#مُعــاويــة
:: 22 ::
تم الاذان رفعت عيوني: هي توضي خللي نصلو جماعة
هزت راسها: حاضر هي
حطيت ايديا ورا ظهري وعيوني ع الروشن الشك كان ليه محل في قلبي .. تسلل وخدي وضعه بالمستراح .. معقولة ماتصليش ؟
عصرت قلبي بايدي وتعوذت من الشطان
رغد: معاوية انا واتية
تلفتلها لقيتها لابسة بدلة الصلاة ابتسمت : هيا
................
نايض بكري ندير في قهوتي بننزل للولاد وبنسلم ع بوي وبنمشي ندير دورة في الورشة .. سمعت صوت خطواتها ..
خشت تكسلت وشبحتلي : نايض بكري ؟
هزيت راسي بالايجاب: اي بنمشي للورشة
قربت مني وحضنتني من الخلف وانا ندير في قهوة
رغد: احسبني في فنجان
تجاهلي ليها ماكانش بسبب خوفها لا .. لكن في داخلي نفور ليها مش طبيعي .. حاس اني استعجلت في زواجي .. دوامة ومش قادر نطلع منها
رغد: معاوية وين وصلت ؟
تلفتلها: شي نفكر في الخدمة بس
حطيت البكرج ع الرخامة: اشربي انتي انا بننزل نشوف بوي وطالع
مارجيتهاش ترد عليا طلعت طول ..
...................
روحت العشية كنت مرهق من كثر التفكير وماوصلتش لحل .. وماحكيتش لحد ع اللي شاك فيه .. انا الغالط ماسألتهاش ع الصلاة وقت خطبتها .. كنت نحساب هذا موضوع تلقائ الانسان يكبر يتعلم الصلاة ويداوم عليها .. في ناس عايشة معانا وماتصليش ؟
علقت المفتاح جنب الباب وخشيت نهد ركبة بركبة .. قعمزت ع الصالون مسحت ع وجهي واستغفرت ربي .. تنهدت واتكيت ع الصالون
سمعت خطواتها قربت مني ع استحياء ..
رغد: معاوية !
رفعت راسي وفتحت عيوني: نعم
كانت لابسة روب ازرق ملكي دانتيل قصير وفاتحة شعرها واصل لتحت كتافها ناعم وكستنائي .. ومدايرة زمالطو عنابي ومكياج خفيف .. قربت مني وجثت ع ركابها وشدت ايديا
تنهدت: حقك عليا انا غالطة
شبحتلها باستغراب: في شن غلطتي ؟
حطت راسها ع صدري وتمسكت بيا: الخوف قاتلني بس لكن والله مازي ماتفكر
بعدتها عن حضني ورفعت راسها بصبعي السبابة: ع شن تحكي ؟
سكرت وفتحت عيونها بضيق: يعني هذا من حقك وانا ظلمتك فيه
قرنت حواجبي: قصدي بنفوتوها الغاز والا كيف ؟
شبحتلي ووقفت: لالا ( بلعت ريقها ) هات ايدك
مديتلها ايدي ومازلت في حالة استغراب وذهول من جمالها
ابتسمت ورفعتني معاها للدار .. يللي بدورها كانت مجهزة الورد ع السرير والشكماجة وشويا لمسات ع الارض وحاطة شمعات وكانت معتمة الدار تماماً
شدت ايديا الزوز ورفعت عيونها فيا: اسفة
فرحت بالاجواء بس هيا كانت فاهمة غلط .. رفعت ايديا لوجهها ولامست خدودها: رغد !
غمضت عيونها: عيونها
همستلها بحب: انتي راك فهمتي غلط
فتحت عيونها: كيف يعني ؟
خديتها وقعمزتها ع حافة السرير: رغد شوفي هالشي صعب عليك وع كل بنت وانا مانجبركش انتي بارادتك وبحب منك .. وبعدين انا ماضغطتش عليك ولا توا مضايق بسبب الشي هذا لا ره فهمتي غلط
حضنتني: يعني انت مش زعلان ؟
تنهدت ومسحت ع شعرها وتمسكت فيها: لا ( باعدتها عن حضني ) لو انتي جاهزة وحابة تكوني ملك معاوية حبيب قلبك انا معاك ولو تبي تاخدي وقت لين ترتاحيلي برضو انا معاك
غمضت عيونها: جاهزة جاهزة
قمتها في غمري وابتسمت: ربي يخليك ليا
كانت مرعوبة وخايفة واعصابها مشدودة .. هدت بالشويا عليها والحمد لله اطمنتلي وارتاحت
وارتحت انا من الجانب هذا يللي ماشكيتش فيه لحظة بس ركبني شوية وسواس مانكدبش عليكم .. الدنيا بدت تخوف اذا كان كِنان وقتها طمعو فيه يابال بنت كيف مانخافوش عليها ؟
................
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
