مُعــاوية

Part 9

#مُعــاويــة

:: 9 ::

وقف غسان وكان وجهه متغير ..قعمزت ويتنفس بسرعة
باستغراب: خيرك ؟
تلفت لبوي بعدين شبحلي: خو نهال هنا
ضحكت بدموعي معاش قدرت نوقف
غسان: مافهمتش قلت نكتة انا ؟
وقفت ومازلت مش قادر نتكلم: وجهك يضحك
غسان: والنبي ضم فمك
سكتت وانا مزلت بنضحك: معاش تقول والنبي
غسان قعمز ع ركابه قدامي: معاوية نكلم فيك بجد ره .. الولد لقيته يعني فرصة
ع وقفة حذيفة مدلي كرتوني فيه اربع اكواب ورقية قهوة وحدة منهم نسكافي
حذيفة: النسكافي ليا
ومد لبوي كيسة فيها كيكات جاهزة: تفضل ياغالي
خدي منه بوي الكيسة: الله يبارك فيك
فتح الكيسة وطلع طرف ومدهولي : كول معاوية قنينة الكيكة أمي تحبها
ابتسمت: امك تحبها بالمربى ؟
ابتسم وتنهد: اي غالية عليها زمان نمشي للخدمة اديرللي فيها
ابتسمت وهمست بصوت ماحدش يسمعه: الله يرحمها .. الام تقعد في الذاكرة مهما مرّ ع الانسان من ضغط وهم ومرض
قمت عيوني لغسان لقيته سارح: غسان كمل
غسان: شن بنكمل .. بنمشي لخوها وبنهدرز معاه وبنتعرف عليه وبعدين ساهل
حذيفة:فهموني
غسان بلامبالاة: انت بالذات مش لازم تفهم شي
حذيفة فتح تليفونه وشرب شويا من النسكافي: ملّح
تنهدت: ماشي دير رايك المهم ماتندمش بعدين بس
وقف غسان ينفض في حوايجه ..
عيط حذيفة : تي هآ ياهم التراب في النسكافي
ضحك غسان: ماشي معاوية ( تلفت لحذيفة ودار تنفيضة سريعة لسرواله) صحتين حذوف
حذيفة غطى الطاسة بايده: مش عارف منين جابها حذوف اهيا ؟ .. ماعمره حد دلعني هكي
تبعد علينا غسان ..
ضحكت: انت لحقت تتدلع بالله
ضحك حذيفة: تو يجي من يدلعني
ضربته ع ظهره: شنو ياشيخ في جديد ؟
حذيفة بخجل: مافي شي غير نبصر ( شرب من النسكافي ) انت قوللي شن موضوعك مع بنت مسعود !
ضحكت وشبحت لبوي يللي منهمك في الكيكة والقهوة: مافي شي .. غير خشت خاطري ونبي نتقدملها رسمي وخايف
حذيفة: من شنو خايف ؟
انا: مانعرفش ممكن متردد في الخطوة هادي .. انت عارف مادياتي
حذيفة: تدوي هلبا بالماديات انت .. برا اخطب وبعدين شوف
انا: مانحطش روحي في موقف .. يسألني وين بتسكنها ؟ .. والا تبي ذهب وهيلولا
ضحك حذيفة: مش كلهم .. في بنات يهمهم الراجل
انا: الراجل ومعاه .. شن نجي نهز طولي نعرف انا البنات شن يبو
ضحك بهزوة: شن يبو ياخبرة
قمت القهوة شربت شويا : تبي حوش بروحها وتبي تسافر شهر عسل وتبي ترفعها لمدة شهر لكافي لاتيه او اي قهوة هكي معروفة باش تصور كيف عاد
ابتسم حذيفة: تتكلم ع الوهميات انت .. شوف ياخوي بنت الاصل تبي راجل يصونها لو انت تشوف روحك راجل برا اخطب ودير الواجب معاها
باستغراب: يعني نمشي ونقوللها راك تسكني في دار وذهب وسفر ردي بالك تحلمي بيه ؟
ركز عيونه فيا: ياودي مش هكي .. الواجب والاصول تسكنها في سكن مريح ومستقل والذهب هدية منك ومحبة لو كان عندك وقادر .. والخدمة ضروري تعيشها يعني اكيد مش ح تجيب بنت الناس وتبهدلها معاك في الفقر ؟
