أنت العوض لا صارت حظوظي شحاح وأنت الهنا ياغايتي والغنايم

عشق الختام

يا تفاصيل الحكاية وش بقول من الكلام
جيت ببدأ بالبداية وزاحمتني هالمشاعر
طاهرة مثل الهداية بك سراطي استقام
احمد الله أنتِ اخر شخص احبه للنهاية
.....••.......
م11:59
مر ثالث اشهر حمل للبنات واليوم زواج مليكه وسلمان مليكه طلبت سلطان يكون زواجهم بعد ثلاث شهور
قبل الزفه غيث كان حريص جداً يراقب الزواج بكل حرص وحذر جاه تهديد من رغم غريب راح يموت شخص يغليه بالحيل  بالزواج زفوا سلمان ومليحه وبدأت الخيمة تفضى من الرجال غيث لمح القناص من فوق احدى البيوت وموجه السلاح صوب قلب عناد وعناد يسولف مع العيال مب منتبه له قبل يطلق القناص على عناد غيث فز وقف قبال عناد ورمى نفسه عليه وضمه بكل قوة ورفض يبعد عنه ، عناد انصدم من رده فعل غيث واطلق القناص رصاصته وتوسطت اسفل ظهر غيث ومال بجسمه كله على عناد وقبل يسكر عيونه همس باذن عناد
غيث : ان صار لي شيء وصيتي عيالي ولحن انا متاكد انك راح تنتبه لهم وراح تعتبر عيالي عيالك انا اوصيك عليهم لاني واثق فيك
الرجال شافوا الدم وصاحوا بخوف وثوبه الابيض صار احمر من كثره النزيف
عناد باقي مصدوم مب مستوعب شي ، سكر غيث عيونه وطاح وقبل يوصل للارض مسكه عناد وشاف الدم وصارخ باسم غيث وحط يده مكان جرح الرصاصه ويده توسخت من دم غيث شاله وصاح  باسم نياف يجي يساعده يحطونه بالسياره ؛ جلس عناد ورا وحط راس غيث بحضنه ويحاول يصحيه وابو عناد ركب قدام وبقيه الرجال بسيارات ثانيه ، نياف سحب شماغه ورماه لعناد : عناد امسك الشماغ وحطه مكان الجرح بسرعه حاول تحصيه
  اخد عناد الشماغ وحطه مكان الجرح وحاول يصحي غيث بس غيث ما صحى ابد
وصلوا للمستشفى ونياف نزل بسرعه يركض وبخوف على غيث جاب سرير متحرك والممرضين وبعض الدكاتره يعرفونه ركضوا صوبه بيساعدونه من شافوا الدم بثوبه ركض لغرفه العمليات حتى ملابسه مابدلها وطلع يطمنهم انه هو اللي راح يجري العمليه لغيث ؛ عناد ماتحمل وخاف يخسره مثل نواف
وضل يضرب راسه بالجدر وابوه يحاول يهديه ولحد الان الحريم ماوصلهم خبر اصابه غيث
عناد : انا السبب لو بيصير له شيء انا السبب
سيف سحبه وقفه قباله وضربه كف يخليه يصحى : انت مجنون انهبلت بدال ماتدعي له تتهم نفسك
عناد نزلت دموعه وضم سيف ابو غيث : عمي وصاني على زوجته وعياله عمي همس باذني وقالي واثق فيك بتعتبرهم مثل عيالك
سيف : هو ماوصاك عليهم الا انه واثق فيك ياعناد انت ادعي له ياعناد هو محتاج دعائنا له الحين
سيف يحاول يهدي نفسه ويقوي نفسه وهو من جواته منهار خايف يخسر ولده اخر عياله هو المفروض احد الحين يطمنه ان ولده بيصير طيب هؤ مؤمن بالله وصابر وجلس على احد الكراسي يستغفر ويدعي لولده
ايهم انحنى وضم ركبه لصدره ونزل راسه على ركبه ويبكي بصمت ومكتوم انحنى يضمه ويهديه سعيد وبداح وتيم يبكون بصمت وحازم توجه لاقرب مسجد
دخل حازم للمسجد وكله حزن وكاتم دموعه ومخبي حزنه بين ضلوع صدره وقف يصلي الوتر ويدعي لغيث دخل ابو عناد للمسجد وشافه
دخل وجلس قباله
ابو عناد : ياولدي نزل دموعك لا تكتم جرحك داخل قلبك لانه بيوجعك ياولدي
حازم منزل راسه ويهزه برفض
ابو عناد مسك راسه ورفعه : ترا البكى ماهو بعيب لا منك بكيت ياولدي ليه تكتم حزنك ودموعك بين ضلوعك وبتوجعك بعدين ياولدي فضفض طلع كل اللي بقلبك لا تكتمه
حازم دفن وجهه بصدر جده وبكى بكى ماتحمل كل اللي صار له من وجع قلبه
حازم : يبه ليه دايم يصير بغيث كذا يبه ليه هو الوحيد اللي دايم يضحي عشان يحمينا يبه حنا الحين واجبنا نضحي عشانه هو عشان لحن عشان عياله يبه زوجته الحين بتدق بتسأل وينه يبه يبه تكفى قول لي ليه دايم هو اللي يحمينا من بعد ربي ويضحي بعمره عشاننا
ابو عناد : لانه يحبكم ويخاف عليكم لانه يشوف نفسه مسؤال عن حمايتنا لانه غيث ياحازم لانه غيث
حازم : لحن تبيه يبه لحن تحتاجه يبه
ابو عناد نزلت دموعه : الله يقومه بالسلامه يبه ويرجع لزوجته وعياله
حازم مسح دموعه وضل يجلس بالمسجد بيضل يدعي له ويستغفر ربي وبيضل لين ياذن الفجر وكل شوي يدق على تيم يساله عن وضع غيث وهل طلع غيث من غرفه العمليات ويتطمن عليه
ابو عناد رجع لولده عناد وبينتظر معهم
....••....
(عند البنات )
بيت ابو عناد كانوا مستانسات ويسولفون ويتكلمون عن الزواج
فجأة سكتوا كلهم من استوعبوا ان الرجال طولوا بالرجعه ولحن كانت خايفه وتحس بقلبها يوجعها ماتعرف ليه فجأة حست بالضيق بصدرها
جاها اتصال من رقم غريب رفت الجوال بيد راجفه والبنات والحريم الكبار يناظرونها مستغربين تغير وضعها
ام عناد : يمه لحن وش فيك يمه ردي على الاتصال
لحن : خايفه يمه
ام عناد : بسم الله عليك
نغم : رجع دق مره ثانيه إفتحي المكالمه يمكن احد مهم
فتحت الاتصال وليتها مافتحته
عمر بابتسامة خبيثه: لحن الحقي على زوجك بغرفه العمليات وشوفيه قبل يموت
لحن بخوف : وش تقول أنت مين
عمر : مب لازم تعرفيني الحين اذا مات زوجك انا بتزوجك وتعرفيني وقتها
لحن : تخسي وتعقب غيث وينه وش سويت فيه
وقفت ام غيث بخوف ونغم مسكت بطنها برده فعل سريعه وخوف
عمر بضحكه مستفزه : الصراحه كانت النيه اقتل ابوك عناد بس زوجك ذكي قدر يشوفني ورمى نفسه قدام عناد وتلقى الرصاصه مكانه يالله يموت زوجك بعدين ابوك وعناد وسيف وعياله ومنصور ومسعود صدقيني لا أندمهم كلكم والله لا انتقم منكم كلكم و والدور عليك ابذبحك مع زوجك
لحن قفلت الخط بوجهه ودقت على عناد مايرد وقفت بتوتر وخوف ويدينها ترجع بخوف ورفضت تهدى ، ام عناد وقفت ركضت صوبها تهديها لحن ضلت تدق على عناد اكثر من مره وضلت تمشي بالصاله بتوتر وخوف ويدينها ترتجف بسرعه
لحن بصراخ : رد رد ليه ماترد رد علي طمني
رجعت تدق عليه وهي ماسكه دموعها ماتبيها تنزل ماتبي تصدقه بس كلامه كانه واثق منه وتاكد من عدم رد عناد عليها
وقفت ومسكت المزهريه ورمتها بكل قوتها للجدار قدامها وتكسرت وتناثر الزجاج راجع عليها وجرح وجها جروح بسيطه وبتروح بسرعه
الكل صاح من رده فعلها السريعه وام عناد ركضت تسحبها من بين الزجاج والبنات ركضوا ينظفون المكان ؛ جلستها ام عناد وضمتها لصدها تهديها بكت لحن وصارت وتضرب نفسها
لحن بصراخ : ليه مايرد علي
....
