أنت العوض لا صارت حظوظي شحاح وأنت الهنا ياغايتي والغنايم

Part18

وهل تظنين أن البعُد يقتلني
وأنّ قلبي لا يقواكِ مفرداً
وأنا التلاشي واللاشيء فانتبهِ
أنا الوجود ، وكل الناس لا احدً .
.
.
<< بيت ابو عناد >>
ابو عناد : ادخل ياشيخ حياك
الشيخ: الله يحييك ناد لي غيث والعيال اللي كانوا معه يمسكونه
ابو عناد : ابشر
توجه للبيت يناديهم الوحيد بالديره بيته فله كبيره  ابو عناد وكبير بالحيل
ابو عناد : عناد رح ناد غيث والحقوني لمجلس الرجال وانت نياف تعال معي
نياف : ابشر يبه
عناد توجه لغرفة لحن ينادي غيث وابو عناد ونياف توجهوا صوب المجلس دخل عناد وراه  وسلم على الشيخ وغيث وقف عند الباب غيث من عرف انه شيخ هبط قلبه وخاف تردد يدخل في احد يقول له اطلع لا تدخل لا تجلس معهم كان يحس بضيقه وكتمه على صدره وصداع يجبر عيونه ترتخي وشيء يقول له اطلع لا تجلس معهم
غيث : انا بطلع تبون شيء
ابو عناد غمز لعناد ونياف يمسكونه وفعلاً هجموا عليه كلبشوا يدينه ومسكوه جلسوه غصب ماقدر يتحرك
غيث بصراخ مرعب ويدينه وجسمه كلها ترجف : اتركوني بطلع وش تبون فيني
البنات وام عناد سمعوا صراخه المرعب وخافوا طلعوا روسهم من الشباك الكبير المطل على مجلس الرجال يشوفون وش فيهم البنات يقدرون يشوفون الرجال اللي بالمجلس بس اللي بالمجلس مايقدرون يشوفون البنات
غيث بصوت فحيح ومخيف: اتركوني
عناد : تكفى ياخوي عشان مصلحتك طلبتك اثبت
الشيخ بدا يقرأ عليه وغيث يصارخ صراخ مرعب
ابو غيث دخل ومن سمع صراخ ولده ارتعب وركض عندهم يمسكه مع العيال يثبتونه لانهم اثنينهم ماهم قادرين يثبتونه لكن فجأة طاحت يدينه ويتنفس بقوه ويلهث وبدا يتكلم بصوت مرعب : اتركوني اتركوني
الشيخ بدا يتكلم معه والعيال وسيف مرعوبين وابو عناد اللي يبي يعالج غيث باي طريقه لان نهايه التعب اللي يعيشه موت محقق البنات وام عناد مرعوبين من غيث وكانوا ماسكين ام عناد ضامينها ويبكون وام عناد ضامتهم وتبكي على حال ولدها اللي تغير ( ام عناد تعتبر غيث ولدها لانه صديق عناد ولد حوراء هي تحبه وتخاف عليه من حبها لولدها وخوفها عليه وزاد حب غيث بقلبها من تزوج لحن وضحى بنفسه عشان عناد )
كان الصوت المرعب يصرخ والشيخ يصرخ : اطلع اطلع
وهو يصارخ : بطلع بطلع بس خلاص لا تقول شيء اسكت
بدا جسم غيث يهتز ويرتجف وفجأة سكن وابعد الشيخ وهو يقول : الحمدلله طلع
سيف : وش فيه ولدي ياشيخ ماكان فيه شيء
الشيخ : اللي توقعه ابو عناد صحيح كان معمول له عمل او سحر بقصد الضرر لعقله او الزواج من اللي سحرته لكن الحمدلله انه ماتعمق فيه للان لان غيث كان يقاومه بأذكاره وصلاته وظاهر لي ان غيث محبينه واجد يحصنونه دايم الحمدلله طلع منه لكن يبي له كم جلسه ثانيه وباذن الله مايعود له
ابو عناد : الحمدلله
نياف : طيب ياشيخ عرفت من ساحره وهل هي زوجته اللي طلقها البارح؟ وش يبي منه وش غرضه من اذيه غيث ؟
الشيخ : ننتظر غيث يصحى واعلمكم
بعد شوي صحى غيث يناظرهم وهو طايح بينهم وراسه على ركب عناد فز وجلس يناظرهم بتشتت يحاول يتذكر اللي صار له بس ما يتذكر اي شيء الا دخوله المجلس وغيره مايتذكر شيء وقف ولف لعناد
غيث: وش جاني ياعناد ؟ وش صار هنا ؟
عناد : ماصار شيء ياخوي وتقدم صوبه وضمه ونزلت دموعه بس مسحها بسرعه قبل احد ينتبه لها مايبيهم ينتبهون
بادله غيث الحضن : انا ليه كذا ياعناد
الشيخ : تعال اجلس ياغيث وبعلمك
جلس غيث بتسائل للي حصل له وهو مرتاح يحس ان فيه شيء كان ضاغط على راسه واختفى قدر يشوف زين ويسمع صوت صافي بدون الازعاج اللي كان يحسه  براسه وجلسوا كلهم
قال له الشيخ كل اللي حصل له وغيث مصدوم ومذهول باللي حصل له ومين ساحره وليه ! وش غرضه من سحره
وقال بضيق : من اللي سوا فيني السوات ذي !
الشيخ ناظر ابو عناد وهز راسه بالموافقة يعلمهم : بنت عمك منصور
سيف انصدم وانذهل ليه تبي تضر ولده وش مسوي عشان تظره بالسحر وش بتستفيد بضرها لـ ولده
ضحك غيث يسخريه عرف سبب زواجه من سما كان خطه منهم عشان يتزوجها
وقف الشيخ وعطى غيث علبه مويه مقري عليها وقال له يقرأ اذكاره يحافظ عليها وعلى صلاته ولا يترك القران وطلع
غيث : عناد لازم نمسك الساحره اللي سحرتني
عناد : بس كيف
غيث : عن طريق سما
عناد : تهقى تساعدنا
غيث تذكر كلام سما بالمستشفى قبل يطلق : تذكرت ياعيال سما قالت لي من اول بس ماسمعتها زين وما اهتميت لكلامها
نياف : وش قالت ؟
غيث : قالت لي ان سبب الصداع بسبب سحر واللي ساحرني مليحه وهي تعرف مكان الساحره
عناد : وليه ما علمتنا
غيث :نسيت ؛ طلع جواله وفعلاً حصل رساله من سما مرسله موقع الساحره وفز
عناد : بسم الله وش فيك
غيث : عرفت المكان سما مرسله لي الموقع من البارح
قم ياعناد نتجهز يالاستخباراتي
سيف : وين ان شاءالله ياعميد
ابتسم غيث : الوطن ينادينا ولازم نلبي طلبه ونحميه اللي سحرتني بتسحر غيري
عناد : هيه خير لا تحتك بوطني
غيث : مب وطنك يالمروح وطنا
دخلوا البنات وام عناد يصيحون وركضوا كلهم الثلاثة لغيث يضمونه
غيث استقبلهم بكل صدر رحب وابتسم على حركتهم
بعد ما هدوا من بكاهم
ام عناد : اقول وخروا عن ولدي كتمتوه يالدبتين  ابعدوا ولدي لي
لحن بعدت من حضنه : من زينه خليه لك انا بروح لعضيدي حضنه اجمل ، وتوجهت لعناد تضمه
نغم : اي صح خليه لك انا بروح لابوي عيوني بضمه مشتاقه له ، توجهت لابو غيث سيف
سيف : ياحيها ارحبي ياروح سيف وطوايفه
عناد يخز غيث يقهره : يازين حضن لحن عناد ووطنه
غيث : يمه شوفي عناد
ام عناد : عناد اترك عنك الحركات اللي مالها داعي
نياف : انا استاذن بروح للدوام
عناد : مسكين مداوم اربع وعشرين ساعه
نياف : الدوام للنشامى عوايد والنوم لكلا***ب الضحى يالسلوقي
عناد مسك علبه مويه بيرميه بها بس نياف هرب وهو يضحك
عناد بصياح يسمعه نياف : قصدك لاني استخباراتي وولد حازم اجيهم وقت الضروره وقت هم ينادوني
