أنت العوض لا صارت حظوظي شحاح وأنت الهنا ياغايتي والغنايم

Patr 7

يا عجولٍ في الحزن ليتك ثقيل
ليت جرحك قبل يجرها : بطى
-
<< في الصباح>>
صحت لحن متضايقه طلعت من الخيمه شافت امها صاحيه تجهز القهوة راحت عندها وماتحملت الضيقه جلست قرب امها
ام عناد : يهلا صباح الخير يابنيتي
لحن ابتسمت : صباح النور يالغاليه
ام عناد : وش فيك يمي متضايقه وواضح عليك من الليل مو نايمه علميني يمه انا امك بشيل الضيق عنك
لحن : يمه جيت بنشدك عن سجه الليل
من ضيقتي ضاقت فجوج الوسيعه
دمعٍ تحدر على وجهي هماليل
حملٍ حملته فوق مالا استطيعه
ماعاد لي قوه ولا عاد لي حيل
من يشتري حظي ليا جيت ابيعه
صبرٍ شلته على متون صبري شيل
طاحت حصونه عقب ماهي منيعه
عناد كان وراهم ماشافته وسمع كل كلامها جلس قربهم وقال : من مضيق صدر بنتي والله لا ادفنه حي علميني من وش متضايقه
لحن تكه وتصيح لو يقول وش فيك بتصيح
لحن : ابد بس تعبانه شوي وماقدرت انام
ام عناد تعالي يمي حطي راسك بحضني ونامي
لحن : كنت محتاجه حضنك بالليل بس ماقدرت اجيك يمه
ام عناد : عناد رح جيب بطانيه تنام البنت تعبانه وحرارتها مرتفه
لحن : يمه ضميني لصدرك وسمي علي هو دواي عن كل المواجع
ام عناد : بسم الله عليك يمه
لحن حطت راسها بحضن امها ومثلت النوم لاجل تتناسى من التعب والضيقه اللي جتها بدون سبب ام عناد تسمي عليها وتحصنها عناد جاب بطانيته وغطاها زين وجلس قربها وحط يده على قلبها يحصنها ويسمي عليها
عناد : يمه وش فيها متضايقه
ام عناد : مادري يايمه وش سبب ضيقتها جتني تقول جتها ضيقه فجأة
عناد : ليت كل الضيق والوجع فيني ولا فيها انا بشيل الضيقه منها وباخذها هي شالت حزني والحين انا دوري اعوضها تصدقين يمه لو لحن مو موجوده بحياتي يمكن انا مع نواف ومت معه بس من اشوفها كل الحزن والوجع بقلبي يتبدل لافرح وسعاده وابتسامات من اشوف زولها ابتسم وادعي ربي يحفظها لي ولا يذوقني فقدها انا تحملت موت نواف عشانها هي قدرت تخليني اتخطى موت صاحبي وهي بعمر 10 سنوات يمه طفله صغيره برائتها شالت كل احزاني وجبرت بقلبي بعد كسره
ام عناد ابتسمت ومسحت على راسه : بسم الله عليك يمي الله يحفظكم لي ياوليدي ولا يذوقني فراقكم هي عوض ربي لك انت صح فقدت اخوك وانا فقدت ولدي لكن وربي جبر قلبك وقلبي عن طريق لحن يمكن ربي كتب قدرها انها تعيش بالطريقه ذي لان ربي مرسلها لنا كعوض عن الدنيا وضيمها واحزانها انت تذكر باليوم اللي ابوها جابها وحطها بين ادينك وقال ربوها وسموها انا مستحيل اعترف فيها او اسميها واعتبرها بنتي انت من سمعت بكاها ضميتها لصدرك ورفضت تتركها وقلت انت بتسميها وسميتها لحن وانت صغير انت عشانها تركت اللعب وانتبهت لها وانت صغير كنت تقول لي يمه انا ابغاها انا اربيها انا اصير ابوها وفعلاً انت صرت لها اب واخ وصديق شفت كيف ربي ارسلها لنا لجل تكون لنا فرحه ايامنا
عناد مسك يدها وباسها وضمها لصدره : يمه لحن من جت لبيتنا انا صرت كبير بسن صغير من جت بحضني قلت ياعناد هو حطها بحضنك انت انت اللي بتصير مسؤول عنها انت اللي بتربيها وتصير لها الاب والاخ والام يمه انا من اسمع ضحكتها اشوفها طرب على قلبي ودواي انا حطتها على جرحي وبراء علمتني كيف اصير مسؤول واتحمل الصعاب والصبر انا معاها اكون عناد ثاني عناد مايعرف للعصبيه درب عناد اللي لا شافها تبدل تعبه لراحه انا لحد اليوم يمه اشكر ربي على وجودها بحاتي احبها يمه وعن حبها كيف بتوب هي تمثل كل شيء بحياتي يمه هي الفرح في كل الاعوام وانا اصير لعيونها شاعر حبها مرتفع بصدري مثل الاعلام احبها والقلب ماهو بينلام
انا وقلبي لها ورد وخيام وهي ربيعي اللي عليه المثايل مادام قلبي مهتني بها بالايام هي ملاذ روحي والشك زايل من جتني وقلبي جفت اقلامه اسمع كلامها من جميع الوسايل اذا انا وصلت لعناد الحالي فهو كله بفضل الله ثم انتم يمه انتِ وابوي ولحن عندي اقرب لي من حبل الوتين
ابو عناد مبتسم من كلام ولده دام عناد ولده راسه مرفوع وفخور فيه هذا هو عناد اللي رباه وواثق في تربيته لولده ولده تحمل مسوؤليه كبيره بسن صغير وكله عشان لحن
ابو عناد: عز الله اني رافع راسي وفخور دامك ولدي
عناد ابتسم : يكفيني فخر لا قالوا ولد حازم
لحن سمعت كل كلامهم وانشرح صدرها ووقفت ضمت عناد : الله لا يحرمني منك يبه
