مُعــاوية

Part 4

#مُعــاويــة

:: 4 ::

ابتسمت وقلت ( تو الصبح يصبح باهي .. خللي يرتاح الليلة غدوا نكلمه )
نسمع في غسان يتكلم بالتليفون لما مريت جنب داره وقفت وتصنتت حسيته يكلم في البنت .. طقيت الباب وخشيت .. سكر الخط وقاللي : شنو ؟
قعمزت ع حافة سرير مقابله : اللي ادير فيه غلط ياغسان
غسان بملل: نعرف قبل حذيفة يحاضر ديما في الغلط .. عداك حتى انت ؟
باسف قلتله: ترضاها لاختك شوف الساعة قداش ؟
غسان انفعل: خيركم شن لقيتوني اندير ؟
تنهدت وقلتله: ماتعشمش بنت الناس خللي بوي يطلبهالك وشوفها قبل .. انا مش مرتاح للموضوع
سكت غسان وحط عيونه في التليفون .. وقفت جيت بنطلع من الدار .. قاللي: معاوية !
فرحت قلت اكيد بيصلح الغلط: نعم ؟
غسان غم روحه بالبطانية: طفي الضي والباب وراك
بأسف : ياعليك اهبل
.....................
لقيت بوي يغسل في سيارته البرا صبحت عليه وولعت سيارتي ورجعت للحوش بنكمل القهوة
خش عليا حذيفة صب طاسة عصير من الثلاجة وقاللي : اليوم ماتحسبونيش ع الغدي
استغربت: علاش ؟
حذيفة: عازمني وليد صاحبي خاتم القران مداير زردة ودابح جمل الله يبارك
ابتسمت: عقبالك يارب زي هاليوم
حط الطاسة في اللاوندينو يغسل فيها: امين
صبيت قهوتي في المق وطلعت حطيتها في السيارة
جيت لبوي: نعاونك ؟
يحك في المرش: لا ياولدي قلت مكسد خللي نغسلها ( حط الفوطة في السطل وشبحلي ) كِنان مش عاجبني
تأسفت للوضع وتنهدت: تو اليوم نكلمه ونتأسف منه
بوي: لا في حاجة صايرة معاه ومايبيش يتكلم
ضميت شواربي لبعض: مااعتقدش .. نفس الموضوع ديما يحكي فيه .. يعلقو عليه في المدرسة والشارع .. حق هوا مشي للمدرسة ؟
بوي عصر الفوطة ونفضها: لا مايبيش وانا مانبيش نغصب عليه
ماكناش نعرفو شن صار معاه والا علاش يتصرف هكي ؟ .. هل ردة فعل عليا والا اختفاء من عيون الناس والا التنمر كلاه داخلياً !؟
..................
روحت من الورشة العشية وكنت مضايق ع كِنان .. طقيت باب داره ماردش فتحت الباب مالقيتاش .. فتحت باب الحمام ماهناش نزلت لبوي نجري
معاوية: بوي كِنان وين ؟!