نياف بضحك مدخل راسه من الباب ويضحك : لا ياشيخ هد اللعب تراك ماتحركت الا من انخطفت لحونه اخت الدكتور نياف
عناد رماه بالعلبه جت بالباب : تقلع بس قال اخت الدكتور قال
لحن : اي اخته عندك مانع
غيث : موانع ست لحن
ضحكوا كلهم وابو عناد يدعي لهم ربي يصلحهم ويهديهم
عناد : امش مو قلت نروح نمسكها عجل علينا
نغم شالت نقابها: وين بتروحون ؟
عناد ضل يتاملها ونسى من وجودهم وقرب سحبها من عند عمه سيف وضمها
نغم خافت وتوترت وانحرجت من حركته
لحن تصفق ومن انتبه على نفسه ابعد وناظرهم : وش فيكم
سيف ضحك : لا الحمدلله الحين تطمنت على بنتي زين
غيث جلس وقال : بنروح نمسك الساحره
لحن وقفت قدامه وضلت تحصنه وهو مبتسم ونغم تحصن عناد وتوجهت لحن لعناد تحصنه ونغم لغيث تحصنه
ابو عناد : وحده تكفي طيب
لحن : لا عشان نتطمن ان ثنتينا حصنتهم
وقفت ام عناد وسحبت عناد وجلسته قرب غيث وحصنتهم اثنينهم وقالت : اقروا اذكاركم
ابو عناد : وش فيكم أنتم انهبلتوا
ام عناد : عشان اكون متطمنه وقلبي مرتاح تحصين بناتك لك عليه يحتاج له تحصين
شهقوا لحن ونغم وضحكوا عليهم الباقين
لحن : عشان يصيرون بحفظ ربي والساحره تشوفهم دبل تحصين
غيث : كيف دبل تحصين
نغم : يعني ياخوي تخاف منكم لانكم متحصنين ثلاث مرات
ام عناد : اي عفيه على بناتي
عناد همس لغيث : خلنا نطلع قبل ننهبل
غيث بنفس الهمس : والله انك صادق امش
لحن : وش تتهامسون به
غيث : نقول الله يعيننا عليكم ويصبرنا بس انتم انهبلتوا
نغم : لحن اسحبي عليهم ودقي على القاطعه تجينا ونكلم البنات الباقين يجونا بنجلس بالجلسه ونتامل الورد
لحن : اي ونجلس لليل ونتامل القمر
عناد : انا عندكم هنا وش تبون بالقمر تتاملونه وانا موجود
نغم بحماس : والله انك اجمل من القمر
عناد : شهاده اعتز بها من حرم عناد
استوعبت وطلعت ركض من المجلس وهم يضحكون عليها وتبعتها لحن وغيث وعناد طلعوا وتواصلوا مع سلمان يتجهز ويقرأ اذكاره
وضل ابو عناد وسيف بالمجلس يسولفون وينتظرون صلاه العصر ويتجمعون كلهم ببيت ابو عناد منصور واهله ومسعود واهله وتقي واهله  وسيف كلم ايهم يجيب امه 
-
<< بيت غالب >>
فكر يطلع من البيت ويهرب يختفي تعب من انه يكون حبيس مكتبه
رفعه دخلت الغرفه وشافته يدخل ملابسه بالشنطه : وين بتروح ؟
غالب : مو شغلك
رفعه : غلاب وش اللي مب شغلي وين تبي تهرب وش مسوي بعد
غالب : انا مو قايل لك تنسين اسم غلاب انا الحين غالب مب غلاب تفهمين
رفعه : ماقدرت انسى طيب
غالب : بتنسين راح تنسين والحين بروح للمدينه اسبوع وبرجع تفهمين
رفعه : بعد الصلاه بنروح لبيت حازم
غالب : بقلعتك طسي للمكان اللي تبينه ، وطلع من البيت بكبره
رفعه : الله يرحمك ياغالب مت وتركت لي بلوه بعدك وانا شاكه بموتك وبضل بحقق مع غلاب حتى اعرف سبب موتك
-
<< بالمركز >>
كان غيث وعناد يخططون لطريقه يقبضون عليها وكانوا خايفين
غيث شارد الذهن ويضرب بالقلم على المكتب سبب ازعاج لعنادو سال عناد سؤال بعيد جداً عن قضيتهم : عناد تتوقع علاقتي بلحن راح تزين ؟
عناد : وش السؤال ذا الحين ؟ وبعدين اترك القلم ازعجتني
غيث : مدري بس جاوب
عناد : لا لاني انا بخربها
غيث اخذ القلم ورماه عليه : انقلع ياخي انت مناشبني حتى براحتي
عناد : انت اللي سالتني طيب !
غيث : انا الغلطان لأني سالتك
عناد ضحك : لا تخاف بتزين انت ادع ربي ييسرها
غيث : اذا ابتعدت انت بتزين حياتنا
عناد : مايحتاج لحن بتذبحك اذا ابعدتني عنكم يابو عناد
غيث : حتى ولدي بتناشبه باسمك
عناد : طبعاً امه بنتي وانا عمه ولحن قالت اول ولد لها بتسميه عناد
غيث : يصير خير
دخل سلمان وضرب لهم التحيه : كل شيء جاهز ياعميد
ابتسم غيث : مشينا
عناد : توكلنا على الله
توجهوا للمكان وكان مهجور ومافيه الا كم بيت بس والمكان مخيف حاوطوا المكان وشافوا الساحره طلعت من بيت وناويه بالهرب بس ماقدرت لانهم قدروا عليها وحاصروها من كل مكان
غيث : وقفي مكانك تراك محاصره من كل مكان ماتقدرين تهربين
الساحره ابتسمت بخبث : اوه غيث مشرفنا بس مسرع تشافيت ولا زوجتك اللي محاصرتك من كل مكان وتحصنك هي اللي عالجتك
غيث ابتسم من طارب لحن : الله يخليها لي لا تجيبين طاريها على لسانك تفهمين
الساحره : تصدق عندي صوره لها كنت ناويه عليها بعدك بس ماقدرت حاولت اكثر من خمس مرات وماقدرت مادري وش السبب بس الظاهر علاقتها قويه بربي محافظة على اذكارها هي ؟
عناد : بنت عناد ماتقدريت توصلين لها تفهمين
الساحره نزلت للتراب بتاخذ منه تبي تعميهم ورمت التربه عليهم بس ماجاهم شيء وقدر غيث يمسكها ورجعوا للمركز ودخلوها غرفه التحقيق وكان عناد اللي يحقق معها رفضت تتكلم وتعترف بجرايمها
عناد يناظرها ببرود وساكت بس يناظرها وهي بتنجن من بروده ضل اكثر من ساعه ساكت ويناظرها
الساحره بصياح : شيلوا الثلجه ذا من قدامي
ضحك بسخريه : اعترفي بجرايمك وبطلع
سكتت
وغيث وسلمان وسلطان يناظرونهم من الزجاج الفاصل بينهم
سلطان : يابرود عناد ياناس عرفت الحين سبب قرار الفريق وانهم مايستدعون عناد الا وقت الضروره وقت يبونه يحقق مع مجرم غاثهم
ابتسم غيث ودخل الفريق خالد : بشروا تكلمت الفريق اول مزعجني يقول تكلمت
ابتسموا كلهم من سمعوها تغرد بكل جرايمها
سلمان ابتسم : هذي نتيجه بروده ياسلطان
سلطان : اشهد انه كفو لو مكانه صفقتها تتكلم
بالغرفه التحقيق :
الساحره طقت كبدها من برود عناد وقررت تعترف : خلاص بتكلم
عناد ببرود: غردي
تكلمت الساحره بكل جرايمها وتم سجنها بسجن انفرادي حتى تتم محاكمتها ويشوفون وش بيصدر حكمها
عناد ابتسم ووقف قبل يطلع قال : احس بتموتين توبي لربك
خافت الساحره وطلع عناد بتعب
عناد : الله ياخذها تعبت مارضت تتكلم الا بعد طلعه روح
غيث ربت على كتفه : بس قدرت تخليها تتكلم كفو عليك
عناد ببرود : تسلم ياخوي
سلطان : ياخي بسالكم انتم حتى ببيتكم كذا باردين مع اهلكم
عناد : البيت معي وطن عناد تقدر عليه تذوب حصونه