<< عناد >>
كان واقف عند الباب ورفض يتحرك من عنده وساند ظهره عليه ينتظرهم يطلعون غيث من غرفه العمليات
مسك جواله كان مصمته وانصدم من كثر الاتصالات من لحن وخاف انه وصلها الخبر
دق عليها وردت بسرعه وسمع صوت بكاها وتركها تكمل عتابها
لحن : يبه تكفى وينه غيث طلبتك علمني ليه من ادق عليك ماترد علي ليه ماعلمتني مو تقول انا بنتك مب تخاف علي يجيني الخبر من شخص ما اعرفه ويتمسخر وش تبيني اسوي وش تبيني اقول له اقول انت كذاب زوجي وابوي عندني جالسين قبالي
بكت اكثر وزفرت بتعب ومسكت بطنها : اهخ عناد تكفى بطني يوجعني مب متحمله الوجع وقفلت الخط ومسكت بطنها بالم وبكت
ام عناد تهديها وماسكتها ببكى  : بسم الله عليك يمه اهدي تعوذي من ابليس يمه أنتِ حامل لا تتتوترين اهدي وامسحي دموعك
عناد من صاحت وقفلت الخط فز يطلع من المستشفى ركض ، ابو عناد يناديه ماسمعه ركب سيارته مسرع  متوجه للبيت
ابو غيث جالس ومن فز عناد يركض خاف والكل خافوا وتذكروا الحريم تركوهم ماخبروهم
ام سيف من وصلها الخبر بكت لين اغمى عليها
وصل عناد البيت بسرعه ونزل حتى السيارة ماقفلها ودخل مسرع متوجه عندها خايف عليها
البنات من شافوه داخل وخايف وشكله متبهذل وازارير ثوبه مقطعه وشعره مبعثر وعيونه حمراء من كتمه لدموعه وثوبه عليه بقع  دم غيث بكوا بخوف
انحنى قدامها ومسك يدينها وباسهم بعمق ودفن وجهه بحضنها ونزلت دموعه ، لحن بكت وحنت راسها نزلته على راسه وهي بكت وصوت شهقاتها عالي وعناد يبكي بصمت ، مسكت بطنها بوجع ماقدرت تتكلم من كثر الوجع واغمى عليها ام عناد صرخت من شافتها اغمى عليها وركضت غزل تجيب عباية لحن
عناد فز من حس بثقلها وايقن انه اغمى عليها سحب عبايتها من يدين غزل وغطاها وشالها بين يدينه بيوديه المستشفى
ام عناد وقفت بتروح معهم ونغم بعد راحت معهم
وصل عناد للمستشفى ودخلها عند دكتورة وهي من شافتها خافت وبعد ماتطمنت الدكتوره على الطفلين اللي ببطنها وخبرتهم انها الحين دخلت الشهر الرابع والحمدلله حملها تمام بس لحن لا تتوتر وتخاف وتحزن لانه بيضرها وهي الحين لازم تهتم بصحتها اكثر
صحت لحن بعد مرور 5 ساعات على نومها وبكت وعناد تقدم صوبها وسحبها لحضنه يضمها لصدره
لحن ببكى : تكفى خذني عنده
عناد وقف ووقفها معه وام عناد ونغم راحوا معهم وتوجهوا لغرفه العمليات.
ماشاف احد موجود واستغرب وخاف
عناد سال احد الممرضين بخوف : اللي كان بغرفه العمليات وينه
الممرضه: نجحت عمليته ونقله الدكتور نياف لغرفه خاصه دامه تعدى مرحله الخطر
عناد : تعرف وينها
الممرضه: ايه اتبعوني
...
ومرت اكثر من 11 ساعه نياف ماطلع من غرفه العمليات، وبعد ماطلع عناد من المستشفى بعدها بكم دقيقة طلع نياف يبشرهم بنجاح العمليه مع انها كانت صعبه ومكان الرصاصه خطير يمكن يسبب له شلل نصفي ، خبرهم انه طيب وبخير وراح ينقله لغرفه خاصه
نياف : ابشركم نجحت العمليه واخوي بخير والحين بنقله لغرفه خاصه
ابو غيث بكى : الحمدلله اللهم لك الحمد يارب
ابو عناد ضم نياف وبكى ونياف بكى والعيال ضامين بعضهم بعد وبكوا بفرح ومنصور ومسعود يتحمدون لابو غيث على سلامه ولده
...
