أنت العوض لا صارت حظوظي شحاح وأنت الهنا ياغايتي والغنايم

Part2

كنت احسبك نادر ومالك شبيه
وأثرني انا النادر وانا الواجد عليك ...
-

عناد ناظره بنظره استغراب : تغيرت حيل ياغيث وش اللي غيرك وصار الحزن مرافقك وين غيث اللي يحب الضحك والسوالف والابتسامه ماتفارقك انت تغيرت من تزوجت سما راحت وخذت ضحكتك وابتسامتك معك حتى الديره اللي كنت تعشق ترابها تركتها وعشان مين عشان وحده فضلت الشخص اللي تقدم لها عشان كم فلس وانت اغنى منه هي ماتحبك ياغيث ماتحبك كانت تلعب على قلبك اللي عشقها
غيث: مو عشانها يعناد مو عشانها هي من تزوجت وانا شلتها من اعماق قلبي وماعاد فكرت فيها هي من وقت ما اختارت اللي تقدم لها كرهتها وماعاد لها ذره حب بقلبي السبب اقوى من اني اقدر اقوله لك في الوقت الحالي
عناد: علمني وش السبب طيب يمكن القى لك حل ويرجعك غيث اللي اعرفه
غيث: مب وقته ياعناد مب وقته صدقني لصار وقته وقدرت اصارحك والله اني لعلمك انت الحين انسى الموضوع وبما ان بكره عيد تكفى ياعناد سامحني على كل خطأ ارتكبته بحقك سامحني ونرجع اعز اصحاب ونرجع ايام طفولتنا صفحه سوداء نطويها ونفتح صفحه جديده ومهما صار بيننا لا نفترق ولا نخلي احد يدخل بيننا حتى لو كانوا ابائنا تكفى ياعناد طلبتك سامحني ياخوي اوعدني مهما صار بيننا ماتخليني
عناد ضمه وقال: مسامحك ياخوي مسامحك وعد مني ياصاحبي ما اتركك
ضمه غيث اكثر وقال: عز الله انك رجال كل اللي سويته فيك وماتركتني ياكبر حظي يومٍ مثلك رفيقي  ياعناد
عناد : خلاص تراك فليتها وخر عني وب...
قاطع حديثهم اتصال من ابو عناد
ابو عناد: عناد وينك فيه تعال بسرعه البيت
عناد قلبه اوجعه فجأه : وش صار يبه علمني ولا تخوفني لحني فيها شيء
ابو عناد : بسرعه ياعناد ولا جيت علمتك
عناد: يلا انا قريب
قلبه اوجعه وجميع الأفكار السيئة داهمته وكلها تخص لحن
غيث: عناد وش صار
عناد خايف : مادري مادري بس قلبي يوجعني يقول وطني فيها شيء ياغيث
غيث: انت اهدى وب نروح نشوف وش السالفه
-
-
< قبل ساعه>
رجعوا غالب واهله لبيتهم
ام عناد: يابنات يلا تجمعوا ابيكم تنظفون الحوش بكره العيد وابي الحوش يلمع من النظافه
آسيا: ياجده الحين الساعه 9:45 م من بينظف الحين
إم عناد: اقول تعالي وانتِ ساكته نظفي يلا امسكي يلا اشوف الممسحه عندك وعند لحن وغيم روحي افتحي المويه ورشيها بالحوش
لحن خذي الصابون وانثريه بالارض بسرعه
وترفه تعالي معي اجلسي نشرف عليهم
لحن: ابشري يمه
آسيا: يجده غش وين عناد وتيم وحازم
ام عناد: اشتغلي من فم ساكت ولا والله بخليك تنظفينه لحالك فاهمه
آسيا: ابشري ابشري بنظف
ام عناد: غيم هناك رشي مويه بسرعه
غيم: ابشري ياجده
ام عناد: تعلمي يا اسيا تصيرين نفسهم تشتغلين بدون حلطمه
صارت الأرضية تزلق بسبب الصابون
آسيا: لحن اتحداك نسوي سياق
لحن: قدام والفايز وش له
آسيا: اذا فزتي لك اللي تبين
لحن: من جد
آسيا: اي والله لك اللي تبين ، غيم انتِ الحكم
غيم: يلا وانا بصوركم فعاليه
لحن: وارسليه على قروبنا
غيم: تم يلا ابداء بعد كل وحده توقف مكانها ووانا بحدد مكان الفوز
البنات : يلا
غيم : نبداء استعدوا 1 2 3 انطلقوا
ركضوا لحن وآسيا وام عناد تصيح عليهم ينتبهون لا يزلقون ويتكسرون لحن اسرع من آسيا وقبل توصل لنقطه الفوز ما انتبهت للعصا المرميه اللي عرقلت سيرها وزلقت وطاحت على يدها اليمين وتوجعت وصاحت ركضوا من شافوها طاحت وابو عناد من سمع صياحها فز من المجلس وخاف
ابو عناد: وش فيكم
من شافهم متجعين على لحن اللي متوجعه من يدها وخاف ومن شاف رهيفه تبكي والبنات يبكون خاف اكثر انحنى عندها
ابو عناد: يبه لحن وش فيك يبه
لحن من شدة الوجع ماقدرت تتكلم
آسيا: تسابقنا بالمويه والصابون وزلقت وطاحت على يمينها جدي يمكن مكسوره
ابو عناد مسك جواله ودق على عناد يجي بسرعه
-
عناد دخل خايف من سمع صوت ابوه وبكى حوالينه دور عليها بعيونه ماشافها شافهم متجمعين وخاف اكثر ركض عندهم
عناد: يبه وش فيكم لحن وينها
