يا عواصف الدنيا هُبي..وطيري مع هبوبك سنيني

P15

الساعه ٢ الظهر ،
عند وتين ،
منسدحه بغرفتها بملل تشوف ابتهاج الي تراسل بدر ومبسوطه ، اخذت نفس توقف : ابتهاج ،
ابتهاج مو معها ما ردت ، وتين بصوت اعلى : ابتهااج !
فزت ابتهاج : خير اللهم اجعله خيراً وش فيك ؟
وتين بملل : بروح عند ليالي ، تقولي انها طفشانه وبنقعد عندها ، تجين ؟
ابتهاج رجعت تنسدح بدون ترد عليها ، كشت وتين عليها وراحت لدولابها ، لبست بلوفر ازرق طويل يوصل لفخوذها بحكم انهم ببدايه الشتاء والجو برد ، لبست بنطلون واسع سماوي ، شعرها الطويل رفعته فوق بتسريحه ذيل الحصان ، حطت ايلاينر ، ماسكرا وروج وردي ، وبلشر خفيف ، اخذت عطرها الي تحبه وتموت فيه تعطرت منه وكثفت عطرها ، ابتسمت ولبست عبايتها ونقابها ، طلعت من الغرفه والبيت متوجهه لبيت ام عزام بعد ما قالت لامها ، طقت الباب وزفرت محد فتح لها ، رجعت تطق وهي تقول : هيه افتحوا ،
فتح صقر الباب وهو لابسه فنيله بيضاء وسروال ابيض ويدعك عيونه بنعاس ،
نطق : بسم الله ، لا اله الا الله ، يالله صباح خير ، وش جابك ؟
وتين رفعت حاجب : ليه تسمي ؟ شايف جني قدامك ؟
صقر بهمس : جنيه مو جني ،
رفع صوته : يا ادميه الساعه ٢ الظهر ! احد يجي للناس ويسير عليهم الساعه ٢ !
وتين : وانت شدخلك ؟ ابعد بدخل ،
صقر بعناد : مافيه دخول ، امسحي عيونك الي معبيتها هالات كنها عيون الباندا وبعدين تدخلين ،
وتين : ما شفت نفسك لابس ابيض بابيض تقل منديل كلينكس ؟
صقر : عالاقل مو لابس اسود بأسود كاني كيس زباله ،
وتين : الله يرزقك ذبات حتى الذبات ما تعرف تذب ؟ حمل برنامج ذباتي وتعلم منه ،
صقر : دامك قلتي لي احمله يعني انتي جربتيه قبلي وما تعرفين تذبين ،
انقهرت وتين : ياخوي اذلف بدخل انشويت من هالشمس !
صقر بطوله بال : مانيب بموخر لين تمسحين هالي بعيونك ،
وتين بقهر : ياخي جلست ساعه احاول اضبط الايلاينر ! وانت تقولي بارد مبرد امسحه ؟ طيب تخسي ،
صقر : اجل تخسين تدخلين بيتنا ،
وتين : والله لا اعلم ابوي !
صقر : روحي لبابتك خليه يفتح لك الباب ،
ليالي من ورا صقر : صقر وتين ما وصلت ؟
وتين بصوت عالي : الا وصلت واخوك ذا ما قصر شواني بالشمس ،
صقر طالع لـ وتين : ترا ذا له اسم ،
وتين بعناد : ليالي شوفي ذا عيا يدخلني ،
ليالي : صقر ابعد خلها تدخل حرام عليك ،
بعد صقر ونطق : ترا وخرت عشان ليالي ولا انـ،،
طنشته وتين تدخل وانقهر صقر : شين وقوي عين ، اوريك انا ،
وتين لفت له : اعلى ما فيك ؟ ااركككبه ،
سحبتها ليالي مع كتفها : خلاص بلا مشاكل امشي معي ،
دخلت وتين البيت وسلمت على جدتها وام عزام ، قعدت شوي عندهم ونادتها ليالي للغرفه ودخلت عندها ،
وتين وهي تطلع عبايتها : اففف يا اخوك الغثيث صقروه يقهر يقهر يعع ، شغلي المُكيف انشويت وانا برا
ليالي ضحكت تشغل المُكيف ، شالت وتين بلوفرها وبانت بلوزتها البيضاء إلي كتوفها عاريه ، عدلت الميكب حقها وناظرت لـ ليالي الي كانت لابسه بنطلون جينز اسود وبلوزه بيضاء باكمام بيضاء ماسكه عليها ، وشعرها الي وصل لكتوفها مفتوح ، نطقت ليالي : وين ابتهاج  ؟ ليش ما جات ؟
وتين : تكلم حبيب القلب ،
بضحكه نطقت ليالي : الله كييوت !
وتين : عصافير الحُب الي الله يخليهم لبعض ويحرمنا منهم ،
ليالي : حرام والله يهبلون ،
وتين كثفت روجها : ماقلت شي ! وبعدين وين اخوك عزام وأبوك وجدي ما شفتهم ؟
ليالي : ابوي وعزام راحوا لدكان ابوي ، وجدي مدري وينه ،
هزت وتين راسها ونطقت : وربي عطشت ،
وقفت ليالي : بروح اجيب عصيرات ومجهزه لنا حلا اجهزهم واجيبهم ،
ابتسمت وتين بتفهم ، وطلعت ليالي لـ المطبخ ،
وقفت وتين قدام مرايه ليالي الطويله فكت شعرها الطويل الي يوصل لركبتها وكثيف ومنسدل بنعومه ، وشغلت اغنيه بجوالها وقربت تتصور وتصور نفسها ، لبست السماعه وكانت منسجمه وتغني بغنج ودلع على اغنيه اليسا (اسعد وحده) وتتمايل مع الاغنيه بحماس ،