مُعــاوية

Part 25

#مُعــاويــة

:: 25 ::

شبحت للتيلفون وابتسمت: this is Dad
زمري قالت ( داد ) اكيد معناها بوها .. كيف بنتفاهم معاها هادي ؟
قمت التليفون وكتبت ( لو يمكن تكتبين كلامك هنا لأفهمك )
ابتسمت وهزت راسها بالايجاب
وقفت شبحت للهادي كيف غافي ومايندري ع الدنيا وين ! .. تلفتلها وابتسمت وطبطبت ع كتفها .. طلعت من الغرفة للاستعلامات يللي بدورهم بعتوني للامانات وخديت تليفونه وحاجاته ورجعت بيهم للحوش
.................
حطيتهم ع الطاولة ورفعت عيوني فيه
غسان: شن هادم ؟
قعمزت ع الصالون: حاجات بوك
وقف وفنص فيا: انت خيرك مستغني ع حياتك ؟
وقفت وشبحلته بصرامة: الناس اللي في مكانك تمشي تجري تبوس رجليه وتفرح بإن باب من ابواب الجنة انفتحله ويلقى من يدعيله .. انا بوي يرجع يوم واحد بس تي نرقد في حضنه رقاد ماعاد متحرك منه
عقد حواجبه: هداكا بوك .. لاخر لحظة قعد معاك ودار جهده باش انتم كلكم تعيشو لكن قدر الله ماشاء فعل .. أما انا لوحني في الدار واستغنى عليا
حذيفة طلع بعد سمع العياط: خيركم ؟
قربت منه: اسمع منه اعطيه فرصة غسان مايبداش قلبك اسود .. ربي فرض عليك اطيعه وتبّر بيه .. بوك هذا ؟ .. مجرد فكرة انك معاش يتيم بروحها تفرّح
قعمز يحك في جبهته: لوح عليا البلي هذا .. انا فرحان وهلبا بكلمة يتيم وفرحان باني تربيت عند بوي خيري كافل اليتيم وماتهمنيش لا نهال لا عشرة زيها .. انا ماننكسرش يامعاوية
جثيت ع ركابي قدامه: كلنا ننكسرو .. كلنا ياغسان نمرو بظروف نقعدو نجلدو في رواحنا كلنا انا وانت وحذيفة كل واحد يكسره شي معين يختلف ع التاني .. غسان سلم وخيي اهدا وفكر كويس ( وقفت وسندت ظهري ) بوك مغمي عليه في الطبي وقاعد تحت الملاحظة وفي شي تاني خايف نقولك عليه تتنرفز
حذيفة رفع عيونه فيا باستغراب
غسان: اصلا مازال في هم اكبر من اللي انا فيه ؟ .. قول قول
لفيت بعيوني بينه وبين حذيفة
تنهدت: بوك جايب معاه بنية في عمر العشر سنوات تقريبا .. الواضح انها بنته والبنت تقطع القلب في المستشفى
جاته هيستريا ضحك
حذيفة وقف جنبي : بجديات ؟
هزيت راسي وشديت دمعتي بالسيف: اي
غسان يصفق بايديه: قلتلك انا مش جاي محبة فيا جاي بيبليني بلوة هكي كبرها .. جايبلي فرخة الحرا...
شديتله فمه وسكته بالقوة: اسسسس سكر فمك .. هادي اختك مهما كان
دفني بالقوة: لا اختي ولا عندي اخوات .. وان شا الله معاد ينوض منها
وطلع قربع الباب .. انهد حيلي : شن الحل بالله !
حذيفة: مصيبة لو هادي اخته مصيبة هكي كبرها
شبحتله: علاش ؟ البنية صغيرة والله تسخف كيف قاعدة مع بوها والكارتة ماتفهمش عربي
حذيفة يضغط ع جبهته بتوتر: لو اخته فعلا كيف بيقدر يعيشها غسان ؟ .. ووين ! راهي مسؤولية يامعاوية
تنهدت بوجع: عارف مسؤولية لكن شن بنديرو ؟ نلوحوها في الدار وتتمرمد زي ماتمرمدنا؟
شبحلي بوجع: ربي يشفيه ويعيش لبنته يارب
شبحتله بحدة: ولو توفى ؟
حذيفة تنهد: الله يعين
تنهدت وتكيت راسي ع المسند : غبي غسان اهوا
حذيفة: ماتلوماش
شبحتله: البنت زي القمر آية من الجمال
شبحلي: كان تسمعك رغد
ضحكت: ماكذبتش .. ( قمت راسي ) حق هيا وين ؟
حذيفة ابتسم: طبعا اكيد ركبت .. روحت لقيت بوي معاها فوق خديته منها وقالتلي غدانا في المطبخ
ابتسمت: الله يبارك فيها
................
نلبس في السبيدرو : رغد هيا ساعتين تلبسي ؟
طلعت : هيا واتية