غيث : امش نرجع تعبت وصارت الساعه 10:30 بالليل وحنا هنا من قبل العصر
طلعوا وركبوا سيارة غيث وشغل غيث شيله وضل يغني معها وتذكر اول ماتزوج لحن ومن شاف شعرها وغنى لها من يعلم مستريح الريح عن فوضى شعرها
وصلوا وقف غيث ويبغى يقهر عناد وقبل ينزل قال : اشهد ان كل كلمه توصف لحن غيث ، نزل ومن نزل عناد معصب قفل السياره وركض يدخل للبيت ماكان عنده معرفه بالموجودين عمامه وزوجاتهم وعيالهم كلهم متجعين بالحوش
عناد عصب وصارخ : يا****  انا بكسر راسك
غيث يضحك ومسك ثوبه من تحت رفعه ويده اليمين ماسك شماغه ويركض وعناد رفع ثوبه ويركض وراه وشماغه على كتفه ومعاه عجره اخذها من عند الباب
وقف بنص الحوش وهم من شافوهم وسمعوا صوت عناد سكتو
غيث مبتسم ويغني يقهر عناد ويرقص اول مره يشوفونه يرقص ومبسوط شخصيته المرحه ماتطلع الا قدام عناد بس
كل مالدت علي البال والعقد يخرزها *** قلت انا ماني خويٍ عادته ينسى خويه
ليتها تدري وعقد الماس لو يدري عذرها *** اشهد ان الجمره اللي في الحشا مني وفيه
عناد هبده : اسكت لا تكمل يرحم لي اهلك
الكل مصدوم من تغير شخصيته ولحن مستحيه عرفت انهم يتكلمون عنها
غيث بعناد يقهره : جادلٍ كل الدروب المشبعه تنبت بثرها *** جت تبي جرح وقصيد وخلت الثنتين ليه
من يحدثني حديث الثلج للجمر بثغرها ** والله اني كنت ناوي لي بهاك الجمر نيه
من نشد هاك الوساع الخرص عن دنيا حورها *** وش جمع سحر الغموض بسودها والنرجسيه
الوكاد اني بشط الكحل غنيت ببحرها *** ماحلا هوسة هدبها والمساء والسامريه
عناد : انت بتسكت
غيث : اسمع
وكمل يهز بكتوفه ويدور ومع كل لفه يغمز لعناد
لحن غيث اللي مساء البارح وانا سيد سهرها *** اقبلت مثل البياض وودعت مثل الخطيه
المساء ضج بسوالف عطرها واشعل سفرها
والعروق اللي روت مسيارها خضر ونديه
مانشدت اخت المهاه ليامتى حزه خدرها
حد علمي يوم امد لجيدها شرهة يديه
عقدها المغرور ياعناد تاه بعطرها ولا نحرها
ساعةٍ اشره عليه وساعةٍ يشره عليه
عناد : ي**** ماخليت شيء ماوصفته ببنتي
ضحك غيث : اف ياعناد والله انها كل مالدت علي البال والعقد يخرزها *** قلت انا ماني خويٍ عادته ينسى خويه
من سرت يمي وانا مال خيار الا قدرها *** كنها كل السنين المقبله والاوليه
من غدت همي وانا مالي ديار الا ديرها *** جالها بين الظلوع الظاميه روحه وجيه
عناد مسكه من ياقته : خلاص تراك فليتها عاد
غيث ابتسم وخر كف عناد : اسمع هذي لحرم غيث اشهد انها بكل كلمه انها المقصوده ياويل قلبي بس
من يعلم ياعناد مستريح الريح عن فوضى شعرها
الحرير اللي كسى هاك المتون العسجديه
علموه ان ما زاح الغره ونشد عن قمرها
لا يخاف ان شاف له ضلمه وشاف الشمس حيه ياعناد
تخيل ياعناد حتى بوصفي لشعرها ماكذبت
كان يغني ويهز بكتوفه ويدور ومع كل لفه ما انتبه عليهم واخر لفه انتبه ووقف منصدم
الكل مبتسم ويسمعون صوته وبعضهم مصدوم من جمال صوته ولحن مستحيه لانه كان صريح بكل كلمه قالها والبنات يضحكون عليها
عناد ضحك من تغير وجه غيث : الحمدلله ربي اخذ حقي منك تستاهل اسكتك ماتسكت
غيث رجعت ملامح وجهه للبرود وعدم المبالاه وسلم عليهم كلهم وجلس قرب ابوه
تيم يصفق ويضحك : الحمدلله شفت غيث طايح على وجهه
بداح : والله ان اختي كفوو ذوبت قلبه الحجر
عناد : متى صارت اختك
تيم : اخته لانها اختي صح بداح
بداح : اي صح
لحن بزعل : انقلعوا ماني اختكم اثنينكم ومن الحين اقطعوها ومافيه واسطه تنقذكم من غيث وعناد وبعد غيث وعناد اهبدوهم تراهم مزعليني
تيم بلع ريقه بخوف : وش مسوين لك الله يهداك
بداح بخوف : لا تكفين علمينا وابشري بالرضاوه بس من وش زعلانه وش اخطينا فيه ؟
لحن : اجل انت وياه تلعبون بعربه الاسمنت وماتعلموني العب معكم
تيم : بس هذا اللي مزعلك ابشري بها وانا اخو لحن
ابتسمت لحن وفزوا تيم وبداح يجيبونها
لحن فزت وصفقت بحماس ونغم واسيا يبون يشاركونها
لحن : تكفينا حنا الثلاثة؟
تيم : من معك ؟
لحن : نغم واسيا
تيم : اهاه قولي الشله العطاله الفاسده اللي فاضيه اربع وعشرين ساعه وبعرفكم
بداح ضحك : اي تكفيكم يالسنافر
لحن بصياح : عننننننناااااادد شوفهم
فز عناد وصفقهم احترموا نفسكم انت وهو تقولون عنهم كذا
تيم : انا اعرفهم كذا لانهم من يجتمعون يرعبون وتخيل انهم كاشفين حسابات كل الديره ويعرفون كل صغيره وكبيره عننا مب بشر ذولا مب بنات صدقني
لحن انقهرت وضربت كتف غيث بخفيف التفت يناظرها وطاحت عيونه بعيونها وشوي وتبكي من القهر
غيث : سمي واطلبي وش بغيتي
لحن تاشر عليهم : خذ حقي منهم تكفى
غيث ابتسم : ماطلبتي شيء وانا ابو عناد
ابتسمت لحن : كفو يابو عناد
ضحكوا عليهم وفز غيث يربط ثوبه على خصره ويتلثم بشماغه وشمر اكمام ثوبه وركض ورهم حتى مسكهم وسحبهم لعندها
غيث : اعتذروا من حرم غيث وروح غيث وحرم نياف بسرعه
تيم : حرم نياف معروفه النشبه اسيا بس روح غيث هي نفسها حرم غيث ولا لا ؟
بداح : روح غيث نغم اخته يناديها روح غيث
تيم : اها قصدك عمتي نغم
عناد ضربه على راسه : ولد
بداح : اجل وش تبيه يقول مو انت عمه وزوجها خلاص تصير عمته
عناد شمر اكمام ثوبه : انا اوريكم زوج عمته وش بيسوي فيكم الحين
نغم : حي عينك تكفى العن خيرهم طلبتك ابيهم اسبوع مايتحركون من الوجع
عناد ابتسم بخبث : ماطلبتي شيء ياحرم عناد وام غيث
غيث ابتسم : اقعد بتسمي علي
عناد : اجل تبي بس انت اللي بتسمي ولدك عناد تعقب تصير اكرم مني واطلق مني
غيث : ماله دخل الكرم باسامي عيالنا
ابو عناد يضحك عليهم وابو غيث : ياعمي الظاهر الساحره سحرتهم مره ثانيه
ابو عناد : وانت الصادق
دخل نياف وشاف منظر تيم وبداح وضحك
نياف ماقدر يسلم عليهم من الضحك حتى سلامه جاء متقطع من الضحك
ام عناد : بسم الله على ولدي وش فيك يمه
نياف : وش مسوين بعد
تيم : جاء الشمات تشمت تشمت وش وراك
ايهم : غلطوا على حرمتك المستقبليه
نياف : اعقب ماعاش اللي يغلط عليها ومسك السماعه الطبيه ورماها لاسيا تمسكها ومسكهم