عناد: ولا منك يابنيتي
لحن : تصدق الضيق بصدري لا سمع بطاريك هرب
ضحكوا عليها من تعبيرها
ام عناد : وين راح يمه
لحن : لمكان بعيد عني
ابو عناد : يبه وش فيك من مضيقك
لحن : تخسي الضيقه دامكم اهلي
ابو عناد: الله لا يجعل قلبك يذوق الضيق جعله دايم سمح وووسيع والفرحه مايفارقك والحزن يدل طريق غيرك يايبه جلعني ماشوف الحزن بوجهك السمح جعلني ماذوق حزنك ولا ابكيه ولا افقدك ولا ازعلك لو ثواني
لحن : انتم سبب فرحتي وسعادتي يبه الله لا يحرمني منكم
باس راسها ابو عناد وتذكر كلام حمد ونزلت دمعه من عينه مسح على راسها ودعاء بقلبه مايخسرها وحتى لو يوم من الايام ندم ساير ويبغى يرجعها مستحيل يعطيه يموت ولا يتركها
-
صحى الكل وافطروا بعد الفطور لحن طفشت وتذكرت شاص ابوها القديمه ولبست عبايتها ونقابها وطلعت متوجهه لخيمة الرجال من شافتهم كثير ترددت تدخل ووقفت بعيد شوي ونزلت راسها لا ينتبهون لعيونها لانهم شافوها اول مره تشوف مسعود ومنصور ما انتبهت لهم من البارح ولا لعيالهم توقعت بس غالب وسيف وعيال سيف الموجودين
ابو عناد قال : بنتي ادخلي وارفعي راسك بنت الرجال ماتستحي من الرجال
ابتسمت لحن ودخلت وعناد فز ودق لها التحيه : ارحبي جعلها ترحب ملايين
لحن : المرحب يبقى يالغالي
تيم : الله يالدنيا التراحيب ودق التحيه لبنتك وانا من تشوفني مقبل قلت اقبل ومعه مصيبه
عناد : هذا الفرق بين الثريا والثراء
لحن قربت لابوها وحبت راسها وجلست بحضنه ومسكت شعر ذقنه الطويل وقالت : بطلبك طلب
ابو غيث : افا يبنتي السلام بس لعمي
لحن : اعتذر منك ياعمي جيت مستعجله السلام عليكم
او غيث ابتسم : نورت الخيمه من جيتي اخبارك يبه عساك بخير
لحن : الحمدلله ياعمي بخير اللي ابوها حازم وعناد دايم تكون بخير
ابو عناد مبتسم من حركاتها : وش تبين
لحن : طلبي صعب واخاف تردني
عناد: احتزمي وقولي ابوي مستحيل يردك
ابو عناد : مثل ماقال عناد والله يرد اللي يردك
لحن فرحت : ابغى تعطيني مفتاح الشاص
ابو عناد : وش تبين فيه
لحن : بفحط طفشانه
ابو عناد خاف عليها : بس اخاف عليك يبه وبعدين الشاص قديمه مره وقيرها عادي
لحن : لا تخاف انا الشبل من ذاك الاسد
عناد : انشهد يبه لا تخاف انا معلمها على العادي بعد
ابو عناد طلع مفتاح الشاص وعطاها: اذا صار فيها شيء بحملك مسؤوليتها  وبعاقبك انت لحني مقدر اعاقبها تطيح غصوني عند بسمتها
لحن : ياجعلني فداك يالغالي انا بنتك لا تخاف علي
تيم : اسمعي لحن بتركبيني معك
لحن : بعد البنات
ابو سيف : من جدك ياحازم تعطيها المفتاح وتخليها تسوق ماعندنا بنات يسوقون وش خليتوا للرجال
ابو عناد : مالك دخل بنتي اللي تبيه تسويه والحين كل بنات خلق الله تسوق ومو عيب البنت تسوق
ابو سيف : انت مدلعها كثير البنت مكانها المطبخ وببيتها ماتدخل مجالس الرجال ولا تسوق
لحن تنرفزت من عقليته وتفكيره
غيث : انت ربي مارزقك ببنت وتعرف معنى حب البنت لابوها وغلاتها عنده
لحن ناظرته ولمعت عيونها لمعه فرح
غيث انتبه عليها وبانت طرف ابتسامته وشافتها
ابو عناد : وانت وش عليك ياغالب بكيفي بنيتي وانا حر بتربيتها بنتي جمالها بدلعها وادلعها بكيفي يكفيني شوفت ابتسامتها انا ياغالب ربي بيحاسبني على تقصيري ببنتي ودام تفكيرك انت البنت بس للمطبخ انا اقول لك غير تفكيرك ونظرتك للبنت انها بس للمطبخ 
عناد : انا لحد الان محترمك ياعمي بس انتبه تجيب طاري وطني عشان ما اقلل من احترامك بنتنا حنا مربينها احسن تربيه وواثقين فيها
لحني روحي فحطي وسوي اللي تبين واللي ياذيك بكلمه يجي ويواجهني
ابو غيث : يبه غير تفكيرك بان البنت بس للمطبخ البنت تاج على الراس يبه يمكن لو ربي يرزقك ببنت يمكن ماراح يكون ذا تفكيرك البنت يبه سعاده وفرح انت لا شفت ابتسامه بنتك بتطيح كل حصونك هم المؤنسات الغاليات هم وصيه نبينا الكريم عليه افضل الصلاة والسلام
هم يبه سترنا من النار
لحن ابتسمت من كلام ابو غيث : ياحظ نغم دامك ابوها ليتها موجوده تسمع كلامك
ابو غيث ابتسم : انتِ بنتي مثل ما نغم بنتي ويشهد الله انك غاليه من غلاها عندي
ابو عناد : تعلم ياغالب الكلام الزين من ولدك بنتي عن الفين رجال ياغالب بنتي احطها على راسي واللي يهينها لو بكلمه يتحمل الضرر اللي بيجيه مني احترامها من احترامي واللي يغلط عليها غلط علي انا
