أنت العوض لا صارت حظوظي شحاح وأنت الهنا ياغايتي والغنايم

Part 10

لا تدور عذر ترجع .. مستحيل
قلبها اللي بار من جرحك : عصى
.
.
صحت لحن على صوت المطر مع آذان الفجر والمطر مستمر صلت فرضها وطلعت تركض للحوش فكت شعرها وتتمايل تحت المطر مرات تلعب ومرات ترقص وشعرها يلعب معها تحت المطر رجعوا من المسجد غيث شافها وضل يتأملها وعناد ركض عندها وشاركها باللعب وابو عناد ابتسم عليهم من طفولتهم يشوفون المطر يطلعون يلعبون
ابو عناد : لا تطولون تحت المطر لا تمرضون
غيث واقف مكانه ماتحرك وام عناد وابو عناد يناظرون لهم من الشباك ويدعون ربي يحفظهم
عناد مسك يدينها وباسها كانت بارده ومبلله وهي تضحك مستانسه وضل يغني لها ويدور فيها عناد من صغرها كان يدلعها يشوفها دلوعته وتستاهل كل الدلع كان يرقص معها تحت المطر ويغني لها دايم من صغرها مع ضوء البرق مسكها عناد ويضحكون ويرقصون ويغني لها
ياعساني ما خلا منك من حلاك وذوقك وفنك
حسن وجهك لا ضحك سنك يافديته مالي بغيره
الشفق لونه من وجناتك والورود تحب نسماتك
الله اللي جمل صفاتك كملك وابدع بتصويره
وغنوا مع بعض ماتنسى كلماته لها ويهي تبتسم اسعد اوقاتها وقت المطر مع عناد
كنك بارق ليل في نوه ايتكاشف في السماء ضوه
يتبعه من ودّه ودوّه لو يخلي الدار والديره
ياوليفي والعمر فاني خلك قريب على شاني
كل شيء يهون في الدنيا غير فرقا اعز خلاني
غيث حس بغيره من عناد وده انه مكانه وتضحك معه مثل ماتضحك مع عناد او امها وابوها  ونغم قرب بيدخل للبيت شاف ملابسه انعدمت من المطر شافته لحن ركضت عنده مسكت يده ووقفته معها هي وعناد
لحن بابتسامة : العب معنا
غيث ماقدر يسوي شيء يلبي طلبها يتجاهل طلبها ويدخل بس ابتسامتها خلته يخضع لطلبها لحن ماتركت يده ابد ضلت ماسكتها وتغني وتلعب
لحن: عنادي وش باقي كلماتها عناد ابتسم عليها ووسحب يدها من يد  غيث
عناد: بنتي لي انقلع لا تمسك يدها تفهم
لحن ابتسمت من غيرته عليها ورجعت مسكت يد غيث تبي تقهره وقالت : تذكرتها عناد خلاص مايحتاج تذكرني ورفعت كفها وكف غيث تقهره تحب تشوف غيرته عليها
اه ياخلٍ تمنيته اه ياليته ويا ليته
يوم حب ويوم حبيته يرسل اعذاره وتبريره
غيث جازت له البيتين وحفظها وشد على يدها اكثر وسحبها يدخلها بردت وطولت كثير تحت المطر
لحن : باقي ابغى العب
غيث : خلاص طولتي حيل تحت المطر بتمرضين ادخلي غصب 
عناد : اقول اترك يد بنتي واللي تبيه بنتي حاضر ولبيه وسمي
غيث : ماني بتاركها وش تسوي
عناد : بنتي تبين تلعبين اكثر
هزت راسها لحن بايه : ايوه باقي ابغى ماشبعت من المطر
عناد قرب وسحب يدها من يد غيث وحطها وراه : بنتي ياغيث ماتنغصب على شيء هي ماتبيه تفهم لا تحسب اني تغاضيت وسكت معناته اني راضي على طريقه زواجكم اذا أنت بتتحكم فيها وكل مره تامرها تسوي اللي هي ماتبيه لانك أنت تبيه وقتها بتلاقيني قدامك تفهم
