مُعــاوية

Part 15

#مُعــاويــة

:: 15 ::

مسعود: تو تقوللي نبي نشوف البنت وبعدين تروح قبل ماتطلع .. وانت اللي اخترت الموعد تقول عندي شغل ماعجباتكش بنتي راك مش مغصوب عليها
انصدمت وعرفت ان مروان نقل الموقف بالغلط: لا والله ماهكي ياعمي نتشرف بنسبك انا .. القصة ومافيها بوي تعب طلعت نجري من غير مانكلمك بس
مسعود: هذا مروان القرد معناها كذب عليا
ابتسمت: مش مشكلة انا حاليا نجهز في روحي وتو نحددو موعد للفاتحة
مسعود: يعني موافق ياولدي ؟
ضحكت: اكيد ياعمي قلتلك نتشرف انا
مسعود فرح: ع بركة الله
سكرت منه وكنت طاير من الفرحة .. خيره الوقت بطئي للدرجة هادي .. امتى نوصل فيك رغودة ؟
انت لحقت حتى دلعتها ياراجل ! .. والله العظيم صورتك ماتحولت من بالي ؟ .. هذا حب والا وجع قلب ؟
.....................
طلع الزين من الحمام
طلع الزين من الحمام
ئولو اسم الله عليه
ئولو اسم الله عليه