غالب سكت انقهر لان حازم مستحيل يرضى احد يغلط عليها
وقهره كلام ولده وغيث
غيث : ليت كل الناس مثلك ياعمي
لحن: ابوي واحد مامثله اثنين لو سمحت
قبل تطلع لفت لعناد وقالت له بدلع تقهر غالب : عنادي حبيبي وش رايك تجي معي نسوي فعاليات طفشانه وبعد نسوي تحدي بينا البنات وبينكم يالعيال
ابو عناد : وانا الحكم وواثق فيكم يابناتي ماراح تخيبون ضني
ابو غيث : انا معك ياعمي ولو فازوا العيال بسحب نقاطهم وبعطيها البنات
ابو عناد : اجل يلا كلنا نطلع معهم نشوفهم وش تبون بالنكد في الخيمه
تيم : لحني تكفين ابغى افحط معك
لحن : ياحياتي اسيا ونغم حاجزين قبلك
ابو سيف : نغم معكم
لحن هزت راسها : اي
ابو غيث : عاد انتم نفس التفكير من تعرفت عليك وهي والله لحن نفسي يبه حبيتها تكفى زوجها غيث
لحن استحت من طاري الزواج وناظرت غيث من تذكرت اللي صار البارح وهو بعد ناظرها والتقت عيونهم بالنظرات وفهمها من عيونها انها تذكرت البارح خلخل يده بشعره وابتسم لها
هربت بسرعه من عندهم وضحكوا عليها
عناد : اعتذر منك عمي بنتي ماراح ازوجها اغار عليها
نياف : اعتقها يامسلم من صغرها وانت تغار عليها وتخاف عليها حتى من نسمه الهوى
عناد : وش دخلك
نياف : يبه سمعت وش يقول
ابو عناد : ماراح تتغيرون كبرتوا وانتم باقي تتناقرون صيروا مثل غيث ثقيل ورزين
تيم : وثلاجه ثلج ونفسيه يبه بعدين ياجدي الله يهديك الثلاثي كلهم نفس الصفات تقل توأم ثلاثي نفس التفكير نفس البرود والعصبيه ووجيهم دايم مكشره ونادر اشوف ابتساماتهم او ضحكهم
غيث : وش رايك تسكت
نياف : صدعت فينا وانت تتشكى
عناد : لا تخليني اذوقك طعم التراب مره ثانيه
تيم حط يده على فمه ويسوي نفسه انه بيسكر فمه
بداح : خير كلكم اتفقتوا عليه
ابو عناد : امشو خلونا نطلع
-
<<عند خيمه الحريم >>
دخلت لحن مبسوطه يمه ابوي عطاني المفتاح وسمح لي افحط
شهقت مضاوي وام سيف
مضاوي بصدمه: تسوقين !
لحن : اي
ام سيف : والله انكم دلعتوها مره يارهيفه
ام عناد : كيفي بنتي يحق لها الدلع
نقزوا البنات كلهم من الفرحه
زهره : وش فيها ياخاله خليها تدلع لايق عليها الدلع وبعدين هي وحيدتهم وصغيرتهم مايبون يرفضون لها طلب
ام سيف : محد طلب رايك انتِ
جنه : لان أمي كلامها صحيح تسكتينها
ام سيف : احترمي نفسك ياقليله الادب عشنا وشفنا البنات يراددونا
لحن : بنات وش عليكم منها امشوا بسرعه ويمه ترا ابوي وعمي سيف بيسسون بيننا تحدي حنا البنات والعيال
ام عناد وقفت : بطلع اتابعكم احسن من القعده هنا
طلعوا البنات وراحت لحن تشغل الشاص وتجيبها شغلتها وجت عندهم
لحن : بنات تركبون
جنه : ما بتكفينا
اسيا : عندي فكره
غيم : بسرعه قوليها
بنجيب حبل ونجيب بطانيه كبيره او سجاده كبيره ونربطها بالحبل وبالشاص ونجلس عليها وانتي تفحطين فينها
البنات فكره حلوه
تيم : دام اتفقتوا على كذا والله تركبيني جنبك
اسيا : خير انت وش تبي ناشب لنا
تيم : اسكتي انتِ هاه لحونه وش قلتي
لحن : بفكر
جنه : بس من وين بنجيب الحبل
لحن : ازهلي ؛ عنادي تكفى يامحزمي
عناد رمى شماغه بوجه اسيا  احتزمي
لحن ضحكت واسيا خافت من وين طلع ذا
اسيا: خير وش شايفني انا هي تحتزم فيك وانت ترميني بشماغك المروح
لحن : نبغى حبل كبير وقوي
عناد : تربطين اسيا وتسحبينها صح بس حرام تكسر الخاطر
لحن ضحكت : لا البنات يبوني افحط فيهم كلهم
عناد: حسافه يعني مابشوف شوشه اسيا طايره بالسماء
اسيا: حسبي الله عليك ياعناد دايم تبي تسحب بشوشتي غيران منها
اصبر لي لين اتزوج وزوجي ياخذ حقي منك
عناد جاب الحبل : جبته
لحن : طيب ممكن تسوون لنا السجاده
تيم : اربيطها انتِ
لحن: كلامي موجه للي عندهم عضلات مو نفسك يالبريعصي
حازم : العب وطيرت جبهتك
تيم : تمون الغاليه
لحن : غصباً عنك
نياف : افا يالحن ماتبين تسلمين علي نسيتيني
لحن : لا تكلمني زعلانه عليك ليه تسحب دمي
ضحك نياف : وش تبين وترضين علي
لحن : حواوه
نياف : ابشري
لحن : امزح عليك انت اخوي اللي تركني وسافر
نياف : اعتذر انا من بعد موت نواف عجزت اتحمل وسافرت بس شوفي رجعت وانا دكتور
لحن : اجمل دكتور لا تعيدها وتروح
نياف : بنشب لكم
عناد تنحنح : ويلو ويلو ياسواد ليلو كيف انا مجنون غيره توه مايدري بجنوني
لحن : شفت ان الشعور موجع
عناد : تردين الحركه يعني
لحن ضمته : ياخي احبك
-
<<عند الخيام >>
