#مُعــاويــة
:: 12 ::
السيارات من اول ماشريناهم بوي كاتبهم باسامينا كل واحد منا ركب سيارته واتجهنا للاستراحة بعد اتفاق بينا .. هذا مكانا المؤقت لبين عرفنا مخططات محمود المستجدة
................
خشينا للاستراحة يللي لقيناها غبرة وتراب .. نفض غسان الصالون وقعمز: تبي تنظيفة
حذيفة حط الشنطة ع الارض: خللي انزلو باقي الحاجات ونبدو فيها عادي
سمعنا صوت سواق السيارة الكبيرة يللي جاب معانا بعض الحاجات يللي ماتجيش في سيارتنا : شباب انزلهم الصناديق ولاه ؟
طلع غسان: اي اي
لحقته وبدينا انزلو معاه في الحاجات ..
السواق: 100 دينار الكرية
طلع حذيفة من جيبه وعدهم ومدهمله: تفضل وربي يبارك فيك
ركب سيارته وحيانا بايده وطلع
غسان: بنمشي ناخد مواد تنظيف ونبدو فيها
هزيت راسي بمعنى باه
حذيفة: خودلنا غدي بالله راني جعان
غسان: ماشي
طلع لسيارته .. وانا وحذيفة بدينا بللي نقدرو عليه حولنا الصالون من مكانه وخشينا للكوجينا حطينا الصناديق الخاصة بالمطبخ ..
الاستراحة كانت عبارة عن دارين ومطبخ وحمام ووسط حوش فيه صالون .. وبرا فيها حوض سباحة وجلسة خاريجية .. مساحتها صغيرة جنانها يادوب رافع طاولة وكراسي من القدام وقراج برفع سيارتين بالكثير والحوض كان من الخلف .. وحدة من الديار مفرشة جلسة ارضية حولها حذيفة وطلعها للجنان السجاد يبي غسل والجلسة تبي مسحة ونشرة للشمس هكي طلب حذيفة .. والدار الثانية كان فيها سرير زوجي ودولاب كبير يللي قررنا نحولوه السرير ونحطو مكانه تلات فراشات مبدئيا نرقدو عليهم بحكم انه حوشنا الاول ماطلعناش منه اثاث .. طلعنا حوايجنا وبس .. حطيت مفتاح الحوش فوق طاولة التلفزيون الموجود في وسط الحوش
تكلمت بأسى: من قال بالله يجي يوم ونطلعو منه
حذيفة كان لاهي في غسل الرواشن: الله غالب .. الدنيا مافيهاش امان
تنهدت: الحمد لله عندنا ربي ياخد الحق
حذيفة: عطل غسان بالله عليك شوفه وين ؟
قمت تليفوني واتصلت بيه: وين ياغسان الظهر اذن ره
ضحك غسان: اسكت ياراجل لقيت عزوز في المحل وقلتلها راني عريس وساكن حوشي جديد شن ناخد حطتلي بضاعة الكروسة عبتها لفمها حتى من المبخرة والوشق والا شن هوا حطاته
ضحكت: وانت عاد صدقت روحك ؟
غسان: تي قريب نخطم ع ميزران ناخد بدلة
ضحكت لين دمعو عيوني: خودلنا معاك
ضحك غسان: هي مروح مسافة الطريق بس
ضحكت: تمام نراجو
حذيفة وقف غسل وشبحلي: شن صار ؟
تلفتله نضحك: حصل عزوز خدتله قضية تامة ع اساس عريس
حذيفة ضحك: وهوا صدق عاد
انا: اي .. هالخفيف
حذيفة خدي المالقي وصب ع الروشن: وانت شن بيصير فيك توا ؟
رديت عليه: خللي نشوفها قبل .. انا خايف منه الموضوع مازال
حذيفة حط المالقي في السطل وقرب مني: علاش !
تنهدت: علاش يبي يدبسني فيها !؟
حذيفة: يدبسك ؟ .. خيرك تقول هكي !