انا طول عمري ماغصبتها على شيء هي ماتبيه كل اللي تبيه يجيها لين عندها ولا بعمري امرتها تدخل او توقف لعب تحت المطر عشان تجي أنت وتامرها توقف لعب وتدخل
غيث : صارت زوجتي وتسمع كلمتي تفهم وبعدين بتمرض أنت مجنون تبيها تمرض
عناد : غيث لا تلعب على نفسك هي زوجتك بس بالاسم مستحيل تعتبرك زوجها
غيث : غصب عنك ياعناد هي صارت زوجتي والكل يدري انها زوجتي
لحن خافت من عليت اصواتهم وطلعو ام عناد وابو عناد ونغم وشافوهم شوي وبيهجمون على بعض بيذبحون بعض
عناد : راح تطلقها صدقني راح تطلقها تحسب اني ماعرف بكل شيء قلته انا سمعت كلامكم وشفتكم في الحديقه لمن طلبت منك الطلاق وانت قلت لها راح اطلقت متى مابغيتي وهي قالت لك اذا مسكت الكوبرا بتطلقها
غيث عصب ومسك ياقه عناد : طلاق ماني مطلق تفهم شيل فكره الطلاق من راسك ماني مطلقها ولا عاد تدخل بحياتها هي الحين زوجتي وبسوي اللي ابيه انا وكلمتي تمشي
عناد شد قبضة يده وبيده الثانيه وخر يد غيث من ياقه ثوبه ووجه له لكمه بخشمه خلته ينزف شهقوا البنات وخافوا
غيث رجع لعناد اللكمه ورجع عناد لورا عناد قرب بيكمل عليه بس وقفته لحن من ضمته وقف وهدأ من ضمتها ناظرها شاف دموعها مسحها لها نغم ركضت عند اخوها تشوف دمه بكت وضمته ابو عناد وقف بينهم عصب  وضرب بعصاه الارض : مالي وجود بينكم ماتحترمون وجودي تتضاربون كنكم بزران وش السبب اللي خلاكم تتضاربون فهموني
لحن كرهت نفسها لانها كانت السبب بالمشكله وكرهت غيث اكثر وحقدت عليه ليه يضرب عناد ناظرته بكره وغيث فهم نظرتها وتجاهلها ودخل وقبل يدخل لف لابو عناد وقال
غيث : محشوم ياعمي
ابو عناد : الكل يدخل ويبدل ثيابه ويجيني بالصاله تفهمون
الكل لبى طلبه المطر لسى  ماوقف والسماء مغيمه والشمس مختفيه وصوت الرعد والبرق اعتلت اكثر لحن عندها فوبيا من صوتها بس تحب المطر ولمن تسمع صوتها تضم عناد تحس بالامان بحضنه
هي من صغرها متعوه تنام بحضن عناد وكبرت وماتخلت عن عادتها عناد من حبه لها لو تطلب عيونه عطاها هي عنده كل شيء في حياته هي ملاذه ولحنه ووطنه هي مثل الوطن له وهو المليك يشوفها مثل الحاكم اللي دون شعبه نهر جاري وهو مثل الصامل اللي دون حاكمه يتفدا
لحن دخلت الغرفه وشافته بدل ملابسه وبيلبس التيشيرت غضت البصر وتوجهت لغرفه تبديل الملابس خذت لها ملابس وراحت الحمام (وانتم
بكرامه) تتروش خلصت ولبست ملابسها وجففت شعرها فجأة عطست اكثر من مره انتبه عليها بس تجاهلها لفت الفوطه على راسها وطلعت توجهت للصاله جلست قرب عناد وهي تعطس وعناد يعطس طلع غيث وشافهم يعطسون تجاهل وجلس ام عناد شافتهم اثنينهم يعطسون هي متعوده من صغرهم يعاندون لين يمرضون مع بعض وصارت وقت يجي المطر تسوي لهم مشروب ساخن يشربونه