طلعوا العيال والرجال كلهم والحريم بعد طلعوا يشوفون للبنات
ابو عناد : يبه لحن انتبهي
لحن : لا تخاف يبه واذا صار لي شيء دكتور عائلتنا موجود
ابتسم نياف
ابو عناد: طاح الحطب رضيتي عليه
لحن : اي يبه خلاص سامحته
ابو سيف: ياحازم كيف تسوق ويدها مكسوره
تذكر ابو عناد يدها : لحن ويدك كيف بتتصرفين
عناد : يبه لا تخاف انا معلمها
ابو عناد : كيف معلمها
عناد: مره ربطت يدها اليمين وسويت انها مكسوره ودربتها تسوق بالسيار وقت اللزوم
ابو عناد: طلعت منت بهين مضبط الوضع
عناد: لابد يبه نحسب حساب لكل شيء
ام عناد : بسرعه بنات دورنا بعدكم
عناد يناظر امه مصدوم : تفحطين
ام عناد : اي بلعب ولا بس انتم اللي تلعبون
عناد : لا ماقلت شيء
<< عند البنات>>
غيث : خلصت وتاكدت من الحبل تقدرون الحين تلعبون
لحن : مشكور
ركبت لحن وشغلت على الموعد اللي بيننا جيت لك ملهوف
ونغم معها ركبت هي وآسيا
جنه وغيم جلسوا على السجاده
ام عناد شافتهم ثنتين جت جلست معهم وتبعتها زهره وحوراء وترفه
العيال ميتين ضحك على امهاتهم
ابو عناد : يارهيفه انزلي بتهبل فيك لحن
ام عناد : خلني على راحتي
لحن : جاهزين
ام عناد : اي جاهزين امشي بس
لحن : يمه تمسكي زين بالسجاده
ام عناد : اقول تحركي
لحن : عناد تكفى صور امي
عناد : عندي
تحركت لحن وفحطت فيهم زادت بالسرعه وراحت للطريق الترابي واسرعت مافيه احد حولهم وفحطت فيهم والحريم طاروا من على السجاده وطيحتهم كانت غبيه غيم وجنه كلو تراب وقفت لحن وهي ميته عليهم ضحك
العيال ماقدروا يتحملون وطاحوا من كثر الضحك
ابو عناد : وش قلت لك يارهيفه شفتي
ام عناد استانست وتضحك : والله يونس ياحازم
ابو عناد ضحك
وام عناد تذكرت انها طاحت ولحقت لحن بالعصا لحن تضحك وتهرب وتنادي عناد
وعناد يركض وراهم : يمه انتِ اللي قلتي لها تفحط فيك
لحن طاحت من الضحك ومسكتها ام عناد : ليه تطيحيني
لحن ماقدرت تجاوب من الضحك : اهخ يمه بطني وجعني
ام عناد ضحكت وسمت عليها : انا بروح بجلس تعبت
غيث ركض لامه ونفض التراب من عبايتها
حوراء : خلني مافيني شيء
لحن جت عندهم وحبت راس ام غيث وام جنه : اعتذر منك بس تحمست ونسيت انكم معي
ام غيث : وش له يابنتي ونستينا
ام جنه : اي والله انا اول مره استانس مثل وناستي الحين
اجوان : مكتوم ابغى اجرب
مكتوم : لا اخاف عليك وبعدين انتِ حامل
اجوان بس شوي
مكتوم : طيب بس انا معك
ابتسمت اجوان : ياخي احبك
ابتسم مكتوم : انا اكثر ياقلب مكتوم
عناد : يلا الحين دورنا
لحن: خذ
عناد: خير مثل مافحطي فيهم تفحطين فينا
لحن : انا ؟
تيم : لا انا اي انتِ الشاص جدي عطاك انتِ
لحن : ماطلبتو شيء
مكتوم : لحظه انا وزوجتي اول عشان اضمن سلامتها
نغم : بتلعبون ؟
مكتوم : اي حلال عليكم وحرام علينا
نغم : لا بس عشان بنتكم
اجوان : خليها تستانس يمكن تجي تحب التفحيط مثل خالتها لحن
لحن : ابد حياكم عناد انتم بعدهم
اسيا: ياغبيه خذي عليهم فلوس
لحن : فكره امي وخالتي ام غيث وخالتي ام جنه وانتِ وجنه ونغم وغيم والله بربح
اسيا: اقول انقلعي داخله على طمع
عناد : تستاهلين فكرتك
لحن : خلاص بس باخذ على اسيا
اسيا : انقلعي خذي من عند عناد
لحن : ما احتاج فلوس الحمدلله
ركبت الشاص ومعها نغم واسيا وعلى السجاده اجوان ومكتوم وماسك كرشت زوجته لا تطير
لحن : وش تبون اشغل لكم
اجوان : نفس الشيله حبيتها
لحن : ابشري
وفحطت فيهم واسرعت كانت بتطيح اجوان بس مكتوم مسكها وانتهى دورهم
اجوان : مشكور لانك ماكسرت بخاطري ومنعتني
مكتوم : انتِ زوجتي ومستحيل اخلي شيء بخاطرك
جاء دور العيال
لحن وقفوا بعدكم : ثمنيه عددكم بتكفيكم السجاده
عناد : بتكفي
تيم : انا قايل لك بجي معك
لحن : حياك
ابو غيث: اضيفيني معهم
تقي : وانا بعد
مسعود : وتسحبون علي معصي معكم
ابو بداح : وش فيكم استخفيتوا
ابو غيث : عادي بنلعب معهم
ابو بداح : الله يقويكم انا ماني معكم
غيث : اسمحيلي بفحط فيهم
عناد : معصي اعرف نيتك
غيث غمز لها وهي لبت طلبه
لحن : خذ انا تعبت بروح اجلس
غيث : كفو مطيعه تسمع الكلام احسن من بعض الناس
غيث اخذ المفتاح وشغل الشاص وفحط فيهم كرههم باللعبه والبنات يضحكون
انتهت الفعاليه وقرروا يرجعون بيتهم لان تقي واهله بكره بيروحون للمدينه
_
<<بعد يومين >>
وقت الوداع
اذن العصر وصلت لحن وقراءة اذكارها ونزلت للصاله
ترفه ام تيم : الحمدلله صحيتي قبل نمشي