نياف : اتركوهم لي
اسيا : اي كفو عاش والله جاء من ياخذ حقي منكم كلكم
نياف : ابشري من تبين بس اشوه له وجهه بالمشرط
آسيا: طلبتك خذ حقي من عناد معهم
نياف : ماطلبتي شيء
لحن هبدتها : خير خيانه الحين غيث قال انه بياخذ حقك معنا ليه تتهمين عناد معهم
آسيا: تراني مانسيت الضربه اللي اخذتها بسبب عنادك المروح
لحن : لا تغلطين لا اشرحك أنتِ مع اخت الدكتور
نغم ضربتها : ياغبيه أنتِ اخت الدكتور
لحن : آه اي صح قصدي مع اخو اخت الدكتور
ام عناد : خلف الله علينا ياحازم بعيالنا واحفادنا
ام سيف : الله يعين يارهيفه ندعي لهم بالصلاح
ام غيث : يمه امسكي الخيزرانه واضربيهم بيرجع لهم العقل شوي
غيث : بسرعة حرم غيث اختاري عقابهم
لحن مسكت يد غيث تفكر
عناد : طيب ليه تمسكين يده عشان تفكرين وخري اغار
لحن : عشان اخذ الفكره منه لانه ذكي وافكاره شيطانيه
نغم : تمدحينه ولا تسبينه مافهمت ؛ وكيف تجيك الافكار ياشاطره
لحن : عن طريق رابطه تشابك ايدينا
غيث حط يدع على جبهتها : مسخنه ياعناد
عناد فز : بذمتك ، وحط يده على جبهتها ، والله انك صادق
لحن : وخروا مب مسخنه بس لاني مسكت يده
آسيا: استحت وارتفعت حرارتها معليكم بتروح تراها صريحه بعد
ضحك غيث وسحب يده من يدها : لقيتي فكره
لحن : اي امسك عقالك عط كل واحد منهم لسعه على القدم كل واحد منهم مرتين لكل وحده فينا وكل واحد منكم يعطهم نفس اللسعه واتمنى تكون قويه طلعو عضلاتكم يلا اشوف
تيم : وش تقصدين بكل واحد
لحن : عناد وغيث ونياف كل واحد منهم يجلدكم ست جلدات
بداح : حرام عليك
لحن : تستاهلون
نفذوا العيال عقابها والبنات يضحكون والحريم الكبار خايفات والرجال مستانسين تيم وبداح جالسين متوجعين
ولحن واسيا ونغم ركبوا بالعربه وضل عناد يلعبهم ويفحط بهم
من نزلوا وهم يضحكون مستانسين
نياف : بس دوري دوري
غيث : اركب انا اللي بسوق فيك
ركب نياف وغيث يفحط فيه والبنات يصورون ويعززون لهم
لحن : جنه وغيم ماتبون تجربون
غيم : لا حبيبتي انا مقبله على زواج ولازم اهتم اكثر بنفسي اخاف من سواقه عناد
جنه : انا بجرب حماس
لحن : غيث دور جنه
فز سعيد : انا بسوق بحرمتي ابعدوا
ايهم : عشتوا يالرجل الغيور
سعيد : اسكت بس
منصور : عمي جيب الشيخ يقرأ عليهم كلهم لا البنات ولا العيال
تقي : والله انك صادق
ابو عناد : عين وصابت عيالي
لحن : لا بابي بس طفشانين ونبغى نلعب
ابو عناد : عندي لكم لعبه
البنات بصوت واحد : وش تحمسنا
ابو عناد : بتنقسمون لفريقين
عناد : تمام انا ولحن ونغم وغيث ونياف واسيا
ابو عناد : والفريق الثاني ؟
تيم : انا والعشير مع بعضنا
ابو عناد : ومن معكم بعد ؟
تيم : ام ناخذ حازم وايهم وسعيد وجنه وغيم
ابو عناد : انتم سبعه وفريق عناد سته لازم تصيرون متعادلين
غيث: مكتوم قوم معنا
ابو عناد : الحين صرتم متعادلين
عناد : وش التحدي ؟
ابو عناد : كل واحد منكم يقابل خصمه ويعطيه بيت شعر والثاني يكمل البيت واللي مايجاوب قبل ينتهي الوقت يعتبر للفريق الثاني نقطه
تيم : يبه غش الفريق الثاني كلهم حريفين قصايد ماعدا اسيا مو جوها القصيد
ابو عناد : ماهو بذنبي ؛ اجلسوا كلكم تربعوا لبو طلبه وكلهم تربعوا
بداح : لا تخاف حتى نغم ومكتوم مب حقين قصايد
ابو عناد : بنيتي اقربي اجلسي هنا واختاري شخص تسالينه واذا جاوب بسرعه تعتبر له نقطه وبعدين يرجع يسالك واذا جاوبتي صح تنحسب لك النقطه واذا ما جاوبتي تصير النقطه من صاحب الفريق الثاني
تحمسوا كلهم وحتى الحريم والرجال الكبار تحمسوا معهم
لحن : بختار الحب حازم 
حازم ابتسم وتربع مقابلها
ابو عناد : عناد حط الوقت لهم دقيقه ابدأوا
لحن : احم صدفه وعشنا من بعدها بعيدين ؟
حازم : ليت الصدف بعد اللقاء قربتنا
لحن : كفو عليك
ابو عناد : من اللي قال البيت ياحازم
لحن وحازم مع بعض : هايف لنجده
ابو عناد : تحتسب لك نقطه لسرعتك ؛ الحين اسالها بسرعه
حازم : لحونه ركزي ؛ كنت اعاند واقعي واضحك لظني ؟
لحن : احسب ان السالفه ارض وخلها لين زفوها عروس وايقنت اني ..
حازم : ماصحيت الا وغيري قد خذاها.
آسيا: ياحقين الروايات وش فيكم حزنتوا طيب
لحن : اهخ مانسيت من زوجوها وكسرو قلب هايف
حازم : ولا لمن ابو صيته يحسب جته جنيه مايدري ان بلاه زواج نجد الاحباب
لحن : نرجع نقراها وش رايك ؟
حازم : تم
تيم : تراكم غثيتونا اخلصوا علينا
ابو عناد : كم مر من الوقت ياعناد
عناد : 49 ثانيه بس
تيم : ماشاءالله سريعين
غيث : كفو عرفتي من تختارين
لحن : اعجبك
نغم : عمي حازم يعني حتى لازم نقول من الشاعر ؟
ابو عناد : اي لازم
ابو عناد : تيم قم اختر واحد وارجعوا اماكنكم يالحن وحازم
تيم : بختار اسيا لانها دلخه مب حقت قصيد نفسي
آسيا: بتشوف انا اعلمك الحين من الدلخ
ابو عناد : الوقت ياعناد
عناد : ابشر ؛ ابدوا اسيا خليك كفو
آسيا: ابشر بي لا تخاف
تيم : بقول بيت دايم عناد يقوله  للحن
آسيا: وش بسرعه الوقت
تيم : لا يلحقك الزمن تكفين خوف ؛ اتحداك تكملينه
اسيا ابتسمت بانتصار : دامي معك عسى الله يخليك لي ؛ حطيني بوجه الليالي والظروف وخليك وراي وخلي العالم لي ؛ هاه وش رايك بعد قلته كامل
عناد : كفو اسيا
آسيا: كفوك الطيب عمي
تين مصدوم كيف قدرت تجيبه
اسيا : تيم ركز ذي سمعتها بالتيك اليوم ؛ اللي يبي يزعل بلا ذنب بقريح ؟
تيم : صبر اول مره يمر علي الشعر ذا
اسيا تبتسم بخبث : لا ابد خذ راحتك
ابو عناد : كم باقي ياعناد
عناد : 10 ثواني بس
تيم : ماعرفته
فريقه يصيحون عليه يجاوب
عناد : انتهى الوقت
ابو عناد : خسرتوا النقطه لصالح الفريق واحد
حازم : ياغبي صار عندهم ثلاث نقاط الحين وحنا بس وحده
غيم : الظاهر بنضل عليها بس
ابو عناد : بسرعه من بيطلع منكم كم باقي ؟
عناد : انا وغيث ومكتوم ونغم ونياف
ابو عناد : وانتم ؟
تيم : بداح وغيم وايهم وسعيد وجنه
عناد تقدم واختار غيم
عناد : سيدي الليل للعاشق نهار ...
