#مُعــاويــة
:: 14 ::
حدها شوفت لعيونها وعجز لساني يتكلم .. طلعت ركبت سيارتي وطيااارة ع المصحة
..................
قعمزت في كرسي الانتظار نستنى ع أحر من الجمر مافيش من طمني عليه .. فاتت ساعة كاملة وانا نراجي ونهز في رجلي بتوتر لعند حسيت بظل شخصين نعرفهم .. وقفت وفتحت ذراعي ليه تغمرني وكانت دمعته سابقته قلبي وجعني وتنهدت بنطلع كل اوجاعي وشوقي ليهم .. مانقدرش نعيش من غيركم والله سامحوني هذا اللي في خاطري بس في الواقع طلع ( مش حركة تريس اديروها )
غسان يتهرب من شبحتي :شن صار ف بوي ؟
مسكت اعصابي: نراجي فيهم
حذيفة قعمز: وين محمود مش ع اساس عمه ؟
ضحكت ع جنب وقعمزت جنبه وربعت ايديا: انت قلتها ع اساس .. عموما يبيني نسلمله مفتاح الحوش وبوي بيرجع معانا
حذيفة: الحمد لله ( ابتسم وقدم بجسمه وشبح لغسان ) بيصير زي ماتتمنى ياغسو
رفع ايده بيأس: يستر الله
شبحت لحذيفة: شن في ؟
حذيفة ابتسم وشد كتفي: تو نروحو ونطمنو ع بوي قبل ونحكيلك
طلع الدكتور فزعناله احني الثلاثة
الدكتور: انتم ولاده ؟
غسان: اي لازم السؤال كل ماتطلعو تقولوه ؟
الدكتور شبحله ع جنب
حذيفة: طمنا دكتور ؟
الدكتور: مافيشي شي اطمنو توا وضعه احسن .. الفترة الاخيرة شوره ماياكلش بكل
غسان شبحله بتعصب: كيف ماياكلش ؟
الدكتور انفعل: وانا علاش سألت انتم ولاده كيف تخلوه من غير وكال ؟
تنهدت: ماكانش معانا الفترة الاخيرة هدا باش
حذيفة: نقدرو نشوفوه ؟
الدكتور : اي تقدرو .. عن اذنكم
تبعد علينا الدكتور حذيفة خش للغرفة طول اما غسان بيلحقه شديته من دراعه
ابتسمت: انا اسف .. غلطت في حقك
تنهد غسان وهوا يشبح لقدامه: مش مشكلة
لفيته ليا وقابلت عيونه: مش قاصد والله مانعرفش كيف طلع الكلام
غسان: خلاص ياراجل فوته توا مش وقته
رن تليفوني طلعته وقمت عيوني في غسان: من هذا !
غسان قرن حواجبه: رد ترا ؟
فتحت الخط سمعت صوت شاب
الشاب: ايوا معاي معاوية ولاه ؟
انا: اي تفضل ؟
الشاب: انا اللي خديت رقمك في الكلية كان تتذكر
ابتسمت لغسان وهمستله ( هذا نعرفه تمام )
ابتسم وخش الداخل وانا كملت مكالمتي
انا: اي اذكرت تفضل
الشاب: غدوا تخرجي انا وزوز ولاد نبيك تحضر المناقشة وتصورنا شن قلت ؟
ابتسمت: اي تمام مش مشكلة الساعة كم التخرج؟
الشاب: الساعة 12
انا: مية مية نكون حاضر باذن الله
الشاب: تمام سلام
سكرت الخط ولحقتهم للغرفة اطمنت ع بوي وكنت سعيد الحمد لله بنجدد نشاطي وبنغير جو وبنمارس شي نحبه قداش ليا غافل عنه .. غدوا موعدي مع حلمي ياصابت ياخابت
.............
مروحين في الطريق ركبنا كلنا في سيارتي .. غسان القدام جنبي وبوي وحذيفة في الكرسي الخلفي .. كان بوي نظره مبهم يشوف للفراغ .. سارح .. ع كل المواضيع اللي فتحناها ماشدش انتباهه شي .. حب غسان يغيرله جوه فتح الراديو وبدي يغير في القنوات بالصدفة لقي قناة تعرض في اناشيد اطفال وكانت الاغنية ( الحمد لله ع السلامة )
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