وصلوا عناد والبنات وام عناد للغرفه ودخلوا شافوهم كلهم متجمعين عليه بعد ماصحى شافها واقفه جنب عناد تلاقت انظارهم  ووجه نظره لجه بطنها البارزه هو مستحي منهم مايبي يناظرهم مايبي يحسون انه بحاجه احد ولا مساعده احد منهم يشوف نفسه انه ضعيف ومايبي يكون ضعيف قدامهم يحس نفسه مقهور منه لانه ضعيف قدامهم  لانه يشوف نفسه ضعيف مايقدر يسوي شيء الحين
غيث بعصبيه : الكل يطلع مابي اشوف احد
عناد تقدم صوبه ووقف قدامه وضربه على صدره وشهقت لحن
عناد : نظرتك ذي انا مابي تكررها انا دايم اقول لك لا تشوف نفسك بالنظره ذي انا معك وانا سندك ومن تصير طيب بنتفاهم على وقفتك قدامي وتلقيك للرصاصه مكاني المفروض انا مكانك على السرير ذا مب انت انت مكانك واشر على لحن جنبها وجنب عيالكم انت بكل مره تدخل للمستشفى هي وعيالك يتعبون ويدخلون معك المستشفى انت دخلت بغيبوبه صحيت وزوجتك بنفس اليوم موجوده بالمستشفى ولا مات ولدكم اللي مامرت شهور على فرحتها بالحمل تخيل اليوم بعد هي رجعت تعبت ودخلت المستشفى والدكتوره خبرتها انها اذا تعبت مره ثانيه بيصير لها وللي ببطنها شيء وبتخسرهم كلهم
غيث يناظرها وهي بتناظره بدموع صد نظره عنها وناظر بطنها البارزه مايقدر يتكلم او يقول شيء حاول يوقف بس ماقدر
غيث : نياف مقدر اوقف مقدر احرك رجليني
نياف بخوف ركض عنده يفحص رجلينه
نياف : مافيك الا العافيه ماتقدر تحركها الحين لان جرحك توه جديد
غيث حاول اكثر من مره يوقف وجاء عناد بيساعده بس غيث من كثر عصبيته اللي اعمت له عيونه حتى عروق رقبته برزت من كثر محاولته يحرك رجلينه دفه ورجع عناد لواء
غيث بغضب : الكل يطلع مابي اشوف احد تفهمون مابي اشوف نظرتكم ذي تفهمون مابي اشوف احد يشفق علي اطلعوا
نياف امرهم يطلعون كلهم عشان نفسيته ماتتعب اكثر والكل طلع منتظرينه براء غرفته يهدى شوي ويدخلون ضلت لحن ماطلعت
غيث : ليه ماطلعتي معهم
لحن لفت تعطيه ظهرها بتمسح دموعها
غيث بيأس: لا تتركيني
لحن رمت عبايتها ونقابها على الكنبه وتقدمت عنده جلست قربه ودفنت وجهها بصدره : من اللي قال لك بتركك انا مستحيل اتركك بيوم تفهم
غيث رفع وجهها من على صدره يناظرها بحب راضي انه يكون اضعف انسان قدامها هي بس
غيث : من اللي مسوي بوجهك كذا وش صار لك بغيابي
لحن : كسرت المزهريه وتضررت شوي بس كم جرح بسيط
غيث حط كفه على بطنها وقال : كل هذا وبسيطه ، طلعيني من هنا بدون محد يدري
لحن : كيف اطلعك
غيث : مابي اسمع كيف بتروحين الحين وبكتبين لي خروج وبنروح بيتنا مابي احد يعرف تفهمين حتى عناد
لحن : ليه
غيث : ماراح نرجع الا من اقدر امسك الشخص اللي حاول انه يقتل عناد
لحن : حتى عناد ماتبيه يعرف
غيث : انا مستعد احط نفسي بالخطر عشانه انا مستعد اخسر نفسي وما اخسر عناد
لحن : طيب جهز نفسك اجل
غيث بيأس: مقدر امشي
لحن : توك مسوي العمليه اكيد ماتقدر تمشي لسى جرّحك جديد كم اسبوع وترجّع اقوى من قبل
غيث : امشي بدون كثره كلام وتراك أنتِ اللي بتسوقين
عناد من وراها : تعقب وخسى وين تبي تختفي وتروح وتتركنا امك بالبيت منهاره تبي تطمن عليك طمنها مب تختفي
غيث : عناد مالك دخل اتركني اعتقني مابيك معي تفهم
عناد : طيب اسمعني انا الحين بروح اسوي لك خروج وانا اللي بيوصلكم لبيتكم بس بشرط
غيث : وش شرطك
عناد : من تحس نفسك صرت طيب ترجعون واذا انت ناوي تتطول بجيكم مره كل اسبوع انا اعرفك ياغيث تبي تختفي اكثر من شهر
غيث : ياليل يالنشبه
عناد : جاك العلم ولا ترا والله ابروح الحين بطلع عندهم واخبرهم بخطتك تبي تسرق بنتي وتهرب بها
غيث : زوجتي مابسرقها 
عناد : لا مب على كيفك هي بكيفها لا تخليني ارجعها معي وتضل وحيد
لحن : بروح مع غيث
غيث ابتسم وعناد مصدوم : تبيعيني
لحن : والله اللي مايرد علي من اول رنه اتصال ابيعه
عناد : اعتذر منك جوالي كان صامت
لحن : مب عذر
غيث : عناد اعجل قبل يرجعون
عناد : لا تخاف رحوا يصلون العصر
غيث : وشلون بيصلون العصر
عناد : نايم اكثر من 11 ساعه ومادريت باللي يصير حوالينك وزوجتك بعد نايمه من 5 ساعات بالجهه الثاني من المستشفى
لحن : عناد بسرعه طيب
غيث : ليه وش فيك وش صار بغيابي
عناد : ابد بس من كثر البكى والتوتر بطنها وجعها وجبتها اتطمن عليها
غيث: انتبهي ثاني مره تفهمين
عناد طلع وقبل يطلع لف وقال : متحمسه للهروب اكثر من المروح زوجك
لحن : اكيد فيه هروب متحمسه
عناد ماشاف الجروح اللي بوجهها لانها لبست النقاب من سمعت صوته
طلع وكمل إجراءات خروج غيث ورجع عندهم ؛ولحن من طلع جابت كرسي متحرك وساعدت غيث يجلس دخل وشافهم جاهزين مسك كابه ولبسه غيث وطلعوا بسرعه متخبين منهم لا يشوفونهم لان الصلاة انتهت
عناد شال غيث وجلسه قدام وركبت لحن وراء بتعب من بطنها اللي برزت وعناد شغل السياره وطلع من المستشفى مسرع متجه لبيت غيث
....
<< الرجال>>
طلعوا من المسجد اللي قريب من المستشفى وصلوا لغرفه غيث دخلوا وشافوها فاضيه انصدموا وحبوا يتأكدون اكثر انها غرفته
نياف طلع من مكتبه متجه لغيث يتطمن عليه وانصدم من شاف الغرفه فاضيه
نياف بتسال: وين غيث
ابو غيث : ماندري مب معك انت احسبك ماخذه تسوي له فحوصات لرجلينه
نياف : لا انا جيت ابتطمن عليه
ابو عناد. : احد منكم شاف عناد ولحن
تيم : عناد ماصلى معنا قال بيروح ياخذ جواله نساه وبيرجع يصلي
منصور : وحازم رجع نغم وخالتي ام عناد للبيت يمكن لحن رجعت معهم
ابو عناد : لا لحن حتى ماطلعت معنا من طلعنا ضلت عند زوجها
نياف دق على احد الممرضين يتاكد من شيء ومن قفل ضرب برجله الارض بغضب : كنت حاس والله
ابو عناد : لا تقول هربوا
نياف : مسوين لغيث خروج
ابو عناد : خلونا نرجع للبيت اكيد وصلوا وما عطونا خبر
سيف : لا عمي صدقني انه مارجع للبيت
ابو عناد : وش تقصد
سيف : عمي غيث واعرفه اكيد انهم راحوا مكان ثاني غيث اعرفه من يتصاوب اصابات خطيره يختفي بالاشهر مايرجع
ابو عناد : الله يستر من اختفائهم وراهم بلا بس  دواهم عندي
....
