لا أعتذّر .. وأنت من يزرع حصيل
ما يفيد العذر في عيون : الخطأ
.
.
العصر نغم طلعت من بيتهم راحت بيت ابو عناد وسلمت على ام عناد وراحت للحن وسلمت عليه وضمتها
نغم: رفضت اسوي حفل زواج
لحن : ليه
نغم : مابغى
لحن : عندي لك خبر بس ننتظر اسيا تجي مقدر اخبرك وهي لا بتذبحني
جتهم اسيا تركض
آسيا: جيت وش عندك وش خبره
لحن: بسم الله اهدي الحين وخذي صينية القهوه والحلى نروج للسطح
نغم : هاتي الحلى انا بشيله
آسيا: وانا الصينيه
جلسوا بالسطح وآسيا صبت لهم قهوة وعطتهم من الحلى
آسيا: اي وش العلم غردي
لحن : تسمعوني للاخير وما تقاطعوني
نغم : طيب بسرعه حمستينا
لحن : تخيلوا طلعت متزوجه وتوقعوا مين زوجي
آسيا: مين
لحن: غيث
نغم : اخوي
لحن : لا ابوي اي اخوك وهو بعد شريكي بالمزرعه
نغم : الحمدلله كنت اتمناك له
لحن: بس بيطلقني
آسيا: متى وليه تزوجك دامه بيطلقك
لحن : تزوجني عشان يحميني من الكوبرا اللي هو نفسه حمد ال راشد اللي جدك يبيك تاخذينه هو يبي يتزوجني
نغم: عمى بعينه الشايب حاط عينه على الحلوين واخوي الكفو تزوجك عشان يحميك وطلاق ماراح تتطلقون تفهمين
لحن : بس
آسيا: بدون بس اقول تسمعين الكلام
لحن : جدي قال بيعلن زواجنا اليوم بالليل وبيسوي عزيمه نغم انا نفسك رفضت اسوي زواج
آسيا صفقتهم : خير ليه ترفضون نبي نرقص نستانس نقهر مليحه
نغم : ماتدرون وش صار على مليحه وليه اخوي فسخ الخطوبه وهو من البدآيه مايبيها
آسيا: ليه
نغم علمتهم بالسالفه
اسيا: طيب هي وينها
نغم : بعد ماسببت مشكله للحن ثاني يوم عمي كلم زوجها يجون يملكون وياخذها معه والحين هي مع زوجها
لحن : الله يسترها ويحفضها اتركونا منها وخلونا في مصيبتنا الحين
ام عناد نادت على البنات
لحن : امشو امي تنادينا خلونا ننزل وجيبوا معكم القهوة
اسيا: هلا بجدتي هلا بالزين وش بغيتي
ام عناد : ابغاكم تتجهزون بالليل راح تكون فيه عزيمه عشانكم لانكم رفضتوا نسوي لكم عرس
آسيا: يمه والله انهم خبلات من ترفض تسوي عرس
لحن : انا وبعدين مو مهم يجون عرسي كثير ابغاه عائلي
نغم: نفس التفكير
آسيا: غبيات اجل انقلعوا تجهزوا والبسوا ابيض وانا بساعد جدتي وبجيكم اتجهز معكم
لحن : ليه
ام عناد : بيجون الحريم وش ليه يلا أنتِ وياه ونغم كلمت امك وهي جايه الحين
نغم ولحن طلعوا غرفه لحن نغم خذت فستان من عندها وتجهزت عندها
وصلت ام غيث وجابت شنطه نغم وملابسها هي اللي مريحها ان بنتها بتعيش قريب منها وعند ام عناد هي متاكده ام عناد راح تنتبه لها مثل ما انتبهت عليها بصغرها حوراء تحب ام عناد وتعتبرها بحسبه امها
