فزو من صوت ابوهم وراهم:وش تسوون هنا؟
ابتهاج بتوتر:يـ يبه انا جـ جيت الغرفه بجيب شاحني بس وتين لحقتني وطاحت على كوعها ،
قرب ابو يوسف ومسك كوع وتين برفق:بسم الله عليك يا ابوي توجعك ؟
وتين بالم: لا لا يبه مافيني شي بس بحط عليها مرهم وتخف ،
ابو يوسف:زيين زين يلا يا بناتي عاونن امكن بالفطور بعد المغرب بنروح للبر ونحجز لنا مخيم ليومين مع عمانكم ،
وتين:طيب يبه ليه ما نروح بعد الظهر ؟
ابو يوسف: عندي اشغال يا ابوي وقلت لاخواني اننا بنجيهم بعد المغرب ، بس مايخالف كلكم تروحون مع بهاج يوديكم بسيارته ، وانا اجي مع يوسف وامكم ،
باسو راس ابوهم وانطلقوا يساعدون امهم بحماس وتجاهلت وتين الم كوعها الي يلسعها بين فتره وفتره ،
#########
فتح عيونه يشوف نفسه بالمستشفى والمُغذي على يده اليسرى ، لف على يمينه يشوف امه نايمه على الكرسي الي بجنب سريره ،
دخلت الممرضه يوم شافته صحى ونطق:انا وين ؟
الممرضه : انت بالمستشفى اغمى عليك بسبب فقر الدم و سوء التغذيه وقلة الأكل والارهاق بس معليك بسيطه يبغى لك ترتاح يومين بالمستشفى وامورك تكون تمام باذن الله ،
صحت امه ونطقت بخوف : بدر يا امي صحيت ؟
بشرني وش حالك ؟
بدر ابتسم : بخير يا يمه بخير
دمعت عيونها : لا مو بخير كل ما اقولك شي تقولي انك بخير شوف وين وصلت نفسك يا امي اذا تعبناك او حسيت انك تعبان قول لنا او ارتاح لاتقلقني عليك يا روح امك !
بدر بطيف ابتسامه : بس يمه ما ابي اقول لكم لا ،
ام بدر مسكت يده : قول يا يمه قول بس لاتتعب نفسك كذا ،
بدر : ابشري يمه ابشري ،
التفت حوله :وين ترف ؟
ام بدر: ترف كانت عندك من الصبح وقلت لها اليوم ترتاح انا بقعد عندك
سكت بدر ولا تكلم بعد ما خلص المغذي بساعتين دخلت الممرضه معها صحن اكل ونطق:ماني مشتهي شبعان ،
ام بدر:وشو الي شبعان ماذقت شي عايش على هالمعذي اقول بس كل لا اغضب عليك
قعد بدر ياكل بهدوء والتفت:وابوي وينه؟
ام بدر:باتل مشى قبل تصحى يشيك على دكانه شوي ويجي ،
ماكملت كلامها الا دخل ابو بدر وتوجه يجلس عند ولده وابتسم:الحمدلله على سلامتك ياروح ابوك وشلونك عساك بخير،
بدر بابتسامه:بخير يا يبه بخير ،
دخلت ترف ورا ابوها وشافت بدر واندفعت تحضنه وبكت ،
بدر بضحكه: افا وانا ولد باتل تبكين ؟
ترف بدموع : شسوي ياخي خوفتنا عليك ،
باس راسها: هذاني قدامك مافيني الا كل عافيه ،
ابو بدر : بروح اشوف متى تقدر تطلع من هنا
وتوجه يطلع قعدو يسولفون شوي ورجع ابو بدر:الدكتور يقول تقدر تطلع الحين بس لازم تاكل فيتاميناتك وترتاح هالاسبوع
بدر: ان شاءالله
طلعو من المستشفى ووصلو البيت ،
##########
صحى عزام على صلاه الفجر وقام يصحي اخوانه يصلون وتوجه هو وابوه وجده وصقر للمسجد يصلون ،
ليالي بعد ما خلصت صلاه راحت للمطبخ تسوي الفطور مع امها ،
دخل صقر المطبخ يشوف ليالي تسوي الكبده وامه تقطع خضار للسلطه : الله الله وش هالريحه الزينه..