غنيتها لغسان لما دوش وطلع بيجهز روحه لخطبة نهال .. جاته هستريا ضحك لانه مرتبك ومتوتر .. اللحظات الحلوة تتمنى ماتفوت .. تقعد .. توقف .. تراجينا نشبعو منها بس للاسف مانشبعوش !
لبس سورية بيضاء وسروال جينز اسود وساعته الفضية .. وانا لبست لبسة عادية تيشرت اخضر ( فستكي ) وسروال ازرق جينز عادي .. اما حذيفة فكان لابس سورية لونها سماوي وسروال قماش بيج ومع الايزار واللحية الطويلة انا شاب وانعجبت بيه الله يبارك .. استمرينا في وصلتنا الفنية واحني ندرجو في للسيارة وبوي كان لابس سورية عربية وفرملة مخططة اسود وابيض .. ركبنا لسيارة حذيفة قرر حذيفة يسوق بينا
خطمنا ع محل حلويات خدينا بكلاوة وشكلاطة مترتبات بطريقة انيقة وراقية تناسب ذوق البنات ع حسب ماقال صاحب المحل وتوكلنا
غسان متوتر وضاغط ع ايديه اكتر .. وكل شويا يقول مساوي هكي .. كيف نبدا الكلام .. شن نقول الاول ؟
لعند وصلنا ارتفع الادرينالين عنده وبدي يهستر يقول ( لالا خلاص فوتوها.. خللي نروحو .. فكونو تربحو عرقت .. لالا نحس في روحي معاق مش قادر نتحرك )
وكنا ندعمو فيه ونبصرو عليه ونضحكو
استقبلنا خوها ودخلنا للصالة .. كانت طيراز مختلف تماما ع حوش عمي مسعود .. راقي واثاثه اخر موديل عيونا متعلقة في تفاصيل البيت
قعمزنا ع جلسة فخمة لدرجة غسان قال: خسارها في تقعميز اهيا .. تحطها لوحة وتتفرج عليها بس
خش خوها: شرفتونا .. دقيقة وبوي يجي
خش بوها وقفنا استعداد هيبة او خوف او رعشة فينا الله اعلم .. سلم علينا ورحب بينا وقعمز مقابلنا
غسان كل مافيه يرعش .. بوي تبسم وقال: مرحبتين بيك يااستاذ
بوها حط رجل ع رجل: انا العميد علي &&
رفع عيونه غسان واندفع: اهلين بيك
شبحله بوها وتلفت لولده : برا جيب القهوة جلال
تلفت غسان وهمسلي: هذا هوا خوها يللي نعرفه
قطع همسه بوها وقت قال: تفضلو شن سبب زيارتكم ؟
انصدمنا
غسان: اا انا ( هرب صوته وضاع )
تكلمت بداله: خللي نعرفوك بينا .. انا اسمي معاوية وهادم خوتي حذيفة ( أشرت عليه ) وغسان ( أشرت عليه كدلك ) وهذا بوي الغالي واسمه خيري راشد اكيد تزبطه
ابتسم بوها: تقريبا
غسان زاد الارتباك عنده وضح وبدي يرعش ووجهه يصب عرق .. خش خوها بالقهوة وضيفنا
غسان الفنجان في ايده يرقص .. شديت رجله ووشوشتله: فضحتنا ياراجل اثبت
بوي: يامعاوية علاش احني هنا ؟
تلفتت لبوي وابتسمت وكيف بنتكلم قطع عليا بوها وقت قال: صدق فيكم علاش جايين ؟ .. من غير علمه ولا ماتندري ع شي ياحاج ( حرك راسه باستفزاز )
شويا كنت ح نوقف نخبطه بس تنهدت ووسعت بالي
حذيفة: بصراحة احني جايين نخطبو بنت حضرتك لخوي غسان
بوها ضحك بهزوة وشبح لجلال: شن يقول ؟
جلال بارتباك: بوي ماهو قلتلك
بوها شبحلنا: من فيكم غسان ؟
غسان ابتسم ورفع ايده: انا واعوذ بالله من كلمة انا
ضحك بهزوة وقدم راسه: عرفني بيك وخيرك ماقلتش لبوك ؟
طبطبت ع رجل غسان: ياافندي .. بوي عنده الزهايمر ف طبيعي بينسى يللي قلناله عليه
زاد على ضحكته وشاف لجلال: زهايمر ! .. ( شبحلنا ) حتى انتم زهايمر شكلكم ناسيين من جايين تخطبو ؟
زفر غسان بقوة لدرجة نفسه ريح وصلتني .. مسك اعصابه وتنهد: انا قلت لجلال كل شي وقاللي انك موافق ( شبح لجلال ) هكي صار ولاه ؟
جلال هز راسه بمعنى اي
حذيفة : لو مش موافق ياعمي مش مشكلة كل شي قسمة ونصيب
أشر بصبعه ع غسان باستهزاء : انت بتكون نسيبي يعني ؟
غسان وقف ماتحملهاش في روحه : خليني نقولك مادامها خاربة خاربة
جلال وقف وشبحله: غسان اهدا بوي مش قصده
وقفنا وانا شديت بايد بوي وقفته وقف بوها وشبحله بتحدي: خليه يكمل شن بتقول ؟
غسان: انا غسان الهادي .. هذا مش بوي اللي رافع اسمه هذا اللي مربيني ( اشر ع بوي ) وهادم خوتي من رحم الظروف مش من امي وبوي .. وانا بوي عايش بس مسافر ومانعرفش عليه شي .. ومفتخر بحياتي ووضعي الاسري .. لو عجبك وضعي وراضي اناسبك فاهلا وسهلا مش راضي وشايف روحك اعلا مستوى ف بنتك عندك وانا اكيد مش ح نموت لو ماتزوجتهاش