ام غيث: يمه جبت كل شيء يخص نغم وين احطها
ام عناد : وغيث
ام غيث: وش فيه
ام عناد علمتها بالسالفه وقالت لها : ابو عناد حلف عليهم يعيشون عنده وبما ان غيث شريك لحن بالمزرعه ما اعترض وقرر بيعيش عندنا
ام غيث : بكلمه يجيب اغراضه ينقلها عندكم
ام عناد : اعذرينا من حبنا لكم سرقنا عيالكم
ضحكت ام غيث : جعلهم والله فداك يمه انا ما انسى معروفك معي انا اعتبرك امي وهم بحسبه عيالك يمه
ام عناد : يازين بنيتي يلا يمه نخلص ونروح عند البنات نشوفهم ونتجهز ونخليهم يحطون لنا معهم من الوانهم
ضحكت ام غيث من وصف ام عناد وجت غيم وامها وبعد ماخلصوا كل الترتيبات وصلوا الحريم
وطلعت ام غيث لغرفه لحن تشوف للبنات ذكرت ربي عليهم وسمت
نغم : يمه وش رايك
ام غيث : طالعين قمر تعالوا احصنكم
لحن : خالتي شفتي عروس تعرف انها متزوجه ولها اسابيع وفي صباح عرسها
ضحكوا كلهم وقالت ام غيث: نغم جبت كل شيء لك نقلته هنا بتعيشين مع زوجك ومع لحن وغيث بعد بينقل اغراضه وبيعيش عندكم
وغيم الحلوه بعد زواجها من ايهم بتعيش عندنا مع اجوان
غيم استحت من طاري زواجها من ايهم هي وافقت بس باقي ماحددت وقت الخطبه
نغم : حبيت بنعيش انا وغيث هنا وغيم ببيتنا يمه غش خالتي ام عناد خذت اثنين من عيالك وهم خذو واحد
لحن : والله ياخالتي ابوي وامي قبل يزوجوني قالو بيجيبون زوجي يعيش معنا بس حنا طمعنا وخذين اثنين من عيالك
ضحكت ام غيث : يلا انا بطلع اكمل مع خالتي وانتم شوي وانزلوا
دخلت جنه مسرعه وصفقتهم خير تتزوجون وماتعلوني
لحن : انا بنفسي مادريت الا الصباح تبين اعلمك
جنه : خيانه
غيم : شفتي
آسيا: اسكتي أنتِ وياها وراكم خطبه بعد اسبوعين
سكتوا غيم وجنه وضحكوا نغم ولحن
نغم: ينصر دينك سكتيهم
اسيا: تحت الخدمه عميمه
نغم ضربتها : قلت لك اسمي نغم
-
< عند الرجال >
ابو عناد خلاهم يبنون الخيام بعد ما انتهوا ابو عناد عزم الكل وخبرهم بسبب العزيمه وانتشر خبر زواج لحن وغيث ونغم وعناد
غيث وعناد جالسين وعلى يمين عناد ابوه ويسار غيث ابوه
تيم وبداح يتحلطمون لان ابو عناد اجبرهم يضلون واقفين ويقهون الرجال وايهم وسعيد معهم
ابو مسفر : مبروك يابو عناد
ابو عناد : الله يبارك فيك يابو مسفر
ابو مسفر : الف مبروك منكم المال ومنهم العيال ياعيالي
غيث وعناد : الله يبارك فيك عمي
تيم وقف عندهم وقال : مبروك منكم العيال ومنهم المال
وقف عناد وهبده : لا تدعي يرحملي اهلك لا تدعي
تعشوا الرجال وطلعوا وانتهت العزيمه