<< بيت غيث >>
وصلوا للبيت ولحن توجهت لغرفه بالدور الأرضي فتحتها ونظفتها وعناد دخل غيث للغرفه وساعده يستلقي على بطنه وحط ادويته على الطاوله بجنبه وطلع راجع للديره بس وقفته لحن
لحن : عناد نم عندنا اليوم وبكره ارجع للديره
عناد : لا برجع الحين
لحن : تكفى عشاني أنت تعبان ولازم ترتاح شوي وتنام
عناد ابتسم : ابشري مابرجع اليوم للديره
ابتسمت لحن ونظفت له غرفه ودخل يرتاح شوي وبينام
وقبل ينام ارسل لنغم يتطمن عليها ويطمنها انهم بخير وطلعوا من المستشفى نغم شافت رسالته وارسلت له ينتبه على نفسه
غيث نام من التعب ولحن غطته باللحاف وقفلت الضوء وطلعت توجهت للدور الثاني لغرفتهم وتوضت تصلي الصلوات اللي فاتتها ونزلت لتحت تجهز لهم اكل وهي مشتهيه صينيه الرز بالباشميل
لحن جهزت الوصفة بس استغنت عن الدجاج لانها تعاني من حساسية الدجاج واكتفت بالبطاطس
اضافت الرز على النار وقطعت البطاطس وقلتهم بالوقت اللي بيستوي فيه الرز استوى الرز وحطته على الطاوله وكانت مجهزه صوص الباشميل اول شي حطته الرز المسلوق بعدين اضافت البطاطس والذره واخر طبقه اضافت الباشميل واخر شيء رشت بالموزاريلا وكثرت الكميه شوي ودخلتها على الفرن من فوق 10 دقايق ومن جهزت طلعتها وحطتها على الطاوله وطلعت تنادي عناد ياكل معها بس فزت بخوف من شافته ساند نفسه على الباب وشهقت بخوف
لحن : بسم الله خوفتني من متى انت واقف هنا
عناد : من لمن سلقتي الرز ضليت واقف اشوف وش تسوين عاد الريحه تجننن تسلم يدينك مره جوعان
ابتسمت لحن : تسلم يالغالي بروح اشوف غيث صاحي وبرجع
عناد : لا كلنا بنروح عنده وناكل عنده
ابتسمت لحن وجهزت لهم ثلاث صحون وثلاث ملاعق حطتهم بصينيه تقديم كبيره وكانت بتشيل صينيه الرز بالباشميل بس عناد وقفها
عناد : انا بشيلها عنك حاره
لحن : لا عادي
عناد : شوفي في الثلاجه عصير طلعيه الدب اللي فوق يحب العصير واكيد الثلاجه معبيها مشروبات غازيه كثيره
لحن فتحت الثلاجه وضحكت  : وش تبي من عصير
عناد ابتسم : المعتاد
طلعت اثنين كولا واحد سفن اب
طلعوا للغرفه كان صاحي يكلم ومن شافهم دخلوا قفل المكالمه
عناد حط الصينيه على الطاوله وتوجه صوبه يساعده يجلس عشان ما يأذي جرحه بتسرعه
سند ظهر غيث على الكرسي ولحن حطت له قطعه كبيره شوي بصحنه وتوجهت صوبه تعطيه الصحن وملعقته وعناد فتح له السفن اب وعطاه
غيث : الله عناد مدلعني لا لا خلاص ماعاد ابي اقوم بضل كذا
لحن : قول استغفرالله
غيث ضحك : استغفرالله
عناد : بس اليوم عشان بنتي حامل ما ابغى اتعبها بفتح العصير لك
غيث : لا ماشاءالله عليك قصرت والله لو انك ماتبيها تتعب كان طبخت عنها
عناد : شم ريحه طبخها وتعرف
غيث : اسكت بس فالح بشمشمه الاكل بس
لحن : فاتك غيث عناد من يطبخ بتموت بطبخه بتدمنه
غيث : ذوقني مب تقول انا اخوك ليه ماذوقتني طبخك ولا بس لحنك
عناد : بس بنت عناد تقدر تذوق طبخ عناد هي الوحيده اللي اطبخ لها
لحن : عنادي حبيبي اشتهيت تشيز كيك بلوبيري اللي تسويه لنا
عناد : ابشري به
غيث : وش حبيبي وقدامي بعد
لحن : اي حبيبي وابوي وعيوني
غيث : اطلعوا برا
عناد : لا تغار طالعين وبنجهز القعده فوق السطح وبنقعد هناك وانت ضل هنا منفس
غيث : معكم والله ان اجي معكم المطبخ واشوفك كيف بتسويه وبطلع معكم
لحن : حياك يوسعك القلب قبل العين
غيث : ادري يطول لي بعمرك
عناد : وع سديت نفسي عن الاكل
عناد ضل ياكل بتلذذ ومن خلص الصينيه كلها وقف
غيث : يالظالم انا ولحن اكلنا قطعه وحده وانت اكلت الصينيه كلها وتقول انسدت نفسك هذا وهي منسده كليت الصينيه كلها لو مو منسده وش بتسوي بتاكلنا كلنا
ضحكت لحن وعناد وقف وطلع فوق الكنبه نقز وصل الارض وضل يسوي حركات برجلينه ويرفعها لفوق  ومرات يهز بخصره : غيث تقدر تسوي كذا
غيث مسك علبه المنديل ورماه بها : انقلع
لحن وقفت تلم الصحون وتنظف المكان بتاخذهم المطبخ بتغسلهم سحبها عناد من يدينها : انا باخذها معي وبنظفها
لحن : لا تسوي التشيز الا من اجي بصورك
عناد : من عيوني
غيث : ميري لا تنسين تاخذين معك ذا
عناد : تعقب ياروزا
ضحك غيث ووجعه ظهره وفزت لحن تمسكه : خبل انت تتعب نفسك
ولفت لعناد ؛ وانت يلا على المطبخ
غيث كتم ضحكته وعناد ضحك : لا الله يخليك لي مب كذا الاسلوب حسستيني خدامه عندكم
لحن بابتسامه : جعلني قبلك ماقصدي بالاسلوب ذا لا تفهمني غلط
عناد : عارف بس ضحكتي الاعداء علينا
لحن : منهم ؟
عناد : روزا
غيث : منهي ذي الله لا ياخذك
لحن : الخدامه حقتنا
غيث : من سكنت عندكم ماشفتها
عناد : لان بنتك عطتها اجازه قبل العيد تسافر لاهلها وسحبت علينا ما عاد تبي ترجع
غيث ضحك : القموا اجل محد قال لكم تعطونها اجازه واكيد انها رفضت الرجعه بسبب وجهك المروح
عناد : وش دخلك
لحن : خلاص انت وياه اسكتوا أزعجتوني
عناد : الحمل مغيرك علينا
ضحكت وطلع عناد للمطبخ وغيث يتأمل ضحكتها
.....•••.....