لحن : الحين بتروحون
ام تيم : اي يابنتي بنمشي بعد شوي
ام عناد : الله يحفظكم وتوصلون بالسلامة
ام تيم : امين
طلع الرجال من المسجد
ابو عناد : تقي جهزتوا كل شيء تحتاجونه
ابوتيم : كل شيء نحتاجه جاهز الله يطول لي بعمرك
ابو عناد : مشينا للبيت
ابو عناد : نياف تعال معنا ابغاك
نياف : ابشر
دخلوا وتقي توجه صوب امه بيودعها
ام عناد نزلت دموعها متعوده كل عصر يتجمعون عيالها حوالينها والحين ولدها بيروح يسكن بالمدينه بعيد عنها
ابو تيم : وش له الدموع يمه بنجيكم كل خميس وجمعه وانتم بعد بتجونا
ام عناد : مب بيدي ياولدي بشتاق لكم متعوده على حسكم بالبيت
ابو عناد : وين اسيا
ام تيم : والله ياعمي راحت للمطبخ تكمل بكي هناك وعندها لحن
غيم ماتقدر تعيش بدونهم متعوده على حس لحن ومضارباتها مع اسيا
واجهشت بالبكاء
عناد : افا حبيبه عمها تبكي
غيم : عمي بشتاق لحن بشتاق لمضاربتها مع اسيا ولازعاجهم لي
ابو تيم : شكلي برجع اكلمهم وبخليهم يرجوني البنات مايبون يفارقونكم
ابو عناد : لا ياتقي دام هم نقلوك انت طيعهم
ابو تيم : ما بتحمل ابعد عنكم
ابو عناد : اجلس اسبوع واذا ماجاز لك الوضع ارجع
ابو تيم : يصير خير يبه
_
<< عند نياف >>
كان داخل للمجلس رجع لورا من البنت اللي جت مسرعه وزلقت وطاحت
نياف : بسم الله جاك شيء
اسيا تفشلت من طيحتها الغبيه وماطاحت الا قدامه
قبل كم دقيقه
آسيا طلعت متضايقه ودخلت مجلس الرجال وتصيح مسحت دموعها من سمعت صوت خطوات متجه صوب المجلس وقفت تركض تطلع قبل يدخل وزلقت شرابها وطاحت قدام نياف وهي مو متغطيه شافها وشعرها القصير جاء على وجهها
اسيا زاد صياحها
نياف جاء عندها ونسى انها مو متغطيه وقفها : فيك شيء
آسيا: سحبت نفسها بسرعه وطلعت من الجلس
نياف تبعها بنظراته لين اختفت ومن تذكر شكلها ابتسم
نياف : الظاهر انها وحده من بنات تقي بس ليه تبكي
-
عناد راح للمطبخ وحصل بس لحن تبكي واسيا مب موجوده
عناد : لا تبكين
لحن : مقدر أفارقهم فجأة قرروا بيروحون
عناد : امسحي دموعك تقي واهله اعرفهم مابيتحملون وبيرجعون بسرعه
لحن : تهقى
عناد ابتسم : اعرف تقي مايقدر يعيش بعيد عن امي وابوي
ابتسمت لحن وحست فيه امل بيرجعون
عناد: وين اسيا
لحن : ماشفتها هنا
عناد : امشي ندورها
طلعوا من المطبخ متوجهين للصاله شافوها داخله
عناد: وين كنتي
آسيا: كنت عند المرجيحه
عناد فتح يدينه تجي تضمه : ماتبين تودعينا
اسيا راحت عنده وضمته وبكت
ابو تيم : يبه والله ما اقدر اعيش بعيد عنكم بلاها روحه
ابو عناد : اللي تشوفه
حازم : يبه طالبك يبه مانبغى نترك الديره
ابو تيم : لحن
لحن ضمته وبكت : بتروح وتخليني يبه
تقي : الله ياخذني كاني رحت روحه للمدينه ماني برايح واترك وراي اهلي
لحن تمسح دموعها : مابتخلوني
ام تيم : يلا اشوف امسحوا دموعكم
اسيا ضمت عناد اكثر وقالت : الكلام اللي سمعته صحيح مابنروح للمدينه
عناد : اي صح نظفي اذانيك زين عشان تسمعين
اسيا: وخر بس انظف منك
وضمت لحن : اشكر دموعك ياشيخه
غيم بعد ضمتها وباستها : الحمدلله مابنتركك
ابو تيم ابتسم : بروح بكره للمدينه وبكلمهم يلغون نقلي واضل هنا
ابو عناد : اللي تشوفه
حازم : الحمدلله مابترك لحني
عناد : وش فيكم على بنتي كل واحد يضيف ياء التملك عند اسمها لا عاد اسمعكم تنادونها لحني
لحن ضحكت : وضمته يازين اللي يغارون
حازم : تراها اختنا بعد وخر عنها
-
<< بعد يومين >>
ابو عناد مسوي عزيمه عشان نياف رجع وصار ساكن قربهم وهدموا الجدار بين بيته وبيت نياف وصار الحوش كبير مره ومشترك نياف يقدر يجي عندهم بدون مايطلع من بيته ويلف ويتعب لا من نفس الحوش يطلع من بيته لبيت ابوعناد
بعد العصر تجمعوا كل الرجال والحريم
ابو عناد : انا مسوي العزيمه مخصوصي لولدي نياف واشكر ربي رجعه لي سالم
ابو مسفر : قرت عينك برجعه ولدك
ابو عناد : الله يسلمك
ابو مخلد : انت الحين مجمع كل الرجال عشان ولد محمد
ابو عناد: الزم حدك نياف ولدي مثل عناد وان غلطت عليه بكلمه ثانيه مجلسي يتعذرك
ابو مخلد : نياف سمعت انك صرت دكتور
نياف : الحمدلله استشاري جراحه
الكل بارك له
عناد همس له : ياولد انت متحصن شوف وجه ابو مخلد من الصدمه حتى ماذكر ربي
نياف بنفس الهمس : لا تخاف امي رهيفه مسكتني ساعتين تحصني
عناد: امي عارفه عيونهم