غالب ماحضر زعلان عليهم
-
< عند الحريم >
طلعوا نغم ولحن وجلسو قرب امهاتهم ام عناد من شافتهم تحصنهم بقلبها
مضاوي : من متى غيث متزوج لحن
ام عناد : من فتره بس حنا خلينا الزواج عائلي عشانهم طلبوا يكون عائلي
مضاوي : ليه احد بيحسدهم اذا ماسووا زواج كبير
لحن : أنتِ بتحسدينا
تفشلت مضاوي وسكتت وام عناد تناظر لحن بعتاب
ام عناد : وش له هالكلام يمه
لحن : يمه وش دخلها تسال تراها زعلانه عشان غيث ما اخذ بنتها
ام عناد: الله يهديك
تعشوا الحريم وباركوا لهم وطلعوا
-
تقي اخذ اهله ورجعوا بيتهم الا تيم راح للعيال
دخلوا للبيت وشافوا البنات متجمعات عند ام عناد وام عناد ماسكه راسها مصدعه منهم
ام عناد : الله اللي جابكم خذوهم من عندي راسي يوجعني بسببهم
لحن وقفت وراحت ضمت عناد ونغم ضمت غيث
غيث : وش فيكم
لحن : امي مزعلتنا
ضحكوا : ابو عناد : رهيفه قلبي اعرفها ماتزعل احد انتم اللي مزعلينا وش مسوين لها
نغم : عمي ماسوينا شيء
ابو غيث : انطقوا وش مهببين فيه
لحن وخرت عن حضن عناد : الصدق ياعمي خلاص انسوا الموضوع
ابو غيث : ماتبين تسلمين علي ولا من شفتي عناد ركضتي عنده
استحت لحن وراحت حبت راسه : وش لونك عمي
ابو غيث : الحمدلله بخير وشلونك أنتِ
لحن : الحمدلله بخير
ضمها ابو غيث : جعلك دايم بخير يابوي أنتِ
ابو عناد : وانا يانغم ماتبين تسلمين علي
نغم سلمت عليه وضمها ابو عناد
لحن : خير ابوي
نغم : و أنتِ بعد وخري عن ابوي ليه ضامته
لحن : كل وحده تبعد عن ابو الثانيه بنفس الوقت
نغم : تم
وابعدوا وكل وحده هربت لحضن ابوها
ضحكوا عليهم وقال غيث: مالنا نصيب بالاحضان
نغم : انقلع
لحن: حرام عليك تكسرين بخاطره
نغم : اخوي يبي حضنك أنتِ
انحرج لحن وحمر وجهها ودفنت وجهها بصدر ابوها
نغم : بسم الله عليك وش قلت
غيث : ابد سلامتك ماقلتي شيء
ام غيث وقفت وحبت راس ام عناد : يالله حنا بنمشي انتبهي لنفسك ياخاله منهم الله يعينك كانوا انثين صاروا اربعه
غيث : ليه بنجي معكم
ابو عناد : انا حلفت ان تعيش معنا هنا وروحه لبيتك مافيه روحه واغراضك كلها بتنقلها وتجيبها
ام عناد : ياغيث انا من قبل ازوج بنتي قلت راح يسكن زوجها معنا ودام صرت انت زوجها بتعيش معنا
عناد : انا سمعت ان البنت هي اللي تطلع من بيت اهلها لبيت زوجها انتم العكس طلعتوا الولد من بيته لبيت زوجته وضحك
غيث هبده : وش قصدك
عناد : ابد سلامتك
ضحكوا عليهم وطلعوا ام غيث وابو غيث راجعين بيتهم
لحن وخرت ورمت نفسها على الكنبه : يمه ان...
