#مُعــاويــة
:: 16 ::
( سامحوني كنت بنزل حلقة امبارح بس ماقدرتش نوصل للطول المطلوب بتجيكم قصيرة ف باذن الله التعويضية داستهالكم ماتخافوش 😂)
..................
قعدتنا طولت اليوم ع الفطور تقريبا قعدنا تلات ساعات عليها .. نهدرزو ونذكرو ايامنا في حوشنا ومواقفنا المضحكة والمفرحة .. بوي مشاركنا بالذكريات اللي مذكرها ..
بوي: وقتها كانت المرحومة أمي تساعد فيا للهروب .. وجدي يتحلف فيا ويعاود لو شافني خديت الليم مرة تانية
انا هنا وقفت مذهول .. يعني مذكر أمه متوفية ؟
غسان حط فردة الخبزة ع جنب وبصوت عالي قال: الحمد لله .. فطور ياحذوفة ولا في الاحلام
حذيفة فرحان بيه: والله طلعت للسوق انا وبوي كله كركرناه
بوي: لكن مابيتش تاخدلي الزبادي الصادة
حذيفة: لا يابوي خديتهولك تبيه توا ؟
بوي ابتسم: لو سمحت طبعا
حذيفة باس ع راسه: من عيوني
ناض حذيفة للكوجينا وغسان حط ايده ع رجل بوي
غسان: شن ياغالي نطلعو اليوم نغيرو جو
ابتسم بوي: ياريت .. للجردينا ولاه ؟ .. ( غمض عيونه وفتحهم ) انت غسان ؟
فرح غسان : اي اي ( عيونه لمعو وقف وحط عيونه في عيون بوي ) انت مذكرني ؟
ابتسمت: الحمد لله
بوي: انا مش عندي هنقر ؟
غسان توسعو عيونه: اي اي بتمشيله ؟
بوي: اي ياريت
استغربت: زعما اللي فيه الزهايمر ممكن في يوم يذكر ؟
غسان رفع كتافه: مانعرفش والله
جي حذيفة : خيركم فرحانين ؟
انا رديت عليه بفرح: بوي اذكر غسان والهنقر
ابتسم بوي: باهي الشبوب هذا منو ؟
اضايق حذيفة: الا انا يابوي ؟
غسان خبطه ع دراعه: اسكت خليني نفرح ماتنكدش عليا
حذيفة يلوح لبوي بايديه: انا حذيفة اذكرتني ؟
ضحك بوي: باين عليه دمه خفيف
ضحكنا ع حذيفة
حذيفة: كخ كخ خلاص برادة
مد لبوي طاسة الزبادي وعطاه كاشيك وقعد مقعمز بحداه ناض غسان رفع الصفرة ولحقته قعدنا نرتبو في الكوجينا ع اساس
غسان: جاينا رمضان شن نديرو ؟
وانا نغسل في الاماعيين: ربي يفرج
غسان ضحك: انت اقرب واحد ره
حطيت الطاسة ع السقطار: لا ربي يعلم ماتندريش
غسان: كلملنا سعودا خللي يزوجك بنته ويريحنا في رمضان تعرف انت الحال رمضان اللي فات تبهدلنا لكن بوي وقتها وضعه تمام وساعدنا هلبا توا منو بينا ؟
انا: مكتر دوتك .. خليني نكمل الاماعيين تربح
قعمز ع حافة الرخامة: من الاول قوللها نبي تحسبي خوتي
تلفتله واتكيت ع الحوض: تعرف صار معاي موضوع بنحكيهولك
غسان بانتباه: شنو ؟
انا: لما كان عندي تصوير في الكلية تلاقيت معاها مانعرفش وقتها شن يللي صارللي
غسان: قلبه يدق يدق ووجهه يصب عرق ياويله
ضحكت: بلا تسهويك .. المهم وقفت وقالتلي ع اسمها وكدا وكدا
شبحلي باستغراب: هادم الكدا والكدا اللي نبوهم
تنهدت: والله ماني عارف شن نقولك لكن البنت خدت مكانها طول .. مافيش بكل
غسان: آها
تلفتت للاوندينو: شن آها ! .. هذا هوا توا مش عارف كيف ؟ ( وقفت وتلفتله ) نكملك القصة لكن تكمل عليا الاماعيين ؟
غسان نقز : تمام حول
مسحت ايديا: تمام توا نكملهالك زي اليوم العام الجاي
خدي طاسة عباها امية: ضحكت عليا ياكلب
ناض يجري وراي وانا نجري لين طلعنا للجنان الخلفي وهوا وراي .. وقفت ع حافة الحوض
انا: رد بالك ادفني تشوف في الدنيا مصقعة
غسان يهدد: صقع صار ؟ .. ماهو خليك قد كلامك علاش تحط روحك في مواقف بايخة !
