🌓 දූවිලි තාරකා 🌓 [COMPLETED]

සමුගැනීම

අයිරිස් සංග්‍රාමයෙන් සහශ්‍රයකට පසු

අයිරිස් කැපිටල් ජනපදය
පර්‍යේෂණ පුහුණු මධ්‍යස්ථානයට අනුබද්ධ, ජනපද අංක 04
ඉන්ඩිගෝ ගොඩනැගිල්ල
XIII කුටිය

" යළිත් වරක්....මා සොයාගන්න"
" යළිත් වරක්... මා සොයාගන්න"
ඒ දුඹුරු පැහැ ආදරණීය දෑස් ඔහු දෙස එක එල්ලේ යොමුව තිබුණා. සුපුරුදු හඬ, හිස් බව, සැහැල්ලුව අතර ඔහු යළිත් ඒ දුඹුරු දෑස් ගැඹුරේ ගිලෙමින් පෙර සේම ගැඹුර නොපෙනෙන ප්‍රපාතයකට ඇද වැටෙන්නට වුණා.

නිදන සයනයේ ඇතිරිලි දෑතින් අල්ලා ගනිමින් නොවැටී සිටින්නටත්, නින්දෙන් හඬ නගා උදව් ඉල්ලන්නටත් ඔහු උත්සහ කළත්, හඬක් නොනැගුණ තරම්. දැඩි වෙර දැරීමකින් පසුව අවසානයේ දහඩියෙන් තෙත්ව ගිය ඔහු දෑස් විවර කළා...

ඒ ලයාන්විත, ආයාචනාත්මක හඬ... ගෙවී ගිය පස් වසර පුරා නින්ද අහිමි කළ හඬ...
අයිතිය නොදන්නා දුඹුරු පැහැ ආදරණීය දෑස්, ආයාචනාත්මක ලෙස තම තද නිල් පැහැ දෑස් දෙස බලා සිටින ඒ දෑස්...

අයිරිස් විශ්වයේ යම් තැනක ඒ හඬෙහි අයිතිකාරිය සිටින බව ඔහු විශ්වාස කළා.
අයිරිස් විශ්වයේ යම් තැනක ඒ දුඹුරු පැහැ දෑස් තම දෑස් දකින්නට බලා සිටිනවා දැයි ඔහු කල්පනා කළා.

නමුත් අයිරිස් විශ්වයට මුදාහල පර්‍යේෂණ කැප්සියුලයකින් වෙන්වූ කොටසක් සෙවීමටත් වඩා මේ හඬ හෝ දෑස් ඔස්සේ නින්ද අඩාල කරන මේ තරුණිය හඹා ගොස් ඇයව සොයා ගැනීම ඉතා අපහසු කාර්‍යයක් බව ඔහු දැන සිටියා.

අවකාශ ගත ලෝහමය අපද්‍රව්‍ය ජාලයක් මෙන් ඔහුගේ සිතුවිලි දිනෙන් දින කැළඹෙන්නට වුණා. ඉන් මිදෙන්නට එකම මග සිහිනය හඹා යාම පමණක් බව ඔහු දැන සිටියා. පිටි අල්ලෙන් දහඩිය බිඳු පිස දැමූ ඔහු උරහිස දක්වා දිගු කෙස් වැටිය අත්ලෙන් පිටුපසට හැසිරුවා. සයනය ඉදිරිපිට වූ කණ්ණාඩිය තුළින් අවුල් ජාලයක පැටළුණ සිය රූපය දැක ඔහුට දැනුනේ කනස්සල්ලක්. සයනයෙන් පිට වන්නට සිතා දෑත් දෙපසට තැබූ ඔහුගේ වම් අතෙහි දැවටුණේ ඔහු මෙන්ම නග්න සිරුරින් වැතිර සිටින නම නොදන්නා යුවතියක්.