قبل تكمل سكتتها ام عناد : يكفي يكفي اسكتي خلاص انتهى النقاش بعدين
لحن : طيب بس ترا بينفتح بكره الموضوع
عناد رمى نفسه قربها : وش موضوعه
لحن : العزايم
ام عناد وقفت وقالت : بروح انام ابرك لي من موضوعك التافه
راحت ام عناد وابو عناد لحقها
نغم : لحن حرام ازعجناها المسكينه
لحن : ترا امي متعوده دايم بعد كل عزيمه ازعجها اساله وبعد اتحلطم
غيث : عناد كلموني العيال نروح عندهم للخيمه بيسمرون ويشبون نار
لحن : خذوني معكم
نغم : وانا بعد
عناد : اقول أنتِ وياها اجلسوا وين تبون عند العيال
لحن : جعل النار تنطفي
نغم : جعل سمرتكم تخترب
لحن : بعدين أنت متصاوب وش له تروح
شهقت نغم : وين متصاوب من اللي اطلق عليه
لحن : انا
نغم : تكفين متى وليه ماعلمتيني
لحن : امشي ناخذ ورق عنب وحلى وقهوه ونطلع للسطح وبعلمك
عناد : جعله مايحدر
لحن : استغفر ربك ليه تدعي
عناد : نفس مادعيتي على سمرتنا وتبون تاخذون صاحبي تحشون فيه
لحن : وبعده دورك وش عليك انت
طلعو للسطح وغيث وعناد طلعوا للعيال
-
<خيمه العيال >
بعد السؤال عن الحال والسوالف جلسوا محاوطين النار
مازن : غيث من زمان عن صوتك اطربنا
غيث : ابشر
مع مساء الخير والغيم غطاك
يا اول طريقٍ في حياتي سلكته
أنت اللذي افرح بشوفتك ولقياك
وانت اللذي لجلك قصيدي كتبته
على خطاوي تتجه صوب ممشاك
ناظرت في عينك وزولك لمحته
البارحه شفتك ويا زين ملقاك
ياكيف موضوعي معك ما فتحته
يازين وجهك مع عذوبه محياك
ياماخذٍ قلبي وعقلي سرقته
لا من طرو عنتر وعبله وشرواك
كني ورا جولٍ وروفي طمرته
يعني من الاخر طيوفك وطرياك
لا منهم مرو شماغي فهقته
مير الغلا والحب في همسه شفاك
ياللي سرقت القلب مدري ملكته
يكفيني اخذ جلسه بوسط مركاك
ويكفيك في غيث انك حضنته
ماني بتابع بس سبحان الادراك
اللي مخلي في طريقي حركته
عناد : ودك نرجع صارت الساعه متاخر واشوفك تعبت
غيث : اي والله تعبت من البارك مانمت
عناد وقف ووقف غيث معه : عاد حنا بنستأذن
مازن : تو الليل بدا يزين
غيث : والله اعذرنا ياخوي ودي ارتاح من البارح مانمت
عبدالله: ابد عذركم معكم وبعدين انتم توكم عرسان
ركبوا سياره عناد راجعين للبيت لان المخيم بعيد شوي عن المدينه
-
< عند لحن ونغم >
ماجاهم نوم وطلعوا للحديقه لحن عرفت نغم على الورد اللي زوعته مع عناد
نغم : الله يجنن كل هذا أنتِ زرعتيه
لحن : اي وش رايك
نغم : يجننن ابغى ازرع
لحن : في ورد طلبته بنزرعه مع بعض لمن يوصل وش رايك
نغم : ابد جاهزه
دخلوا غيث وعناد وسمعوا صوت في الحديقه ومشوا بدون مايطلعون صوت شافوهم البنات قرروا يسوون فيهم مقلب
غيث تلثهم وعناد بالمثل واخذو اثنين من الحطب مرميه وهجموا عليهم
لحن شافتهم وصارخت ونغم ركضت بيغى تهرب للداخل
عناد ضحك وانتبهت لحن لضحكته وعرفته
لحن : الله ياخذكم للجنه ليه متلثمين وداخلين كانكم حراميه
نغم رجعت وهي تمسح دموعها : والله ما اسامحكم
ضمتها لحن تهديها وغيث وعناد رموا اللي معهم وشالوا اللثمه