<< بيت ابو عناد >>
متجمعين بيحلون قضيه اختفائهم ويبونهم يرجعون بسرعه بس مايعرفون موقع بيت غيث
نياف : القهر اني ماعرف موقع بيت غيث
ابو عناد : لا تخافون عليهم هم كبار وبيعرفون يتصرفون
ام عناد : بنتي حامل ياحازم وانا ابيها عندي قدام عيوني اتطمن عليها
ابو عناد : لا تخافين مابيطولون اكيد بيتشافى غيث وبيرجعون
نغم : كلمني عناد وقال انهم طيبين ولا تخافون عليهم
ابو عناد : قال لك متى بيرجع
نغم : قال بيجلس الليله عندهم وبيرجع بكره
ابو عناد : زين المهم انهم طيبين
ام عناد : الله يصلحهم ويهديهم باذن الله ان يتعاقبون والله ما اعديها لهم على خير يخطفون بنتي
تيم : يمه مب مخطوفه مع زوجها
ام عناد : انت اسكت مابي اسمع لك صوت تفهم
تيم : ابشري
مقرن : اهدي يارهيفه ماعليها خلاف مع زوجها وخالها
تيم : عمي مقرن
مقرن : لبيه ياولدي
تيم : ابغى اتزوج بنتك غزل زوجني
شرقت غزل بالقهوة وكبتها على غيم
غيم : عمى ياتيم شوف وش سويت بالبنت مب كذا يطلبون البنت
ضحك مقرن وتقي تفشل من ولده
بداح : عمي وانا بعد ابغى توأمها غزال
غزال شهقت : خير من قال لك ابغى اتزوج
بداح : انا ابغى اتزوجك توافقين
كحت اكثر من مره
منصور : نعتذر منك ياعمي عيالنا مشافيح يحسبون الزواج لعبه وهو مسؤليه
مقرن : ماغلطوا عشان تعتذر لا ياولدي هذي سنه الحياه والزواج شرعه الله لنا
تيم : شفته يبه انا ابغى اكمل نص ديني
غزل : ونص دينك على حسابي
تقي : حتى البنت ماتبيك
تيم صامل على طلبه ويحاول يغريها : عمي مقرن اذا وافقت تزوجني بنتك تراني بسوي معها كل الترندات وبطلعها كل يوم وبعد تراني دكتور وعندي فلوس واشتغل بشركه لحن وعمي عناد وش تبون اكثر ومهرها بيجيها لو تبيه مليون راضي
غزل : بتسوي معي الترندات والمصايب وتلعب معي سوني كل يوم
تيم : تلعبين سوني
غزل : اي محترفه
تيم : انا موافق على الزواج
تقي مسك راسه بفشله والباقين يهتزون من كتمهم لضحكهم ومن شافوا مقرن ضحك ضحكوا بصوت عالي
مقرن : بشوف للبنات امهلوني اسبوع وبنرد لكم ان شاءالله خبر موافقتهم
بداح : تيم اذا تزوجت تكفى لا تبيعني وتنساني
تيم : انت تكفى لا تبيعني وتنساني اذا تزوجت
بداح : وعد مابيعك ولا بنساك
تيم : وانا وعد مابيعك
ابو عناد : اشتروا بيتين قراب بعض نفس بيتي وبيت نياف
بداح : جازت لي الفكره
تيم : وانا بعد جازت لي
...••...
<< جورجيا >>
مايعرفون باللي صار لغيث ابو عناد رفض يوصل لهم الخبر وهم مسافرين يبيهم ياخذون راحتهم
وصلوا للكوخ دخلوا مليحه كانت خايفه من تجربه الزواج جربت اول تجربه وفشلت وتدعي ربي ماتنخذل من سلمان كانت مرتاحه جداً معه وطريقه تعامله لها وخوفه عليها كانت امنيتها شخص يحبها ويخاف عليها وربي حققها لها مع سلمان اللي راح يعوضها عن اهلها وتجربتها الفاشله بالزواج وكانت تحمد ربي ان راكان عقيم وماعندها ولد منه
سلمان يعرف بزواجها الاولي وكيف كانت خايفه من انها تعيش تجربه زواج ثانيه وتفشل بس هو حبها ووعد نفسه يعوضها عن كل العذاب اللي عاشته مع راكان وكان بسبب امها
سلمان : تعبتي من الطياره
مليحه : لا بس كنت خايفه شوي
سلمان : ليه تخافين وانا معك
مليحه انهارت وبكت  : سلمان انا اخاف من كل شيء اخاف من الماضي اخاف من فشل التجربه الثانيه بزواجي زواجي الاول دمر ثقتي بنفسي وزرع الخوف فيني انا اعتذر منك انت تستاهل وحده  احسن مني انا للحين ماعطيتك حقك الشرعي بسبب خوفي انت المفروض تعيش حياتك اجمل من انك تعيشها معي انا اعرف انك انت ماشكيت مني ولا زعلت لاني ماسمحت لك تقربني بس انا اعرف انه كل رجل متزوج جديد حقه وابسط حقوقه يعيش مرتاح مع زوجته
سلمان ابتسم وقرب مسك يدينها وجلسها على الكنبه ومسح دموعها :
أنتِ بوجهي لا تخافين دنياك
من كل ماضي خوفك لا تخافين
لو الليالي والزمان يتحداك
لا يضيق لك خاطر عسى ماتضيقين
كل الظروف اللي تشوفين تفداك
نامي على راحت يدي لا تبالين
لا يبين خافيك ولا يطلع اقصاك
وانا معك عمري اعيشه بعمرين
مليحه بكت وتجرأت انها تضمه من تزوجها وهذا اول حضن لهم
سلمان : انا ابيك أنتِ حتى لو ماعطيتيني حقوقي كلها انا ابغاك أنتِ بعيش معك أنتِ انا من اول يوم شفتك فيه بالمركز دعيت ربي تكونين من نصيبي انا من شفتك عند الحلال زاد تعلقي فيك وحبي لك زاد حبي لك من اول ماشبكتي اصابعك باصابعي ورفضتي تتركينهم انا ابيك أنتِ مابي احدد غيرك والله ان يحرمون علي بنات ادم عداك يامليحه
مليحه ابتسمت وبعدت من حضنه وقررت تعطي زواجهم فرصه وتعطي نفسها فرصه هي تحتاج الفرصه لنفسها وتعيش حياتها الزوجيه بسعاده
حاولت توقف بس سحبها سلمان وطاحت على صده وباسها وتعمق هي خافت بس استسلمت له وهو من استسلمت عجبه الوضع وابتعد من حس انها انكتمت
مليحه : وش رايك بكره نطلع ونشوف المكان اليوم تعبانه وابغى انام
ابتسم سلمان : من عيوني ابشري باللي تبينه والحين اذا تبين تروحين تنامين روحي
مليحه : حتى انت تعبان تعال معي تنام اخاف لوحدي وحنا بمكان مب امن
سلمان : انا معك لا تخافين
توجهوا لغرفتهم ينامون واول ليله لهم تمر بسلام وينام سلمان بحضنها
.....••......