غيم : صعب مره
عناد : مب شغلي
ابو عناد : كم مر من الوقت ياغيث
غيث : الحين 40 ثانيه
غيم : ماعرفته
ابو عناد : نقطه لصالح الفريق واحد
غيم : اف طيب بقول وحده سمعتها البارح واتحداك تجيبها صايره ترند
عناد : بسرعه الوقت
غيث :20 ثانيه ياعناد انجز
غيم : قلبي اللي لواه من الصواديف لاوي
عناد : جرته الليالي والحظوظ الرديه للشاعر خالد الفيصل
غيم : عمى ماشاء الله كيف تعرفها ؟
لحن : مين مايعرفها ياقلبي
غيث : كفو عليك اخر خمس ثواني جاوبت
عناد بغرور : ادري راح اجيبها
ابو عناد : نقطتين لعناد ؛ صفر لغيم
تيم : تتفلسفين علي وفي الاخير ماجاوبتي شيء
آيهم: بعذرها ماتعرف للقصيد
تيم : اسكت تدافع عنها عشانها زوجتك وتعطيها اعذار
ابو عناد : هدوء رجاءً غيث وبداح دوركم
بداح بلع ريقه بخوف : عمي لازم غيث
ابو عناد : تربع وانت ساكت
بداح : ابشر ؛ وتقابل مع غيث
غيث طاحت عيونه بعيون لحن وقال : ليت العمر يهدى ابهديك عمري
بداح : وش ذا مب قصيده ذي ؟
غيث : كمل البيت
بداح : بستسلم ما اعرفه
غيث : اختصرت علي الوقت
ابو عناد : نقطه لصالح غيث ؛ كمل يابداح
بداح : شوف هذا شفته البارح بتويتر وحفظت اوله بس ونسيت التكمله ؛ اي والله احبك واحب كل مافيك
غيث ابتسم بانتصار : ياللي حضورك يبعد الهم عني
بداح بصدمه : كيف كذا ؟ صبر بتأكد هو نفسه تكمله البيت
طلع جواله يتاكد وصاح : والله هو البيت
غيث بغرور : مايخفى على غيث شيء تفهم كل شيء يعرفه
بداح : الله يخلي اختي لحن صرت تحب القصيد عشان تقوله لها
غيث هبده : وش دخلك
ضحك ابو عناد : نقطتين غيث صفر بداح
الفريق اثنين بتحلطم : بنخسر اكيد
بداح : عمي فيه عقاب للفريق اللي يخسر
ابو عناد : اكيد
تيم : جدي كم مجموع النقاط الحين ؟
ابو عناد : انتم نقطه وهم سبع نقاط ؛ نغم وجنه دوركم
نغم توترت ولحن تشجعها
لحن : أنتِ قدها لا تتوترين نعتمد عليك
نغم : تمام
جنه : شوفي مالي بالقصيد بس في وحده قالتها لحن قبل ام نسيتها بحاول اتذكرها ؛ اي تذكرت ؛
اسلم يا احلا ويا اغلى ؛ لحن عادي مساعده تكملينه لي
لحن : يبه عادي ؟
ابو عناد : مافيه مشكله كمليه
لحن : مشكور يالغالي ؛ اسلم يا احلا ويا اغلى الناس واجملها
جنه : اي هذا هو
صفقت نغم : وسولف ياصوتٍ يموتني ويحييني
شهقت جنه : من وين تعرفينه
نغم : أنتِ نسيتي من كنا عند الحلال ولحن عشان تقهركم قالته لي
ضحكت لحن وعناد باس خد لحن وقال : كفو بنتي
نغم ابتسمت بنصر : احم هذا اقسم لك ماراح تعرفينه لان اللي قاله لي عناد
جنه : ابتلشنا
ضحكت نغم وقالت : اخترتك من الناس للقلب خله
تيم : العب يالعم البطل وش الرومنسيه والحركات ذي ماعرفتك
نغم انحرجت ماتعرف الا هو
الكل صفق وانتهى الوقت
ابو عناد : نقطتين نغم صفر جنه الحين المجموع تسعة نقاط / نقطه وحده
اخر اربع مشاركين مكتوم وايهم وسعيد ونياف
مكتوم تقدم وجلس مكان نغم وايهم مقابل له
مكتوم : للي سوالفها علي الذ من طعم الحليب
آيهم: وش ذا قصيده هي ؟
مكتوم : ايه ودايم اردده نسيته
آيهم فز من تذكره : حليب مصغر وصفها وضحٍ شناح وناهيه ؛ صح ؟
ابتسم مكتوم : كفو عليك
غيم : كفو جاب وحده
آيهم: ام بفكر
عناد : مافيه وقت اخلص
آيهم: انا معك لو كل هالدنيا عليك
مكتوم صفق : هات حزنك وهذا كتفي لك سند
تيم : ماشاء الله العائلة كلهم شعار
صفقوا الحريم
ام عناد : كفو عيالي مافشلتوني
الرجال : غلطنا من اخترنا فريق ثنين ندعمهم
ابو عناد : 11 نقاط للفريق واحد ، نقطتين فريق اثنين
نياف : قم ياسعيد
سعيد : اقدم انت
نياف : هذي لامي رهيفه ، امي يا اطهر من وطى كف الثرى
ام عناد : ياجعلني ماذوق حزنك يمي
نياف ارسل لها بوسه بالهوى
سعيد : من وين جبته
نياف : جاوب
سعيد : أنتِ قلبي عيوني وروحي صح ؟
نياف ضحك : خطا خطا خطا
ضحكوا الكل عليهم
سعيد : بتشوف بجيب وحده لخالد الفيصل واتحداك تجيبها
ضحكوا عليه لانه خبره من الشاعر مايدري ان نياف مدمن قصايده وحافظها كلها
سعيد : لا ما انتهيت توي معك يا اجمل العمر ابتديت . جيبها اتحداك
نياف صفق ووقف وكمل وهو يصفق : توي عرفت ان السهر نشوه هوى توي عرفت ان الهوى عند الحبايب دوا توي اسجل مولدي ياموعدي بعد الضياع
كملت لحن معه : توي نسجت الثوب من هدي الشعاع توي اكتشفت الليل واسرار النجوم
غيث كملها : توي ركبت الخيل من فوق الغيوم لا ما انتهيت توي معك يا اجمل العمر ابتديت
سعيد وسع عيونه بصدمه : تعرفونها ؟
ام عناد : ياولدي من مايعرف قصيد خالد الفيصل انت طحت بيد واحد عاشق قصايده وحافظها كلها
سعيد : ليه ماتعلمني انك تعرفه
ضحك ابو عناد : 13 نقطه لصالح الفريق واحد ؛ نقطتين للفريق اثنين والفايزين الفريق واحد
حزنوا الفريق اثنين
غيم : غش كلهم يعرفون للقصيد وكلهم مع بعض حنا فريقنا غشاشين ومانجحوا زود على غشهم
ضحكوا من تحلطمها
وكملت : مافيهم الا ايهم وحازم جابوها الباقين اغبياء
تيم : تراك معنا على فكره
لحن بحماس : وش العقاب يبه
ابو عناد : نقوله بكره تعبت الحين وعلى فكره بكره كلنا نتجهز نروح للحلال بكره بنجلس ثلاث ايام هناك
الكل ايده وكل واحد اخذ اهله ورجعوا بيتهم .
