#مُعــاويــة
:: 20 ::
من زمان يامعاوية !
وانت راقد ع وذانك وانت مش فايقلها ؟ .. كيف هكي ؟ .. كيف شافتني او عرفتني ؟ .. كيف حبتني ؟ .. شن المواقف يللي جمعتنا غير مرضة بوها ؟ .. الليل كلها وانا نخمم وسارح ومش ع وعيي بكل ..
اذان الفجر هالمرة كان صوته واضح وعالي .. تكسلت ومسحت ع وجهي ( اعوذ بالله من الشيطان الرجيم ) حاس روحي خفيف كان حمل جبال وانزاح .. مضت توضيت ولقيت حذيفة كيف طالع من الحوش لحقته ع الجامع ..
مروحين ع رجلينا وقت قال حذيفة: استاحشت بوي نحس في مكانه اخخخي بكل
ابتسمت: اي والله .. حتى انا استاحشته
حاطين ايدينا ورا ظهورنا ماشيين بشموخنا
حذيفة: تعرف !
انا: امم
حذيفة: شاغلني غسان نحس فيه كابت شي داخله ومش قادر يطلعه
تنهدت: حتى انا هكي حاس .. بس اكيد الموضوع يخص نهال
حذيفة: ياعليك ولد اقسم بالله حذرته كدا مرة واللي خفنا منه صار .. من يرضى يعطي بنته لواحد اماليه مش معاه
قطعت عليه: لكن معروفين
حذيفة: وحتى وكان مايخلاش الموضوع من الشك .. الناس بدت تخاف من ولاد العم يابال اماليه مش معاه بكل .. بيقولو اكيدة مش شرعي
فنصت عيوني: يمشو يسألو
حذيفة: من بيسألو خيرك معاوية كأنك مش عايش معانا .. بيسألو الجيران بيقولو جابه خيري من دار الايتام وبيسألو دار الايتام مش ح ياخدو منها لا حق ولا باطل
تنهدت بوجع : يعني نحمد ربي ع بنت مسعود ؟
ابتسم: اي احمد ربي
شبحتله بشك: لكن خايف تكون توريطة
حذيفة فنص فيا: ارقد تربح
ضحكت بألم: يعني كان عنده حق كِنان وقت قال انا وجودي زي عدمه مانقدر نفيد حد ولا نستفيد من حد ومن بترضى بيا ومن بيقدر يتقبلني اصلا .. كلهم يبو ولد العيلة والناس وانا امي وبوي يغلطو وانا نتحمل غلطتهم عمري كله
حذيفة تنهد: الله يرحمه والله يسامحهم
شبحتله بحدة: الله لا تسامحهم ولا تسامح يللي زيهم في العالم كله .. مادامك مش قد الصغار ماديروهمش
حذيفة ضحك بهزوة: مش قصة قد الصغار القصة انها رغبة وزالت مع الوقت وضاع ضحيتها كِنان واللي زيه لاهيا في يوم ح تكون أم ولا هوا يكون أب ح يمارسو شغفهم لين يموتو وينكُوُو بنار جهنم الزوز
تنهدت بوجع: ربي يغنينا بحلاله عن حرامه
حذيفة: آمين يارب
وصلنا للحوش وخشينا لقيت غسان يصلي
ابتسم حذيفة : ربي يهديك وتصلي معانا في الجامع بس
خشيت دوشت وجهزت الفطور ومعاي حذيفة وصلني مسج من مرتي وحلالي .. من الغالية يللي يادوبني تعرفت عليها امبارح صبحت اغلا ماعندي .. الحلال طعمته غير .. يخلي البداية ببركة من الله وروح جديدة .. ميول وقبول غير طبيعي .. تتكلم وتهدرز براحة لا توصف .. بثقة متكاملة .. بكلمات في غاية الادب والحشمة لانها تحسها ليك .. ملكك وامانك ومأمنك ومخزن اسرارك وحضنك الدافي وشق من روحك ونص قلبك .. مختصر الحلال كل شي حلو من اوله .. دام راضي علينا ربي 🤍
( صباح الخير معاوية )
بعتلها مسج وهالمرة كنت جرئي شويا وتحركت مشاعري بكلمتين منها ( صباحك ورد وفل يامرتي )
مسحت اخر كلمة وترددت نكتب غيرها مخدوشة من الحياء قلت في نفسي ( واضحة مرتي امالا شن بتكون ؟ )
كتبت ( ياقمري )
لالا ماتجيش بكل ( ياروح معاوية )
فعلا روحك وقلبك وكل شي عندك .. لالا مانبيش نبالغ في الحب .. نكتب ( صباح النور ) ساد شن الخفة يللي انا فيها .. اثقل ياراجل اثقل .. شن معنى الثقل قدام وقارها وحشمتها .. يارب معقولة بكلمة منها قاعد نصب عرق وقلبي زادو نبضاته ومعدل الادرينالين ارتفع عندي ؟
( صباحك فل يااحلا رغد في الدنيا )
غمضت عيوني وع الارسال بدون تردد
( قداش عرفت رغد في حياتك )
بدينا في النكد ..
( تقدري تقولي لتوا وحدة )
( لتوا ؟ )
( وبعدين انتي وشطارتك ياتقعد وحدة يايولو مية )
( غلبتني في هادي )
( نايضة تصلي في الفجر ؟ )
( اي وانت ؟ )
( اي طبعا .. )
وقفت ع الكتابة ورفعت عيوني فوق .. خديت راحتك هلبا يامعاوية .. وشن فيها مرتي هادي ره فيق ع عمرك .. معاوية ؟ .. وليت صاحب عيلة .. ضحكت
غسان: ان شا الله باللطف
فتحت عيوني : خير بلاك طالعلي زي قريني
غسان يصب في قهوته ويضحك: لعلمك ليا ساعة هنا وكلمتك وانت زي المسبوه مش معاي .. وتضحك بروحك
شبحتله بارتباك: ساعة ؟
غسان: اي شوف تليفونك !