ضحكت: نبصر ياسيدي والله
غسان: خللي بنت مسعود اطلعك توا
دفني بقوة طحت في الحوض وطلعت راسي نفضت شعري وانا نضحك: ياكلب والله لما تشوف
يضحك وهوا ع حافة الحوض: باش نوريك
انا: والله لو ننواك نلحّقك بيا وربي
غسان يضحك بدموعه قرابة الخمس دقايق .. بعدين قعمز ع حاشية الحوش مقابلني : دهشتني بالضحك
وانا طلعت قعمزت ع حاشيته الجهة المقابلة : دوم ياحنة
غسان : ياحنة !
ضحكت: تخايلنا جينا بنات ؟
غسان يقلد في البنات: ووك عليا ياحبيبتي بعيد السو .. نبدو هكي همجيين ومتوحشيين لالا I can't
ضحكت بصوت عالي: جبتها اقسم بالله
غسان: شني نلعبو امالا !
نلعب برجليا ع المية: طيحتني فيها المية خامرة وتبي تعقيم
غسان يصول ويجول بعيونه: مايطرالك شي
ابتسمت: شن اللي مفرحك ؟
غسان شبحلي والدمعة في عينه: كأن ربي جبر بخاطري وخلا الذاكرة ترجع لبوي لحظات باش يذكر اسمي ولاه !
ابتسمت وسكتت
تنهد: صح هوا ناسينا لكن انا مش ناسي انه بوي ومستحيل نضايقه ولا نتحشم فيه .. نحكيلك موقف !
هزيت راسي وابتسمت: اي
استرسل غسان :وقت جيت انت لحوشنا كنت اكبر منك وغرت منك هلبا وضايقت بوي بتصرفاتي لدرجة الدادا مديحة يأست مني وقالت لبوي اني مشاغب وتبيه يردني بس بوي قاللها كلمة عمري ماننساها ( غسان هذا حاجة كبيرة تو تشوفيه لما يكبر يكون سند ليا ولخوه .. شخصيته قيادية ومايكسره شي واهو الزمان يفوت وقولي خيري قالها ) وقتها بس حسيت بقيمتي .. لما اتلزيت من حوش نهال انكسرت واضايقت وقلت في نفسي ( هدا انا اللي مفروض حاجة كبيرة ومايكسرني شي راني انكسرت يابوي وانت حاضر ومادرت شي )
تنهد غسان وكمل: بعد صليت وشكيت لربي ارتحت هلبا وانا توا مؤمن بنفسي وعارف روحي ح نكون شي كبير مش موقف يكسر غسان الهادي لالا مادام ربي معاي مايكسرني شي
كنت مستمع بانتباه ليه .. ابتسمت: صح انت واحد مايقدر عليه كان ربي
ضحك: مقبولة منك التهزيبة عموما
انا: وشن يصير في الاماعيين
سمعنا صوت من بعيد جاي: كملتهم انا ياباير منك ليه
ضحكنا وقت شفنا حذيفة ينشر في حوايج بوي
تلفتلي غسان: تو شن يصير في بنت مسعود ؟
ابتسمت: اسمها رغد وانت شادها بنت مسعود بنت مسعود
ضحك غسان: آوووبا رغد .. قوي الاسم
بخيته بالمية: تحشم
غسان: باه شن يصير في رغد ياعم ؟
تنهدت: بنحدد موعد للفاتحة
غسان: هكي طول .. باهي غير شوف شن شروطها وكدا
ابتسمت: الباين ماعندهاش شروط غير القراية
غسان: وبتمشي تهز في طولك ؟
حكيت جبهتي: مانعرفش من بننشدك ؟ .. قصدي ماعندناش انثى في حياتنا بكل الزفت
ضحك حذيفة وقرب منا: ح نكلم شيخي اكيد زوجته او بنته تقدر تساعدنا
طق غسان بصوابعه: جبتها حذوف
خداه بسرعة وحذفه في المية عيط غسان من الخلعة ضحكنا كلنا
حذيفة: معاش تعاودها مبردك
طلع راسه غسان يضحك واتكي بايديه ع الحوض: حذوفة جيبلنا الفوط حسنا صقعنا
حذيفة تعصب: والله ماني جايبلك حاجة شغال بوكم انا !
غسان : حي ياحي تو نقوله بوي حذيفة سبك
انا وقفت وقلتله: تو نجيبهالك
طلع غسان: نبصر تو نخش بروحي
...................
