🌓 දූවිලි තාරකා 🌓 [COMPLETED]

42

" කැමීලියා ඔබට වෙහෙසයි නොවේද? විවේක ගන්න. "  ඔහු එසේ කියමින්  ඇයට සන් කළේ ආහාර පාන පිළිගැන්වීමට සකස් කර තිබූ මේසය වෙත යන ලෙසයි.

" එසේය කුමරුනි, ස්තූතියි " කැමීලියා අසරණ දෑසින් ඉතා යටහත් පහත්ව ඔහු වෙත හිස නවා ආචාර කර ඇගේ පිරිවර සමඟ නික්මුණා.

ඇස්ට්‍රියා දෙස බලා මද සිනහවකින් මුව සරසාගත් ඩ්‍රයිඩන් ඇයට ගමනේ මුල් තැන ගන්නා ලෙස අතින් සන් කළා.

ඔපේලියා සැණකෙළිය වැනි වැදගත් කටයුත්තක් සඳහා පැමිණියත් කැමීලියා සැරසී සිටියේ සුදු පැහැයෙන් යුත් රාජකීය ඇඳුමකින් බව ඇස්ට්‍රියා ගේ මනසේ කොණක ලැගුම් ගත්තත් ඇය ඒ ගැන කල්පනා කරන්නට තැත් කළේ නැහැ.

සිය රතු පැහැ රාජකීය ගවුමේ සාය සීරුවට දෑතින් අල්ලා මදක් ඉහලට ගත් ඇස්ට්‍රියා නිහඬවම කුමරුගේ කුටිය වෙත පය එසෙව්වා. ඔවුන් පිටුපසින් ඇගේත් ඔහුගේත් සේවකයන් කිහිප දෙනෙක් පමණක් පැමිණියා.

රන් ආලේපිත සුදු පැහැ ද්වාරය දෙපසට විවර කළ ඇය ඩ්‍රයිඩන්ට ඔහුගේ කාමරය පෙන්වා සිටියා. ඔහු දෑත් දෙපසට කර බැඳගෙනම කාමරයට ඇතුළු වී සෙමෙන් එහි විශාල කවුළුව වෙත ගොස් ඈත පෙණුන කඳු දෙස බලා සිටියා. ඔවුන්ගේ සේවකයන් කාමරයෙන් පිටත රැඳී සිටියා.

" අවසරයි කුමරුනි, තවත් පැය කිහිපයකින් එනිඩ් හි ෆෙලික්ස් කුමරුන් පැමිණෙනවා. මා ඔහු සඳහා වෙන් කළ මාළිගයට යා යුතුයි." ඇය ඉක්මනින් පිටව යන්නට මගක් සෙව්වා. සියල්ල අවසානයේ ඔහු සමග තනි වීම කිසිසේත්ම නුසුදුසු බව ඇය දැන සිටියා.

" ඔබට වඩා වැදගත් ෆෙලික්ස් කුමරුද? අප හමුවූයේ දෙවසරකට පමණ පසුවයි. ඔබ , ඔබ මා හා වදනක් හෝ කතා කරන්නේ නැතිද?" ඩ්‍රයිඩන් ඇය දෙසට හැරෙමින් පැවසුවා.

" ඩ්‍රයිඩන් , අපට අතීතයක් තිබූ බව සත්‍යයක්, නමුත් එය අතීතය පමණයි. කරුණාකර ඒ අතීතය අමතක කරන්න. අතීතය තුළ ඔබවත් මමවත් සිරකරුවන් විය යුතු නැහැ. අප දෙදෙනාටම සත් ලොව විසින් පෙර නිර්ණය කළ ජීවිතයක් තිබෙනවා. ඉතින් අප අජීවී ලෙස එහි ජීවත් වෙමු. ඔබ මට පෙරම එය තෝරාගත්තා නොවේද?"