شفت التليفون لقيتها باعتة مسج ( تقبل الله )
تنهدت: طيبت حتى قهوتك !
غسان: قلتلك ليا ساعة .. اللي واخد عقلك يتهنى
ضحكت بحياء: قصدك هلبا واضح عليا
ضحك غسان وشرب من قهوته شويا: اي .. ياسيدي ربي يهنيكم
ابتسمت: امين وعقبالك
ابتسم غسان بوجع: آمين
تلفتت وكملت تجهيز الفطور: وين حذيفة ؟
غسان: قال بيمشي يجيب بوي يفطر معانا ويبات الليلة هنا وغدوا بما انها العرّاسة ف بيرده لعمي كريم
ابتسمت وهزيت راسي : اي هكي خير
حطيت الصفرة ع خشة حذيفة وبوي
حضنته : اوووو الحاج خيري اليوم احلا صبح عندي
ابتسم: صباحك مبروك وليدي
شديت ايده وقعمزته ع الصالون : تفضل هي فطورك واتي ( اشرت ) هادي البسيسة وهدا التمر وهادي الزميطة وانت اختار ياغالي
ضحك: نبي وين الزبدة والعسل
شبحت لحذيفة باستغراب: ماتحبهمش قبل !
ابتسم بوي : توا نبيهم عادي لو عندكم
ابتسمت: اي عندي تو نجيبهم
طلعت للكوجينا لحقني حذيفة لقاني
نتنفس بسرعة : ياحذيفة خايف خايف ياحذيفة
حذيفة شد ع ذراعي: خيرك ؟
تلفتله وشاد دموعي: بوي مايحبهمش قبل
حذيفة باستغراب: مافهمتكش وكان طلبهم يعني ؟
تنهدت: خايف يكون ( سكتت شويا ) مش قادر نطلعها
استغرب اكتر: فهمني خيرك ؟
تعصبت: خايف يكون يودع
ضحك حذيفة بقوة: ياخيالك انت .. تي ناسي ان عنده الزهايمر وطبيعي بينسى شن يحب وشن يكره .. وليله بعد ربع ساعة يقولك مانحبهمش ونحب الجبنة وهكدا .. طبيعي خيرك !
قرنت حواجبي : ع اللي يحكيلك
خبطني بالخفيف: معاش توسوس وجو قاللي خاطري في مكرونة وهوا عارف روحه بيموت ووو .. كله وهم ياراجل
ابتسمت ع جنب: مش وهم قاعد نتفكر لتوا وين قال بوي وقت مشينا للرحلة انا خايف ع معاوية لما يكبر اكتر واحد .. تو هذا مش واضح انه يودع ؟
حذيفة : اها انت تفسر زي ماتبي .. وبعدين تعالا جاي بوك غالط الله يرحمه طبعا
طلعت الزبدة وحطيتها في صونية: كيف ترا ؟
حذيفة: علاش يتشائم ؟ .. المفروض الانسان يقول الشي الحلو مش يقول كلام مش باهي ويقولو ها يودع
ضحكت ع جنب: هوا الكلام يطلع لا ارادياً حتى دعوة امي
ابتسم حذيفة وخدي مني الصونية وصب عليها العسل : دعوة امك بس لو غيرتها وقالت يارب يتقي علينا كلنا .. هداك الوقت كانت ساعة استجابة واستجابت ونجيت انت لو دعت ليهم كلهم راهو ممكن استجابت ونجيتو كلكم ( حط ايده ع كتفي ) يلا الحمد لله كلها كتبة ربي احني نقولو وخلاص
ابتسمت: الحمد لله .. هي برا لبوي عندي مكالمة ضرورية
ضحك وغمزلي: ضرورية هلبا ؟
حذفته بالفوطة: درق وجهك
مشي حذيفة .. رفعت تليفوني وع رقمها طول سجلته ( R ) ع اساس رمز للشباب والكارثة انهم ح يعرفوه ويزبطوه ما شي يفوت عليهم
انا: الو
رغد: عطلت عليا
انا: كنت تراجي ؟
رغد: يب
انا: شن الجو ؟
رغد: ماشية الحمد لله وانت ؟
انا: بخير .. شن كنتي اديري ؟
رغد: فطرت بابا وتوا نراجي في عمتي بتجيني
استغربت: علاش ؟
ضحكت: امور بنات عاد
ابتسمت: ع الصبح ؟
رغد: وكل وقت .. المهم توا نكلمك بعدين تتصل بيا
تنهدت: تمام ( ترددت ) ءء رغد
رغد: عيونها
ارتبكت وهرب عليا الضي : ءء لا شي
رغد: حتى انت رد بالك ع روحك .. سلام
كيف تقرا في افكاري ؟ .. كيف عرفت بنقوللها ( ردي بالك ع روحك ) ؟ .. بدت تخوّف فيا البنت .. مسحورة !!
لحقت عليهم ع الفطور وهدرزنا مع بوي ..
.................
وجي يوم الفرح ::
نضت بكري فرحان ونراجي في لحظة نروح بيها من حوش بوها مرفوعة الراس .. طاقتي الايجابية فل .. نجري هنا وهنا وبدون مانتعب .. من الصبح انا والولاد مشينا لاستراحة صاحبنا ولقينا مجهز الجو .. بداية فطروني كبدة وقلاية وسلاطة مشوية لين تحرحر لساني .. والجو المعتاد
وبدينا في التلبيس
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