عناد : ياحميد شكلنا بنتورط وبنمرض
نغم وغيث مصدومين من حميد ذا ضحكت لحن على صدمتهم
لحن : شكلنا صدق بنمرض
ابو عناد : المشب جاهز لكم تنحجرون هناك حتى تتشافون
نغم : من حميد
لحن : بقولها وبكل فخر واعتزاز انا
نغم شرقت بالحليب وكحت وغيث يضرب على ظهرها ويسمي عليها
ام عناد : بسم الله على بنيتي تنفسي يمه باقي ماشفتي شيء الله يسلمك من صغرها تقول انا اسمي حميد نادوني حميد والخبل عناد يغني لها ويعزز لها وش اغنيته ياحازم
ضحك ابو عناد ماينسها : ياحميد ياحميد شسوي الغيره تزيد
لحن وقفت وكملت الاغنيه وهي رايحه تاخذ جوالها وترجع وقفت بنص الدرج وغمزت للنغم وعناد وتتمايل بيدينها وهي طالعه لغرفتها وتغني : لا حول لا حول اغني له اغاني نغم عيار ثاني وسيرة الحب وصولو دندنه
عناد رماها بعلبه المنديل:  اطلعي و أنتِ ساكته مو لازم تغنين
ام عناد مسكت راسها منهم : ياحازم بيمرضون ويجننونا نفس كل سنه
لحن : يمه وش دعوه وركضت تجيب جوالها ونزلت تتمايل وتكمل الاغنيه لين وصلت عند ام عناد ومسكت يدها توقفها وتدور فيها ياحميد ياحميد شسوي الحيره اتزيد اخوك مقيد الايد اروح فدربها ولا اتركه لا حول لا حول بغيناها مزوحي تنسينا الجروحي وتاري  كنت غلطان انا لا حول لا حول حسبنا وما حسبنا ياكيف بسرعه ذبنا واشرت على نغم قليبي ضعيف بين معدنه ( هذا الحدث انا اسويه بنفسي كل يوم بالدرج وانا طالعه او نازله اغني وارقص )
عناد يصفق ويصفر : عاشت ام عناد وبننته
ابو عناد : أنت بتسكت فجرت روسنا بالتصفير
لحن تعبت وعصست اكثر من مره وعناد شاركها بالعطس وام عناد متلثمه وابو عناد بعد نغم غطت وجهها وغيث يناظرهم وش ذا التخاطر حتى بالعطس
ابو عناد: لا بارك الله بعدوكم قدامي على المشب وكل شيء بيجيكم
غيث : ليه بتحبسهم
ام عناد : ياولدي سلمك الله هم كل مره كذا من يجي المطر ويتعبون يضلون اسبوع كامل مرضانين عمك يجي لهم دكتور يكشف عليهم ويصرف لهم ادويه وهم بمكانهم بالمشب وعشان مايعدون اهل البيت يضلون هناك
لحن : لكذا خذيت جوالي وبروح اخذ عفشي الباقي ونغم لا تقطعينا من السوالف كل يوم تعالي ونسيني عند الشباك مثل اسيا
نغم : ابشري اسيا ليه ماجت
ام عناد : اسيا احذر مني ومنك تخاف المطر وماتطلع بالمطر تضل حبيسه غرفتها ولانها عارفه المقرودين ذولا بيمرضون تبعد عنهم اسبوع تجي زياره ساعه تتشمت عليهم وترجع
نغم ضحكت : عارفتهم
عناد سمع ضحكتها وتجرأ يناظرها ولاول مره تطربه ضحكه احد غير لحن ضل يتاملها لين قطع عليه عطسه لحن وعطس معها وهل المره العطسه جت قرب ابو عناد وفز ابو عناد
