" အင်း .. အကုန်မှန်တယ် ရော့ .. "
သက်လွှာ ရေးဖြေထားတဲ့ Grammar တွေအကုန်မှန်နေသဖြင့် သိမ်မွေ့ထည်သဘောတွေကျပြီး မျက်နှာလေးက ပြုံးလို့နေသည်။
" ရော့ ... အသဲလေးပါ ပေးလိုက်တယ် "
ရှေ့ကို ထိုးရွှေ့ပေးလိုက်တဲ့ စာအုပ်ကို သက်လွှာ ငုံ့ကြည့်လိုက်တော့ မှင်နီနဲ့ V.V Good လို့ရေးထားသည့် စာကြောင်းလေး။ အဲ့ဒီဘေးမှာမှ အသဲပုံလေး ဆွဲထား၏။ သက်လွှာ မျက်ခုံးပင့်ကာ မော့ကြည့်လိုက်တော့ သူမက Eyes smile မျက်ဝန်းလေးနဲ့အတူ တခစ်ခစ်ရယ်ပြလို့နေသည်။
" ကလေးဆန်လိုက်တာ "
ခပ်တည်တည်နဲ့ ရေရွတ်လိုက်ပါသော်လည်း သက်လွှာရဲ့ရင်ထဲမှာတော့ နွေးနွေးလေးဖြစ်နေသည်။ သဘောကျပါသော်လည်း သဘောမကျတဲ့ပုံစံ ဟန်ဆောင်လုပ်ပြနေရတာက သက်လွှာအတွက် ခက်တော့ အခက်သား။
" ဒီနေ့တော့ ဒီလောက်နဲ့နားကြတာပေါ့ "
သူမသည် မီးခိုးရောင်ဖျော့ဖျော့ ပိုးသားဂါဝန်ရှည်လေးကို ဝတ်ဆင်ထားပြီး အပေါ်မှ Cardigan အဖြူဆွတ်ဆွတ်လေးကို ထပ်ထားသည်။ ဆံပင်ကို ကျောလည်မှာ ဖဲကြိုးစအဖြူလေးနဲ့ ခပ်လျော့လျော့လေးစည်းထား၏။ သူမသည် ဒီညမှာလည်း ယဉ်ယဉ်လေးနဲ့ကို လှနေသည်။ ဖြစ်နိုင်လျှင် စာသင်ချိန်တွေကို ထပ်တိုး၍ သင်ချင်နေမိသည်။ အကြောင်းပြချက် မရှိပါပဲ သူမနဲ့ အတူတူရှိနေချင်သေးသည်။ စကားတွေ တစ်ခွန်းစ နှစ်ခွန်းစ ပြောချင်သေးသည်။ သို့သော်လည်း ... ။
" ဟုတ်ကဲ့ "
တွေတွေလေးငေးကြည့်ရင်း သက်လွှာ ခေါင်းညိတ်ပြလိုက်သည့်အချိန်တွင်
" သက်လွှာ .. "
" ရှင် "
" ဒီနံရံမှာ ကပ်ထားတဲ့ ပုံထဲက ကောင်မလေးက ဘယ်သူလဲဟင် "
သူမက စာကြည့်စားပွဲရဲ့ ဘေးနံရံမှာကပ်ထားတဲ့ Taeyeon ရဲ့ပုံကို ကြည့်ပြီးမေးသည်။
" အဲ့ဒါ Kim Tae Yeon လေ။ မသိဘူး မဟုတ်လား .. အင်းပေါ့လေ တီလေးက အသက် ၄၀ နားကပ်နေပြီဆိုတော့ အခုခေတ်နာမည်ကြီးနေတဲ့ K-pop အဆိုတော်တွေကို ဘယ်သိပါ့မလဲ "
YOU ARE READING
Elegant
Romanceလှပကြော့ရှင်းသော ချစ်ခြင်းမေတ္တာသည် အမုန်းတရားမှ စတင်ပေါက်ဖွားလာခြင်းဖြစ်၏။ Own Creation by Moe(JE Rain)