شبحتله : مانعرفش الموضوع غريب شويا
حذيفة: مش كنت مطمن شن جاك ؟
انا: قصدي في العادة الولد اللي يخطب البو مايرضهاش ع روحه يقول لولد اخطب بنتي من غير معرفة
حذيفة: معرفة شنو ياراجل خيرك ؟ .. يعرفك من كنت صغير شبه مربيك مع بوي ره ( ربع ايديه ) بعدين تعالالي جاي مش قالك انا مش غاصبك ع بنتي بس نبيلها الستر وخايف عليها ؟
تنهدت: باه مش كانت مسحورة ومن قال مسحورة ؟
حذيفة: خيرك معاوية ؟
قرنت حواجبي: اسمعني حذيفة مانبيش نكون ساذج ومضحكة .. فلهذا خليني نفكر في الموضوع كويس
اضايق حذيفة ووقف
شبحتله: خيرك زعلت ؟
حذيفة قام السطل ومتجه للمطبخ: علاش بنزعل ؟
انا: مش قصدي عليك ره .. لكن والله مانبي نتورط هذا زواج مش شي ساهل هادي حياة كاملة
حذيفة بضيق: براحتك
مشي للمطبخ خش غسان بطاقته الايجابية جايب الاكياس : هي حذوفة تعالا شوف
حذيفة زفر بضيق: مبرد عمك
انصدم غسان : حي مش مصدق حذيفة بدي يسب
ضحك ع جنب حذيفة وقال: هادي مش سبة وبعدين احمد ربي جت ع هكي اللي يقعد مع معاوية مرات يطلع حتى من عقله
ضحكت وخديت كيسة: اعطيني نبدا بالحمام
..................
نسيق في الحمام وانا نسمع في حذيفة وغسان يتعاركو .. نفخت وبصوت عالي قلت: الصبر منكم .. تي ياسر فددتونا
رن تليفوني شفت المتصل لقيته عمي مسعود .. زفرت بضيق ودرته صامت ورديته في جيبي .. عاود الاتصال قلت: شن في ياعمي مسعود نفختهم ره
ع وقفة غسان جاي بيشكي كالعادة من حذيفة: خيره عمك مسعود يالنسيب الضال العاق
حطيت منشفة وبديت انشف: مانعرفش اتصل مرتين
غسان اتكي ع الباب: رد عليه شوفه شن يبي ؟ .. حق هوا شن حاله توا ؟
كملت التنشيف حطيتها ع جنب: باهي .. كملتو الكوجينا ؟
غسان قفز تفكر: اي والله انت وعمك مسعود دهبتولي شيرتي .. تي الغبي هداكا يبي يغسل الدواليب غسل والدواليب لوح
ضحكت ع جنب: وانت شن تبي ؟
غسان: زمان دادا مديحة كانت تمسح فيهم مسح
فتحت شيشمة اللاوندينو نغسل في وجهي: تمسح فيهم لان استعمال يومي اما هذا قداش لينا معاش استعملناه اكيد يبي غسلة باهية
سمعت حذيفة يتكلم بصوت عالي: انا كملته ومسحته حتى المسح
غسان مشاله ويسرع في خطواته: مصح وجهك تو تفسده .. الله ناوي يخلينا ع الحديد الحمار اهوا
مشيت لحقته قاعد قريب ع المطبخ نسمع طيحة وعيطة وضحكة وين مشيت نجري لقيت غسان طايح ع الارض وحذيفة يضحك
بصدمة: خيرك ( بديت نضحك ) ديما بعمايلك
غسان شد في الدولاب وقف: الغبي اهوا مداير صابون ورراكينا
حذيفة يضحك: انت عارفني نسيق جاي تجري زي المهبول
غسان يلتقط في انفاسه: ضم فمك انت قاصدها
حذيفة يضحك: والله ماصارت
وانا واقف نشوفلهم بيأس ونضحك .. رن تليفوني المتصل عمي مسعود تباعدت عليهم ورديت عليه
انا: السلام عليكم
مسعود: اهلين ياولدي كيف حالك ؟ .. بالك مشغول والا حاجة
تحشمت ع وجهي: اي والله صارت شوية ظروف وقعدت لاهي
مسعود: لقيت حوشكم مظلم استغربت
تنهدت وقعمزت ع عتبة باب الاستراحة: والله من ضمن الظروف الحوش هذا .. حولنا منه للاسف
انصدم عمي مسعود: علاش شن صاير ياولدي ليه عليك ؟
خديت عودة وقعدت نرسم بيها ع التراب في حاجات مش مفهومة: لالا مافي سو .. غير حجرو رزق بوي خيري كله لانه فاقد الاهلية هكي قالو
مسعود: لا حول ولا قوة الا بالله .. يالطيف ع هالناس بتكلب ع رزق الدنيا
قلت في نفسي ( ماهو منهم ولادك اللي خايف منهم )
مسعود: الله يهديهم وخلاص .. وهوا عنده ناس بالله ؟ .. هذا وين تفكروه !