ابو عناد : انا ابو عنادوالله ان تنقلعون الحين للمشب وكل شيء بيجيكم
لحن : طيب يبه صمني
ابو عناد : بعدين اضمك واشبعي بضمتي لك بس مو الحين
ام عناد : هش هش يلا للمشب
عناد : يمه ترانا انس مو غنم تهشين علينا
ام عناد : اسكت وامش
لحن : مطر برا ماوقف والمشب لازم نطلع للحوش وانا زوجي منعني من الطلعه وش الحل
ام عناد : خذيه معك
غيث : هاه لا مشكو... وقبل يكمل كلامه عطس
ضحكوا وعناد صفق وهز بكتافه : احلى بيجي معنا للمشب
ابو عناد : ياسبحان الله شفتي يبه حتى زوجك معكم
لحن : لحضه خلني افهمك الموضوع شوي عطني فرصه
ام عناد : بلا استهبال  وخذي زوجك معك
لحن : مابيه خلوه معكم
ابو عناد وقفهم الثلاث بالعصا واشر على الباب
غيث : عمي انا وش دخلني معهم عطسه بسيطه وش بكم
نغم تضحك وتناظرهم وهي متخبيه وراء ام عناد : هش هش معهم أنت الثاني
ام عناد : كفو بنيتي السنعه مو ذيك النسره
لحن : يارب كثر من التماس الكهرب بالمدرسه وتحترق واخلي امي تشوف النسره وش تسوي
بعد ماكملت دعوتها جاتهم رسايل باحتراق المدرسه كامله وتعلقت الدراسه لمده شهرين وتتحول الدراسه عن بعد
عناد قراءة الرساله وضحك : والله ان دعوتك استجابت يابنت ادعيلي
لحن : ليه وش صار
عناد علمهم بخبر المدرسه وضحكوا البنات ونغم صاحت عليها : ادعيلي تكفين عاد أنتِ مريضه ووقت مطر ادعيلي
لحن : هاتي فلوس
نغم : حتى على الدعاء تبين فلوس انقلعي ادعي انا لنفسي
ابو عناد : يلا قدامي امشوا للمشب
ام عناد : الله يستر من دعاويك يالحن قبل المدرسه بيوم دعيتي تلتمس ومابداومين  اسبوعين والحين تحترق واحترقت ومافيه دوام لمده شهرين
لحن : الحمدلله
غيث : ادعي على الكوبرا
لحن : يارب تقدر تمسكه وانت بخير وسليم ماتجيك اصابات ولا طلق ناري  والرصاص يبتعد عنك ويتجه صوب اعدائك
غيث ابتسم : آمين
ام عناد : وش ذا الدعوه
لحن : ادعي له مايتضرر مره ثانيه لان يقولون الثالثه ثابته
ام عناد : ماتصوب الا مره وكله منك يالنسره
لحن : يمه لا تذكريني هو السبب صدمني بالخبر وانا معي السلاح
ام عناد : وش يعرفه المسكين انك مجنونه وبايعتها
لحن : يمه عشان يعرف اني بايعتها واسويها مره ثانيه
نغم : تدربي بعيد عن اخوي تكفين باقي ابغاه
ابو عناد : قدامي على المشب لا بالعصا عليكم
طلعوا للمشب وهم يعطسون وام عناد ونغم جابو لهم كل اللي يحتاجونه ودخلوها لهم من شباك المشب الكبيره
لحن : يمه ابغى ايبادي
ام عناد : بيجيك بس ابعدي واذا طقينا الشباك افتحوا خذوا الاكل بعد مانمشي
لحن : حسستوني انا بسنه كورونا وحاجرينا
ام عناد : هذا اشد من كورونا
لحن : يمه بديت اصدع وأزكم تكفين ما ابغى ازكم
ام عناد : خلي اللهب بالمطر ؛ومشت راحت جابت ايبادها وبطانيتها الخاصه فيها وشواحنها ومخدتها اللي تحبها لحن