ابو مخلد : وش رايك ازوجك وحده من بناتي الحين انت صرت رجالٍ ماشاءالله عليك وينشد فيك الظهر
نياف : تسلم انا مالي نيه اتزوج الحين
ابو مخلد : عطيتك بنتي الكبيره
ابو عناد : اعتذر منك يا بو مخلد بس نياف خاطب
غيث قرصه وهمس : من ورانا
نياف : اسكت انا مصدوم مثلك
عناد : والله ابو مخلد حط عينه عليك وخطبك لبنته حط رجلك
نياف : يارب عمي يطلعني من الموضوع
ابو مخلد : وخطب عند مين
ابو عناد : وضرب على كتف تقي خاطب عند ولد تقي وحده من بناته
شرق تيم بالمويه وبداح يضرب على ظهره : صحه صحه لا تموت
ابو مخلد : الكبيره
ابو عناد : لا الصغيره
ايهم نغزه قلبه ليكون اللي خاطبها غيم وارتاح لمن قال الصغيره
وهمس لابوه يبه وش رايك تفاتح عمي بالموضوع الحين قبل تطير البنت من عندنا
ابو غيث بهمس : اصبر وش فيك طرت بالعجه
ايهم : اخطبها لي ولا بغير رأي
ابو غيث : بخطبها الحين لك
-
< لمن رجعوا من المخيم عند بيت سيف >
ايهم : عندي موضوع وابغاكم تسمعون لي
ابو غيث : وش موضوعك
ام غيث : استعجل بروح احضر الغداء
ايهم : قررت اتزوج
ام غيث : عندي البنت
نغم : وانا بعد عندي وحده لك تجنن
ايهم : منهم
ام غيث : بنت تقي الكبيره غيم
نغم : نفس اللي ابغاها لك
غيث : اخيراً قررت تفرح قلب امي
ام غيث : الدور ان شاءالله عليك بس اصبر علي
ايهم : يبه انا ابغى بنت عمي تقي غيم اخطبها لي
ابو غيث : يصير خير
ايهم : متى بتكلمهم
ابو غيث : بنشوف للوقت المناسب
نرجع للعزيمه
-
تنحنح ابو غيث وقال : ياعمي انا جايك ابكلمكم بموضوع مهم انت وتقي وباذن الله انكم ماتردوني
ابو عناد : حياك ياولد وباذن الله مانردك خايب
غيث همس لهم : يعيال ركزوا هنا في موضوع مهم وخاصه على ايهم
عناد: ليكون بتخطبون وحده من بناتنا بعد
غيث : اصبر بيجيك العلم الحين
ابو غيث : حنا طالبين القرب منكم ونبغى بنتك ياتقي على سنه الله ورسوله الكبيره لودي ايهم
ابو عناد فرح وتقي استانس
تقي : يبه انت رد عليهم
ابو عناد : لا ياتقي انت لك الحق ترد عليهم انا مني موافق ورجال مثل ايهم ماينرد
تقي : بالنسبه لي موافق وتشرفت فيكم بس لازم استشير البنت واخذ موافقتها هي ولا ورجال مثل ايهم ماينرد
ابو غيث : لا ابد وهذا من ابسط حقوقها تاخذ راحتها وردوا لنا الخبر بالوقت اللي بيناسبكم
ايهم مبسوط ويدعي انها بتوافق
سعيد يبه وانت كلم عمي مسعود
ابو بداح انبسط وقال : ابشر
ابو بداح : دام الكل فتح موضوع الخطبه اسمعني يامسعود
حنا طالبين القرب منكم واطلب يد بنتك جنه لولدي سعيد
مسعود ابتسم : ابد تشرفت فيك ياخوي وبولدك بكلم البنت وباخذ منها الموافقه
ابو بداح : ابد خذ وقتك ياخوي وراي البنت مهم عندي
ابو سيف ساكت عياله كل واحد مقرر بدون شوره ومخليهم الفتره ذي
على راحتهم
غيث : عيال الكل بناظر فينها وش رايكم نهرب
عناد : والله انك صادق
نياف : بسرعه
وقفوا ثلاثتهم بيطلعون وقفهم ابو عناد
ابو عناد : على وين ان شاءالله انت وياه
عناد : يبه بنجيب العشاء ونجهزه لكم
ابو عناد : دام تجهزون العشاء لا ابد خذوا راحتكم
طلعوا وجهزوا العشاء وتعشوا الرجال وكلٍ راح بيته وضل ابو مخلد ينتظر اهله
-
<<عند الحريم >>
ام مخلد : يارهيفه سمعت ان نياف رجع وصار دكتور ماشاءالله عليه
ام عناد بنفسها تقول يارب احفظ ولدي من عيونهم : اي رجعل الحمدلله ورفع راسي وصار استشاري جراحه
ام مخلد : ماتبين تزوجينه
ام عناد فهمت نيتها وانها تلمح لبنتها : اي خطبت له
ام مخلد : من بنته
ام عناد : بتعرفينها بعدين الوقت مو مناسب الحين اعرفك عليها
ام مخلد : حسافه طار من يدينا ولا رجال مثل نياف ماينعاف
تعشوا الحريم وكلٍ راح بيته وقبل تطلع ام مخلد وبناتها لحن رشت زيت على الارضيه وشوي صابون
ام مخلد وبناتها وهم طالعين زلقو وطاحوا وصارخوا
لحن ابتسمت بانتصار ولمحت ابتسامتها ام عناد وشكت انها مسويه شي
-
<< عند الرجال >>
من سمعوا صوت الصراخ فزوا من المجلس طالعين
ابو مخلد ركض عند زوجته وبناته : وش فيكم
ام مخلد : ياضاري ساقي توجعني
ابو مخلد : وانتم يابنات
سوسن : يبه راسي يوجعني
ساميه لمحت ابتسامه لحن  : يدي توجعني اهخ اكيد انتِ اللي طيحتينا
لحن : لا تتهميني بشيء ماني مسويته وش ذنبي اذا أنتِ عمياء ماتشوفين الدرب من سمعتي باخوي خطب انعميتي
ساميه : اقص يدي اذا مو انتِ اللي مطيحتنا الله ياخذك