مسحت ع وجهي: الزواج توا لمن استطاع اليه سبيلاً .. ربي يعاون الشباب بس
حذيفة: لا كذب عليك .. الزواج عفة وستر مش صور ع الفيس .. لما انت تتزوج وتعف نفسك مع بنت الناس وتصونها وتخافظ عليها ح تشوف الزواج نعمة ربي اكرمنا بيها ولو تبي تخلي الزواج مجرد غلاف لشهواتك وقولة آهو تزوجنا ماعنسناش ح تشوفه جحيم
ابتسمت: انت علاش ماتزوجتش
حذيفة شاف للمجهول وضحك: مازال مالقيتش بنت الناس
انا: معقولة البلاد معبية
حذيفة: اشبح وين نصيبي يراجي فيا
ضحكت وخبطت ع كتفه: ربي يسعدك ويرزقك بنت الناس اللي تسر قلبك وخاطرك
حذيفة: آمين .. وبعدين انا نبي نكمل في الشريعة ونتخرج وع طول بنتزوج
استغربت: وين بتسكنها ؟
حذيفة: لو حصلت شغل محترم مبدئيا بنأجر
ضحكت بهزوة: من بيعطيك بنته في الايجار
حذيفة: يالطيف يامعاوية قداش مامتشائم .. شن امهاتها وابهاتنا عاشو طول في العز ماهو تمرمدو وتنازلو باش كونو حياتهم .. ( تلفت لبوي ) ابداها من بوي خيري ماهو قالك كنت في دار مع اماليا وشوف توا الخير اللي هوا فيه
شبحت لبوي وباستغراب قلت: ع سيرة اماليه .. بوي ماعنداش حد ؟
حذيفة رفع كتافه: مانعرفش .. ماعمره حد جي وقال انا من اهله
قمت حواجبي وشفت غسان بعيد ضحكت: غسان تلاقى مع خو نهال
حذيفة شاف لنفس الجيهة يللي نشوفلها: كيف صار ؟
حكيتله التفاصيل .. ضحك وقال: مهبول الولد اهوا
رديت عليه وانا مجتاحني الخوف: لكن تعرف خايف عليه
حذيفة: علاش ؟
انا: لانه شكله متعلق بيها وخايف يردوه
حذيفة: يصطفل هذا راجل ويعرف مايصلح بيه
تنهدت وسكتت
..............
اتصلت بيه: غسان ماعرفتش انا متلاقي معاها والا مع خوها
ضحك: ضم فمك يسمعك .. بتروحو ؟
انا: اي هيا ياراجل ظلمت الدنيا وبوي قلق
غسان: جاي هي
روحنا للحوش ساعدت بوي يبدل حوايجه ودخلته سريره يرقد يرتاح .. سكرت عليه الباب ومشيت لداري نوتي في حوايجي بندوش خشلي غسان وقعمز ع السرير
غسان: خللي نحكيلك
ضحكت وانا عاطيه بالظهر فاتح الدولاب وندور في حوايجي: نسمع فيك
غسان: طلع اكبر واحد في عيلته وتقريبا هما 3 بنات واربع ولاد ويخدم في الداخلية و
قطعت عليه وتلفتله: شن بنخطبه ؟ .. ادويلي شن استفدت من المقابلة كلها
غسان ضحك بهزوة: مقابلة شنو ؟ .. اللي استفدته انهم عيلة محافظة
ضحكت وحطيت حوايجي ع الكمادينو وقعمزت بحداه وأشرت ع قلبه : اهوا مرتاح للموضوع ؟
ضحك بخجل: مانعرفش
ابتسمت وطبطبت ع كتفه: ربي يجيب اللي فيه الخير .. ( طبقت ايديا ع بعض ) توا شن الخطوة التانية ؟
شبحلي وعيونه ذابلات: شوف معاوية ( بان عليه الارتباك وصوته هرب ) انا
شبحتله وقرنت حواجبي: شنو قول ؟
مسح ع وجهه وتنهد: مانبيش نخسرها .. خسرت هلبا معاش نبي نخسر حد
ابتسمت: ماتخافش لو كانت ليك صدقني ح تكون ليك ولو مش ليك لو ادير المستحيل مستحيل تكون ليك