-
<بيت ابو تيم >
اسيا : اقص يدي اذا لحن وعناد امرضوا وامي وابوي حبسوهم بالمشب
غيم : دقي عليها نطقطق عليها
دقت اسيا سناب وفتحت الكاميرا ولحن كانت منسدحه وراسها على ركبه عناد فتحت المكالمه
لحن : خير وش بغيتي يالملسونه الملقوفه
اسيا : اشوف المشب وعناد معك
لحن : لا ابشرك وغيث معنا
اسيا ضحكت : تستاهلون ولا خذيتي زوجك معك المسكين
لحن : اقول اسكتي لا ادعي عليك مثل دعوتي للمدرسه
غيم : وش صار للمدرسه
لحن : ابشركم احترقت وتعلقنا شهرين
شهقت اسيا : بذمتك
لحن : شوفوا الرسايل
عناد سحب الجوال منها : خير داقين تضحكون علينا ياقليلين الادب مافيه احترام لعمكم
اسيا : بالله اسكت قال عمنا قال أنت خلني اناديك عمي عشان احترمك
عناد : وقت المصلحه اشوف عمي تقطر من لسانك
آسيا: طبعاً ولا انت وجهك وجه عم اقلب وجهك زين
عناد : لحن ادعي عليها
لحن رفت يدينا : يارب زوج اسيا بسرعه يارب وش تبي ادعي عليها بسرعه علمني
عناد : خليني افكر
لحن : بسرعه
عناد : اي تطيح قدام زوجها بليليه زفتها
ضحكت لحن : يارب اسيا تطيح بليله زواجها قدام المعرس وقت زفتها يارب
اسيا : بسم الله علي من دعاويكم
لحن : احترمينا
آسيا: اسحبي الدعوه
لحن : كيف اسحبها راحت ماترجع
اسيا : تكفين استغفري
لحن : من قطوتي قولي مياو
اسيا: تعقبين وتخسين
لحن : ام وش ادعي بعد
اسيا: انا قطوتك مياو
ضحكوا عليها عناد : سجلت والله لا ابتزك يومياً به وتسمعين الكلام
اسيا انقهرت : الله لا ياخذكم ياحقيرين انقلعوا يالمريضين
قفلت اسيا بوجه لحن وطلعت لغرفتها
-
<بيت سابر >
ماتوصل معك عبد الملك
عزيزه : لا مسوي لي حضر ومغير رقمه
ساير : تتوقعين وش اسم بنتنا
عزيزه : وش جاب طاريها الحين وش مذكرك فيها
ساير : حلمت فيها
عزيزه : دايم تحلم فيها مو غريبه
عبدالرحيم : توكم تتذكرونها
ساير : وش دخلك انت
عبد الرحيم : انا رياح عندها الحين
ساير : ان رحت عندها لا انت ولدي ولا انا اعرفك تفهم
عبدالرحيم: أنا اصلا ماني معتبرك ابوي عشان تتبرا مني ترا وجودك مثل عدمه عندي
عزيزه : ابوك احترمه لا تصير عاصي والدين
عبدالرحيم : انتم الحين تسمون نفسكم بحسبه الوالدين انا امي وابوي ماتوا من اليوم اللي رميتوا فيه اختي
ساير عصب وبلحضه غضب قال : ان شفتها جعلك للموت
شهقت عزيزه بخرف : استغفر الله انت الحين معصب بتندم بعدين لو يصير له شيء
عبد الرحيم : الموت ارحم من مقابلكم وطلع من البيت متوجه للديره
ساير ضل يستغفر لانه معصب ومايبغى يخسر ولده
-
< بيت ابو عناد >
ام عناد تجهز الغداء مع نغم وحطوا غداء الثلاثي المريض بصحن واخذته نغم دقت الشباك فتحت لحن واخذت الصحن ودخلته لهم
وقالت : نغمتي وين السلطه حقتي