لحن : والله مو مشكلتي اذا انتِ عمياء ماتعرفين تمشين
ابو مخلد : نياف تعال شوف وش فيهم
نياف : اعتذر منك ياعمي بس انا مو مختص بالكسور انا جراح
ابو مخلد : كيف مو انت دكتور
نياف : بلا دكتور بس تخصصي جراحه بس اسوي عمليات
ابو مخلد : قوموا بوديكم المستشفى
ساميه: يبه والله لحن اللي طيحتنا شفها تضحك
ابو مخلد : انتِ اللي مطيحه زوجتي وبناتي
لحن : زوجتك وبناتك مايعرفون يمشون لاتبتلوني بنفسكم يامسلمين
عناد عصب : اسمعني يابو مخلد انا محترمك لحد الان عشان ابوي وكبر سنك اكسر الشر وخذ اهلك ولا تبتلي بنتي باهلك وش ذنبها اذا اهلك مايشوفون قدامهم قبل يطلعون
سوسن : يبه تكفى راسي يوجعني الدنيا تدور فيني
مسكت راسها وشافت الدم وصاحت
ابو مخلد مسك زوجته وساميه مسكت اختها وطلعوا رايحين للمستشفى
-
بعد ماطلعوا ام عناد خذت حذيانها وانتم بكرامه لحن هربت واحتمت بغيث
ام عناد: اطلعي من وراه بسرعه علميني وش مسويه
لحن : يمه تكفين مو مسويه شيء
ام عناد : وش جاب الزيت والصابون اجل عند الدرج
لحن : مدري
غيث لف وشافها مو متغطيه وبكامل زينتها حس بنار الغيره تاكل جوفه وسحب شماغه وغطاها به
ام عناد ولحن يدورون على غيث
غيث مسك ام عناد: خاله هدي وخلينا نسمع العلم منها
عناد : يمه الله يهديك بتضربينها على شان ام مخلد وبناتها
ام عناد بعصبه ورمت حذيانها وانتم بكرامه على عناد وجت بظهره
عناد توجع : اهخ يمه وش دخلني
لحن : جعله فيني ولا فيك عناد
ابو عناد : رهيفه ماتعصب كذا الا من خطا وش مسويه
لحن : بعلمكم بس توعدوني ماتضربوني
ام عناد : اطلعي من وراء ظهر غيث
لحن : ماني بطالعه
ام عناد خذت الخيزرانه لانها رمت عناد باحذيانها  وانتم بكرامه  : غيث وخر ولا والله ان تعلم الخيزرانه عليك انت
غيث : راضي بس ماتقربينها
ام عناد : تكلمي وش مسويه
عناد قرب ومسك يمين غيث وصار قدام امه ونياف بعد مسك يسار غيث وصاروا الثلاثه حاجز بينهم
تيم وحازم وقفوا ورا لحن
غيث : تكلمي ولك الامان
لحن ابتسمت
ام عناد : ماشاءالله وعندك محامين بعد وتصيرون حازج وخروا كذا تعلمونها اكثر على الخطا
لحن : يامامي ياحبيتي خذيت حقي منهم
ام عناد : انطقي وش حقه وش قاعده تقولين
لحن : تذكرين ليله العيد وسالي البنات اذا مو مصدقتني
ام عناد : مصدقتك بس تكلمي
لحن : كنت مصوره ترند مع عناد وجو بناتها وسبوني وغلطوا على تربيتك ويقولون اني قاعده اتصور مع رجال وانه مو عناد اللي صورته
ونزلت دمعه من عينها وطلعت ومن وراهم ووقفت قدام امها ؛ ام عناد شافت دموعها ورمت الخيزرانه
لحن كملت بغصه  : وتخيلي انهم قالوا لي حتى اهلك مايبونك رموك  للعجايز يربونك وحتى كرت عائلتهم مو متشرفين فيك يضيفونك من ضمن عايلتهم والعجوز اشفق عليك واضافك يرضيك يمه ونزلت دموعها انا ما رضيت يغلطون عليكم وحطيت زيت وصابون انتقم منهم
ام عناد انصدمت من الكلام اللي سمعته وضمتها : اعذريني يابنتي اعذريني والله من خوفي عليك تخيلي يصير في وحده شيء وتموت ويصير لك شيء انا ما اتحمل وبيوقف قلبي
لحن : بسم الله عليك يمه ربي يخليك لي ويطول بعمرك
عناد انقهر من الكلام اللي سمعه وضمها  من ورا : والله لو انهم مب حريم لا اربيهم واخذ حق كل دمعه نزلت من عينك منهم
-
عند مليحه الحين الوقت المناسب عشان افضحك يالحن
طلعت مليحه وقالت : طيب بنات ابو مخلد ماغلطوا لان بنتكم لمن كنا بالمخيم كانت مع ولد عمي اللي كان خطيبي وضامين بعض وحاضنين بعض والاخ غيث نايم بحضنها وعندي الدليل مزعجينا ببنتكم وتربيتكم وبنتكم عديمه شرف
غيث عيونه حمرت وعروقه برزت من العصبيه : وش قاعده تقولين أنتِ
مليحه : وهاذي هي الصور انا بنفسي شفتكم وصورتكم
لحن ساكته ما ابدت اي رده فعل
عناد عصب لانها قاعده تغلط على وطنه : تعقبين وتخسين تغلطين على بنتي وبنتي اشرف منك ومن امثالك تفهمين
ابو عناد عصب ورمى بعصاه على الارض وطلعت صوت قوي : منصور تسمع وش قاعده تقول بنتك
منصور انحرج من بنته وماقدر يتكلم
ابو سيف : خلونا نشوف الصور ونحكم
ابو عناد : انا واثق ببنتي ولو اشوفها تخطي قدامي خطاها بعيوني صواب تفهم
ام عناد : ثمني كلامك يامليحه ولا عشره من امثالك يقدر يشكك بتربيتنا لبنتنا
غيث : أنتِ تسوين كذا لاني رميت الختم بوجهك
مليحه: أنت فسخت الخطبه عشانها
غيث: كلٍ يشوف الناس بعين طبعه وانا فسختها من سواد وجهك تعتقدين اني بتزوج وحده مستعمله