قلت: الله غالب
مسعود: الله غالب .. طمنوني عليكم باه
حسيت كأن يبي يحاول يتقرب مني .. ليش نحس فيه يضايق فيا باتصاله بكلامه ؟ .. ليش نحس في روحي نبي نبعده عليا باي طريقة ؟ .. مش المفروض يكون نسيبي وبو مرتي يعني ؟ .. والمفروض نكون حسبة ولده ؟ .. لا انا نحس انه يستفز فيا يبي يصطادني .. يبي يحصل عليا ويسيطر ويغمني ببنته
مسعود: الووو معاوية وين مشيت ؟ .. التغطية شكلها ضعيفة
انتبهت واستدركت الموقف: اي قطعت شويا .. احني الحمد لله تمام انت طمني عليك
مسعود: والله كل يوم للاسوء والحمد لله
ضحكت بهزوة: يالطيف شن في تاني ؟
استغرب لهجتي وتقريبا سكت تفادياً للاحراج مش عارف اني قصدت نحرجه
مسعود: خلاص ياولدي استحقيت شي كلمني .. سلام
سكرت الخط وقعدت مركز نظري ع الفراغ شن اللي قاعد يصير ؟ .. تفكرت اول مرة شفتها في الشارع هاربة تجري كيف اغرمت قلبي .. ولما وصلتها للكلية ابتسماتها أسراته اصلا ولما جتنا مفزوعة ع بوها .. معقولة هذا كله تمثيل ؟ .. باش يكسبوني ؟ .. لالا شن تمثيل بالله في واحد بعقله يصعق روحه باش بنته تتزوج ؟؟ .. خيرك معاوية راك شاب عادي جدا شن حاسب روحك بس ؟
وقفت نفضت حوايجي خشيت لقيت غسان يأن راقد ع الصالون ورجليه ع المسند فوق
قعمزت وحذفتله رجليه لوطة: خيرك ؟
غسان: تعبت بنرقد ( وقف ) تصبحو ع خير
حذيفة: حتى انا بنرقد
خشو الزوز رقدو وانا قعدت سارح وتفكيري يرفع ويجيب .. نضت صليت ركعتين استخارة وخشيت رقدت
................
الصبح لقيت حذيفة نايض فاتح الشاشة ع القرآن ويغسل في البساطات
وقفت نتكسل قريب منه: صباح الخير .. شن ادير ؟
ابتسم: صباح النور امس مالحقتش نغسلهم
ابتسمت: خللي نصلي وندير الفطور .. يعطيك الصحة
حذيفة: الله يسلمك
خشيت حطيت براد الشاهي ع النار .. ناض غسان نشبح فيه يفركس في الشناطي ويحوس .. مشيت للحمام لحقني
غسان: وين شخاشيري معاوية ؟
هزيت راسي بأسف: قول صباح الخير ياراجل
غسان بنفاذ صبر: شخاشيري وين ؟
سكرت باب الحمام وفوته .. نسمع فيه يتعارك مع حذيفة .. غسان فوضوي وكل شي يبيه في مكانه مابعدها زوجته المستقبلية لو كانت نهال مابعدها والله ..