-
<< بمكان اول مره نزوره عند مليحه >>
كانت جالسه بالشقه تنتظر راكان وبكل مره تعاني مع راكان وتبغى تنتقم من غيث لانه كان السبب بزواجها منه عاشت جحيم مع راكان كرهت نفسها وكرهت حياتها ومن عرفت ان  غيث وعناد مسكوا الساحره خافت وضلت حبيسه غرفتها وتتصل على سما ماترد او بالاصح حاضرتها دخل راكان وبكل مره يدخل للبيت شارب ومعه بنت ماهمته زوجته ومشاعرها ياخذ حقه الشرعي منها واذا منعته ضربها ضرب مبرح يسيل لها دمها سمعت صوته مع البنت وقفلت غرفتها بالمفتاح وضلت تبكي بقهر وكره لغيث هي كرهت راكان بعد حبها له دق راكان الباب مافتحت وضل يضرب الباب بكل قواه وعقله مب معه كثر الشرب ومع كل ضربه البنت خافت وهربت تركته ومن سمعته ينادي زوجته انكسرت تحسب انه مو متزوج وتركته وطلعت راكان عصب اكثر وكسر الباب شافت بيده زجاجة الشراب وخافت هربت للحمام وانتم بكرامه قدر يلحقها ويمسكها قبل تقفل الباب ضربها ضرب مبرح وكسر الزجاجة براسها توجعت ومسكت راسها ودفته ضرب راسه بالجدر واغمى عليه من الوجع مع الم الصداع من كثر الشرب تمشي بوجع ماسكه راسها وفكرت انه افضل خيار تتصل على غيث يساعدها ويخلصها من راكان عارفه باهلها ماراح يساعدونها كانت حافظه رقمه ودقت عليه
-
<<عند غيث >>
كانوا متجمعين بالصاله بعد ماراحوا اهلهم وابو عناد وام عناد ماجاهم نوم قرروا يكملون السهرة بالصالة
فجأة قطع حديثهم صوت جوال غيث مسك جواله وشاف الرقم غريب تجاهل ورجع دق وبعد ثالث مكالمه تكلمت لحن
لحن : غيث رد يمكن احد محتاجك يمكن مهم الاتصال
غيث : تحسين انه مهم يعني ارد ؟
عناد : تسال بعد اي رد
فتح الاتصال وحطه اسبيكر جاه صوت مليكه وهي تترجاه يجي يساعدها من سمع صوتها وعرفه ناظر لحن منصدم من كلامها تترجاه ينقذها ولا بيذبحها راكان
_
<عند مليحه >
دقت عليه مارد جربت المره الثانيه وتترجاه يرد
تكفى رد غيث رد انت الوحيده اللي بيساعدني من بعد ربي تكفى رد مارد ورجعت تدق وآخيراً رد
غيث : الو من معي
مليحه ببكى وترجي : غيث تكفى ساعدني بيذبحني تكفى غيث طلبتك مالي احد غيرك يقدر يساعدني تكفى غيث
غيث مصدوم وساكت : مليحه راكان شارب وضربني والحين بيرجع يصحى ويضربي طلبتك انقذني نخيتك ياولد العم تخلصني من الجحيم اللي انا عايشته
غيث : ارسلي موقعك انا جايك الحين
مليحه ببكى : طيب
-
<< بيت ابو عناد >>
طبعاً سمعوا المكالمه لانه حاطه سبيكر
عناد : جاوبها البنت تترجاك لازم ننقذها مهما سوت ذي تضل بنت عمك
غيث : وهذا اللي بسويه بروح اشوف وش السالفه
ام عناد والبنات من سمعوا صوت بكاها وترجيها لغيث خافوا وام عناد مسكت قلبها من الخوف
غيث : عناد ابغاك معي إذا فعلا راكان سكران ابغاك تقبض عليه
عناد : ابشر
وقفوا بيطلعون وقبل يطلعون من البيت ام عناد وقفتهم
ام عناد : ياعيالي طلبتكم جيبوها هنا لا تاخذونها لمنصور حتى نشوفها ونتاكد من صحه كلامها اخاف منصور يسوي فيها شيء او يذبحها ويشك فيها مره ثانيه
غيث سكت يناظر لحن اللي كانت واقفه وراء ام عناد
وتناظره بخوف وعناد رد على امه
عناد : ابشري يالغاليه ماطلبتي شيء
ام عناد : الله يحفظكم من كل شر استودعتكم ربي ولا تطولون يمه لا تخلوني احاتيكم تراني ماراح تغمض عيوني الا لا من جيتوا
عناد : تامرين امر
وطلع عناد ام عناد دخلت وغيث لف بيطلع بس وقفه صوتها
لحن : غيث
التفت لها ينتظرها تتكلم بس هي سكتت وركضت ضمته غيث ابتسم وشد عليها اكثر الود وده يخبيها عن العالم بحضنه
لحن : انتبه لنفسك مو عشانك عشاني
غيث باس جبينها : ابشري ياحرم غيث
لحن ابتسمت وبعدت عن حضنه: استودعتك الله
ولف بيطلع وقف عند الباب ناظرها وابتسم وطلع وعناد ازعجه بالبوري يبيه يستعجل
غيث : هاه جينا تراك ازعجتنا
عناد : ساعة انتظرك
غيث : لا تكذب ترا كلها دقيقه
عناد : اسكت ؛ وحرك متجه لشقه مليحه وراكان
لحن ضلت واقفه مكانها تتامل زوله وتبتسم
ضربت كتفها نغم : يتهنى اللي ماخذ عقلك
شهقت لحن : بسم الله
نغم : شايفه جنيه
لحن ضحكت وحاوطتها بذواعها : اجمل جنيه والله
نغم : احم احم تراني خفيفه
ضحكوا ودخلوا وام عناد امرتهم يجهزون غرفه لمليحه ويرتبونها تنام فيها اذا جت
—
<< بالشقه>>
وصلوا غيث وعناد للعنوان اللي ارسلته مليحه نزلوا من السياره ودخلوا البنايه وسمعوا صوت صياحها وركضوا كسر عناد باب الشقه ودخل وغيث وراه شافوا منظرها كيف هي كلها دم وراكان ماسك اصابعها البنصر والوسطى وكسرها لها وكل واحد فيهم نزل نظره احترام لها راكان شافهم وعرف غيث وخاف وابعد عنها بعد ماشوه لها وجهها وكسر اصابع يدها اليمين وقفت تترنح من كثر الضرب وخايفه وركضت احتمت فيهم وغيث وعناد من شافوا منظرها المرعب عصبوا وثار الدم بعروقهم وتوجهوا صوبه وضربوه ضرب من القوة الضرب ضل يصيح ويون
عناد : اي تصيح وش لون هي وهي بنيه ياشبيه الرجال ودق على سلمان وجات الدوريه ومسكوه كلبش غيث يدينه وضربه كف من قوته بيضل علامه بوجهه لان خاتم غيث جرح خده جرح كبير
لفوا يعطونها ظهرهم وقال لها غيث تروح تلبس عبايتها ولبت طلبه واخذوها للمستشفى شافها الدكتور وكتب لها تقرير طبي للاعتداء بخصوص حالتها وتقدر ترفع قضيه وتتطلق من راكان خيط راسها ولف الشاش عليها وسوا لها جبيره لاصابعها وصرف لها كم مرهم لاثار الضرب وهي تبكي ومستحيه من غيث سوت المستحيل لاجل تأذيه وبالاخير هي اللي تاذت وهي اللي خصرت وبالنهايه غيث اللي انقذها من راكان
-
<< بيت ابو عناد >>
كانوا منتظرين رجعتهم وخايفين ومتوترين لان صايح مليحه وترجيها غيث كان مخيف بالنسبه لهم
وصلوا وعناد وغيث وقفوا ينتظرونها تنزل وتدخل معهم مليحه منحرجه منهم
تكلم عناد من شافها متوتره ومستحيه ومتردده تنزل : لا تستحين أنتِ الحين اختنا وحقك بناخذه لك لا تخافين
غيث : مثل ماقال عناد انزلي ولا تخافين عمي انا بكلمه
نزلت مليحه ودخلت وراهم ودلها عناد للصاله ودخلت وهم وقفوا ورا الباب عشان تاخذ راحتها
