يا عواصف الدنيا هُبي..وطيري مع هبوبك سنيني

P1

بديره كبيره مره ، قريبه من الرياض ،سكانها عايشين بهدوء عايشين على الطبع القديم مايحبون التطور ولا يهوونه..ببيت كبير بوسط هالديره عايش فيه الجد سليمان وزوجته وولده صالح..
اما ولده ابو يوسف عايش بنفس الديره وبيته قريب من بيت ابوه..
وابو بدر عايش بمدينه الرياض مع اهله ويزور ابوه بين فتره وفتره..

ببيت الجد سليمان العصر:
طلعت ليالي من غرفتها وهي لابسه قميص قصير شوي وشعرها لافته ببكله ورافعته فوق وبيدها الحناء وتنادي:جدتي جدتي جبت الحناء
الجده وسن كانت جالسه بالمجلس وقالت:انا هنا تعالي يا بنتي
تقدمت ليالي وحطت السفره وجلست وهي تحط الحناء:عطيني يدك احنيها لك
مدت الجده يدها وبدت ليالي تحنيها ونطقت ليالي:جده ارسم لك هلال على يدك، ؟ عشان رمضان قريب وتعرفين يعني ؟
الجده هزت راسها بالنفي: لا لا يا بنتي وش هلاله وخرابيطه الحناء الي باليد ما ينرسم فيه ،
ليالي:بكيفك انا ابي اقول لامي ترسم على كفوفي هلال ،
دخل عزام :السلام عليكم
ردو السلام وتقدم يقبل راس جدته ويجلس عندهم ، نطقت الجده:ها يا عزام شريت مقاضي رمضان الي قلت لك هذيك الي بالصناديق ووزعتها لاهل الحاره ؟
عزام:ايه يا جده وزعت 50 صندوق على حارتنا ،
الجده:عشت عشت يا ولدي ،وصقر وينه ماشفته اليوم؟
عزام بعدم معرفه:مدري حتى انا ماشفته ،
دخلت ام عزام وبيدها القهوه والشاهي وجلست عندهم:جبت لك القهوه يا عمتي تتقهوين وتوسعين صدرك ،
الجده : عشتي يمال الغناه ،
ليالي بعد ما خلصت من وضع الحناء على يد جدتها التفتت لامها:يمه تكفين ارسمي لي على يدي هلال رمضان ،
ام عزام:معرف يا بنتي قولي لعزام ،
ليالي التفتت لعزام: مايعرف !
عزام رفع حاجب: انا ما اعرف؟
ليالي:ايه ؟
مد عزام يده: عطيني ارسم لك افضل هلال بتاريخ المجره اخلي اي شخص يشوفه يقول مين الرسام المُبدع الي رسم لك هالتحفة الفنيه ،
رفعت حاجبها ليالي:والله؟ ماظنتي !
عزام اخذ الحناء ومد يده: اقربي اقربي اوريك ،
قربت وقعد يرسم على يدها انبهرت ليالي وهي تشوف رسمه :واو ما توقعت انك تعرف !
عزام بشوفه نفس: شفتي ؟ وش قلت لك انا !
بحماس قالت ليالي:الله بالله ارسم على يدي الثانيه !
عزام بتعَالِي: كم لي ؟
ليالي بصدمه : يا الطماع تاخذ من اختك !
عزام بضحكه: احمدي ربك رسمت وحده مجانيه والثانيه بفلوس تبين ولا انقلعي ،
مدت ليالي يدها : هفف طيب كم تبي ؟
عزام بضحكه: 300﷼
بققت عيونها بصدمه : 300﷼ يالظالم ! النقاشة تسويه بربع هالسعر تستهبل صح؟؟
رد عزام : بكيفك تبين ؟
وقفت ليالي :والله ما ادفع 300﷼ لو تموت !
مشت وضحك عزام : امزح امزح تعالي يالزعوله بسويه لك ببلاش بس لاتبكين ،
رجعت تجلس : غصب ،
رفع حاجبه: هاه ؟ وش قلتي ؟
ليالي بتصريف: اقول غصب اقعد قدامك و أتأمل جمالك ؟ ياخي عور عيوني !