في عشية من العشيات جانا حذيفة بقائمة مدهالي
حذيفة: هاك اقرا هادي زوجة الشيخ كاتبتلي شن الاصول
قريتها عيوني خشو بعض: كيف ذهب وبدلة كبيرة وصغيرة تي من بيشوفهم هادم ؟ هوا حتى دخول مانيش مداير ماعندناش عنصر نسائي خيرك حذيفة
حذيفة اتكي جنبي ع الفراش: والله هذا اللي كتباته جيبه
حذفت الورقة: نجيب عينك وعينها .. بنمشيله عمي مسعود برا ملح
ضحك: برا ملح انت
نضت اتصلت بعمي مسعود ورحب بجيتي بحكم خبرته انه نبي نتعرف ع شوية تفاصيل
لبست لبسة عادية تيشرت اسود وسروال رمادي وسبيدرو اسود ولبست نظارتي وطلعت
استقبلني مروان بدمه الثقيل ووجهه المتعصب كالعادة .. خشيت للصالة لقيت السرير متحول وعمي مسعود بدي يتحرك شويا شويا
حط كرسي قدامي وقعمز: سامحني ياولدي غير قاعد نتعالج ف مانقدرش نقعمز ع الارض
ابتسمت: لا عادي ولا يهمك
مسعود: اناديلك رغد واسألها شن شروطها ؟
ابتسمت وارتبكت وبديت نلكلك
ضحك: سلم ولدي انا معاكم ماتتوترش
هنا المشكلة ياعمي مسعود علاش مقعمز تزيد في همي هميين .. ابتسمت قام تليفونه واتصل بيها وجت
بحيائها وحشمتها قعمزت في اخر الصالة وبصوت يادوب ينسمع قالت السلام
رديت وانا ذايب هايم في السجاد طبعا ماتتوقعوش فيها ماقدرتش حتى نقيم عيني
مسعود: بنتي هذا معاوية شوفيه كويس .. وانا يابنتي راضي عليه رضا تام ولو تبي رضاي ترضي بيه
كم في ذلك حرف الضاد ياعمي مسعود كترتها ره .. شن راضي ماراضي وارضي ورضاي وو .. تربح خليني نلمحها بس اطلع دير دورة وارجع ماتعطلش خمس دقايق بنشوفها .. الشوق مرتفع عندي فايت حده
رغد: الشور شورك بابا
بابا ! حي ع الكلمة .. حي ع الصوت قتلني .. عرقت وماقدرتش نتحكم في نفسي .. قاعد نلهث داهش ارحميني
مسعود: باه معاوية جاي اليوم يبي يعرف شروطك ؟
رغد كانت متحشمة ووجهها احمر: زي ماتبي بابا
ومعاوية ؟ .. مش ضروري تعرفو شن يبي ؟ .. ولا خلاص حصلتو عليه في ارضكم ! .. تي اوقفو شويا خيره عمي مسعود ماضيفنيش نوض ديريلي قهوة من تحت يدياتك ياعم
مسعود ابتسم: معاوية تبي تشرط شي ؟
بلعت ريقي بصعوبة: انا شروطي واضحة ياعمي .. نبيها تحسب غسان وحذيفة حسبة خوتها تودهم وتعطيهم زي ماتعامل في خوتها بالزبط
ضحك مسعود: لالا قول زي ماتعامل في بوها
استغربت وكملت: وبوي انت عارف وضعه
هز راسه: عارف وقلتلها
ابتسمت: خلاص .. مبدئيا بنأجر
رفع ايده عمي مسعود: ايجار لا .. ابني فوق استراحتكم جنبها المهم ايجار لا
استغربت انفعاله: علاش ؟ .. قصدي ياعمي انت عارف الوضع ؟
ابتسم مسعود: اي عارف انا نساعدك نحط دارين وحمام ومطبخ ياسيدي حتى دار وحمام والمطبخ خليك انت والعيلة
اضايقت: لا خوتي شباب كيف نخليها معاهم ؟
مسعود: شن الحل برايك ؟
تنهدت: خليني يومين نفكر ونرد عليك
مسعود: تمام ربي يعينك ياولدي
ووقفت واستاذنت قبلي بشوي لمحت نظرتها ليا وطلعت .. طلعت ركبت سيارتي وللحوش
..................
