حطت ايدها ع بطنها ) نبي ولدي يتربى بينا ومانبي شي في هالدنيا غير هالامنية
بوست ع راسها: ربي يبارك فيك ويخليك ليا
....................
غسان: خللي نشوفو الدار قبل ونتفاهمو معاها
لفيت بعيوني ع مكان ندرس فيه السيارة: تمام
ودرّست السيارة ونزلنا .. استضافتنا السكرتيرة وقعمزتنا في كرسين مقابلين بعض وقعمزت ع كرسيها خلف المكتب
بابتسامة خفيفة: اهلا وسهلا بيكم .. شن تشربو ؟
غسان ابتسم: لا صحيتي كيف شاربين قهوتنا ( شبحلي وبعدين رد عيونه ليها ) احني جايين لطلب صغير هكي .. بس نبو نتفاهمو مع المدير لو سمحتي !
ابتسمت السكرتيرة: والله شن بنقولك المدير واخد اجازة ومسافر .. بس تقدر تقوللي شن طلبك ونساعدك بالاوراق المطلوبة .. انت تبو تتبنو طفل ؟
ضحكت بهدوء: لالا .. ( شبحت لغسان وكملت ) والله جايين نبو نتعاقدو معاكم بحيث ان الصغار يقرو في المدرسة يللي بنيناها خصيصا ليهم
تفاجئت: غريب ماوصلنا شي من الدولة !
غسان ضحك: لا اما دولة بالله .. هادي مدرسة خاصة يعني استثمرت فلوسي ونبي أجرها في الاخرة
ابتسمت بفرح: يعني تقدر تقول مدرسة خيرية ؟
غسان حرك راسه: ممكن
فرحت ووقفت: ندير تليفون للمدير ونجي
طلعت من المكتب
طبطبت ع رجل غسان : الحمد لله شوية خطوات ونوصل لحلمك
فرح غسان: متشوق ياراجل
خشت بنية عليها في الغرفة وقالت: وين ماما هديل ؟
تلفتلها غسان: قصدك امك هديكا ؟
البنت ابتسمت: اي وين مشت ؟
رديت عليها بلطف: طلعت برا
ابتسمت البنت وسكرت وراها الباب
خمس دقايق وخشت السكرتيرة يللي عرفنا مؤخرا ان اسمها هديل ومعاها البنت الصغيرة .. شادة ايدها بحنان وقعمزت ع كرسيها والبنت قعدت واقفة .. غسان ماواطاش عينه عليها
هديل حست بالشي هذا : نعرفكم ع بنوتي الحلوة اسمها حور
غسان بمغازلة: حور حق .. لو في الدنيا شفنا هكي حور امالا في الاخرة كيف حور العين يامعاوية ؟
ضيقت عيوني: اخدم عليها في الاخرة
ضحكت هديل وشبحت للبنت: حور حبيبتي راجيني برا نكمل مع عمو ونجيك .. فهمتيني صح ؟
ابتسمت البنت وحركت راسها بالايجاب وطلعت سكرت الباب وراها
شبحتلها: ربي يحفظهالك بنيتك الله يبارك
ابتسمت هديل بحزن : ياريتها بنتي
غسان ابتسم بهزوة: والله حسيت انها مش بنتك
شبحتله : والله ؟ وكيف ؟
غسان: ماتشوفش فيها البنت هديكا قمر بيوضية ع عيون واسعات شن جاب لجاب ؟
اضايقت هديل لانها كانت قمحاوية ونقشها اسود ..
هديل: معنى كلامك ؟
غسان: عادي ياوخيتي كلنا قهويين شن بنتحشمو من لوننا ؟
خبطته برجلي: تحشم
تنهدت بتعصب: لو سمحت هذا مش موضوعنا
غسان تمالك نفسه ع الضحك: تمام شن صار في المدير ؟
هديل: قال يعطوني مهلة شهرين بالكثير ويتواصل معاكم وتجو هنا تتفاهمو معاه
ابتسمت ووقفت: تمام بارك الله فيك
غسان خدي ورقة من المكتب وقلم: هذا رقمي خلي يكلمني اول مايوصل
عدّل تيشرته وابتسم: سامحيني كان ثقلت عليك بكلامي مش قاصد ره
حاولت تبان طبيعية وانحرجت : ولا يهمك
وطلعنا من الدار .. اول ماوصلت للسيارة ضربته ع ظهره بالقوة
عيط : خير بلاك ؟
شبحتله بحدة: ماتتحشمش تقول للبنت هكي ؟
غسان ضحك: شن قلتلها توا هي ؟
ولعت السيارة: عيب عليك والله واضح البنت تحشمت مني كان هذا راهي كلاتك ماكلة ياكلب
غسان لوي فمه: والنبي اطلع من راسي
خبطته ع ذراعه ..
غسان: تي وااك شن تاني تفكرت ؟
ضحكت: معاش تحلف بغير الله
غسان: باهي اطلع وريحني
طلعت بالسيارة وحطيته في الحوش .. وركبت شقتي لقيت بوي راقد ومغطياته رغد ومقعمزة تقرا قريبة عليه .. خشيت طبست عليها بوستها ع الخد
دفتني بخجل : تحشم بوك هنا ؟
قعمزت بحداها: ولا داري ع الدنيا
عضت شاربها: حي كان مش داري نهزو عليه ؟
تنهدت: لا مش قصدي والله .. بوي هذا ع العين والراس لكن قصدي راقد بس
ابتسمت: نحسابك
عدلت جلستي: شن مدايرة حلو الغزالة ؟
حطت شيتاتها: درت كيكة الجزر ع خاطر عمي مافيهاش سكر
رفعت حواجبي : وولد عمك مافيشي السكر ره شن بياكل ؟
ضحكت وخبطتني ع ركبتي بالخفيف: نديرله اللي يحب بس يهنيني بسكاته
وقفت شديتها من ايدها: تعالي تعالي ماديري شي .. الحلو قدامي ومازال ندور ؟
ضحكت ..
