مُعــاوية

Part 6

#مُعــاويــة

:: 6 ::

..............
مشيت للورشة تاني يوم الصبح وخليت حذيفة مع بوي في الحوش .. في ظرف زي هذا صعب نخلوه بروحه .. قعمزت نستنى في رزقي جاني طارق
طارق: والله ماني مصدق الحاج خيري كيف صار فيه هكي ؟
رديت : كتبة ربي الله غالب
طارق: زعما حزنه ع كِنان ؟
هزيت راسي : الله اعلم .. مني ماحزنش عليه كِنان .. والله كل ليلة نحلم بيه مش قادر ننسى صورته لما شانق روحه ( واطيت راسي بالم ) مش قادر قسما بالله
طارق طبطب ع كتفي: الله يرحمه .. قداش كان وليد محترم وخدّيم .. عندي شوية مواقف معاه ويوجعني كل مانتفكره يابال انتم عشرة عمر
ابتسمت: ربي يرحمه ويجمعنا بيه
طارق: وشن صاير في غسان وحذيفة ؟
تنهدت: مشيين حياتهم وخلاص ماحد حاس بالوقت كيف يجري .. حذيفة مستمر في الجامع ربي يباركله بس غسان وقف كل شي
طارق: غسان رغم انه عصبي ومايتفاهمش لكن قلبه طيب وحنين هلبا
ضحكت : اي ناوي ع الحلال ومش عارف يرفع منو يخطبله خايف لو مشي بروحه يردوه
طارق سرح شويا وبعدين شبحلي: ارفعوه الحاج خيري معاكم .. خللي يشوفه بوها واكيد الناس بتقدر مش معقولة رانا ليبين فينا شوية حن
ابتسمت: يستر الله
.............
مروّح من الورشة وصلت قدام الحوش طفيت السيارة وفتحت تليفوني نقلب في الصور لقيت صورة كِنان .. تحسست الصورة بايدي وقعدت نتأمل فيه وقلبي ينعصر مع كل نظرة .. الله يرحمك ياغالي الله يغفرلك ويسامحك .. قطع تأملي ودعواتي صوت عياط جاي من حوش جيرانا يللي مقابل .. قمت عيوني لقيت بنت طالعة تجري بلبس الحوش وشعرها منكوش .. نزلت نجري نشوف شن صار لقيت عمي مسعود ومعاه زوز يجرو وراها .. حسيتها جاية جيهتي وتقربت اكتر وهيا تجري ومش مركزة من قدامها .. شديتها بايديا الزوز حصلت عليها .. عمي مسعود يجري ويقول( شدها ياولدي بالله عليك )
كانت تحاول تفك روحها وتبكي وقعدت تسب فيا وتلعن .. مش فاهم شي
عمي مسعود شدها وحضنها .. حضناته وتقول: انا مش مريضة يابابا
واطيت عيوني
عمي مسعود: سامحني ياولدي
قلتله: لا عادي ردو بالكم عليها
جي خوها وشدها من شعرها: ياحقيرة درتيلنا العار
كنت بنتكلم بس استدركت الموقف هذا خوها وبوها انا شن علاقتي ؟ .. عمي مسعود طبطب ع كتفي وابتسملي
رديت عليه: ربي يشفيها يارب
وخشيت للحوش .. لقيت حذيفة يهدرز مع بوي
حذيفة: يعني انت حفظت القرآن بعمر 15 السنة ؟
بوي: اي شيخي كان مهتم بيا لاني بسرعة نحفظ
حذيفة: باهي كيف قدرت تحفظ حتى انا نبي نختم زيك
بوي بتكبر: انت مش خيري
ابتسم حذيفة: ياريتني خيري
قطعت كلامهم وابتسمتله: شكلك انسجمت معاه ؟
حذيفة: بوي هذا
ضحكت: وشن درتلنا الغدي ؟
حذيفة تكسل: مادرتش .. اقعد مع بوي بنوض نحط مفروم وخلاص
بوي: لا انا خاطري في كسكسي بالحوت
ضحكت انا وحذيفة
حذيفة: اي عادي نطلبوه مش مشكلة
ضحكت: كان غسان هنا راهو قال كاني متزوج راهو مرتي ادير
ضحك حذيفة وقلب تليفونه: اما مطعم اللي يطيب في وجبات هكي ؟
تكسلت ووقفت: وين نندري اسأل غسان
.........
