#مُعــاويــة
:: 17 ::
وصلني مسج ع الماسنجر .. كنت نستنى فيه .. ابتسمت لا اراديا .. عيوني لمعو من الفرحة اول ماقريته
( خير ياطير .. وينك قداش ليك معاش تبان المهم تلاقيت مع غسان وقاللي خطبت بنت عمي مسعود خود هي زبون الفاتحة عليا انا )
رديت عليه بمسج
( هوا انا خطبت وانت وصلت للفاتحة ياراجل ؟ .. مازال وقت )
( عادي انا من توا حجزت هديتي .. نبعتلك صفحة فيها زبونات خدمة يد شوف وتفرج ووازي اللي تبيه وماعليكش في حقه )
( تحسابه رخيص شكلك ! .. فوق الالفين الحاجة الباهية )
( انا قدها شن دخلك فيا ؟ )
بعتلي رابط وين فتحته لقيتها صفحة للزبونات درتلها اعجاب وسكرت تليفوني .. مش وقتها توا
..................
مرّت الايام وبديت في البني شويا شويا .. بنيت فوق الاستراحة دارين ومطبخ وحمام ووسط الحوش درته واسع شويا وصغرت من المطبخ ودرت بلاكونا ع الفيراندا يللي تحت ..
العامل: ازاي ياباشا دا احنا بنخلص
انا: مادخليش فيك باين مايل بتعدله
غسان: كيف تشوف فيه مايل مافهمتش ؟
العامل: شفت ياباش مهندس .. انا مش شايف ميول ولا حاجة !
شبحت لغسان بحدة: عدله قلتلك الجاية لو نلقاه مايل تحلم تاخد فلوسك وتمينا
طلعت ولحقني غسان: اسمع شكلك متوتر اطلع غير جو وبعدين شوف الفاصل مرة تانية راك درهتلي كبدي اطلع في الرز عظام
قرنت حواجبي: هادي خدمة التبلبيز تو لازم تزوجوني قبل رمضان ؟
ضحك غسان: درق وجهك دير دورتين ع الشارع وتخايل رغودتك وتعالالنا
تلفتله بتعصب: ضم فمك غسان خيرنا عاد
ضحك غسان: ماشي ماشي بتاكلني خزي .. شن فيها كان بصرنا ع مرت خونا !
كلمة مرت خونا هدتني شويا وابتسمت: ماتزودهاش بس
غسان: حااااضر
......................
طلعت بسيارتي لشارعنا كنت بنخطم ع الورشة قلت خللي ندير لفة ع حوشنا ليه وحشة .. نذكر ايامي وحياتي فيه وطفولتي اللطيفة .. خطمت من قدامه ودرست السيارة نزلت قدمت ع سوره ولمسته بايدي وخطوة خطوة بدت ترفعني للذكريات
بوي: معاوية ياولدي هذا خوك ولازم ادافع عليه
كنت مصرّ : مانبيش كل مايدير مشكلة في الشارع بنقعد انا نحز وناكل في كفوف من الولاد بداله
بوي ابتسم وقعمز لمستواي وعيونه في عيوني: مهما كان هذا خوك .. تنضرب تنهان يصير فيك مايصير ماترضاش في خوك
قرنت حواجبي: اشمعنا يعني غسان ديما بمشاكله خيره حذيفة عاقل ؟
استمر في ابتسامته: قلتلك انا من قبل مش كلكم زي بعض تو انت زي حذيفة !
ببلاهة: خير مني هوا يعني ؟
ضحك: لالا انت عندك ميزات زي ماعندك عيوب وحتى حذيفة هكي .. غسان مشاكلي لكن يحبكم ومايرضاش فيكم واغلب مشاكله ع خاطركم
ربعت ايديا: لالا هوا مايحب حد ديما يتعارك مع الناس
حط ايده ع كتفي: ياولدي ( سكت شويا وشبحلي ) خلاص تمام ( وقف ) تو نرده لمكانه واقعد انت وحذيفة ولادي بس
قدّم بخطواته قرب الباب الرئيسي وينادي ع غسان داخل : غساان ياغسااان لم حوايجك خللي نحطك عند ناس تانية اهني معاش نبوك تقعد معانا .. بنلوحك ياغسان
كان صوته عالي ويتكلم بتجهم وقارن حواجبه .. لحظتها خفت نخسر غسان .. غسان مهما كان بمشاكله بس حنون علينا وحتى نحبه .. اي اي نحبه ضايف نكهة حلوة للحوش
طلعت نجري لبوي وتمسكت في رجليه: لالا خلاص ( غمض عيوني بصعوبة مانبيش نشوف مشهد تلويح غسان ) خللي يقعد معانا خوي هذا
ابتسم بوي ونزل لمستواي: يعني تمشي تعتذر منه ع كلامك وتسامحو بعض وتلعبو صح ولاه ؟
هزيت راسي بالايجاب: اي اي خلاص
طلعت نجري فوق لغسان وقتها وتغمرته واستسمحت منه لاني جرحته بالكلام
فقت ع الواقع رفعت عيوني فوق خوفا من الدموع تسبقني .. ونزلت عيوني لقيت مروان طالع من حوشهم ابتسمت ولوحت بايدي ع اساس نسيبي وحركات
جاني زي الغول : خيرك جاي هنا.؟
استغربت سؤاله: شارعنا شنو !
