جدران مهدمة

البارت الثامن عشر

جدران مهدمه"

للكاتبه _زمرده

ياريت تقدرون تعبي بـ تصويت
ومتابعه وتعليق يشجعني اكمل
.
.
ومن گتلّك عيونك غاليات هواي ،
تغمضهن گمّت كلما تلاگيني .
.
.
.
عيوني تتنقل بين أبوي وبين ميسى ، مو فاهمه
منو ألي يجون ، وشمعنه جاي يگول الها تفرد وجهه
وتمسح دموعها

بقيت صافنه وحايره ألى أن تبين ألي كُلشي بـعد ساعات قليله جداً

،،واگفه بـ المطبخ ،أصب الجاي و ادردم
ما مُرحب بـ جيتهم أبداً

شلت صينيه الجاي ونطيتها بيدها وأني اگول
...لازم أنتي تقدميها ،هيج گالت الحيه

دگت رجلها بـ الارض مو راضيه تروح ، بـ تواسيل
أله قبلت ، رأحت قدمت ألجاي الهن ، وصاحنها
تگعد يمهن وهي رفضت ودارت وجهه ومشت
أجت للمطبخ يمي ،علامات الاستغراب بأنت بـ
وجهن ، كأن محتارات ليش رفضت تگعد يمهن

گلت بـ گلبي أنتن ماتعرفن شي ،

تبعتها من دخلت ، اتكت على الكاونتر وهي تگول
...ماتوقعتها رأح أصير صدگ

دمعت عيوني وأني اگول
...ليش قبلتي

أجت مسحت دمعتي ألي نزلت ،وهي تگول
...ماجان گدامي غير أقبل

باوعت الها بـ زعل
...جان عفتينه طبنه الف مرض ، مو تضحين بـ
نفسج هيج ، والله لو ادري جان حتى دوام ما
داومت ولا عتبت باب المدرسه

باوعتلي بـ أبتسامه بيها هواي كلام وگالت
...أنتن وصيه أمي ، وصتني اكون سنـد الجـن

...بس رأح تعوفينه

...مامنه على مُستقبلجن ، أهم شي دراستجن

...منو النه غيرج گوليلي

...وجودي مو مهم بگد ما مهمه الدراسه الجن

نهت الحديـث وهـي تطلع من المطبخ ، أني أحس
گلبي مشتعل نار من دريت بـ الموضوع ، والقهر
و الشعور بـ الذنب تجاها موتني ، بـ سببنه قبلت
أنجبرت تقبل ، روحي مفرفحه أحسها صعبه دفعت
ثمن حياتها علمودنه...

مسحت دموعي بـ عصبيه ، لـو أعرف أگعد بـ البيت
وماخلي هـل زواج يتم ، والله أضيع من بعدها شلون
أگعد هنا بدونها منو يسندني ، وهـي تضيع ويا منو
.
.
أستمع للحديث وأسمعهن يحجن بـ أمور المهر
سمعت صوت وحده منهن گالت

...الخطوبه راح تصير على الساكات ، لان زوجته المرحومه ما صـار هواي من توفت ومانكدر نسوي
حفله

گلت بـ گلبي ، هـلا هـلا وهم مزوج وهم زوجته ميته

خليت أذني يمهن وركزت
...الذهب باجر نجي نشتريه أن شاء الله