غسان: مافهمتش هذا اسمه تفائل ! ( ناض يقلد في كلامي ) مستحيل تكون ليك ( دفني بالقوة ) والنبي نوض درق وجهك
ضحكت وحذفت عليه المخدة: معاش تقول والنبي ياحمار
هز راسه باليأس: مستحيل يصير منك ره
ضحكت وطلعت من داري باتجاهي للحمام بندوش .. علاش وين نمشي يخطر عليا طيفها وملامحها .. علاش نفكر فيها ؟ .. هذا انا ماعرفت شي عليها وهكي صاير .. لكن ابتسامتها ضحكتها يامعاوية تقتل .. خلاص انسى خليها للوقت وخليها ع ربي
فتحت الدوش ونسمع في تقربيع باب الحمام .. عيطت بصوت عالي : خير بلاك اندوش ره
حذيفة بصوت واضح في مصيبة: تي اطلع ضروري
لبست حوايجي وطلعت مازال نلبس في تيشرتي : شن في ؟
حذيفة وملامح وجهه تخوف: في واحد لوطة قال انه ولد خو بوي
شبحتله بهزوة وضحكت: جاي تتسهوك عليا ع خاطر سألت عليهم امبكري ؟
حذيفة خبطني ع كتفي: تي نكلم فيك بجديات .. لوطة مقعمز في الصالون
انا: غسان وين ؟
حذيفة: وين نندري .. انزل معاي خللي نشوفوه البلوة شن يبي عقاب الليل
تكلمت بتعصب: اسبقني لاحقك هي
خشيت لداري مالقيتش غسان خديت تليفوني ونزلت من الدروج نسمع فيه يقول ( نبي نشوفه عمي وين ؟ )
نزلت بكل ثقة مديت ايدي بنسلم: السلام عليكم
وقف مد ايده: اهلين .. وانت مني ؟
قعمزت مقابله وجنب حذيفة يللي كان مصدوم في وقاحته: انا معاوية .. انت اللي منو ؟
قعمز حط رجل ع رجل وطلع دخان بيدخن
حذيفة تعصب : معليشي ماادخنش .. اطلع برا دخن
ضحك بهزوة وحط السيجارة بعد طفاها ع الطاولة
حذيفة همسلي: وقح
شبحتله: انت منو ؟
ابتسم ع جنب: انا اسمي محمود راشد ولد خو خيري راشد .. انتم الايتام اللي متكفل بيهم ؟
في داخلي نار لو طلعت تحرقه وتحرق كل شي قدامي : ايتام ؟ .. لا احني ولاده
ضحك لين دموعه نزلو بهزوة طبعا وواضح نيته وشن جاي يبي ..
وقفت متعصب: نوض اطلع برا
وقف وشبحلي بهزوة: ياراجل ! حوش بوك وانا مش عارف ؟
حذيفة وقف بحداي: عمرنا ماسمعنا بيك ولا سمعنا انه عنده ولاد خو ولا عنده اخ اصلا
ضحك محمود وشبحله بحدة: عنده خو اسمه مختار الله يرحمه والمختار هذا عنده زوز ولاد محمود وياسر .. كونه علاقتنا مقطوعة مش يعني هذا ماعنداش اهل
حذيفة شد ايدي وقعمزني : الله يرحمه .. شن المطلوب ؟
محمود قعمز: نبي نشوف عمي .. خيركم ماتفهموش ؟
اعصابي بتنتلف: شن تبي منه ؟ .. مش شايف الساعة ؟
طلع تليفونه من جيبه وضحك: نسيت ان عمي يرقد بكري
حذيفة: اي ياريت تتعلم ادي الزيارة
وقف محمود ومد ايده: ماشي
سلمنا عليه وتقرب من باب الحوش تلفتلنا: احفظو الوجه هذا ( أشر ع وجهه وضحك ) ياولاده
تنهدت وشبحت لحذيفة بعد طلع من الحوش: جيته مش للخير
حذيفة: ماارتحتلاش
غسان طفى سيارته ونزل تلاقي معاه في الشارع قاله: ولد خيري حتى انت ؟
غسان استغرب شافله كيف ركب سيارته وطلع .. خشلنا غسان ويتمتم ( من هذا ؟ )
حذيفة رفع ايده ونزلها بالقوة: ولد خو بوي خيري
غسان شافلنا باستغراب: شن في ؟
..................