ابو عناد طلع على صوت الصراخ وشافهم وعصب : انتم باقي صاحين كل واحد ياخذ حرمته ويمشي غرفته يلا قدامي
لحن : يبه هم
ابو عناد : بكره يالحن خذي زوجك وعلى غرفتك
لحن : مابي خله يخيس هنا
وطلعت لغرفتها
ابو عناد : وراها ياغيث وانت خذ نغم وامش قدامي
عناد : ابشر
مسك يد نغم وتوجه لغرفته نغم توترت اول مره احد يمسك يدها غير اخوانها
-
<غرفه لحن >
دخلت وتبعها غيث
لحن: غير وش تبي
غيث : ابغى زوجتي
لحن : انقلع ماعندك زوجه
غيث : لا ماني منقلع وش تسوين
لحن خذت مخده ورمتها له : نام على الاوض
غيث يبغى يستعطفها : انا تعبان تكفين بنام عندك جسمي متكسر ومانمت طول الاسبوع اللي كنت بعيد عنكم واحس فيني حراره و أنتِ صاوبتيني في كتفي والثاني متصاوب بعد
لحن كسر خاطرها وماحبت تبين ليه وقفت وراحت عنده تشوف لحرارته وصدق طلعت مرتفعه شافت لجراحه وشهقت : انت ماتنتبه تعال اجلس بغير لك الشاش
غيث عجبه الوضع وجلس جابت شنطه الاسعافات وغيرت ضماده وحطت له كماده وخفضت من درجه بروده المكيف وغطته زين
غيث : تعالي نامي جنبي
لحن : مافيني نوم نامت أنت
غيث : تذكرين لمن كنا عند الحلال
لحن : اي
غيث : وقتها كنت مصاب بيدي بس الرصاصه خدشت يدي والجرح مب ذاك بس وقتها ارتفعت حرارتي وصدعت مدري ليه و أنتِ لمن لعبتي بشعري وسويتي لي مساج قدرت انام
لحن : تبيني اسوي لك مساج تنام الحين
غيث هز راسه : تكفين تعبان
لحن وقفت وراحت للجه الثانيه للسرير ودخلت معه بالفراش وقربت صوبه هو بسرعه من شافها قربت حط راسه على صدرها وضمها
هي توترت بس مابينت ولعبت بشعره حتى نام وهي نامت
-
<غرفه عناد >
دخلوا وقفل الباب واخذ مخده بينام على الكنبه
عناد : تقدرين تاخذين راحتك على السرير انا بنام هنا و أنتِ على السرير
نغم : بيكفينا انت تنام بجهه وانا بالجهه الثانيه عادي وبعدين هذي غرفتك وهذا سريرك
عناد : صار لنا
نغم : دامه صار لنا ليه تنام هناك
عناد : قلت يمكن تتضايقين
ابتسمت نغم من تصرفه فكر فيها هي مافكر في نفسه واحترم مشاعرها وقرارها
خذت المخده منه ورجعتها على السرير : مثل ماقلت لك
عناد ابتسم وتوجه لمكانه وهي راحت للجهه الثانيه
فجاه يسمعون صوت كلاب وصوت الرعد والبرق جلست وضمت اللحاف عناد شافها وسالها : تخافين
نغم هز راسها : اي
عناد : لا تخافين انا معك ارجعي نامي
نغم نزلت دموعها : مقدر انام
عناد تجرأ وسحبها وضمها هو تعبان يبغى ينام : الحين تنامين
نغم توتر من قربه وانه ضمها بس حست بالامان بحضنها وكل ما اشتد صوت الرعد عناد يغطي اذانها بكفه ويضمها اكثر لين نامت ونام عناد
.
.
سبحان الله وبحمده
سبحان الله العظيم
أنت تقرأ
أنت العوض لا صارت حظوظي شحاح وأنت الهنا ياغايتي والغنايم
General Fictionلحن تلد بعد ثلاث عيال ويزعل ابوها ماكان يبغى البنت يبغى الولد ورماها لجدها ابو امها وسماها سود الليالي يربيها خالها ويعتبرها وطنه مو بس بنته ويخاف عليها من نسمه الهوى