عزام بتسليك: اييه ادري ان ما فيه مثلي ابدًا !
ليالي بهمس : اكيد الكلب ما من مثله ،
طالعها عزام بنص عين : قلتي شي ؟
ليالي هزت راسها بالنفي :لا استغفر بس ،
عزام :اشوى ،
بهاللحظه دخل صقر وبيده كيسين مليان لحم وقال:جبت ٣ ذبايح والمفروض كلكم تحبون راسي من الظهر وانا بسوق الغنم ادور لكم الذ ذبايح بتذوقونها !
الجده بعصبيه: ايا الي ما تستحي تبيني احب راسك ! اقرب اخلي العصا تحب راسك حب اقرب !
حط صقر الذبيحه وضحك بخوف: نمزح نمزح يجده وشفيك شخصنتيها ؟
ام عزام وقفت: ليالي ..صقر..عزام تعالو عاونوني نقطع الذبايح ونوزع نصها على الجيران ،
ليالي رفعت يدها بعد ما خلص منها عزام :مقدر يمه يدي كلها حنا ،
ام عزام : اجل عزام وصقر امشو قدامي ،
صقر بتمثيل: يمه جتني ضربه شمس ما اقدر اتحرك احس بدوخه !
فزت ام عزام تركض وحطت يدها على راسه ولمسته وكان حار
(من الشمس بس هو مافيه شي)
وقالت بخوف:بسم الله عليك استريح يمه بجيب لك عصير بارد وثلج ،
صقر:لا لا يمه لاتتعبي نفسك انا بقعد شوي عند المكيف وبصير بخير ،
طالع اخوانه بنص عين وقال عزام: :يمه وربي يكذب مافيه شي !
تقدمت ام عزام تدفه:اقول امش قدامي بس ،
مشو ومر عزام من جنب ليالي وغمز لها ،دخلو المطبخ وانفجر صقر يضحك:مسكييين الله يعينه بس ،
الجده وقفت بعصاتها بعد ما تقهوت : بشوف جدكم وينه مختفي ،
طلعت وقرب صقر من ليالي:وش راسمه على يدك؟
ليالي بعدت يدها لانها تعرف صقر بيخرب يدها:ولا شي انقلع يالكذاب ،
صقر بصدمه: انا كذاب !
ليالي:اييه كذاب ليش تكذب على امي انك تعبان وانت مافيك الا العافيه؟
صقر:ياخي شسوي مالي خلق اقطع اللحم تعب والله
ليالي بشبه ابتسامه: يعني كنت تكذب !
صقر:ايه اكذب ،
ليالي وقفت : زيين زين ،
راحت المطبخ ودقايق طلعت ام عزام معصبه ومسكت صقر من اذنه: تكذب على امك يالخسيس !
صقر بصدمه كيف امه عرفت: ااايي يمهه وش فيكك يمه تعبان انا !
رفعت ام صقر الجوال الي بيدها وشغلت فيديو فيه صوته وصوت ليالي وهم يسولفون ناظر بصدمه لليالي الي واقفه ورا امها كاتمه ضحكتها ورافعها حاجبها تقهره
نطق:يالورعه سجلتي صوتي !
ام عزام سحبت صقر ودخلته المطبخ وقالت لعزام:اطلع صقر هو الي يقطع الذبايح كلها !
عزام بتمثيل الصدمه:ليش يمه ؟
ام صقر قالت له الي سواه وطلع عزام وسكر باب المطبخ الي فيه امه وصقر قرب من ليالي ودقو كتوف بعض ونطق
عزام:كييف بسس؟
ليالي ضحكت: وربي انك كفو احسن اجل يبي يرتاح ،
(الي ما فهم عزام قبل يقوم شغل فيديو وغمز لليالي وفهمته وحط جواله بجيب ليالي وقام والجوال سجل كل شي وليالي قامت والجوال بجيبها وقالت لامها تاخذه وتسمع)
فتح عزام طرف الباب وشاف صقر يقطع اللحم وام عزام تكلم ومعطيتهم ظهرها
عزام طالع بصقر الي شافه ورفع حواجبه يقهره
وانقهر صقر وحلف ما يعديها لهم..
..