الساعة 9:00 بالتمام جي نوضني حذيفة
تكسلت: خيرك ؟
حذيفة بضيق: الفرخ هداكا لوطة
استغربت: الساعة كم ؟
حذيفة: التسعة
قعمزت ورفعت ايديا: شن حالم بينا ؟ .. نايض قبل الدجاج
حذيفة: تي مش وقت تسهويك ونوض شوفله صرفة انا بنمشي للكلية
هزيت راسي بالايجاب: برا .. بوي وين حقا ؟
حذيفة: غسان طلع بيه بكري
استغربت جيت واقف: كيف وعلاش ؟
حذيفة: ناض بكري وقاللي بنرفعه لانه متوقع يولي ولد خوه
خبطت ع وجهي: شن هالغباء ؟ .. شن مدايرين احني باش يهرب بيه ؟
حذيفة تنهد: خايف يزبط انه زهايمر
حذفت بطانيتي وقعدت ندور في تليفوني: ويزبط وين الموضوع شن احني مرضناه ؟
حذيفة واقف وخايف ع بوي
لقيت تليفوني فتحت ع رقمه: غسان توا توا تروح
غسان: مانيش مروح جاكم التاعب ولاه ؟
قعدت نوخر في شعري بتعصب: ماتزيدش تزمرها غسان روح
غسان: هذا وين تفكر عنده عم ؟
بديت ننفخ : غسان تربح روح وبعدين نهدرزو
غسان: بعيد اصلا تبيلك باش نوصل سقدوه
نفخت وبديت نهدي في روحي: غسان حبيبي ارجوك روح مش وقته اللي ادير فيه .. انت هكي بتودرنا
غسان بلامبالاة: يدير اللي يقدر عليه بوي مش ح نفرط فيه
خبطت ع جبهتي وشبحت لحذيفة: تفضل هي البهيم شن يقول
حذيفة: وسع بالك بالله عليك
شويا وسمعنا محمود يتكلم بصوت عالي وواضح انه قريب ع الدروج: شنو عمي مايبيش يشوفني
سكرت ع غسان الخط وتلفتت لحذيفة: شن هالمصيبة اللي جتنا
حذيفة بأسف: غسان ديما بيكحلها يعميها
حذفت تليفوني: تو يقول اشبح شن مدايرين في عمه
حذيفة تنهد: توا الحل ؟
تنهدت وحطيت ايديا في نصي: تو نشوفه الهم اهوا
هز راسه بالايجاب وطلع من داري نسمع فيه يكلم في محمود
حذيفة: انا عندي امتحان وقلنالك عمك طالع بكري
محمود: مشيت للهنقر لقيته مهناش .. وين بيكون مشي ؟
نزلت من الدروج وأشرت لحذيفة: برا لجامعتك تو نتفاهم معاه
رفع عيونه فيا: شن في مانتفاهمو مابيني وبينكم شي .. نبي عمي
شديته من كتفه ودخلته للصالون: قعمز
قعمز وشبحلي باستحقار: وين عمي اخر مرة نسألك
قعمزت رجل ع رجل وابتسمت باستهزاء: عمك مش حاب يشوفك يعني بعد كل هالسنين جاي تسأل عليه
ابتسم بمكر: انا نبي نتأكد من حاجة وخلاص تأكدت .. ماشي يامعاوية خليها في بالك
وقف وطلع من الحوش قربع الباب .. انا وقفت مصدوم شن يقصد ؟

#Dudu