ع صفرة الفطور مقعمزين والكل منهمك في الاكل قلتلهم: بنزور قبر كِنان
تنهد غسان: سعدوده كِنان لا يفكر في حوش لا وين يرقد .. حصل مكانه وارتاح
حذيفة: استغفر الله قول اللهم احسن خاتمتنا ماتعرفش من ارتاح في قبره ومن اللي قاعد يتعذب فلهذا قول ربي يرحمه ويحسن خاتمتنا
غسان شبحله ع جنب: كيف عاد غسان تكلم
حذيفة يشرب في الشاهي: ياودي افهم ياسرك من سوء النية
غسان رفع حواجبه: انا نيتي سودا ؟
قطعت عليهم وانا متعصب: تي ياسر الهم بنزور كِنان درتولي قضية
وقفت طلعت نسمع في غسان يسأل: خيره هذا خلوقه في حكة ؟
حذيفة: وين نندري
شويا ولحقوني
غسان: خلاص مومو نبدل ونمشو
حذيفة: مش عندك بريزنتيشن ؟
غسان شبحله: اي مدايرينه الولاد انا بنخلص حق العرض بس وبنمشي للكلية طول
حذيفة: يعني مايعطلكش المشوار ؟
غسان: لالا ضروري نمشو مع بعض
تلفتلهم وابتسمت: تمام خلي نشطبو الحوش ونطلعو
اطمنا ع الابواب مسكرة والرواشن والضي وسكرنا الباب وطلعنا
واقفين ع قبره .. قلوبنا جمدت والنبض تحسه وقف .. رفعنا ايدينا وقرينت الفاتحة ع روحه وكل الارواح يللي تحت التراب .. غسان سبقاته دمعاته وحذيفة كان مغمض عيونه ويدعي ..
أما انا ..
تنهدت ونزلت قمت حفنة من التراب وبوستها وغميت شمي بيها وتنفست بصعوبة وقلت في نفسي
( كِنان حبيبي سامحني وخيي .. سامحني قصرت معاك هلبا معاش جيتك وقريت الفاتحة .. معاش شميت ترابك .. سامحني ياوخيي راهو وخيك حاصل لرقبته ستين موضوع في موضوع في بالي خشت بعضها عندي .. سامحني ياغالي راني فاقدك وكل يوم وليلة نفكر فيك .. مش ناسيك اصلا والله ماناسيك لا انا ولا خوتي ولا حتى بوي .. كِنان بوي يسأل فيا عليك كل فترة يبي يطمن عليك وع قرايتك .. وصاحبك اياد مانساكش جاني في الورشة جددلي الحزن ياكِنان بكاني وهوا يحكيلي عليك وكيف يضايقو فيك .. سامحني ياوخيي نبي ماخذ حقك وثارك مش قادر قاعد نموت في اليوم مليون مرة عليك .. كل شي في الحوش يفكر فيا بيك .. كِنان سيبناه الحوش خليناه بوي فقد الذاكرة من حزنه عليك .. شافك متعلق ياغالي شافك ومش ناسي صورتك حبيبي طمني عليك ارتحت انت توا ؟ .. عهداً عليا ياكِنان اسمك لما يتجدد في حياتي وعد مني والله )
مسحت دموعي لما طبطب عليا حذيفة: ادعيله ماتعذباش بدموعك بالله عليك
تنهدت: لالا مش ح نعذبه ( رفعت عيني مالقيتش غسان ) غسان وين ؟
حذيفة تنهد: ماتحملش الموقف طلع
استغربت ووقفت: موقف شنو ؟
حذيفة: قعدت تبكي يامعاوية شوف التراب تحتك
لما نزلت للتراب لقيت في قطرات تنهدت بوجع
وقلت: مش ناسيه ياحذيفة
حذيفة نزل لمستواي: ولا احني قدرنا ننسوه .. خلاص معاوية ماتعذبش روحك وتعذبه وتعذبنا معاك
شديت ايده وعصرتها: ان شا الله يسامحنا
هز راسه حذيفة بالايجاب وابتسم
وقفنا وطلعنا من المقبرة وكل واحد فينا يجر في احزانه معاه .. وبين القبور في قصص تروى .. هذا اب سيب صغاره صغيرين هادي ام وهادي اخت وهادي طفلة مازال ماشافت من الدنيا شي .. وبين قبر وقبر كانت في مسافة قصيرة اقصر بهلبا من صلة قرابتهم .. في قبر تلقاه معشب وورد وفي تلقاه تراب صافي .. وكل حد فينا فسر هالمنظر بوجهة نظر مختلف ع الثاني .. طلعنا من المقبرة ولما نقبر احزاننا معها .. تنفسنا صعداء وطلعنا طول لكلية غسان حطيناه فيها
غسان: كملو طريقكم تو نروح مع الولاد
مشينا للاستراحة .. نزلنا وفتحت الباب
حطيت المفتاح ع الطاولة: انت ماعندك شي ؟
حذيفة اتكى ع كتف الباب: بنمشي للحوش عندي وراقيا شكلني نسيتهم
امتديت ع الصالون بتعب: سكر وراك الباب
طلع حذيفة وانا خدتني عيني ورقدت
....................
