#مُعــاويــة
:: 34 ::
خشيت لداري بنرقد .. وصلني مسج
( انا مانبي نضايقك بس وجعتني كيف ضحكت عليك )
عيوني تعبو حقد وكره وغل ع جنس حواء .. سكرت تليفوني وتلوحت ناسياً كل همومي .. وياليث تصدق الكلمات
وليت زي المومياء ضعفت وشحبت .، بان ع وجهي الهم .. رن تليفوني والمتصل رقم غريب توقعتها هنادي بس توقعي مش في محله
: ع من عابي يصرف عليها امالا ؟
تنهدت: دافع عليها برا روح بيها لحوشكم في الليل تو نجيها مشغول توا
مروان بتعصب: اسمعني جاي .. هادي مرتك وانت المسؤول انا هنا ماعنديش من يخدمها
مسحت ع وجهي بتعصب: انت شن تبي توا؟
مروان نقص صوته شويا: روّح بيها عندك دبرلها مادخليش فيك
قبضت ايدي: هيا كلماتك ؟
مروان: اي قالت المصحة دارولها خروج
تنهدت: ماهو تحسابك سند ليها مسكينة والله
مروان تفاجأ: شني ؟
سكرت عليه الخط .. وبدلت حوايجي وطلعت للمصحة .. مشيتلها للحجرة سمعت من ورا الباب دموعها وتتوسل لاحد ما
( بالله عليك تعالا انت روّح بيا .. مش قالك مشغول خلاص تعالا انت بالله عليك رضوان.. لالا نقدر نعول روحي مانبي منكم شي بس خلوني في حوش بوي ... كيف قصدكم بتبيعوه؟ .. باهي بيعو ديرو رايكم غير خلوني الايام اهيا فيه وبعدين الله ياخد عمري ويريحكم مني كلكم باهي هكي ؟ )
قطعت سرحاني الممرضة: تفضل خوي
كنت شاد مقبض الباب ومتصلب كلياً: ءء لا شي جاي لمرتي
ابتسمت وفتحت الباب .. وانا قعدت في مكاني جامد
الممرضة: كملتي بالتليفون وخيتي ؟
مسحت دموعها بالقوة مع رشفة خشم : اي تفضلي
خدت التليفون: بيجوك توا ؟
تنهدت وقريب قلبها طلع من مكانه: اي
ابتسمت الممرضة: زوجك البرا
تفاجئت : شنو ؟
خشيت وطلعت الممرضة ..
قعمزت ع الكرسي: شن قالك رضوان ؟
مصدومة تشبحلي: سمعتني ؟
رفعت كتافي: لا .. كلمني مروان يبيني نروح بيك وقلتله مشغول بس كان انذل مني وسيب اخته
شبحتلي باستغراب: كيف انذل منك !
تنهدت: اسمعي يابنت الناس انتي امانة في رقبتي .. فلهذا معاش تتصلي بخوتك لانهم زي قلتهم .. نوضي وتي روحك بنشوف الدكتورة ونطمن ع حالك
ابتسمت فوق كل الاوجاع واندثر القلق رغم الدموع معبيات العين .. وصلني امتنانه من غير كلام
...............
الدكتورة تكتب في روشيتا: هادي يااستاذ شوية فيتامينات لصحتها .. وكتبتلك في الوصفة مهدئي لو حسيتها مستصعبة النوم او صارللها أرق .. ولازم الراحة يااستاد اهتم بيها وكثف جهودك راهي بحاجتك زوجتك وباش يجيكم البيبي سليم معافى حافظ ع الصحة النفسية لزوجتك تمام ؟
ابتسمت: تمام ( خذيت الورقة مركز فيها ) يعني مافيش حاجة تخوف ؟
ابتسمت: لا لا اطمن بس تبي الراحة والفطور فوتها الفترة اهيا من برا والا جيب من امك والا امها معليشي
وضحكت الدكتورة مش عارفة ان حالي مايفرقش ع حالها اليتم مصاحبنا من اول ماطلعنا ع الدنيا .. تنهدت وشكرتها وطلعت
................
طول الطريق كانت مستندة ع روشن السيارة سارحة في الطريق .. وانا كنت ساكت افكاري تتخبط في بعض بين ظلم و عدل .. تنهدت وحطيت قبضة ايدي تحت سنوني يللي بدورها حاولت تخفف من حدة التوتر يللي عايش فيه بروحي ..
ركبنا للشقة حطيت كيسة الادوية في المطبخ : تلقي كل دواء مكتوب امتى تاخديه بالزبط
ماردتش عليا .. خشت ع طول للحمام بخطوات مرهقة فاقدة شغف الحياة .. سمعت صوت الدوش
تلوحت ع الصالون وخشيت في عالم النسيان .. الغفوات وسكرات النوم تنسيك هموما لساعات معدودة .. بس اول ماتفتح عيونك تستقبلك وتكون في انتظارك ع أحر من الجمر بعنفوانية اكبر
ع اذان المغرب سمعت بكاها ولأكون صادق قلبي وجعني عليها .. تنهدت وعصرته وهمستله
( خيرك راهي كذابة ومحترفة في التمثيل )
صليت المغرب .. وشوفت من شق الباب لقيتها تصلي .. بيني وبينكم فرحت لان مهما كانت سيئة معاي حلو تكون قريبة من ربي تخف الذنوب لان الصلاة تنهى عن الفحشاء والمنكر .. باهي لو الانسان استمر في المنكر هل معناها صلاته غير مقبولة ؟
جهزتلها فطور وبارك الله في المطعم يللي ساندنا طول فترة الصيام .. يللي لما تزوجت فرحت برمضان هذا معاي انثى .. زوجتي تعينّي ع الصيام وتوتيلي فطوري .. اااااه وبس
طقيت ع الباب بالخفيف
تفضل
سمعت صوتها الحزين .. خشيت بالشويا وولعت الضي .. غمضت عيونها بارهاق
حطيت الصفرة ع السرير: تعالي افطري مش باهي تقعدي صيام نهار وليل
ابتسمت: شكرا
تنهدت وكيف بنطلع وقفتني بكلامها: معاوية تعالا افطر معاي
وكأني كنت نراجي فيها .. قعمزت وسمينا بالله وكلينا والصمت كان جليسنا الثالث .. مامن حد نطق بحرف بحضور الاخر .. بعد كملنا وقفت بتثاقل بتقيم الصفرة تكلمت بصوت تعبان: خليها ارتاحي
ابتسمت وتنهدت بصوت عالي: ااااااه تعبانة ياربي فرج عليا
انعصر قلبي وتألم .. وكيف بنتشجع بنواسيها اذكرت خيانتها .. عقدت حواجبي ووقفت .. خديت الصفرة وطلعت
.....................
غسان: غدوا بنمشو نوقعو تعاقد مع الشركة المنفذة ويستر الله
حذيفة ابتسم: ريت لما قلتلك مرات انت تبدخ فينا واحني قاعدين محلك سر
ضحك غسان: اي والله الحمد لله ربي أنعم عليا
كنت ساكت ومش حاب نشارك ولا نخوض في اي نقاش وحوار ان كان حلو او شين ..
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