ركبت دوشت وبدلت حوايجي وصليت الظهر .. فتحت روشن داري بنهويها لان طلعت بكري مافتحتاش .. شفت بنت واقفة ع الروشن نفسها يللي كان تعيط لوطة .. ماقدرتش لحظتها نغض البصر .. ملامحها واضحة بالنسبة ليا وشعرها ملموم بطريقة فوضاوية شبحتلي وابتسمت رديت الابتسامة وسكرت الروشن .. حسيت روحي انخنقت شن قاعد اندير هادي بنت عمي مسعود جارنا ويللي ماسيبنا في يوم .. قاعد نخون فيه بنظراتي لبنته رغم انه وثق فيا وخلاني نلمسها .. قمت ايديا فوق وقلبتهم حسيت برجفة في جسمي .. سندت راسي ع روشن وابتسمت .. كانت جميلة
................
خشيت لدار كِنان بهدوء نتأمل فيها مانعرفش ليش اليوم بالذات حسيت بالفقد حسيت بمكانه فاضي .. حسيت بأني بروحي وان كأن حاجة سلبت مني .. ممكن لان موتّه مش طبيعية .. فتحت دولاب كتاباته نتصفح فيهم كاتب معلومات وملاحظات بيقراهم في الفاينل اللي مالحقش عليه اصلا .. ولا لحق يعرف معدله السنة هادي شنو ؟ .. قلبت الاوراق ابتسمت بوجع .. كيف الانسان يبدا ضامن حياته للاخر .. يعني يخدم باش يحصل مرتب نهاية الشهر مرات يموت قبل نص الشهر اصلا .. وكيف يجتهد ويتمسك بدراسته وتاخده المنية قبل الامتحانات .. اللهم احسن خاتمتنا .. رديت الاوراق في مكانهم طاحت ورقة استغربت .. خديت قمتها وفتحتها
( سامحوني خوتي ماقدرتش نحكيلكم شن اللي صار .. سامحوني انا لازم نموت مانقدرش نتقبل حياتي بعد اللي صار .. طفو عليا الضي ولاد الحرام ودارو مادارو قاعد معلم في جسمي مش قادر ننساه انا ماعشتش حياة طبيعية بكل جيت ع الدنيا لا أم لا أب لقيتكم انتم قدامي وبوي خيري ربي يحفظه ماعمركم حسستوني غريب لكن ولاد المدرسة والشارع كانو ينادو فيا بولد الحرام ماتقولش انا اللي قلتلهم لكن وضعي في المدرسة غير صحيح اسم بس لا هوية ولا كنية وهالشي عرفوه بروحهم .. كنت بالنسبة ليهم ملفت للنظر محط الاهانات والشتايم واللي في نفسه سوء يطبقه عليا .. ماتقولش ضعيف عافرت وضربت بس كانو اكتر مني قوة وعدد .. اللي عذبوني ودارو فيا الحرام هما فاتح واصيل ومالك وانا والله ماح نسامحهم وربي ينتقهم منهم في اقرب الناس ليهم وانتم خودولي حقي بعد نموت ماتخلونيش متعذب حتى في قبري .. سامحوني لاني ماقدرتش نحكيلكم ماعنديش وجه نقول اللي صار .. معاوية انت خوي وحبيبي وسندي انا مش زعلان منك لان ضربتني وماتقولش بسببي قتل روحه .. انت ديما واقف جنبي ومعاي وانا والله مامضايق منك انا نحبك غير عن خوتي لانك قريب مني هلبا .. انا عارف وواثق انك انت ح تقراها الورقة .. كلكهم سامحوني وربي يحفظكم .. انا كِنان )
كاتب تاريخ انتحاره .. طبقت الورقة وبديت نبكي بحرارة ونبوس فيها وخفت نبلها .. هادي دليلي الوحيد لقضية كِنان .. طلعت نجري لغسان