<< بيت غيث >>
لحن ساعدت غيث يوقف كان محاوط كتوفها بيساره وهي محاوطه بطنه بيمينها وتساعده يمشي بخطى بطيئه وصلوا للمطبخ وعناد جفف يدينه من المويه وتوجه صوبهم يساعدها ومسك غيث ولحن سحبت كرسي وعناد ساعد غيث يجلس
لحن : عنادي يلا بتسوي التشيز وانا بساعدك بس بالتصوير
عناد : اجلسي جنب زوجك وانا بصور وبجهزه وانتم بس تابعوا كيف يتم تجهيز الذ تشيز بطريقتي
لحن : لسى ماطلعت المقادير
عناد : بطلعهم الحين
350 بسكوت دايجستف ، 100 جرام زبدة مذوبة،
الطبقة البيضاء
10 جرام جيلاتين، 300 جرام كريمة خفق، 580 جرام جبنة فيلادلفيا، علبتين زبادي ليمون 150 جرام
طبقة التشيز بالتوت
3/4 كمية مربى توت ، 100 جرام كريمه خفق، 1/4 علبه زبادي ليمون
5 جرام جيلاتين
مربى التوت
400جرام بلوبيري ، 85 جرام سكر ، 1/4 كوب مويه ، 10 جرام عصير ليمون، ملعقة ونص نشا
غيث : اخلص علينا واخلطهم مع بعض بسرعه نبي نتقهوى
عناد : وش عليك بكيفي ابغى اطول
لحن : بسرعه عنادي اشتهيته
عناد : ابشريي
الطريقة:
نجهز البسكوت ونطحنه من يصير ناعم نحط عليه الزبده ونخلطهم بع بعض ونحطه في الصينيه وعلى الفريزر 15 دقيقه
طبقه التشيز :
نخلط الفيلادليفا مع الزبادي والسكر لما يصير القوام اخف نذوب الجلاتين ونضيفه على الكريمة ونخلطهم ونضيفهم لخليط الجبنه
مربى التوت :
نحط التوت والسكر والمويه بمقلاة على نار متوسطة لما يغلي شوي نضيف الليمون والنشاء ونخلطه بموية ونضيفه عليهم ونتركه 5 دقايق ونشيله يبرد
ناخذ من مربى التوت 1/4 الكمية ونترك 3/4 الكمية على جنب نضيف نص كميه التشيز على البسكوت ونضيف نص مربى التوت عليه ونتركه 20 دقيقه فالثلاجه
واكمل اضيف كميه التشيز كلها واضيف فوقها بقيه مربى التوت وندخله الثلاجه لمده 20 دقيقه
طبقه التشيز توت :
نضيف 3/4 كميه المربى ونضيف الكريمه والزبادي ونذوب الجلاتين ونضيفه ونخلط ونطلع صينيه التشيز من الثلاجه ونضيف عليه طبقه التوت ونتركه في الثلاجه 5 ساعات او اكثر
غيث : اف خمس ساعات طيب ليه ماتسويه من قبل
عناد : عادي انتظر شوي باقي وراك صلاه العشاء وباقي نتعشى بعد الصلاه وعلى الساعه 12:00 نطلعه ونجهز السطح ونجهز الشاي والقهوة ونجيب مكسرات وفشار ونجلس نسولف للصبح
لحن : تمنيت نغم معنا
عناد : نجيبها ليش لا يمدنا 5 ساعات الحين بروح اجيبها الحين ترا بس ساعه تبعد ابها عن الديره
لحن تحمست : تكفى جيبها
عناد حط اصبعه على خشمه: على خشمي
لحن : عليه الشحم
ضحك عناد وباس خشمها وطلع ارسل لنغم تتجهز
لحن ركضت وراه قبل يطلع من الباب: اسمع كلمها بتجلسون اسبوع معنا وطمن امي لا تخاف
عناد : ان شاءالله
طلع موتجه للديره وصل على اذان العشاء نزل وتوجه للمسجد بيصلي معهم بعد الصلاة تسلم ابو عناد وشاف عناد بين الصفوف يصلي
طلعوا وهو مسك عناد من ياقه ثوبه : وين اختفيت أنت وخذيت ولدي معك وهو تعبان
عناد : والله ولدك هو اللي امرني اطلعه
نياف : وانت خبل تسمع كلامه
عناد : اللي يقوله غيث يتنفذ ولا يبه
ابو عناد : وينه جبته معك
عناد : لا
سيف : وخاطفين البنت معكم
ابو عناد تذكر لحن وضربه : وين بنتي يالمروح
عناد : مع زوجها رفضت تجي
ابو عناد : لي تفاهم معكم بس خله يرجع
عناد : ابشر بروح اتطمن على زوجتي وعيالي وجدتهم
ابو عناد : ياقليل الحياء تنادي امك كذا
تيم : شفت جدي عمي قليل ادب
عناد : لا ياشيخ لا تغلط ترا وظيفتك بين يديني الحين
تيم قرب وفك يد ابو عناد من رقبه عناد وحب راس عناد : هذي حبه عذر طال عمرك
حازم : فاتك عناد البارح
عناد : وش فاتني
سعيد : المروحين طلبوا البنات من عمي مقرن
حازم : شوف انا مصورهم وبكل ثقه الاخ تيم يقول انا موافق اتزوجك
عناد شاف المقطع وضحك : فشلتوني عند خالي
ابو عناد : وش دخلك تتفشل
عناد : قررت انا اللي بكلم خالي وبطلب يد توأمه لهم
بداح : والله انك كفو
عناد : المهم من بكره انت وياه بداومون الشركه واحد مكتبه جنوب والثاني شمال تفهمون وان جاني خبر انكم تقابلتوا بالشركه يتم فصلكم بسرعه
تيم وبداح ضربوا له التحيه وقالوا مع بعض : ابشر
عناد : ياعسكري استرح انت وياه
حازم : الله لو انكم عساكر صدق ؛ بتخرج وبقدم على العسكريه باذن الله وان شاء الله غيث اللي بيدربني
عناد : ما انصحك تكون تحت يدينه والله لو تكون ولده مايرحمك بالتدريب وبيخليك تصير متوحش
حازم : انا ابي كذا طيب
عناد : الله يوفقك يالغالي
حازم : وياك ياعمي ابغى اسير على خطاك وبدخل العسكريه
ابتسم عناد وطلعوا راجعين للبيت
دخل عناد وركضت نغم تضمه تحسب بس هو مادرت باللي دخلوا وراه
عناد من شافها تركض صوبه فتح يدينه لها يستقبلها بالاحضان ضمها بقوه متجاهل اللي واقفين وراه كان بطنها مسبب لحضنهم عائق شوي لانه كبر بعدها يمسح دموعها وقرب وجهها اكثر لوجه ناوي يبوسها بس ابوه تنحنح
وتيم شهق : ياوسخ عندك غرفه
عناد استوعب وهمس باذنها اركضي تجهزي بنروح لغيث ولحن
نغم انحرجت وركضت لغرفتهم وعناد يضحك ويصيح عليها
عناد بابتسامه : اركضي بشويش ببطنك اثنين لا تطيحين اتبهي
ابو عناد : مسوي حريص ويخاف على عياله
تيم : قليل ادب طحت من عيني
عناد : لا ياخيش اخر همي انت اطيح من عينك جعلني اطيح اكثر وش علي منك وبعدين بيتنا أنت ليه جاي
تيم : بكيفي
نياف : وخر انت وياه نبي ندخل
عناد مشى يدخل الصاله وتوجه صوب امه ضمها وباس راسها ويدها ام عناد ضمته وتطمنت انه بخير وسالته وين لحن وغيث
عناد : بيتهم يمه رافض غيث يجيكم الا من يصير طيب
ام عناد : الله يصلحه ويعافيه باسرع وقت يارب
الكل : امين
نزلت نغم ودعتهم
عناد : عاد حنا بنستأذن باخذ زوجتي لاخوها تتطمن عليه وبغير لها نفسيتها
ام عناد : انتبه لنفسكم استودعتكم الله وحب لي خد لحن واحشتني
يمه : غابت اليوم عنك
ام عناد : اشتاق لها وهي معي وشلون لاغابت عن ناظري
عناد: ابشري
...••...
وصلوا نغم وعناد ولحن كانت مجهزه كل شيء وساعدت غيث يطلع للسطح وجابت له فروته تدفيه دخلوا نغم وعناد وتوجهوا للسطح ونغم من شافت غيث بكت ركضت ارتمت بحضنه طبطب على ظهرها يهديها بعدت عنه نغم تمسح دموعها
نغم : اشتقت لك وخفت عليك
غيث ابتسم : روح غيث ليه البكى امسحي دموعك شوفيني بخير
عناد جلس جنب لحن وباس خدها : هذي وصيه من ام عناد
من جاب طاري امها بكت وضمته
ابتسم وقال : ترا حنا جيناكم بنسهر معكم اليوم وبكره راجعين لبيتنا
لحن ابتسمت ونزلت تجيب التشيز وبقيه اغراض السهره
كانوا جالسين مبسوطين وسوالف وماتخلوا جلستهم من مناقر عناد وغيث وضحك البنات اذن الفجر
لحن : يمه اذن ما انتبهنا للوقت
نغم : بصلي وبرقد
عناد ساعد غيث يوصله لغرفته ونغم توجهت للغرفه اللي نام فيها عناد قبل وصلت فرضها ونامت ودخل عناد للغرفه وتوجه صوب الحمام << يكرم القاريء >> وتوضى وطلع يصلي وبعد الصلاة قرأ اذكراه وحصن نغم بقلبه وتوجه لسرير ينام تعبان ماذاق طعم النوم من دخل غيث المستشفى وحتى من طلعوا من المستشفى مانام الا ساعه وحده بس وصحى بسبب كابوس مخيف
.....••.....