دخلت وشهقو البنات من شافوها دخلت وتبكي ام عناد مسكت قلبها وبكت من شالت نقابها وشافوا يدها وعرفوا انها مكسوره ووجها ملامحها مو مبينه من كثر الضرب والكدمات وعينها اللي منتفخه وقلب لونها بنفسجي ام عناد فتحت يدينها لها وارتمت بحضنها وبكت بكت وتشد على حضن ام عناد نغم ولحن ضموا بعض وبكوا من بكاها ومن منظرها مليحه كانت محتاجه حضن امها ماتعرفه كانت امنيتها ان امها تضمها وتحاتيها وتخاف عليها او تطبطب على راسها كانت تغار من البنات من تشوف تعامل امهاتهم معهم وتعامل امها معها ومن شافت خوف ام عناد على لحن تمنت امها تخاف عليها مثل خوف ام عناد على لحن بعدت من حضن ام عناد وام عناد تطبطب على راسها وتسمي عليها وتهديها
نغم ولحن توجوه صوبها وضموها وبكوا مع. بعض
ابو عناد نزل راسه وانقهر على حالها
لحن مسحت دموعها ومسكت مليحه مسحت لها دموعها وقالت : امسحي دموعك ووقفي على رجلينك واسندي نفسك واذا طحتي حنا لك سند بنمسكك ونسندك لاتخافين حنا معك ماراح نتركك لا يدخل الخوف قلبك يابنت منصور والله انك بحمايتنا من كل ضرر ولا تخافين غيث وعناد بيساعدونك
مليحه ابتسمت بكسر ونزلت راسها مستحيه منهم : سامحوني سامحين لحن وانا كنت اغار منكم وكل اللي ساويته بسبب غيرتي لاني ماجربت شعور ان امي تحبني وتخاف علي انا من اشوف اهتمام خالتي حوراء بنغم اتمنى امي تحاتيني تخاف علي تهتم فيني على الاقل تضمني انا ماذقت حنانها من صغري امي كانت تكرهني من وانا صغيره ومهملتني امي السبب بكل شيء انا سويته لمن كنا عند حلالكم غرت منك لان عندك عناد وعندك خالتي وعمي يخافون عليك من اتف الاسباب حتى من جرحتي اصبعك جرح بسيط كلهم فزو وخافوا عليك خالتي بكت بس لان السكين جرحك وعناد كسر السكين عشانك وضل يحاتيك وكل شوي يتطمن عليك وماتركك من ضقتي وشافتك خالتي متضايقه عرفت وش كان مضايقك وضمتك لحصنها وحصنتك وعمي كل شوي يحاتيك وطلباتك اوامر عنده ومايرضى احد يكسر كلمتك هم حتى اذا بياخذون راي احد خذوا رأيك أنتِ ويمشي على الكل بتقولين ابوك وينه اخوانك وينهم اخواني كرهوني بسبب جدي جدي دمر حياتي جدي هو السبب بكل شيء صار لي جدي هو اللي اخذني لراكان وعمل عملته معي جدي هو السبب بكل شيء جدي حرض ابوي واخواني علي وكرهوني ؛ ونغم كنت من اشوف خالتي وعمي واخوانك كيف يخافون عليك تمنيت اكون بمحلك تمنيت امي بس تقول لي استودعتك الله بدلاً من الله ياخذك من بنت ليتك متي ولا عرفتك ليتني ماحملت فيك بكت ونزلت راسها ضموها البنات وبكوا من بكاها وكلامها
< عند الحلال >
لحن يمه انا بقطع البصل ام عناد وانتبهي تراني سمحت لك اليوم تقطعينه لانك ازعجتيني
رفعه : عن الدلع يارهيفه حتى البصل تمنعينها لا تقطعه
رهيفه : اي بالله يارفعه من حبي لها ماودي تسوي شيء حتى اني امنعها تقطع البصل لانه ينزل دموعها وانا ما ارضى اشوف دمعها حتى لو كان من بصل
رفعه : ترا كثر الدلع ماهو بزين للبنت
رهيفه : الا لبنتي الدلع زين لها ؛ يلحن الطماطم انا اقطعه تفهمين
لحن : ابشري يالغاليه
مضاوي : خاله اتركيها تقطعه ليه تمنعينها
رهيفه : لحن بنتي عندها حساسيه من الطماطم اذا لمسته تصير كلها حمراء وتطلع فيها حبوب صغار وتجيها حكه وتبكي من الوجع لازم تاخذ ابره تحسس
زهرة : خالتي لكذا أنتِ مانعتها من التقطيع
لحن كانت تقطع البصل وما انتبهت وجرحت اصبعها جرح بسيط وصاحت لانها خافت من توجعت كانت مسرحه وهي تقطع
رهيفه فزت وتوجهت صوبها ومسكت يدها : يمه بنيتي وش فيك يمه ماتنتبهين على نفسك أنتِ
لحن : يمه بسيطه لا تخافين ماصار شيء
رهيفه: كيف جرحتي نفسك؟
لحن : مدري ما انتبهت كنت مسرحه شوي
سمعوا الرجال صوت الصياح وطلعوا من الخيمه ركض لعندهم وعناد ميز صوت صيحتها وركض عندها متجاهل الكل سحبها من امه بخوف عليها
عناد بخوف الكل ملاحضه : وش فيك ياوطن عناد علميني وش صار لك
لحن : يروح وطنك ودواها ماصار شيء بس شوف رفعت اصبعها يشوفها ؛ جرحت يدي بالغلط
عناد باس اصبعها وطلع منديل من مخباه ومسح الدم ورجع المنديل مكانه وضمها لحضنه وشد عليها وضل ضامها للين مابعدت وباست خده وهو باس خدها وابو عناد دفه : وخر بس عن بنتي
عناد : تراها بنتي انا مب بنتك لاتسرقها علي هي حبيبتي
ابو عناد : تقلع بس
لف عناد وطاحت عيونه على السكين الصغيرة وشاف دمها بالسكين مسكها وكسرها
شهقوا الحريم من رمى السكين على البلكه المقابله له بقوه وما انكسرت رجع مسكها وضربها اكثر من مره بحجره كبيره
رهيفه: وش فيك يامجنون انهبلت انت
عناد : اللي ياذي بنتي اعدمه حتى لو كان جماد
لحن :ياخي اعشقك واموت فيك واحبك تغار علي حتى من سكين وتخاف
عناد : اي اغار واخاف اذا كانت السكين اذتك انا ابعدها
ابو عناد : والله انك مجنون بس صدقت اللي ياذي بنتي ابعده حتى لو كان جماد
ابتسم عناد وحصنها وبأسها ورجعوا الرجال للخيمه وعناد يوصي امه تنتبه لها
رهيفه ام عناد : اقعدي والله ماتسوين شيء ومابي اسمع منك كلمه تفهمين
ابتسمت لحن وجلست تتامل اصبعها
< نرجع للبنات >>
ابو عناد انقهر عليها من كل كلمه قالتها وكره غالب لانه السبب بتدمير حياة بنت وخطط مع واحد وسلب منها شرفها غالب عشان نفسه عادي يبيع حفيدته ماهمته
غيث عصب وشد على قبضته جده دمرهم وعشان مصالحه دمر بنت ولده واتفق مع راكان عشان يسلب منها اغلى حاجه عندها
عناد مسك يده يهديه وام عناد تمسح على راسها تسمي عليها وتحصنها
لحن : تصيري اختي عادي
نغم : وانا تصيرين اختي
ضحكت مليحه : اصير لكم اختكم الكبيره اذا تبون بس تسامحوني وماتزعلون علي ؟
نغم : حنا مانزعل من اختنا الكبيره هل فيه احد يزعل من اخته الكبيره ؟
لحن : مافيه احد يزعل من اخته
ضحكت ام عناد عليهم وابتسم ابو عناد
غيث بهمس لعناد : يازين قلب زوجاتنا
عناد ابتسم : مب غريبه عليهم
ام عناد : يمه لحن خذي اختك مليحه لغرفتها وانتِ يمه نغم سوي لها عشى تتعشى وتنام ترتاح
وقفت نغم راحت المطبخ ولحن مسكت يد مليحه ووقفتها متوجهين لغرفتها طلعوا وصادفوا عناد وغيث عند الباب صدوا بنظرهم وعطوهم مقفاهم احتراماً لمليحه
لحن : عنادي خذ بوسه طايره
عناد ضحك ولف ومسكها بكفه وحطها على خده : وصلت
غيث : خير انت وهي
ضحكوا البنات وتوجوه للغرفه وغيث وعناد دخلوا وعناد من التعب رمى نفسه جنب امه وحط راسه على ركتبها
وامه تلعب براسه حتى غفى
_
<< غرفه مليحه >>
لحن جلستها على السرير ومسكت عبايتها وابعدتها
لحن : تبين تستحمين تتنشطين وبعطيك ملابس من عندي جديده ما لبستها