فتحت عليه الباب بالقوة انخلع وسكر الخط شوره كان يكلم في نهال
غسان: خير بلاك هاد زي الحمار بوي راقد
سكتت لما شفت بوي راقد في سرير غسان
تكلمت بهمس: خيره راقد هنا ؟
غسان يوشوش: وين تبيني نخليه ؟ .. قلت يرقد تحت عيني خير ( شاف لتليفونه وبعدين شافلي ) شن تبي ؟
مديتله الورقة: اقراها كويس
خداها مني ويقرا بتركيز وقف من الصدمة: تبتت عليه التهمة بنكلم المحامي صالح شن رايك ؟
رديت عليه وانا نتأمل في بوي كيف راقد : دير رايك الورقة وصلت عندك وتصرف
طلع غسان من الدار: رد بالك ع بوي
قعمزت ركابي نتأمل فيه .. وفي ملامحه الحادة .. لمست ع وجهه وابتسمت: ربي يحميك ويعافيك يارب
نضت طفيت الضي المخفي وسكرت الباب عليه بهدوء ومشيت للجنان .. خيال كِنان ولا فارق جنانا .. طق عمي مسعود باب الحوش فتحتله: اهلين عمي مسعود كيف حالك ؟
سلم عليا: والله الحمد لله ياوليدي كيف حال بوك ؟
ابتسمت: تقدر تقول توا احسن
مسعود: ان شا الله ديما .. بالله ياولدي سامحنا ع اللي صار
ابتسمت: معذور ياعمي .. شن اخبارها ان شا الله احسن ؟
مسعود: جبنالها شيخ وعالجها والحمد لله توا نحس بيها ولت خير من قبل
باستغراب: شن اللي صارللها هيا ؟
شبحلي باستغراب .. تنهد وقام عيونه: والله من لما تزوج خوها وهيا في هالحال .. رفعت تونس تركيا مصر ماخليت مكان الا ورفعتها .. في اللي يقوللي صرع واللي يقول هذا مرض نفسي وبرا عاد تاخد لين تشبع من دوة الدكاترة
قلت: اها وانت كيف عرفت مسحورة ؟
مسعود: هذا اخر احتمال حاطه وتوا بديت في علاجها .. تصدق الليل ماترقداش وهيا تأن وتعيط
باسف رديت عليه: لا حول ولا قوة الا بالله ربي يشفيها
عيونه دمعو وابتسم بحسرة: انا ماشاغل بالي غيرها .. هيا بنية وحيدة والولاد مدايرين فيها الويل لو غلطت مش مساعديني بكل في دواها واميمتها متوفية وطقت الخمسة وعشرين ومازال ماجي نصيبها
كنت نراقب فيه كيف يحكي عليها بالم ووجع .. عصر قلبه وتلفتلي: ربي يعين .. ربي يعين
ابتسمت وطبطبت ع كتفه: ربي يرزقها بزوج الصالح يارب
غمض عيونه وفتحهم: بالله من وين ؟ .. نحس لو جي نصيبها خوتها ح يبهدلوه ولو ماجاش ح تتبهدل من بعدي
تنهدت ورديت عليه: للدرجة هادي ماينفعوش ولادك ؟ .. في الاخير هما خوتها وح يردو بالهم عليها
مسعود ضحك بهزوة: لا ياولدي مش كل الخوت هكي .. هادم نساوينهم راكبين ظهورهم الكلام كلامهم والسلام سلامهم .. وهما كارهينها بلا سبب
ضميت شواربي بحسرة ومعاش عرفت نرد عليه
عمي مسعود ابتسم وخبطني ع كتفي: يلا مانبيش نزيدك هم ع همك المهم بين فترة وفترة بنجي نطمن ع الوالد
ابتسمت : بارك الله فيك
...............