لحن انصدمت وش يقصد بكلامه
مليحه انقهرت من كلامه : وهي وش يعني علمني مو مستع
قبل تكمل جاها كف من غيث : اقسم بمن احل القسم ان ماتسكتين والله لا انسى انك بنت عمي واذبحك تفهمين
سعيد مسك اخته وضربها كف ثاني : أنتِ وش وضعك ناويه بكل مره توطين راسنا بالارض
ابو سيف : ابعد أنت وياه مافيه احترام لنا الدنيا لعبه عندكم تضربونها
اشوف الصور
عطته مليحه جوالها وشاف الصور: متاكده انها لحن وجهها مو مبين
لحن ارتاحت لمن قال وجهها مو مبين
نغم : لان اللي كانت مع غيث انا اخته مو لحن لحن اشرف من امثالك والبنت اللي شفتيها انا غيث ارسل لي اجيه عند الكايده ورحت شفته تعبان ومرتفعه حرارته ومصدع وعطيته كماده بارده وجلست وحطيت راسه بحضني اسوي له مساج لراسه لانه مصدع وماقدر ينام
منصور من سمع كلام نغم كان احد صب ماء بارد عليه وعصب من موقف بنته السخيف وكلامها وغلطت بحق بنت حازم
غيث سحب الجوال من يد غالب يشوف الصور وحمد ربي ان وجهه لحن مب مبين ورمى الجوال بالارض وتكسر وصار ثلاث اجزاء تحطم ماتقدر تصلحه
مليحه : عمى كسر ان شاء الله يكسر يدك مين أنت حتى تكسر جوالي وعشان مين عشان وحده توك عارفها من كم يوم
ابو بداح : اكسري حسك ما ابغى اسمع صوتك تفهمين  ؛ اعتذر منك ياعمي امسحها بوجهي والحين مليحه بتعتذر من لحن
مليحه انقهرت هي متاكده انها لحن بس كلام نغم يثبت لهم العكس وخافت من ابوها : مستحيل اعتذر
ابو بداح همس باذنها: حسباك بالبيت مب الحين ياسواد الوجه والحين
بتعتذرين غصباً عنك
لحن وغيث ناظروا بعض مصدومين من كلام نغم وكيف عرفت انه كان تعبان
مليحه : اعتذر منكم
ابو عناد : فكري قبل تتهمين بنتي بقبل عذرك عشان ابوك ولا أنتِ ماتستاهلين السماح
عناد مسك يدين لحن الخايفه ويهدي رجفتها : لو يتكلمون من الحين لين بكره والله مايهزون ثقتنا فيك
لحن بكت وضمته : انا ادري انكم واثقين فيني بس مدري ليه خفت خفت يصير باهلي شيء ابوي ضغطه خفت ينخفض خفت يصير فيك شيء بسبب كلامها واتهامها لي
عناد مسح دموعها وقال: لا يلحقك الزمن تكفين خوف
دامي معك عسى الله يخليك لي
وضرب صدره
حطيني بوجه الليالي والظروف
وخليك وراي وخلي الباقي علي
لحن ابتسمت وارتاحت كثير
رجعوا لبيوتهم ونغم قبل تطلع همست للحن : لا تخافين محد علمني انا شفتكم وغيث اذا صدع وارتفعت حرارته مايتذكر اللي يصير معه
لحن قرصتها وهربت ونغم صارخت : مردوده يالحن بتشوفين
غيث سمع همسهم وقال : اقول امشي باقي تبين تتضاربين
ضحكت لحن : تستاهلين
-
<<بيت ابو سيف >>
منصور عصب وسحب العقال وضربها ضرب انا تنزلين راسي وتشوهين سمعه بنت عمي حازم تحسبينها مثلك تقابل فلان وتراسل علان انا دلعتك ودلعي لك خربك
ام بداح : وقف لا تضربها صدق بنتك ليه ماتصدقها
منصور : انقلعي أنتِ قبل ارمي عليك يمين الطلاق بالثلاث
بداح وسعيد يناظرون باختهم ومالهم وجه يناظرون بابو عناد وعياله من سوات اختهم
منصور سحبها بشعرها لين غرفتها وقفل الباب وقبل يطلع قال لها : جوال مافيه تحلمين تمسكين جوال وبكره ملكتك من راكان وبدون عرس تفهمين بتوقعين وتنقلعين معه ولا عاد اشوفك أنتِ مب بنتي اللي انا ربيتها
مضاري تبكي على حالها هي تكره بنتها بس لانها قدرت تجيب شيء يمس لحن بتوقف معها
مليحه بعد ماطلع ابوها وقفل الباب ضربت نفسها : انا استاهل كل اللي صار لي انا دمرت نفسي بيدي وكله لاني وثقت براكان الله ياخذك ياراكان الله ياخذك أنت السبب والله لا انتقم منكم كلكم  صاحت لين نامت على نفس وضعيتها
-
<< بيت ابو عناد >>
بعد يوم متعب ناموا الكل الا لحن سوت لها ولعناد شاهي وطلعت للسطح جلست جنبه وعطته كوبه
لحن: تصدق كنت واثقه فيكم راح توقفون معي
عناد: قالها ابوي والله لو تخطين ونشوف خطاك قدامنا خطاك بعيوننا صواب يالحن
لحن ابتسمت ومسكت الشاهي بيسارها وشربت : متى اقدر اشيلها تعبتني
عناد : مطولين شوي ياحب
لحن تئفئفت  : اف مليت منها طيب
ضحك عناد وقال : وش رايك تغنين لي اشتقت لصوتك
ابتسمت لحن وغنت: انا على متن السحاب خطاك بعيوني صواب
حبك بقلبي منتحي مكتوب ومقدر كتاب
عناد ابتسم : اشهد ان خطاك بعيوني صواب وان حبك مكتوب بقلبي ومقدر كتاب
.
.
سبحان الله وبحمده
سبحان الله العظيم
من العصر اكتب لكم وانا تعبانه كتبت 5191 كلمه 🌷