قرب من ليالي : جعل ايديك ما تمسها النار يا اطلق اخت الاكل يشهي مررره ،
ليالي : الله الله من وين طالعه الشمس اليوم ؟ انت تمدح طبخي ؟
صقر يحك راسه : وش اسوي جيعان قلت اتمصلح معك وبصراحه ،
كمل بهمس:سمعت ان جدتي معطيتك قروش
ضحكت ليالي: اهاا عشان كذا انت تمدحني من اليوم ،
دخل عزام ونطق:السلام عليكم ،
الكل:وعليكم السلام ،
عزام راح لامه : يمه فيه فول اليوم ؟
ام عزام : انا بسوي فاصوليا وشكشوكه اختك بتسوي الفول والكبده ،
عزام لف لـ ليالي: ليالي بالله الفول خليه ثقييل وكثري ملح ،
ليالي تخصرت : لا بالله ؟ ووش تبي بعد حضره الامير ؟
عزام : ابي شاي مضبوط السُكر فيه متوازن والخبز ابيه مُحمص والكبده خليها محروقه شوي ،
بققت عيونها بصدمه : تتشرط بعد ؟ اقول احمد ربك اني فاضيه واطبخ لك بعد عيال اخر زمن،
عزام : بكيفك دوري لك احد يوديك البقاله ولا السوق ؟
ليالي فزت : لا لا ابشرر ابشر اسوي لك اللي تبي لك عيوني !
صقر بضحكه: عرفت لها يوصخ !
عزام بغمزه : اعلمك انا ،
ليالي:خلاص اطلعو حطو السفره بالحوش بنجيب الفطور
حطو الفطور بالحوش والسماء كانت غييم ، والرياح تهب بنسيمها البارد ،
الجد سليمان : يا عيالي اذا خلصتو جهزو عزبتنا بنطلع مخيم ليومين مع عمانكم نمشي بعد الظهر
ضحكت ليالي بفرحه : صدق جدي ؟
الجد: اي والله يا بنتي
عزام طالع ساعته :تونا الساعه الحين ٧ الصبح
ليالي : بس يا جدي ناقصنا اشياء كثيره للعزبه
الجد: وش ناقصك يا بنتي ؟
ليالي: ابي اشتري ملح ملحنا خلص والايلاينر حقي بيخلص والكونتور فيه جديد توه نازل وودي اجربه ووش بعد التنت ماعندي لون احمر منه وابي قلتر وبـ..
قاطعها الجد بصدمه: وش تخربطين به انتي ؟ وش كنتره ما كنتره هذي اغراض عزبه ؟
صقر: قالت ملح بالبدايه بتشتتك عن الاشياء الي هي تبيها عارفين حركاتكم يالبنات ، مافيه هالخرابيط
ليالي بنرفزه :وانت وش دخلك !
والتفتت لجدها:جدي تكفى ،
الجد: ابشري على هالخشم وصقر بعد هو الي يدفع ،
صقر بصدمه :شدخلني يا جدي !
الجد:عشان تعرف تقول لا لحفيدتي
ابتسمت ليالي ترسل بوسه لجدها : يخليك لي يارب
وطالعت بعزام : عزام تودينا ؟
عزام هز راسه: زين يالله انتظرك بالسياره انتي وصقر،
وقفت بحماس تلبس عبايتها وصقر انقهر وما تكلم..
ركبو السياره ونطقت بحماس:عزاام طلبتكك !
عزام التفت لها : وش تبين ؟
ليالي بترجي:بالله وديني مول الرياض سوق الديره مافيه شي حلوه تكفىى !
عزام :الطريق طويل ،
ليالي:بس ساعه تكفى طلبتك وانا اخت عزام ،
عزام احتزم : ابشري على هالخشم ،
قمزت تبوس خشمه وهي مبسووطه
صقر بقهر : اي اي انبسطو اشتري الي تبين على حسابي تراكم مشخصنينها معي من امس تكذبون علي وتحرشون علي عند امي اوريكم والله لا اقهركم نفس قهري !
عزام بصوت عالي يستفز صقر : اعلى ما فيك ؟
ليالي بتكمله : ارككببه !
ما تكلم صقر وصد بقهر ، وصلو المول بالرياض وقعدت ليالي تتقضى وما خلصت الا الساعه ١١ وصقر طول الوقت يتحلطم ،ورجعو لدريتهم يجهزون للمخيم..
أنت تقرأ
يا عواصف الدنيا هُبي..وطيري مع هبوبك سنيني
General Fictionالقصه : [اب مجهول يقف امام احدى غرف المستشفى ينتظر ولاده زوجته ويدعي انها ما تلد بنت ، تخرج مُمرضه من الغرفه وقالت له زوجتك جابت بنت وولد توأم، انصدم واخذ ابنته الرضيعه ليرميها امام المسجد ويبتعد ، خرج شخص من المسجد يشوف الطفله الرضيعه واشفق عليها...
