අසීමාන්තික | | "UNCONDITIONALLY"

හතලිස් එක් වන දිගහැරුම

"මිසිස් බුලත්සිංහල, අපිට මේ ගෙදර සම්පූර්ණයෙන් ම පරීක්ෂා කරන්න කියලා වරෙන්තු නිකුත් වෙලා තියනවා."

"Whatt? No.... අපේ ගෙදර චෙක් කරන්න. ඒ මොකටද?"

අම්මත් අතේ තිබුණු රිමෝට් එකෙන් ටී වී එක මියුට් කරන ගමන් ඉස්සරහට ආවාම මාමායි නැන්දයිත් පිටිපස්සේ ඉඳන් අඩි කීපයක් ඉස්සරහට ආවා.

"මට කනගාටුයි මෙහෙම එකපාරටම කඩා පැන්න එකට. ඒත් මේක මගේ ජොබ් එක මැඩම්. අල්ල ගන්න එන්නම් කියලා හොරු අල්ලන සිරිතක් මට නැහැ."

"හහ්.... mind to whom you are speaking මිස්ටර්. අපි වින්දිතයෝ මිසක් අපරාධකාරයෝ නෙවෙයි."

"මෙතන මම වින්දිතයා විදිහට සලකන එකම කෙනා මිස්ටර් අශෝක් ඉන්ද්‍රචාප බුලත්සිංහල විතරයි මැඩම්. ඒ ඇරුණාම ජීවත් වෙලා ඉන්න අනිත් හැම මනුස්සයා දිහාම මම බලන්නේ වපරැහින්...."

"මම එයාගේ වයිෆ් ! ආශා චේතනී බුලත්සිංහල. මමයි තමුන්ව මේ කේස් එකට හයර් කළේ.... දැන් තමුන් මට මෙහෙම කතා කරන්නේ කොහොමද?"

"මම ආයෙත් කියනවා මැඩම්, මම වින්දිතයා විදිහට සලකන එකම කෙනා, තමන්ගේ ජීවිතෙන් වන්දි ගෙවපු මිස්ටර් අශෝක් ඉන්ද්‍රචාප බුලත්සිංහල විතරයි. අනිත් කිසිම කෙනෙක් මට අදාල නෑ... ඒ එයාගේ වයිෆ් උනත්.... සහෝදරයෙක් උනත්... පුතා උනත් !"

අන්තිම වචන දෙක තුන රාමනායක අන්කල් කිව්වේ ඇස් කොනකින් මගේ දිහාත් බලලා.

මොකක්...? පුතා උනත්? ඔයා එහෙම කියන්නෙවත් කොහොමද අන්කල්?

"අනික මිසිස් බුලත්සිංහල, ඔයාටත් ඕනේ මේ කේස් එක සාධාරණව විසඳන්න නේද? ඇයි දැන් ඔයාම අපේ රාජකාරිවලට බාධා කරන්නේ?"

"මොනවද මෙතන සිද්ධ වෙන්නේ?"

ඇතුලේ කාමරේ ඉඳන් ආච්චිත් ස්වීටරේකුත් ඇඳගෙන සාලෙට ආවේ කලබලේ මොකද්ද බලන්න.

"අපිට මේ ගෙදර පරීක්ෂා කරන්න වරෙන්තුවක් නිකුත් වෙලා තියනවා."

"හහ්..... මට නොකියා මගේ මන්දිරේ අහුමුළුවල කරක් ගහන්ඩ.... උඔලා හිතුවා මදි.... මම සර් විජේකෝන් ගේ භාර්යාව බව අමතක කරන්ඩ එපා. මම මැරෙන කල් මේ ගෙදර දුවන්නේ මගේ අණට. දැන් ම දොට්ට බැහැපල්ලා පඩත්තර පොලිස් කාරයෝ ටික..."