مروان: اسمع معاوية ماتقعدش سرّي مرّي ع الشارع وجو هذا شارعنا وابصر شنو .. وبعدين عيونك يبلحصو فوق واصلا لاش جاي لشارعكم يابو شارع انت مش لزوكم منه الحوش ؟
استغربت: لزوكم ؟
مروان بحدة اكتر: اي ياريت تحترم نفسك وماتجيبش لروحك ولاختي الدوة بحركات المراهقين اهيا ؟
شديته من تيشرته: حركات شنو واحترام شنو ؟ انت خيرك بالع راديو والا بالك تحسابني صايع زيك ومتاع مواضيع .. وبعدين تعالالي جاي بالك تحسابني ميت ع نسبتكم ؟ .. فيق ع عمرك واعرف ع من تسترجل
رخيته وبديت نساويله في تيشرته: واحترم نفسك
دفيته بالخفيف وركبت سيارتي ولعتها وطلعت للورشة .. درستها بغل ونزلت حذفت المفاتيح ع الطاولة وقعمزت ع كرسي وسندت راسي
طارق خش تغيرو ملامحه: خيرك تخبط ؟
قدمت بجسمي : الحمار اهوا مروان جايني يهزب شارعنا ومراهقين واشبح شنو !
قعمز طارق ع الكرسي : مافهمت شي
تنهدت: مروان الحيوان
طارق اندفع: فهمنا حيوان وكلب وولد ستين كلب شن تاني ؟
تنهدت ورجعت براسي التالي: شن وضعه في الشارع ؟
ضحك بهزوة: تعرف انت عاد في النهار شيخ وفي الليل ( سكت شويا ) مافيش داعي نكملها
تنهدت: عيّل يحسابني ميت عليهم
شبحلي طارق: انت ميت فعلا مش خطبتها وتميت فيها ؟
حطيت ايديا ع الطاولة وشبكتهم في بعض بتعصب : وكان خطبتها يعني خلاص نموت لو ماخديتهاش ؟
ابتسم طارق: في النهاية البنت ماليهاش علاقة بخوتها .. انت شن جاتك عليهم ؟
رجعت لوضيعتي: شي انسى .. شن جو الورشة ؟
طارق: ماشية امورها ( تلفتلي ) انت طمني ع حوشك ماشي فيه كويس ؟
ابتسمت: لتوا تمام .. مازال سريب الكوجينا والمواد الصحية
طارق: وتلايم الحسبة ؟
تنهدت: اظني
طارق خلي ع الطاولة بالخفيف : يلا ربي يهنيك ويعاونك
ابتسمت: امين ولك بالمثل
طارق وقف: ان شا الله .. خللي نمشي نطمن ع العيلة ونجي مش معطل .. نجيبلك غدي !
ابتسمت: ياريت والله وكان مسقي ااااخ ياحليلي
ضحك طارق : انا ناقص حنان وانت ناقص في بطنك
ضحكت: البطن قبل الوطن
طلع طارق بعد ممكن خمس دقايق سمعت صوت بنت تتكلم برا تسأل في العامل .. طلعتلها
واطيت عيوني: تفضلي اختي
البنت: انت صاحب الورشة ؟
شبحتلها: اي تفضلي
البنت: سيارتي شوفهالي
قرنت حواجبي يايوم ماباش يفوت .. يعني جيتي قبل خمس دقايق راهو صلحهالك كاظم الساهر : تمام
درت دورة ع السيارة : هادي البومبتشي تبي التغيير
استغربت: هادي شن معناها ؟
تنهدت: هادي معناها ديري دورة وخليهالي
لوت شاربها: تمام اعطيني رقمك
خيرها هادي ؟ .. رقم مني تبي ؟
رحعت للمكتب خديت الكرت ومديتهولها: تفضلي
خداته وابتسمت: يعني اسمك معاوية ؟
اسمي المرك هادي كرهته : اي
البنت: تشرفنا
مدت ايدها .. حطيت ايدي ع صدري: سامحيني وخيتي مانسلمش
البنت اضايقت: سلام هوا مش ( سكتت شويا وبعدين ) اوكي اوكي خليها عندك
هزيت راسي: باهي تفضلي روحي
مشت خطوتين ورجعتلي: يعني امتى نجيها ؟
قلت بتعصب: اتصلي بينا تو نقولك لو جهزت
قدمت وسندت روحها ع السيارة: عادي نتصل يعني ؟
شبحتلها بحدة: مافهمتش وخيتي راك جاية للورشة مش واخدة رقمي ره