ميز صوت بكاها من بينهم وانحنى عندها انجن من شاف بكاها المكتوم حاولت تكتم بكاها من شافته بس ماقدرت ضمها لصدره وزاد بكاها
عناد: وش فيك ياوطن عناد وقلبه علميني وش صار
لحن من كثر البكاء ماقدرت تتكلم وتقول انها موجوعه بيمينها
آسيا: زلقت وطاحت على يمينها والحين هي مو راضيه تتكلم
عناد: اركضي عطيني عبايتها بسرعه
ام عناد : وانا بعد عطيني عبايتي
جابتها اسيا وعناد وقف لحن سحب عبايتها من يدين اسيا ولبسها وضمها لصدره يسمي عليها ويقرأ بعض الايات عشان تهدى
ام عناد : بجي معكم بتطمن على بنتي
عناد: يمه اجلسي ارتاحي وانا وابوي نروح معها
ام عناد : لا يمه بروح معكم بنتي ياعناد ماقدر اتركها
عناد: بس يمه بتتعبين
ام عناد : لا بس ولا غيره معكم وانتهى الكلام
-
غيث من شاف عناد دخل وسمع صوت الصياح وخاف اكثر وانتظر عند الباب حتى يجي عناد ويطمنه
طلع عناد وهو شايل لحن بين يدينه ومعه امه وابوه وكانت لحن بحضنه نامت من كثر الوجع والبكاء
غيث عطاهم ظهره احتراماً لبنت صاحبه
عناد: غيث اركب بتودينا المستشفى تكفى ياغيث
غيث: ابشر بسرعه اركب
وصلوا للمستشفى ولحن لسى نايمه ماصحت
ممرضتين من شافوهم داخلين ركضوا بسرعه يجيبون سرير للحن وحطها عناد على السرير وركضوا فيها عند الدكتور
الدكتور: وش صار لها
ابو عناد: زلقت وطاحت
الدكتور: وين مكان الطيحه
ابو عناد: يدها اليمين
الدكتور: بنسوي لها اشعه وبنشوف واضح لي انها كسر بس بتأكد اكثر من الاشعه وباذن الله تكون بخير
الدكتور: طلعت الاشعه وفعلاً عندها كسر بيدها اليمين وبقيه جسمها سليم الحمدلله
صحت لحن وشافت نفسها بمكان ثاني ومركبين بيدها الثانيه مغذي وام عناد ماسكه يدها وتصيح وتحصنها
غيث ما تجرأ ينزل من السياره ويتطمن عليها ضل ينتظرهم يخلصون
عناد: يادكتور متى نقدر نطلعها
الدكتور : الحين بسوي لها جبيره بيدها وتقدر تطلع عادي
ابو عناد: الله يبشرك بالخير ياولدي
الدكتور: خلصنا ماتشوف شر باذن الله بعطيكم مسكن للوجع تاخذه اذا توجعت وانتبهوا لها لانه بترتفع حرارتها بعطيكم بعد مسكن للحراره
عناد: مشكور يادكتور ماقصرت
ابو عناد : الله يسعدك ياولدي
الدكتور: ولو ياعمي هذا واجبي وحنا تحت الخدمه وباذن الله بنتكم بتصير طيبه وبعد شهر جيبوها نفك الجبيره
عناد مسك يدها الثانيه وطلعوا من المستشفى وشاف سياره غيث ركبت وام عناد جت عند الباب ولحن بالوسط وعناد الباب الثاني دخلت راسها بحضن امها من الوجع طاحت عيونها بعيون غيث وهو ماشال عيونه عنها او بالاخص عن يمينها المكسوره مرت الدقائق وغيث يسترق النظر لها وصلوا البيت
عناد : شكرا ياخوي تعبتك معي
غيث: ابد تعبك راحه ياخوي
-
آسيا شافتهم داخلين وركضت تضمها : اسفه سامحيني انا السبب ليتني ماقلت لك نتسابق
لحن: لا تعتذرين ياروحي شوفي مافيني شيء وبعدين هذا ربي كاتبه ليه نعترض على اللي كتبه لنا ربي وخري لا اكسر يدي على راسك
آسيا: لحن ارفعي يدك كذا تقدرين
ضحكت لحن : عنادي وخرها
عناد: يالملسونه تبين تجربين الشعور
آسيا: لا مشكورين
غيم : الحمدلله على سلامتك ياقلبي ماتشوفين شر جعله باسيا ولا فيك ياروحي بس تراني حفظت الطيحه وبرسلها على القروب
لحن: بشوف الفيد تكفين احس الطيحه غبيه
آسيا: لا تحسين ياقلبي هي غبيه
ابو عناد: يلا انتِ وياها ادخلوا مو وقتكم اختكم تبي  بترتاح
ترفه: تعالي يمه ادخلي الف لا باس عليك سلامتك ياروحي
لحن: الله يسلمك يمي
ابتسمت ترفه لانها تحبها اكثر من حبها لعيالها هي بعد بنتها ربتها مع آسيا
-
لحن ماقدرت تنام من الام عناد ماتركها وخلاها تنام عنده على سريره وكل شوي يروح يتطمن عليها شافها صاحيه راح عندها
عناد: ليه وطن عناد صاحيه موجوعه
لحن: شوي بس ؛ عنادي
عناد: لبيه ياعروق قلبي امري وسمي
لحن : ضمني لصدرك ابغى ارجع لحن الصغيره اللي كل ليله تنام بحضنك تنام بأمان حضنك ودفاه
عناد من غير مايتكلم سحبها لحضنه وسمى عليها وهي نامت بسرعه
تيم وحازم رجعوا متاخر ومايدرون باللي صار للحن