جابت ام عناد اكل لحن لانها طبخت اليوم دجاج ولحن ماتاكله تتحسس منه
ام عناد : هذا غداك يمه
لحن خذته وارسلت لها بوسه من بعيد
ام عناد : كيف حرارتك يمه
لحن : مو مره مرتفعه
ام عناد : ابوك كلم نياف وقال انه بيجي يشوفكم
لحن : حركات صار عندنا طبيب خاص فينا اخوي دكتور
ام عناد : يلا تغدوا وحطوا الصحون بالشباك وانا بجي باخذه وناموا
تغدوا وبعد ماخلصوا
غيث : والحين ابغى الحمام وانتم بكرامه
لحن : تطلع للحمامات الخارجيه حقت الرجال
طلعوا كلهم للحمام وانتم بكرامه ورجعوا
لحن ماتحملت الحراره وحطت راسها على كتف عناد وعناد ارتفعت حرارته وضمها يحس بالبرد غيث ماجاه شيء من شافهم تعبانين قاس حرارتهم طلعت مرتفه ارسل لنياف بوضعهم ونياف جاء وكشف عليهم غيث سليم بس عناد ولحن تعبوا ولازال العقاب لغيث معهم سحبها غيث وحطها بحضنه وحط الكماده البارده لها وعناد بعد قرب صوبه وحط له كماده بارده انخفضت حراره لحن وصحت شافت عناد نايم وتعبان وشافت انها بحضن غيث بعدت بعد ماشافت عناد يصب عرق ويصيح باسم نواف
عناد يحلم بنواف ياخذ  لحن منه ويناديه : نواف تكفى اترك بنتي لا تاخذها نواف نواف تكفى نواف
لحن خافت عليه من موت نواف تجيه كوابيس موت نواف مات قدام عيونهم مانسوا موتته نياف وغيث وعناد يشوفون خويهم ينقتل قدامهم وماعرفوا مين لين كل واحد كبر وافترقوا عن بعضهم وعرف غيث مين القاتل وخبرهم
لحن ركضت عنده وضمته تهديه كل ماجاه كابوس مرعب عن نواف تضمه لين يهدأ وتسمي عليه وتقرا بعض من الايات القرآنية حتى يرجع ينام
لحن : عنادي خلاص تكفى لا تخوفني عليك
غيث يناظر صاحبه ومايقدر يسوي شيء سمعوا صياح عناد باسم نواف طلعوا شافوا لحن ضامه راسه وتقراء عليه
عناد يصيح نواف اترك بنتي لا تاخذها لا تاخذها معك هي ملاذي ووطني من بعدك نواف خذني انا واتركها
لحن تهزه عشان يصحى لا تعب تجيه الاحلام
صحى عناد خايف وشاف لحن ضامته وتقرا عليه وابو عناد يناظر ولده وحاط يده على قلبه من خوفه على ولده مو اول مره يشوفون عناد يصيح بحلمه
عناد ضم لحن اكثر وبكى ولا استحى انه يبكي 
غيث حس ان عناد مثل  الطفل الصغير وبحضن امه تهديه من البكى لحن بكت معه وضمته اكثر باست راسه : لا تخاف انا هنا معك محد بياخذني منك انا معك عنادي يابوي انت
عناد : لا تخليني
لحن : انا معك يبه لا تخاف
ام عناد تبكي على حال ولدها اللي تغير عقب موت نواف ونغم خاف اول مره تشوف عناد كذا هي تذكرت غيث لمن تجيه حراره يحلم بنواف ويناديه بمنامه وخافت على غيث بس تطمنت من وجود لحن قربهم لانها واثقه بلحن ماراح تتركه ومثل ماخافت على عناد اكيد بتهتم بغيث وقف المطر شوي هداء عناد ونام ولحن نامت وغيث تاملهم لين غفى ونام بعمق
.
.
سبحان الله وبحمده سبحان الله العظيم