سكر صوت التلفزيون وقاللي : توا ماليشي نص ساعة كان معاي بالك في الجنان يقرا
طلعت نجري للجنان ولحقني بوي رعش عليه .. شفت شوفة فشلتني عن الحركة طحت ع الارض طول .. مانعرفش بالزبط شن يللي صار لبوي بس سمعت غسان يقيم فيه وينادي فيه : بوي تربح نوض
كِنان كان معلق في الشجرة .. شنق روحه .. حكم ع روحه الانتحار .. حرم روحه من الجنة .. الانتحار ؟
غسان يعيط: معاوية تي نوض نزله مرات فيه الروح ونلحقوه
ع طول وقفت ماشيله مرتين انطيح ع الارض رغم انه المسافة كانت قريبة .. قمته في غمري وحولت الحبل وركبنا في السيارة بعد غسان ركب بوي من القدام وسند الكرسي شويا
فاقد للوعي وانا واعي .. نبكي ونردد ( كِنان سامحني وخيي سامحني والله مانقصد )
نسمع غسان يرشف في خشمه ويمسح في دموعه بالقوة ومرة مرة يطبطب ع رجل بوي ويناديه : بوي .. بوي بالله عليك قاوم
لما وصلنا للمستشفى غسان نزل يجري جاب الباريلا دفيتها برجلي وقمت كِنان في غمري وخشيت بيه نجري للاسعاف .. غسان حط بوي ع الباريلا وقعد معاه
اقل من ربع ساعة جي وقف معاي يراجي في الدكتور يللي طلع ع طول وقال : للاسف ماقدرناش ننقذوه .. سلامة روسكم
انهد حيلي وطحت ع الارض غسان خش في حالة تانية وشد الدكتور ويعيط عليه: توا نبيه حي نبي خوي حي
الدكتور: لو سمحت تعالا شد خوك اللي في ايدي درته هادي ساعته .
بعد رخاه غسان وبدي يخبط ع وجهه
الدكتور: ياخوي لازم الطبيب الشرعي يشوف الحالة
هزيت راسي بمعنى باه .. ع جية حذيفة يجري ولما شافنا انهار وسند راسه ع العرصة وبدي يبكي زي الطفل .. ويدعيله
وقفت عليه وانا جهدي طايح وداهش: كِنان انتحر ياحذيفة
تغمرني حذيفة وبدي يبكي : خللي ندعوله بالرحمة
كنت متمسك فيه ونبكي: وبوي مريض مانعرفش شن صاير فيه ؟
بعدني من حضنه ومسح دموعه: تو نمشي نشوفه انت خليك مع غسان ورد بالك عليه
هزيت راسي : باه ان شا الله
غسان كان مقعمز ع الكرسي ويبكي بحرقة .. جيت قعمزت جنبه وطبطبت ع رجله
غسان: تعرف شن يعني انتحار ؟ .. شن يللي خلاه ينتحر يامعاوية ( بعدين بدي يخبط ع وجهه ويعيط بصوت عالي ) انا السبب انا قاللي ع ولاد ضايقوه وماعدلتش عليه انا مادافعتش عليه يامعاوية
تغمرته نبيه يهدا بس كان اقوى: انا السبب يامعاوية انا .. ارجع ياوخيي والله لما نربيهم كلهم والله
شويا طلع الطبيب الشرعي وشبحلنا: معليشي شن تقربو للحالة ؟
وقفنا وتكلم غسان: خوته .. شن في ؟
الدكتور: تفضلو معاي
خشينا معاه للمكتب منهارين .. قعمزنا مقابلين بعض ومستغربين
معاوية: شن في دكتور ؟
الدكتور: خوكم الصغير الفترة الاخيرة شن سلوكياته ؟
استغربت: يعني شن بنقولك يادكتور.. هوا حساس هلبا من ابسط كلمة يدير قضية
الدكتور ابتسم: لالا نقصد شكالكم من حد او تعرض لتنمر ومضايقات ؟
غسان: شن يعني تنمر فهموني ؟
الدكتور: يعني هازيين عليه يعلقو عليه لابسينه بالليبي
غسان: كلنا هكي في صغرنا يادكتور .. علاش تتكلم هكي شن في ؟ .. ابلطها دكتور
الدكتور تنهد: خوكم متعرض للاغتصاب
وقف غسان وجبد الدكتور من بالطوه وبدي يعيط: احترم نفسك واعرف شن اطلع من فمك .. شن اغتصاب مااغتصاب خيره اهوا ؟