مر الشهر جرح غيث بدى يطيب شوي شوي بس باقي يوجعه واي حركه قويه يخلي جرحه ينزف غيث بسبب حركاته القويه واكثرها بسبب عصبيته ماينتبه لجرحه تسبب بجرحه يطيب ببطىء لانه يتسبب بفتح جرحه واكثر من مره يجي عناد و ياخذه للمستشفى يخيطون الجرح ويرجع ينفتح بسبب اهمال غيث وحذره الدكتور اذا رجع جرحه ينفتح وينزف بيتعرض لشلل نصفي ؛ يقدر يمشي بس مب مثل قبل يقدر يركض الحين مايقدر يركض او يمشي بخطى سريعه خطاه بطيئه لحن من خبرهم الدكتور انه اذا رجع جرحه ينزف وتنفتح غرزه واحتمال يصير له شلل نصفي خافت اكثر ومنعته من الحركه وضلت تراقبه وتحرص عليه اكثر
وصلته رساله من عمر وكان غيث يراقب تحركات عمر وعرف كل معلوماته وامر عناد بعدم التدخل بقضيته وعناد لبى طلبه
انصدم غيث من عرف انه ولد غلاب كذب عليه غلاب من خبره ان ماعنده عيال وعنده عمر بس كان مخبيه وتذكر كلام غلاب من همس باذنه بانه راح يجي من ياخذ حقه منه وينتقم منه
< فلاش باك >
باليوم اللي يتم قصاص غلاب فيه وقف غيث قباله وهمس غلاب باذنه
غلاب : لا تستانس بموتي صدقني راح يجي من بياخذ حقي منك ومن عناد وبينتقم منكم
غيث ابتسم بسخريه وكانت ابتسامته مستفزه لغلاب : تحلم واجد الظاهر انت الحين بدل من تنطق الشهاده جاي تهدد المفروض انك تنطق الشهادة لان مافيه احد من نسلك بينتقم لك ياغلاب
غلاب : بيجي اليوم وبتشوف بعينك وتذكر كلامي زين صحيح ماعندي عيال بس بيجي اليوم اللي بتندم فيه
غيث : دايم ترعد ماشفنا مطرك
غلاب : بتشوفه قريب جهز قبرك جنب قبري
غيث تجاهله معتقد انه يكذب عليه ومن قهره قال كذا ومشى وتركه
< انتهى >
محتوى رساله عمر : اقابلك بالمكان ذا لوحدك اذا انت رجال تعال لوحدك لا تجيب عناد معك
غيث : انا رجال من قبل اعرف اشكالك و اقدر اجيك لوحدي لاني واثق بربي وما احتاج أحد يحميني غير ربي بس انت خلك انسان لا تصير ثعلب مكار وتعال لوحدك
عمر : لا تخاف اللف والدوران بس عندي
غيث : لعبتك المكر واللف والدوران
عمر : تعقب وانا ولد وسكت
غيث ابتسم بسخريه : غلاب اللي مخفي هويتك كملها.
عمر ارتبك والغبي يبي يجحد انه مب ابوه بس قال بصدمه : وش معرفك اقصد لا مب ابوي
غيث ضحك بسخريه اوضحت لعمر : تراني اعرف كل شيء عنك من ولادتك لين مكانك اللي انت تكلمني منه الحين وانت اللي كلم زوجتي وراح تتحاسب على الكلام اللي قلته لها وانت من كان يبي يقتل اخوي
عمر ارتبك لانه عارف كل شيء عنه ومكانه يعرف وينه : ضحكت بلا سنون انتظرك
غيث تجاهله ورمى جواله ووقف ولبس بنطلون اسود وهودي اسود وحط القبوع على راسه وسلاحه بخصره لانه متوقع الغدر منه
قرب صوب السرير وغطاها زين باللحاف وباس راسها وتعمق ببوسته وطول شم ريحتها اللي تاسره وتجذبه اكثر وتغرقه ببحور عشقها استنشقها
وطلع من عندها تاركها لوحدها بالليل بظلمة البيت ووحشته توجهه للمكان ودله الموقع لمستودع قديم ومافيه احد ابد غيث كان ماخذ احتياطه ومتفق مع الفريق والفريق محدد موقع غيث عن طريق جهاز مركبه بسياره غيث وتوجه الفريق وكم عسكري للموقع ويراقبون غيث من بعيد لانهم حاسين بان عمر راح يغدر بغيث
الفريق والعساكر تحركوا بكل خفة وحاوطوا المستودع وفعلاً عمر كان مخلي كم رجال يحاوطون المكان عشان اذا جاء غيث باشاره منه يمسكون غيث والفريق والعساكر قدروا يمسكونهم ويسكرون فم كل واحد منهم عشان ماتخرب خطّتهم وتنكروا بملابس رجال عمر ولبسوا الاقنعه وصاروا مكانهم ورجال عمر مغمى عليهم بعد ما ضربهم الفريق بسلاحه خلف رأس كل واحد منهم بقوه مما ادى بإغمائهم
دخل غيث المستودع وعمر كان متخبي وراء برميل وماسك بيده عصا ومن شاف غيث معطيه ظهره وقف وبحركه سريعه ضربه بالعصى مكان جرح الرصاصه مما ادى بنزيف الجرح توجع غيث وطاح على ركبه بسبب وجع ظهره قوى نفسه و قدر يوقف ولف بحركه سريعه وعطاه لكمه على فكه طيحته على ظهره وغيث مسكه من ياقته وقفه ورجع لكمه على بطنه وعمر توجع ورجع لورا وتقدم يرجع اللكمه لغيث رجع غيث لورا وعمر طلع من جيبه سكين صغيره وتقدم لغيث وجرح رقبت ؛
غيث سحب منه السكين بحركه سريعه ادت بجرح كفه ورماها بعيد ورجع يضرب عمر متجاهل وجع ظهره عمر صفر بصوت عالي لرجاله دخلوا مفكرهم رجاله دف غيث وامرهم يمسكونه لكن الفريق تقم لعمر وضربه بسلاحه خلف راسه وطاح مغمى عليه وشالوه العسكر رموه بالدورية
الفريق توجه صوب غيث وربت على كتفه : احسنت ياعميد قدرت تقبض على اكبر تاجر مخدرات
غيث : واجبنا يافريق حمايه الوطن وتنظيفه من اشكاله
الفريق : ارجع لبيتك ولزوجتك وقبل تروح للبيت مر اقرب مستوصف وضمد جروحك تفهم
غيث : امر ولا طلب
الفريق : امر تفهم
غيث : ان شاء الله
غيث تجاهل كلام الفريق وركب سيارته طلع الجهاز الصغير ورماه ودعس عليه بالسيارة راجع للبيت
وقف السياره ونزل وضرب البرق وميض ضوءه بالسماء وانتشر صوت الرعد القوي ونزل المطر من بعدها بغزاره وقال : سبحان اللذي يسبح الرعد بحمده والملائكه من خيفته ؛ اللهم صبيا نافعاً