اومت لها بالموافقه جابت لحن الملابس وشافتها جالسه مكانها ماتحركت
لحن : تبين مساعده
مليحه : عادي تساعديني استحم
ابتسمت لحن : ابشري
مسكتها ووقفتها وتوجهت للحمام وانتم بكرامه شالت الشاش وشافت الخياطه ونزلت دموعها من شافت الكدمات بظهرها ويدينها غسلت لها شعرها وابعدت المويه عن الخياطه ماجاها شيء مررت المويه على اكتافها وبعد ما انتهت عطتها البجامه تلبسها وهي طلعت ونغم دخلت بصينيه فيها اكل تحبه مليحه
وتركته على الطاوله الجانبيه وشافت لحن مبلله مويه وفهمت طلعت مليحه وشافت الاكل مالها نفس تاكل بس اجبروها البنات تاكل
لحن : هاتي انا باكلها بيديني
نغم : طيب
بعد ما اكلت وقفت وانسدحت على السرير ونغم اخذت المرهم وحطته لها وعطتها الدوا تشربه وغطتها زين وطلعت هي ولحن بعد ما تاكدوا انها نامت
نزلوا الصاله وشافوا عناد نايم وغيث يفكر بحل لمليحه
تربعوا مقابل عناد
وفز عناد بخوف ونزلت دموعه ومسك قلبه والتفت على لحن وسحبها وضمها لحضنه
الكل ناظره من فزته وخافوا وش فيه
ام عناد : بسم الله عليك وش فيك يمه
عناد : يمه رجع يمه يناديني يمه اتخيله جالس جنبي يمه واثره حلم ؛وقال
شفته رجع وقلت يالله تحييه *** وشلون رجعت ورجعتك مستحيله
وفزيت اثره حلم والدمع يرثيك *** معذور يا اغلى من كسرني رحيله
لحن بكت وضمته اكثر وابو عناد مقهور على حال ولده اللي ماقدر ينسى وفاه نواف ونغم ضمت غيث وبكت وغيث منزل راسه ماقدر ينسى موت نواف ومثل ماعناد يعاني من رحيله غيث يعاني نفس الفقد والوجع
ام عناد : ادع له يمه بالرحمه كلنا مانسيناه هو ولدي يعناد وانا قلبي مكسور من فقدته
لحن : هو خالي اللي دايم يجيب لي حلاوه اشتقت له واشتقت من كنتم تتضاربون عشاني وكان نياف يسحبني ويخبيني وراه وانتم تنقهرون وتضربونه حتى من يشوفني ابكي كان يقول لي قصيده انا وقتها نسيتها بس انت ياعناد دايم تقول لي نواف قبل يموت وصى عليك وكنت تذكرني بقصيدته حتى حفضتها
نغم : وش هي القصيده
لحن : ولا عاد تبكين قطعتي معاليقي
عناد : الله يرحمه
ام عناد تبي تغير الموضوع : نامت مليحه ؟
نغم : ايه يمه نامت ياقلبي عليها
ام عناد : الله يكون بعونها المسكينه
نياف من خطب رجع بيته وملكته بعد مايرجعون من عند الحلال
ابو عناد : يلا تقلعوا كل واحد ياخذ حرمته ويروح لغرفته صارت الساعه 2:45 ص ناموا قبل الصلاة وإللي مايصحى شفتوا العصاء ذي والله ان تلعب على ظهره
عناد : يبه ليه تحب عصاك
ابو عناد : وش عليك يالملقوف
لحن : جبنا لك عكازه رميتها واخذت العصاء ذي وش رايك تعطيني عشان الصقر احبه يبه
ابو عناد : ماراح اعطيك ويلا على غرفتكم
وقف غيث وسحبها وهي ماتبغى
لحن : بعد باقي عندي سؤال بسالهم
ضحكت نغم : ينصر دينك ياشيخه وش سؤاله
ابو عناد : يتاجل لبعدين يالحن ويلا قدامي على غرفتك غيث خذها لا تنهبد انت
غيث : لا تكفى يبه حدي حيل متكسر بروح ارقد وباخذها معي لا تخاف
عناد مسك يد نغم وهرب قبل ابوه يعطيهم شوط بالعصاء
نغم : وش فيك تهرب من مين
عناد : ناظري وراك وتعرفين
لفت وشافت ابو عناد يركض ورا غيث ولحن ولحن تضحك ضحكت وركضت معه لغرفتهم وغيث سحب لحن لغرفتهم
<< غرفه عناد >>
عناد : اعتقيني تراني تعبان اليوم ارحميني طلبتك
نغم حاوطت عنقه وباست خده : هاه راح التعب الحين
عناد ابتسم وحاوط خصرها : اشهد انه راح التعب
ضمته ودفنت وجهها بصدره وشمت عطره اللي يذوبها ويخلي قلبها يدق غصباً عنه
عناد مسك خصله من شعرها وقال :
يامنه الرح يوم ان الحشى ضمش
تلي حشى القلب تل ورزي القامه
ويا فتنه الغيد يوم ان الغلا زمش
سمي على القلب من خلفه وقدامه
ويا تلعه الغيد لا من قلتي بفمش
ودعتك الله حبٍ يذبح هيامه
روفي بابو غيث قبل يموت مالمش
وهزي قوامٍ لا هندم كن هندامه
نغم ابتسمت بحياء ووجها قلب لونه احمر وعناد ماتحمل جمالها وضمها اكثر وباس جبينها وخشمها
نغم : ياخي تراني ما اتحمل لا تخليني اصير اهيم بالقصيد
عناد : كل القصيد ينكتب لعيونك كل ماشفتك اشكر جدك لانه كان السبب بزواجي منك
نغم : انت صرت ثالث والديني ياعناد
عناد : وانتِ ام عيالي يابنتي
نغم : عناد
عناد: عيونه
نغم استحت ودفت وجهها بصده اكثر
ضحك عناد وشدها اكثر لصدره : سولفي مثل المشاريه في صوت الحشيم
واسكتي مثل الشفايف ليا طاح القناع
واضحكي مثل النواوير في روضه خريم
مسك فكها ورفعه وباسها وابتعد من حس بانها تبي تاخذ نفس وابعدت منحرجه من حركته وجرئته وانسدحت على السرير تتهرب منه ضحك وقفل النور وانسدح جنبها سحبها من خصرها وضمها لصدره ونام وهي نامت بعد ماقرت اذكار النوم وحصنته معها
-
<< غرفه غيث ولحن >>
لحن : انا مافيني نوم بضل اقراء روايتي وانت نم اذا تبي
غيث مارد عليها وفسخ ثوبه ورماه قربها وتوجه للحمام وانتم بكرمه وتروش وطلع كان لاف المنشفه على خصره نسي ياخذ ملابسه شافته طالع وشهقت وغطت وجهها بجوالها ويدينها ضحك من حركتها العفويه
غيث : ترا زوجك عادي تشوفيني
لحن : قليل ادب رح البس
غيث يعاندها وقرب لها وسحب يدينها وبلل وجهها بشعره المبلل
لحن : غيث وخر
ضحك واخذ شورت اسود وتيشرت ورجع للحمام وانتم بكرامه لبس وطلع شافها متحمسه بالقراءة تجاهلها وانسدح تقلب ماقدر ينام ولفت رفع راسه بيده
غيث : ماودك ترحميني وتجين
لحن ضحكت : الصراحه مقدر اترك الحماس واجيك
غيث تئفئفت ودفن وجهه بالمخده ماقدر ينام ينتظرها تخلص روايتها يحس بان حضنها مثل المنوم ادمنه
لحن ناضرته وشافته يتقلب ماقدر ينام رحمته وقفلت جوالها وتوجهت صوبه وسحبت اللحاف وانسدحت وناظرته فهم نظرتها وابتسم وحط راسه على صدرها وهي لعبت بشعره حتى نام ونامت هي بعد
.
.
اعتذر على التاخير صيام وتعب ومقدر اكتب لكم كل يوم ابغاكم تختارون يوم او يومين بالاسبوع انزل لكم بارت تبون الاثنين والخميس انزل لكم لاني اتعب ما اقدر انزل لكم يومياً لا تحسبون انتي اتغلى او العب عليكم لا والله بس لاني ما اقدر اكتب يومياً والفتره ذي مريت بظرف لكذا انا تاخرت اعتذر منكم وعشانكم طولت لكم البارت والجمعه باذن الله بنزل لكم بارت بعد طويل وبتحبونه وبيكون مرضي للجميع اتمنى ماتزعلون علي او تشوفوني اتغلى او شايفه نفسي وما انزل لكم او ارد عليكم انا ماقدرت ارد عليكم كلكم اعتذر واتمنى ماتضغطوني اكمل