.....................
وتتوالى الايام وخشت رغد للسابع .. وزاد عليها الوجع وفاقدة توازنها .. والحمد لله كنت في الحوش بوي تعبان ضربتله يبرا السكر وقعدت بحداه .. لعند نسمع صوت عياطها وانا لوطة .. ركبت نجري لقيتها مستندة ع كرسي الصالون وشادة بطنها وتتأوه من الوجع ..
رغد بتوسل: معاوية بنموت يامعاوية خلاص
خديت بايدها: اهدي بس خللي نكلم غسان
اتصلت بغسان مرتين ماردش ..
خديت بايدها لبستها العباية والوشاح بصعوبة ونزلتها درجة درجة ..
بوي كان واقف نهاية الدروج: شن في ياولدي ؟
بلعت ريقي بخوف: رغد تعبانة ادعيلها
كانت متمسكة بايدي بالقوة .. رفعتها للمصحة والصدفة لقيت نفس الدكتورة الاولى .. ترجيتها تخش معاها واطمني .. بس شوية وطلعت تجري
عرقلت طريقها: طمنيني شن في ؟
باعدتني: لو سمحت خليني نشتغل
لحقتها: يادكتورة انا زوجها تربحي طمنيني !
تلفتتلي: ولادة مبكرة .. بنخششوها للعمليات ادعيلها بس تعبانة زوجتك
بديت نلف في مكاني ورافع ايديا ( يارب سهّل عليها يارب سهَل عليها )
اذكرت بوي .. وين مشي ؟ جبته معاي ؟ .. طلعت نجري لنفس الطريق يللي جيت منها لعل وعسى نلقاه واقف ع احد المارّة .. وفعلا لقيت واحد يهدرز عليه
وقفت عليه: بارك الله فيك .. سامحني ياعمي
ابتسم الراجل: بوك هذا ؟
هزيت راسي بالايجاب : اي ( خديت ايد بوي ) هيا يابوي
الراجل: رد بالك عليه راهو يطلع البرا معاد تلقاه
تنهدت: اي والله .. غير جايب زوجتي في الطوارئ ولهيت شويا
شبحلي: في الطوارئ ؟ ( شد اي بوي ) امالا برا ياولدي وخليه معاي اهو انا هنا .. وربي يطمنك عليها
تنهدت بخوف: يارب .. اهو نكلم في خوي يجي يروح بيه
قعمزه الراجل ع الكرسي: اللي يريحك غير برا لزوجتك توا
ركبت نجري للدور الثالث وين مافي غرفة عمليات الولادة .. وقعدت نستنى .. ذهاباً واياباً قدام الغرفة وعيوني لا اردياً يتجهو صوبها .. ورافع ايديا ندعي ( يارب يارب )
شويا وطلعت الدكتورة جيتها نجري ومش شايف قدامي : طمنيني بالله عليك
ابتسمت: الحمد لله زوجتك جابت وليد
مسحت ع وجهي بفرح: الحمد لله الحمد لله
الدكتورة بحزن: بس لان خديجاً لازم يقعد في الحضانة عندنا لعند يتأقلم مع الوضع بعد الولادة ويبي عناية خاصة ومتابعة لحالته الصحية اولا بأول
اضايقت: علاش ؟
تنهدت: يااستاذ الطفل اللي ينزاد في السابع بيكون نموه ناقص ووزنه اضعف من الطفل يللي بينزاد في التاسع اكيد .. ف خوفاً من المضاعفات خليه يقعد هنا تحت الملاحظة .. وزوجتك بخير فقدت دم هلبا وزدناها الحمد لله لقينا فصيلة دمها متوفرة .. خليها تطلع من العمليات واطمن عليها في الغرفة اللي حجزتهالها
شبحتلها باستغراب: ماحجزت شي وخيتي جيت نجري هنا
ابتسمت: معذور .. انزل للريسبشن ويقولولك التفاصيل
تنهدت براحة: اي والله بارك الله فيهم خدوها طول بدون ماياخدو قرش
نزلت وشفت الاجراءات وحجزتلها حجرة ثلاثية ع قد فلوسي .. ولقيت الراجل يهدرز مع بوي ومنسجم
ابتسمت: سامحني ياعمي أخرتك عن اشغالك
ابتسم: لا أخرتني لا سو .. انا عندي بنتي هنا تغسل في الكلى نراجي فيها
تأسفت: لا حول ولا قوة الا بالله .. ربي يشفيها ويعافيها
الراجل: يارب .. قول ياولدي بوك عنده الزهايمر ؟
حركت راسي بالايجاب : اي والحمد لله
ابتسم بضيق: وقعدت معاه رغم انه ناسيك ؟
ابتسمت بألم: هوا ناسيني لكن انا مش ناسي انه بوي يللي تعب ورباني .. هذا جزاه لما يحتاجني مايلقاني ؟ ربي وصانا بيهم ياعمي الا ماعارف انه البرّ بيهم صعب
ابتسم وطبطب ع كتفي: الله يبارك فيك ياولدي .. هي نستاذن
تنهدت: شكرا وربي يعاونك
تكيت راسي وشبحت لبوي: جي كِنان يابوي .. كل كِنان يجي في حياتي لازم يتعذب ؟
ابتسم بوي: وينه كِنان ؟
تنهدت: فوق في الحضانة تعبان
رفع ايديه بوي: ربي يشفيه يارب
ابتسمت: امين يارب

#Dudu