ودخل للبيت وتوجه لها يبي ينام بحضنها حتى جرح ظهره متجاهل وجعه دخل الغرفه وشافها صاحيه تتأمل السماء والمطر من البلكونه وخايفه من البرق والرعد وقف وراها وحاوط بطنها بيدينه وشاف ان بطنها كبر بشكل من الحمل وسحبها لصدره يضمها لصدره
لحن بعتاب : وين رحت وتركتني لوحدي خايفه
غيث : كان عندي شيء مهم ومن خلصت منه جيتك ركض
لفت ودفنت وجهها بصدره بخوف وبكى : تخيل صحيت خايفه من صوت البرق والرعد وما شفتك عندي خفت اكثر
غيث : لا تخافين انا هنا معك
لحن : لا تتركني طيب
غيث : من عيوني
سحبها يدخلها من البرد وشغل الضوء يبيها تغير ملابسها وتلبس شيء يدفئها ، لف بخوف من سمع صوت شهقتها وتوجها صوبها
غيث : وش فيك لا تخوفيني
لحن : من مسوي فيك كذا وش سبب الجرح اللي برقبتك
غيث : كيف شفتيه حاولت اخبيه عليك
لحن : مايخفى شيء علي
جلسته على السرير وطلعت من الغرفه تجيب حقيبه الاسعافات جت وانصدمت من شافته مفسخ ومستلقي على بطنه
غيث : دام بتعالجين رقبتي عالجي ظهري معه
لحن : ياخي انت ماترتاح الا من يصير بجسمك علامه جرح رصاص او سكين ماتتوب انت
غيث : انا زوجك مب اخوك
طنشته وجلست من الجهه الثانيه من السرير وتربعت بتعب من كرشها مقابله ظهره تامل حركتها وابتسم
غيث بضحكه : مهما تكبرين مستحيل تتركين حركاتك
لحنّ بدأت تعقم له جرحه وترجع تضمده من جديد : مثل وش
غيث : طريقتك بالتربع ومن تعقدين حواجبك وقت تكونين جديه ومتربعه
لحن فككت عقده حواجبها و وجهت نظرها لحركتها كيف متربه وابتسمت : احبها من صغري طيب متعوده على حركتي ذي
غيث : صارت تروقني دايم اجلسي كذا
لحن : بشتاق لها انا الحين بالشهر الخامس بطني برزت بشكل واضح وانت تبيني اتربع دايم بكتم نفسي
غيث : خلصتي
لحن : اي
جلس مقابلها وتربع هو بعد ولحن قربت تشوف جرح رقبته وبدات تنظفه وتعقمه وتضمده وهو يتاملها وكيف عضت شفايفها من حست عليه طول يناظرها
لحن رفعت كفها تلف وجهه للجه الثانيه تبعد نظراته عن عنقها
ابتسم من حركتها ومسك كفها وباسه خلصت ومسكت كفوفه تشوفهم سليمات وشافت جرح باطن يده
لحن : كنت حاسه والله راح تصير جراحك قصص عيالنا انتظر بس يجون وبعلمهم
غيث ابتسم وحنى راسه وباس بطنها ولحن عقمت جرح يده ولفتها بالشاش وباستها 
غيث عدل جلسته وانسدح وسحبها لحضنه وضمها وناموا بعد تامل صوت المطر القوي وكل مايضرب البرق وصوت الرعد تفز بخوف وغيث يضمها لصدره اكثر وغطى اذنها بكفه عشان ماتسمع الصوت وناموا
صحوا الصباح وتجهزوا راجعين للديره بعد ماحس غيث انه صار طيب ويقدر يمشي احسن من قبل
....••...
كانوا يفطرون وسمعوا صوت سياره دخلوا غيث ولحن وهم ماسكين يدين بعضهم وغيث يساعدها ويضحك على حركاتها ماسكه ظهرها بيدها والثانيه على بطنها وتمشي مثل البطريق  وقفت ام عناد ركضت تضمهم اثنينهم وبكت
ام عناد : يامرحبا يامرحبا تراحيب المطر يامرحبا والقلب اوسع من الدار يامرحبا تراحيب كبار الذ من در البكار يامرحبا ترحيبه اللي ينتظر له غايب وابتهج صدري بعد طول الدهر والمده مرحبا ينطق بها لساني ولسان حازم مالها قدر محدد بالعدد والعده ارحبوا والله انه نور صدري وابتهج من شافكم يامرحبا نورت الدار والديره وضلوع صدري
عناد وقف وراها : اف يمه كل ذا شوق لهم
ام عناد تمسح دموعها : واكثر ياعناد قلبي من راحوا وهو واجعني واطلبك تاخذني لهم بتطمن عليهم ترفض
لحن بكت وضمت ام عناد ودفنت وجهها بصدرها اكثر ورفضت تبعد عنها وام عناد شدت اكثر على لحن وبكت وهي بعد رفضت تتركها
ابو عناد ضم غيث ونزلت دموعه
غيث : افا ليتني مت قبل اشوف دموعكم تنزل بسبيي
ام عناد بعدت عن لحن وضربته : بعد عمر طويل اتفاول على نفسك ليه
غيث : جعلني ما خلا منكم يمه
ابو عناد : ان اختفيت ثاني مره وخذيت بنتي معك لي تفاهم ثاني معك تفهم
عناد ضم غيث وبعد وضم لحن ورفض يتركها ونغم وقفت بتعب وتمشي مثل البطريق وصلت عنده وضمته وبكت
نغم : طولت شهر ياظالم بدونك اشتقت لك وتعبت من السياره
ورفضت اجيكم
غيث : خلاص امسحي دموعك انا جيت وباذن الله ماعاد ابختفي
عناد : وش صار قدرت تمسكه
غيث : لو ماقدرت امسكه ماكنت جيتك
عناد : ليه رفضت اساعدك
غيث : تبيني اشوفه يقتلك قدامي معصي ذا مريض نفسيا وعنده الغدر مثل شربه المويه
ابو عناد : اجلسي يبه تعبتي من الطريق
لحن كانت ضامه نغم وتبكي ونغم تبكي ما انتبهت ان ابوها يكلها
نغم : لا تتركيني مره ثاني طول يومي طفشانه مشتاقه لك
لحن : أنتِ بعد والله اشتقت لك
نغم : الحين حنا صدق بالشهر الخامس
لحن : تصدقين مب مصدقه
نغم لفت لعناد : عناد كم باقي واولد احس طولت ونسيت حسبه البارح
عناد : اربع اشهر بس باقي وبتولدون بسلام ان شاء الله
لحن : امشي نروح للمطبخ اشتهيت عصير
نغم : قدام
فسخت عبايتها لحن ورمتها لغيث ياخذها معه لغرفتهم ومشوا ماسكات ظهورهم وبطونهم ويمشون مثل البطريق ودخلوا المطبخ غيث وعناد يناظرونهم ماسكين الضحكه ومن اختفوا انهاروا ضحك على طريقه مشيهم وقصار بعد شكلهم يضحك
ام عناد ابتسمت : اسكتوا لا يسمعونكم بيزعلون
غيث : ابشري
طلع غرفته وعناد جلس مع اهله يسولفون ونزل غيث وشاركهم وانتهى يومهم بالضحك والسوالف ومايخلوا من دموع البنات