حذفه ع الكرسي .. الدكتور عدل روحه: مقدر الظرف يللي انتم فيه .. لكن هذا عيبنا احني نحسابو الاغتصاب للبنات بس .. عموما كان الحل في ايدكم لكن ضيعتوه الوليد
غسان انهد حيله وانا مصدوم تلفت للدكتور: كيف عرفت ؟
الدكتور: هذا شغلي .. في كدامات في جسمه وع رقبته .. كان يلبس في تيشرت رقبة الفترة الاخيرة صح ؟
سكتت لان كان كلام الدكتور صح .. مش قادر اندخل القصة في راسي
غسان: كيف صار ؟ .. وعلاش ماقالش ؟ .. معاوية ( قام عيونه فيا ) قالك حاجة ؟
سكتت لانه فعلا قاللي ولمحلي بس انا الغبي ومافهمتاش
غسان تعصب وشدني من ذراعي: نكلم فيك رد عليا .. كِنان امس قالك حاجة ؟
فكيتله ايده بالقوة: ماقال شي
الدكتور وقف: اهدو شوي .. ربي يكون في عونكم .. بوكم وامكم وين ؟
غسان شبحلي وشبح للدكتور وسكت
الكلام يطلع مقطع وبصعوبة: متوفيين
الدكتور كتب ورقة ومدهالي: كملو اجراءات الوفاة والتحقيق .. كان الله في عونكم اولادي
طلع وخلانا .. قعمزت مقابل غسان وهمست: هذا فاتح
شك غسان انه سمع صوتي: شن قلت ؟
قمت عيوني فيه: فاتح هوا اللي دار هكي ياغسان
وقف غسان مصدوم .. فتح الباب وطلع يجري .. سندت راسي ع المكتب وبديت نبكي
نجر في رجليا مش قادر ع الوقوف ولا الحركة لقيت حذيفة مقعمز ع الكرسي ويبكي .. اي يبكي من قال الراجل مايبكيش ؟ .. يبكي لما يحس بالندم .. ولما يحس بالوحدة .. ولما يحس بالفقد .. ولما يحس بالاهانة والقهر .. احساس بسيط قادر يسيطر عليه كلياً
وقفت ع حذيفة وطبطبت ع كتفه: شن صار في بوي ؟
حذيفة استجمع قواه ومسح دموعه : ارتفعله السكر وخلوه تحت الملاحظة
تنهدت: ان شا الله خير
حذيفة شبحلي بالم: غسان وين ؟
ابتسمت بقهر: ياخد في حق كِنان
حذيفة وقف: مافهمتش
شبحلته ودموعي معبيات العين: كِنان تعرض للاغتصاب وهذا سبب انتحاره اكيد
انهد حيله وقعمز ع الكرسي وقال: كيف ؟ .. واحني وين من هذا كله ؟
مسحت ع وجهي: في غيبوبة ياحذيفة ولا حد فينا حس
حذيفة مصدوم ومش قادر يستوعب
شبحت القدام: انا مروح بنشوف غسان وين وبنجيب الاوراق .. خليك مع بوي واعطيني مفاتيح سيارتك
هز راسه ومدلي المفتاح :باهي باه
................
وصلت للحوش طفيت السيارة وخبطت بكل قوتي ع الدومان لين ايديا فشلو .. تكيت راسي وبديت نبكي بحرقة اكتر .. كل مانتقرب من الحوش نتذكر كِنان وحياتنا معاه .. وذكرياتنا .. ولما شكالي من الناس .. وكل كل شي
نزلت وكيف ركبت المفتاح في الباب جي جارنا مسعود وقف عليا وقال: معاوية ان شا الله خير ؟
تنهدت ومسحت ع وجهي: بوي ارتفعله السكر
ماحبيتش نحكيله تفاصيل حادثة كِنان لانها بتبدا حديث الساعة ( ترند ) في الشارع
مسعود طبطب ع كتفي: بسيطة ان شا الله .. بنقولك غسان تعارك مع فاتح ورفعوهم الشرطة
رشفت خشمي وفتحت عيوني نستوعب الكلام: امتى صار ؟
مسعود: ماليشي نص ساعة غسان يضرب ويقوله كله منك .. وكان يسب فيه وضربه ضرب ياراجل مارحماش بكل .. شن اللي صاير يامعاوية ؟
حطيت ايدي ع كتفه وابتسمت: ماشي بنشوف
..................
