#مُعــاويــة
:: 11 ::
تنهدت وابتسمت: عمي انا
قطع عليا وقال: خليني نكمل كلامي .. الكلام يللي قلتهولك مانبيهاش تعرف بيه لا هيا ولا خوتها .. يقعد بيني وبينك يامعاوية
ابتسمت بأمل: ياعمي انا اصلا كنت نبي نفاتحك بالموضوع بس نراجي في الوقت المناسب بس
نظرة الحب والفرح يللي شفتها في عيونه عمري ماننساها .. ضحك بفرح وقال: هكي اطمنت ع بنتي الحمد لله
ارتاح عمي وابتسملي خش حذيفة وجايبلي قهوة قعمزنا هدرزنا شويا وطلعنا
طول الطريق كنت ساكت ونفكر في كل المواضيع اللي في راسي بوي غسان وبنت مسعود .. تنهدت وقلت: صدقت ياحذيفة لما قلتلي اللي يبي راجل مش ح يدورك لا في فلوس ولا في حوش
ابتسم حذيفة: تميت موضوعك معاه شكلك
مسحت ع وجهي: اي عارف مش وقته بس جت في الدوة ورحب بيا وفرح
حذيفة طبطب ع رجلي : ربي يهنيك ياخوي
ابتسمت وكملت الدرب وانا عقلي متشتت بين هدا وهدا .. الحوش محجور وغسان مسجون وبوي الله اعلم وين اراضيه وبنت مسعود !!! ع الاغلب في قلبي حاس بشي ينبض حب وخوف في ذات الوقت .. كيف الواحد يحب من غير مايعرف شي عن محبوبه ؟ فطرة سبحان الله .. وسنة الله في خلقه ان يزرع بينا الحب والود رغم جهلنا بالطرف المقابل
متأكد انا انها واخدة حيز كبير من قلبي .. شن اسمها باه ؟
...........
خش حذيفة لداري ع اذان الفجر ابتسم لما لقاني واقف ع الروشن قرب مني وحط ايده ع كتفي
حذيفة: صباح الخير
رديت عليه : صاح النور
ابتسم وشاف للروشن: مارقدتش ولاه!
تنهدت: لا
حذيفة: تعوذ من الشطان وتوضى وصلي تو يهدا بالك .. قداش ليك ع صلاة الفجر معاش صليتها حاضر
ابتسمت : اي والله انا مقصر في الطاعات كلها ياحذيفة
حذيفة شبحلي وابتسم بحب: مافاتك شي جدد النية ونوض صلي واهو رمضان جاي وفاتح ابواب التوبة معاه
ابتسمت: ربي يغفرلنا .. ( تكسلت وتنهدت ) ع سيرة رمضان تو كيف بنديرو ؟
حذيفة فتح الروشن: في شنو ؟
قعمزت ع السرير: في بوي وفي الحوش يللي بنطلعو منه وين بنمشو وفي الماكلة طبعا
ضحك حذيفة: كله ينحل مادام ربي معانا غير صلي الفجر وادعيله بللي خاطرك
واطيت عيوني: بندعيله يردلنا بوي وتردله صحته بس
ابتسم حذيفة وقرب مني وطبطب ع كتفي : وبنت مسعود ماعندهاش نصيب في الدعوة
ابتسمت لما اذكرتها قمت عيوني فيه : بنت مسعود هنا ( أشرت ع قلبي ) ربي يكتبها من نصيبي وماتصيرش كاينة
ضحك حذيفة: خللي ايمانك بالله قوي .. بعدين تعالالي جاي شن جاك قبل ماتحبش الدوة ع الصبح
وقفت مسحت ع وجهي وضحكت: كل شي فيا تغير وبعدين اصلا مارقدتش يعني ينحسب ع الليل
ضحك حذيفة وطلع من الدار: نراجي فيك نمشو للجامع
ابتسمت : هيا هي
توضيت ومشيت معاه للصلاة .. مانعرفش السبب علاش خطر في بالي موقف وقت كنت صغير الحادث الشنيع يللي صارللنا مسحت ع وجهي وتنهدت .. نلقاكم في الجنة ؟ ان شا الله يارب .. خشيت للجامع كان قلبي يدق بسرعة بعكس حذيفة ثابت الخطوات خش بثقة لانه متعود وصلاته في الجامع .. هل ممكن يللي صارللي كله من ذنوبي ؟ .. من تقصيري في الطاعات ؟ .. مقصر مع ربي ؟
سمعت صوت الشيخ يقيم في الصلاة كان صوته يقطع فيا بالطرف الداخل .. نحس في الدموع سيل بيهد مجرى دموعي .. غمضت عيوني مانبيش نبكي مانبيش نضايق .. هذه صلاة هذه طريقة التواصل مع الله .. مع رب الخلق كيف نضايق وهوا الوحيد يللي سمع شكواي ونجواي ويكون معاي .. ضغطت ع عيوني وكبرنا للصلاة
سجدة بس مسحت كل التوتر والضغط النفسي انا مش قاطع صلاتي .. لكن صلاة الفجر ليها فضل كبير في تخفيف الوجع ونورت طريقي ووجهتني للصواب .. سجدة وحدة فرغت كل دموعي وتنهدت وكملت صلاتي .. بعد السلام طبطب حذيفة ع كتفي وابتسم .. فهمت انه اطمن عليا رديت عليه الابتسامة وعيوني حمر من الوجع .. رفعت ايديا ودعيت لوالديا يللي توفاهم الله في الحادث وخلوني نصارع في الحياة بروحي .. دعيت لبوي خيري يشفيه ويعافيه ويرجع ينور حياتنا .. وغسان فاقدينه والحوش مظلم من غيره .. دعيت ربي يحنن قلوبنا ع بعض ونقعدو سند لبعضنا طول العمر .. كيف بنمسح ع وجهي ذكرني حذيفة: دعيت لبنت عمي مسعود ؟
ابتسمت ورديت ايديا لفوق : يارب ارزقني بالزوجة الصالحة يارب تكون بنت عمي مسعود زي مانحب ونكونلها زي ماهي تحب ..( تلفتت لحذيفة ) مانعرفش ندعي ره
ضحك حذيفة: قول وراي
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