في الليل مقعمز ع الجلسة مقابل الحوض ونفكر شن ندير بالزبط نبني والا نشري شقة ع قدي والا نسكر راسي ع الايجار .. خيرها البنت هادي عتبة كل مانبي نقدم خطوة نولي عشرة .. في ظرف شهر يبيني ندير هذا كله ! .. عاجز ومش عارف نتصرف .. شفشفت شعري بتعصب وتنهدت
وقف حذيفة قريب مني : دورتك مالقيتكش
بعدت شويا وأشرت: تعالا قعمز
قعمز بحداي وتلفتلي باستغراب: شن في ؟
تنهدت: عمي مسعود يبيني نبني او نفصل المهم ايجار لا
حذيفة ابتسم : وين المشكلة بيع الورشة
ضحكت بصوت عالي: وبعدين نقعد انلقي في ايديا ولاه ؟
سكت وبعدين قال: مش مشكلة نبيعو المحل .. اهم شي راحتك ياعريسنا
ضحكت ع جنب : بالك غسان مايرضاش
ضحك حذيفة فرحان: مايرضاش عينه تو تشوفه كيف بيفرح
ابتسمت بضيق شويا: بيقولك والورشة خيرها ماتنباع
سرح شويا وبعدين قال: نقولك راي اللي محل نديرو جيهة في الورشة نحطوه تستفيد انا وهوا وانا بنستفيد وانا مرتاح
ضحكت : تمام قوله وبعدين خبرني
حذيفة: تمام
وفعلا خبره وصار يللي اتفقنا عليه .. المحل كان ماسكه واحد اسمه ناجي وبما أن اوراق المحل عند صاحب بوي عبد الكريم تمينا الاجراء قانوينا وبعناه لعمي عبد الكريم نفسه .. وعاهدنا ان لو ردينا حقه يوم ما نشروه ونردوه لينا من جديد
عبد الكريم: زي ماوصيتكم ياولادي مادامني حي وحصلتو كيف تردو حقه هوا ليكم .. وتوا خلوه شغال ع نفس الوضع اعتبرو ماتغير شي تمام !
ابتسمنا وشكرناه بالواحد
حذيفة: جزاك الله عنا كل خير .. صحيت ياعمي
غسان: والله فرحتنا اقسم بالله
انا: بارك الله فيك ويكثر من امثالك
بس بوي .. بوي يتفرج ع الحوش والاثاث ويراقب بهدوء كل الحديث يللي دار بينا
تلفتت لبوي: بوي هذا عبد الكريم
ابتسم بوي : اهلا وسهلا بيه
عيون عمي عبد الكريم دمعو وقال: ناسينا يامعاوية ناسي ايامنا وحياتنا جميع ( تنهد ) شن اللي جبركم تقعدو معاه رغم انه ناسيكم ؟
ابتسم غسان: هوا ناسينا صح لكن احني متفكرينه
حذيفة واصل: ماحد جبرنا هذا بفضله بعد الله احني اهنا
تنهدت: هذا مش غير بونا هذا خونا وصاحبنا وكل شي عندنا بالدنيا .. ينسانا اي لكن مستحيل ننسوه
ابتسم عمي : الله يبارك فيكم ياوليداتي اقسم بالله لو ولاده فعلا راهو مادارو هكي .. احسن شي داره خيري في حياته هوا رباكم وعلمكم ع الدين الصح ربي يحفظكم لبعض وديما خليكم هكي
ابتسمنا
حذيفة: وانت ياعمي بارك الله فيك ساعدتنا هلبا
غسان: لولاك والله رانا احترنا وماديين وجوهنا نستنو في رحمة ربي للباشا هذا
حذيفة همسله: رحمة ربي ديما مجاورتنا يامثقف
غسان شبح لعمي عبد الكريم: برااا خديتنا بعين ياعمي شكلك
ضحكت وفنصت فيه: تحشم ياراجل
بوي: لالا الراجل هذا محترم ياشاب عيب هذا كبر بوك
ابتسم عبد الكريم: عارفه يبصر ياحاج طمني انت ع صحتك ان شا الله تمام
بوي ابتسم: والله بخير الحمد لله
عبد الكريم: ربي يحفظهملك الولاد من خيرة الشباب والله
ابتسم بوي وشبحلي: هي نادي امك يامعاوية بنروحو خلاص
قلبي عصرني وتلاشت ابتسامتنا كلنا .. ادراكت الموقف : حاضر هي نوضو ياولاد
عمي عبد الكريم توجع ووقف بآسى شبحله وهمس: ربي يعافيك ياحاج يارب
كان صوته يادوب ينسمع ابتسمتله وودعته: نستاذنو عمي وربي يبارك فيك
ابتسم ولوحلنا بايديه: بالسلامة في امان الله
طلعنا وركبنا سيارة حذيفة وساق بينا حذيفة ووصلنا للحوش مطمنين مرتاحين البال .. دوش بوي وخش رقد من التعب وانا سهرت الليل نفكر في حل للحوش .. هل نبني فوق منهم والا جنبهم وهل الفلوس يسدوني نكمل بيهم الشقة كلها
وصلني مسج ع الماسنجر .. كنت نستنى فيه .. ابتسمت لا اراديا .. عيوني لمعو من الفرحة اول ماقريته
#Dudu
أنت تقرأ
مُعــاوية
Actionيقال أن الصُدفة خير من ألفِ ميعاد .. لم أعلم متى جمعتنا الصدفة وجعلتنا إخوة تحت سقف واحد نساند بعضنا البعض .. نقف في صف واحد ونحارب معاً .. من قد يتصوّر أنها قادرة على تغيير حياتنا إلى الأبد ! من هنا تبدأ الحكاية !!