روح غسان جايب معاه غدي وروح حذيفة مقعمزين ناكلو لما تكلم حذيفة: كنت في شارعنا امبكري ولقيت سيارات قدام حوش عمي مسعود انخلعت
مارديتش لانه مايهمنيش او تقدرو تقول تصنعت اللامبالاة
غسان: شن في ؟
حذيفة ياكل: قالولي فضانية مافضانية
وقف قلبي .. وقفت وشبحلته بحدة: فضانية منو ؟
حذيفة مستمر في الاكل: خيرك انخلعت ؟
غسان: خيرك معاوية مش قلتولي تكلم فيها ؟
شبحتله بتعصب: تكلم من هما ؟
حذيفة وقف وركز عيونه فيا: مادامك ماتبيهاش خللي البنت اطب نصيبها
شديته من سوريته: شن دخلك انت ؟
بعدني عليه: معاوية وخيي اعرف روحك شن تبي ؟
تنهدت وقعمزت: يعني فضانيتها ؟
حذيفة قعمز: مش فضانية ولا شي .. تكلمت هكي باش تعرف روحك انت قلبك معاها وشاريها علاش ادير هكي .. معقولة تخطبها وبعدين تقطع علاقتك بيهم بكل .. عيب والله
سكتت مارديتش
غسان وجعاته: كيف قدرت ادير هكي ؟ .. بديتها راجل تمها راجل
تكلمت بأسى: اسكت ياراجل مافاهم شي انت
غسان شبح لحذيفة: فهموني
حذيفة: اليوم قاعدة وتراجي فيك غدوا بيجيها اللي خير منك وتمشي ع حالها .. لو عارف روحك مش قدً كلامك برا انهي موضوعها وخللي البنت في حالها .. فهمني انت شن حاسب روحك علاش تتصرف هكي؟ .. معقولة الراجل يتصل بيك ماتردش عليه وتستكرد فيه ؟
غسان: هوا هكي قالك ؟
حذيفة: اسكت انت .. معاوية تفهم فيا ؟ .. شوف وضعك
غسان باستعجال: خيره وضعه ؟ .. عقيم الولد والا شني ؟
لوحت بايدي: خودلك هي
حذيفة: اسكت انت
غسان: تي شن تسكت فيا عيل بحداكم انا ؟
رديت عليه: خلاص فهمت تو نتصرف
ابتسم حذيفة: توكل ع ربي وشوف راحتك وين ؟
غسان: الراحة في القبر ( كيف بيتكلم حذيفة تعصب غسان ) تقول اسكت تاكل كف قسما بالله
ضحك حذيفة وانا نضت رفعت تليفوني ع وقم عمي مسعود
( عمي مسعود كيف حالك ؟ .. اتصلت بيك لو في امكانية الخميس نزوركم ونديرو رؤية شرعية بالك البنت عندها راي تاني .. تمام باذن الله السلام عليكم )
#Dudu
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