الضابط: نقولك اضاربو بالسلاح
استغربت: سلاح شنو غسان ماعنداش
الضابط متعصب: نكدب عليك يعني ؟
تسرعت بالكلام: لالا حشاك .. باهي وينه نبي نشوفه
الضابط تنهد: تو تشوفه
ناض وطلع من المكتب شويا وخششولي غسان وقفتله لقيت وجهه دم ويعكز ع رجله .. لفيت بعيوني عليه وقلتله: شن درت في روحك ؟
غسان فك ايده من الشرطي وقعمز ع الكرسي: معاش تهمني روحي توا قعمزت في الكرسي يللي مقابله: غسان احني توا في أمس الحاجة لبعضنا ره
غسان: كنت بنقتله فكوه مني فكان والله كانت موتته ع ايدي بس ( خبط بايده ع رجله بالقوة لين توجع ) آآي
وقفت وثنيت ركابي ليه: خيرها رجلك ؟
غسان: ضربني برصاصة ولد الحرام
قعمزت: احكيلي شن صار !
غسان: ضربته قريب قتلته وين هرب مني لحقته لحوشهم طلعلي بالرصاص وضربني طلقة ع رجلي
استغربت: باه شن يقوللي الضابط تعاركو بالسلاح ؟
غسان ضحك بهزوة: لفقوهالي .. ماعنديش من يسندني ياوخيي
سكتت وابتسمت: ربي معانا ماتقولش هكي واحني وين مشينا ؟
غسان قدم راسه ليا: تعرف شن قاللي ؟ .. كِنان ولد حرام لاهو خوك ولاهو قريبك حتى مات ماعنده من ينشد عليه هدا اللي زاد هبلني .. كان مستوطي حيطه هالكلب وعارفنا ديما بعاد عليه بحكم العمر وكان عارفنا مش ح نصدقوه .. لكن يامعاوية وربي لما نربيه
سكتت وقمت عيوني فوق: حسبي الله ونعم الوكيل
..............
روحت للحوش لقيت حذيفة وبوي يراجو فيا
بوي: شن صار يامعاوية ؟
استغربت: من قالك ؟
حذيفة: جارنا مسعود
ضحكت بهزوة: شورا مايعرفش يسكت بكل
حكيتلهم شن صار وقرر بوي يطلعه بكفالة .. وفتحنا عزاء لكِنان وقررنا ندسو سبب انتحاره الحقيقي وقلنا انه مسحور .. وبما انه ( غير شرعي ) فكانت الاجراءات شويا صعبة
طيف كِنان يلف ع الحوش يوميا وفي كل وقت .. مافيش حد منا قدر يرقد ولا يرتاح كل تفكيرنا في كِنان وماتحمل من عذاب اكبر من سنه .. مافيش حاجة تثبت ع فاتح جريمته لان المغتصب توفى .. بس اكيد ربي شاهد ع جريمته الحقيرة .. كيف انسان طبيعي وبكامل قواه العقلية يطمع في طفل ؟ .. او يطمع في ولد صغير كيف بادي حياته ؟ .. كيف يهون عليه يدمره ؟ .. كيف يسمع في صوته الموجوع ومستمر في فعلته ؟ .. ماقدرتش نتخيل قداش حس وتعذب كِنان وغيره .. فاتح مش اول ولا اخر واحد يدير الجريمة الشنعاء في حق الاطفال .. ياما سمعت قصص بس ماتوقعتهاش قريبة مني لهالدرجة
غسان هالفترة مش قادر يستوعب انقطع عن الحياة كلياً لا عاد ياكل ولا يشرب ولا حتى تواصل مع نهال ولا شد تليفونه اصلا .. قرايته قطعها .. في داره شاد صورة كِنان وبس .. رجله الحمد لله تعافت لانها كان الضربة سطحية ..

#Dudu