غسان: مانعرفش هكي قاللي مايعترفوش بيه وقضية ليها فوق الشهر جاي توا تبي تفتحها بعد حتى دفنوه وممكن تحلل
خبطت ع جبهتي: هذا اعتراف المغدور بيه كيف مايعترفوش بيه ؟
غسان طبق الورقة وردها لجيبه: وين نندري انا .. تعرفني قاري IT مش قانون
تكيت راسي ع الكرسي : والراي ؟
غسان بانفعال: الراي عند حسني وحسني مات .. ماعندي ماندير اكتر من هكي وانت في موضوع تاني
قمت راسي وشبحتله: شن المصيبة الثانية ؟
غسان: عندك علم فاتح سيبها الجيهة هادي بكل .. بيشوفله مكان تاني يكمل فيه جرايمه
خبط ع رجلي بقوة: يلعن شكله .. كيف صار ؟
غسان: في ليلة مافيهاش ضي كتح لكن وين بيهرب من ربي .. مصيره يجيني برجليه وتشوف
تنهدت: اكيد ربي بياخد فيه الحق
غسان شبحلي بنظرة غير مفهومة: وفي موضوع تاني !
شبحلته وهزيت راسي بمعنى ( كمل )
غسان: نهال
قلبت عيوني وتنهدت: خيرها التانية ؟
غسان فنص فيا: شن خيرها انت التاني ؟ .. بوها ( خدي نفس وكمل ) عرف انها تكلم فيا ضربها وتوا مايكلمش فيها
فنصت فيه: ويعني ؟
غسان: شن يعني ؟ .. بنخطبها يعني لازم نكون راجل معاها
قعدت نتكلم بطريقته: لازم نكون راجل معاها ( فنصت عيوني فيه ) شن تخرف انت ؟ .. مش وقتها بكل
غسان: شن تبيني نخليها وهيا توا في أمس الحاجة ليا ؟ .. تكلم بمنطق ؟
رديت عليه: والله ؟ .. اما منطق اللي تبيني نكلمك بيه .. عندك حوش ! .. عمل محترم ؟ .. ياسيدي حتى مصروف جيب عندك ؟
غسان قام ايديه وضحك بهزوة: اللي يسمعك يقول عايشين ع المصروف احني ؟ .. ماهو ناخدو من بوي والامور لوز
صفقت ايديا في بعض: اما لوز بتقعد عمرك كله بتمد ايدك لبوي ؟ .. وبعدين انت شايف وضع بوي توا ؟ لولا صاحبه عبد الكريم رانا بعنا كل شي باش ناكلو .. اما خدمة اللي انا وياك فيها باش تقدر تعيشنا وتعيش عيلتنا لو تزوجنا ؟ .. انا الورشة اليومين اهما او تقدر تقول الشهر اهوا مش زي العادة اللي يجيك ينفخ قومة ويروح .. ( لفيت بعيوني ع الدار وبعدين شبحتله ) بعدين تعالالي جاي انت ناسي وضع بوي حاليا غير مدرك للي حواليه .. شايف شن مكتوب في البطاقة ؟
غسان تنهد بوجع: ياسر انت استاكيت ساد تعبتني
تنهدت وطلعت هواء بقدر المستطاع وتنفست الصعداء وشبحتله بحسرة: سامحني
وقف وعيوني حمر خانقاته العبرة: طالع شويا تو نجي
هزيت راسي بمعنى باه .. مسحت ع وجهي وتنهدت ( ربي يكون في عونك غسان )

#Dudu