ضحكت باغراء: ياريت رقمك والله
تعصبت: معليشي خودي سيارتك وبري لورشة تانية احني اعتزلنا خلاص
خشيت للورشة الداخل لحقتني: مش قصدي اسفة
من غير مانشوفلها: خودي سيارتك وتوكلي تربحي
قعمزت ع الكرسي وحطت رجل ع رجل : انا مش جاية للسيارة اصلا
شبحتلها بحدة: اها وشن ان شا الله ؟
شبحتلي : جاياتك انت .. ياوخيي حس بيا قداش ليا نشوف فيك ومش قادرة نتجراء ونكلمك لعند سمعت انك خطبت اهني قلت لازم نتدخل
شبحتلها باستغراب: تتدخلي ؟
البنت: اي .. انا عارفاتك مصور فلهذا بنضربو عصفورين في حجر
ربعت ايديا: والله وكيف هادي ؟
البنت: انا مودل واسمي هنادي وصاحبة ماما عندها بوتيك بس محتاجين مصور شن رايك ؟
ضحكت بهزوة: في شنو ؟
البنت وقفت وقدمت جيهتي وقعمزت ع حافة الطاولة: في الموضوع
رفعت حواجبي ووسعو عيوني : اي موضوع ؟
ضحكت بصوت عالي: خيرك معاويوو استيعابك بطئي ؟
فنصت عيوني: انت شن تبي ؟
البنت وقفت : نبيك
قعدت مصدوم وبدي جسمي يرعش مع بعضه .. هادي الحالة المفروض تجيها هيا بنت وتخاف ع سمعتها ووضعها الاجتماعي .. بس صاير توا العكس
البنت ركزت في عيوني: اي. اي نبيك .. وندير اي شي ع خاطرك يامعاوية .. ماعطيتنيش فرصة نبينلك حبي بكل
فنصت عيوني
استرسلت في الكلام: بالله عليك ماتمش موضوعك معاها وخليك معاي اقسم بالله ح توصل للنجومية .. لكن لو تزوجت بنت عادية شن ممكن تقدملك ؟ .. لا تقدر تكون نجم ولا اصلا تحلم .. اصلا اقصى تفكيرها اطلع الدجاجة من الفريز للغدي
كنت مركز فيها وفي وقاحتها
هنادي: أما انا كلي ليك من توا من اللحظة هادي .. وسيلة باس توصل بيها لحلمك
فنصت عيوني اكتر: حلم شني مقابل الشرف ؟
هنادي ضحكت باستهزاء: ماعندي من مني بنخاف .. نبي ع ايدك تكون هدايتي
رفعت صبعي السبابة: اسمعي يابنت الناس انا لا نفكر نكون مصور مشهور ولا نجم ولا الوهم اهوا .. وبعدين من قالك انا نبي نربح فيك الاجر ونهديك لطريق الصح ؟ .. هي لمي روحك وتحشمي ودرقي وجهك
وقفت بثقة: وراك وراك والزمان طويل
طلعت من الورشة وولعت سيارتها وطلعت .. ع جية طارق شافها خشلي مستغرب: شن قصتك كل مانطلع يجوك زباين بنات !
قعمزت ع الكرسي وتنهدت وحطيت راسي بين ايديا : حظ اغبر
ضحك وحط الصونية قدامي: جبتلك غداك .. لكن الباين البنت قنينة الزفت
شبحت للصونية وخديتها: سلم ايديها الباهية
ابتسم: صحتين .، خيره وجهك هكي ؟
شبحتله : تي ( تفكرت انه هادي بنت وعيب انضيع سمعتها ) شي شي
خديت الكاشيك وبديت ناكل : تغدا معاي
شبحلي: ياراجل البنت عجبتني هلبا ونحس في روحي شايفها
شايفها في الكناسة اكيد .. والا في وسط مستنقع
طارق: مش عارف وين ؟
خبطت الكاشيك: ياراجل نفختهم .. كول واسكت وانت كل بنت تشوفها تقول في نفس الكلام
ضحك: باهي شن كانت تبي منك ؟
لفيت بعيوني ع الورشة : تبي سحلب
رفع حواجبه مستغرب: شن؟
غمضت عيوني: قسما بالله راك وترتني تي ورشة الهم شن تبي يعني كريم اساس ؟
ضحك : اضرب يا .. كريم اساس مرة وحدة بدينا نزبطو
واصلت ماكلتي وماعاش رديت عليه
#Dudu
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