جلال: غسان اهدا !
بوها وقف وعيونه شرار: ناقصني غير لقيط انا
عيونا توسعو وشبحله غسان بحدة: كيف كيف ؟
قرب منه شده حذيفة: غسان تربح اهدا ؟
غسان انفعل: انا مش جاي هنا ننهان ياجلال.. قلتلك انا جاي بنخطب اختك نهال وقلتلي بوك موافق شن يللي صار ؟
علي: اسمعني جاي .. قصداً جبتك هنا باش تشوف الفرق بينا واضح ومش محتاج نوضحلك .. بنتي ابدا مش مستواها تاخد واحد شنفاك زيك
انصدمت ورديت عليه بتعصب: شن تقول انت ؟
علي: هي خودو بوكم المهبول ودرق وجهك انت وياه
جلال شد بوه: عيب يابوي هالكلام .. نهال مش رافضة
دفه وحوله ايده: خللي يروحو جايها يوم اسود من شعرها مالقت غير هالبزقليف تصاحبه
جلال مصدوم: شن تصاحب يابوي ؟
غسان شبح لعيون جلال شاف فيهم الخيانة والخذلان .. سكت وماردش
انا خديت بوي وضربت غسان ع ايده: هيا غسان اطلع
بوها شبحله من فوق للوطة : اياك ثم اياك تولي مرة تانية اقسم بالله تلقى روحك في الشيلّا
غسان شبحله بحقد وكره: تي كان وليت ادفل ع وجهي مش غير في الشيلّا
بوها تعصب ودف جلال: طلع هالكلاب برا
جلال شد غسان: سامحني ياغسان بالله عليك
غسان فك ايده وطلع زي الطلقة لحقته انا وحذيفة .. كنت نلبس في بوي في كندرته وقت سمعت حاجة انكسرت مرش قد يكون طواسي اي شي مرش المهم .. وسمعت صوت بوها عالي وبدي يقربع ويعيط عرفت انه ح تلاقي حتفها من الاهانات والضرب .. وجعتني وقلبي تقطع عليها
...................
الصمت كان سيد الموقف
شتان بين ذهابنا والعودة .. غسان يسوق بسرعة جنونية ومش قادر يتحكم في اعصابه قرر يسوق بيطلع كل طاقته السلبية في السواقة رغم اصرار حذيفة عليها .. بوي بينه وبين نفسه يسأل شن صار وشن قلب حياتهم ؟
حطنا غسان في الحوش وطلع بالسيارة
حذيفة: خايف عليه يدير شي في عمره
كنت شاد ايد بوي: هالكلب بوها ماخلا كلمة موجعة الا وقالها
حذيفة: هذا علاش ربي حرّم هالعلاقات نوجعو في قلوبنا يامعاوية ونفسيتنا تتدمر تو كان مايعرفهاش راهو ماهمه فيه هانه والا لزه يجيب غيرها لكن هوا اكيد قلبه محروق عليها .. مابُنِيَ ع باطل فهو باطل
تنهدت: ماتزيدهاش عليه بالله عليك لو روح تفادى النقاش معاه
حذيفة: لا مستحيل نكلمه هي خش خش نحس في بوي جعان وبيرقدً
تلفتت لبوي : نحطلك تاكل ؟
بوي: اي يامعاوية خيره لزه هداك الراجل والله الوليد باين محترم وولد ناس
ابتسمت وشديت ايده: اي ولد ناس فعلا غسان حسبي الله ونعم الوكيل في اللي كان سبب
.................
الساعة 2:00 صباحاً
حذيفة مقعمز ع الصالون يهز في رجله بتوتر: عطل يامعاوية
كنت متكي ع المدخل ومضايق: وين ممكن يكون راني احترت
حذيفة: وقتها لما طلعنا من الحوش بتنا في المحل ومشيت امبكري للمحل مالقيتاش
زفرت بقوة: اقسم بالله كرهت البنوت في جرايرها
حذيفة: هيا توا اشبح شن صاير فيها ؟
رن تليفوني : من يتصل بيا عقاب الليل ( وين شفت المتصل لقيته ) هذا غسان ياحذيفة
حذيفة وقف بحداي : رد بسرعة
هزيت راسي بالايجاب: ايوا غسان انت وين ؟
كان صوته مخنوق ومضايق: تعالالي يامعاوية والله ماعاد متحمل اقسم بالله ماعاد عندي طاقة
تنهدت بقلق: وين انت ؟
غسان : ع البحر جيهة جزيرة اسبان
تنهدت براحة: تمام جايك انا وحذيفة
غسان: وبوي ؟
ابتسمت: تو نديرو راي
سكرت الخط حذيفة قاللي: براله انت تو نلحقك لما ينوض بوي
طبطبت ع كتفه: تمام بينا ألو
هز راسه بالايجاب وابتسم
ولعت سيارتي وع طول اتجهت للبحر .. بانت عليا سيارته كان القمر مضويلي طريقي .. وصلت فيه لقيته مقعمز ع الرمل وثاني رجليه لصدره ولاف عليهم ايديه .. خبطت ع كتفه بلطف : هونها تهون يابو رفيق