رفعت عيني لقيتها لابسة بلوزة فوق الركبة واسعة لونها بيج وسروال قصة وحدة ازرق كحلي ( جينز ) ووشاح زيتوني شيفون وحاطة شوية مكياج ولابسة خواتم وحوسة .. وقفت قعدت نلف عليها وهيا مبتسمة فرحانة
وقفت مقابلها: عبايتك وين ؟
شهقت: تو الاناقة هادي كلها مش عاجباتك ؟
رفعت حاجبي: لانها عاجبتني نسأل عبايتك وين ؟
طلعت كلينكس ومسحت الروج: هآ الروج مسحناه
شبحتلها باستغراب: شن دخل الروج ؟ هداكا خليه موضوع بروحه .. بري البسي عبايتك والحقيني للسيارة
خبطت رجلها: معاوية ياسر تعقيد
تلفتلها وانا ماشي: انا معقد وشلافطي هيا عبايتك وهيا
خشت اتمتم في كلام مش مسموع ليا ضحكت وركبت السيارة نراجي فيها
ركبت تخبط لبست عبايتها طبعا .. ولعت السيارة وتوكلنا ع الله .. حاطة راسها ع الروشن وسارحة
نخصتها ع جنبها: غير عدلي علينا
بعدتلي ايدي: ماتكلمنيش
ضحكت: ياسر من حركات الصغار .. تو المرة اللي فاتت لابسة عباية شن جاك توا ؟ بتهبلي ؟
شبحتلي بصدمة: المرة اللي فاتت ع قولتك لابسة قفطان قصير شن تبيني نطلع بيه هكي والا نلبس تحته سروال وتيشرت ؟
ضحكت بدموعي: ياودي من يغلبك ؟
زفرت بضيق: ربي بس
شبحتلها: والحمد لله ياقوية انتي
ماردتش عليا
عيوني ع الطريق: حق ماقلتلكش ؟
مابتش ترد .. عرفتها زعلت
عاودت كلامي: ماتبيش تعرفي شنو ؟
رفعت راسها بنفي : هئه
تنهدت وتكلمت بصوت واطي : شفت بنية امبكري يالطيف
تلفتت متعصبة: شنو ؟
شبحتلها: شنو ؟
رغد: انت توا قلت شفت بنية تهبل !
رفعت حاجبي: انا !؟
خبطت ع رجلها: معاوية بلا استفزاز
ضحكت: اي شفت بنية قنينة وقعدت تقوللي يابختها مرتك واكيد ع حلاوتك هادي هيا شينة
شهقت: مصح وجهها ! ماهو ماشافتنيش
انصدمت: شن قصدك انتي احلا مني ؟
هزت راسها بثقة: امالا شنو ؟
ضحكت : عبد الواثق
رغد: بالله عليك هكي قالت !
وقفت عند الاشارة: علاش متزوجتيني كاني شين هآ ؟
ضيقت عيونها: شن متزوجاتك لجمالك انا ؟ .. بنحطك في كاترو وبنعلقك ؟
رفعت حواجبي: اها امالا شنو ؟
تنهدت: راجل ويبوله الزين حق حق .. تي انت ادير اللحية خلاص مع هذا مازلت احلا منك
وطلعت لسانها تستفز فيا
ضحكت: ومن قالك ارضي بيا ؟
طلعت بعد الاشارة اخضرت
رغد: خديتك لزين افعالك وياسر مانبيش نكبرها بيك هلبا تمشي تولي للبنت وتقوللها عندك الحق مرتي شينة
ضحكت وحطيت ايدي ع ايدها: عادي شينة وراضي بيك
شهقت: شن راضي بيك اهيا ؟
شبحتلها: تتفكري بوك لما جيت خطبتك !
ضحكت: ماتفكرنيش تربح
عصرت ع ايدها: هداكا احلا يوم في حياتي
ضحكت : ربي يحلي ايامك يارب
ابتسمت: امين
بعدين بعدت ايدها: حق من هيا البنت ؟
ابتسمت: مش قلتلك ع بو غسان !
رغد: ماتقوليش متزوج وجايبله بنت يبيها تقعد معاه
ضحكت: يالطيف
رغد: قسما بالله تقول مسلسل
تنهدت: ربي يعينه وخيي
تنهدت رغد: امين .. مسكينة البنية ( فنصت عيونها فيا وقربت من كرسيا ) نهارك احرف تطلع عاطي وواخد معاها ؟
دفيتها بايدي لكرسيها: ارقدي تربحي البنت انجليزي صافي وانا ثقافتي كوري
ضحكت بدموعها لين خرب جمالها وساح المكياج
رغد: نهارك تطلع تفكر فيها وبتتزوجها عليا !
ضحكت: توقعي شن فيها الواحد يصلح النسل
شهقت: هكي معاوية ؟
درست السيارة قدام حوش بوها بوست ع ايدها: مانبدلك بكنوز الدنيا انتي قمرهم .. وبعدين تعاليلي جاي امسحي هالهم من ع خليقتك واخرلك مرة
ضحكت بخجل: حاضر
ابتسمت: هي انزلي .. تو نجيك بعد صلاة العشي تمام !
رغد: تمام رد بالك ع روحك
.....................