ပန်းဖြစ်ရုပ်ကြွင်း {ပန္းျဖစ္႐ုပ္ႂကြင္း}

[၂] ဥပေက္ခာဝါဒီ/ ဥေပကၡာဝါဒီ

Marseille provence airpot|မာဆေးပရောဗန့်စ်လေဆိပ်

တချို့သော အချစ်တွေက အလင်းရောင်လိုပဲ။ ဘ၀ထဲကို ဝင်လာတဲ့အခါ နွေးထွေးလုံခြုံရသည်။ ကိုယ့်ဘ၀မှာ သူက အလင်းတစ်စအဖြစ် နေရာယူပြီး ရှေ့က ဦးဆောင်ခေါ်သွားတတ်သည်။ တချို့အချစ်တွေကျတော့ ဘ၀ထဲ ၀င်လာကတည်းကိုက အမှောင်ကျခဲ့ရသည်။ ဘ၀နှင့် အချစ်ကို သီးခြား မခွဲခြားဘူးဆိုလျှင် ကိုယ့်ဘ၀တစ်ခုလုံးကို အဲဒီအမှောင်ထုကပဲ လွှမ်းမိုးချုပ်ကိုင်သွားတော့သည်။ လူတို့၏ ဘ၀တွင် သည်လိုမျိုး အချစ်နှစ်မျိုးနှစ်စား ရှိလေသည်။ အချစ်သည် အလင်းတစ်စဖြစ်ဖို့ လိုသည်ဟု ထင်ပါသည်။

လင်းဗရိုစ်သည် ညွှတ်ကျချင်နေသော ဒူးကိုထိန်းလျက် ခေါင်းကို ငိုက်စိုက်ချကာ လေဆိပ်လူ၀င်မှုကြီးကြပ်ရေးကောင်တာဆီသို့ ဘောင်းဘီဘေးအိတ်တွေထဲ လက်ထိုးထည့်ပြီး လျှောက်လာခဲ့၏။

"Have a safe flight" တဲ့။

သူ့ဆီက နှုတ်ဆက်စကားမှာ ဒါအကုန်ပဲ ဖြစ်သည်။ တကယ်ပင် သူ လင်းဗရိုစ်ကို လေဆိပ်သို့ လိုက်မပို့ခဲ့ ... ။ မယုံချင် ယုံချင်နဲ့ပဲ နောက်ဆုံးမှာတော့ အမှန်တရားကို လက်ခံယူလိုက်ရလေသည်။

"ဒီလိုပါပဲ ... "

ဒီလိုပါပဲ ဆိုတဲ့ စကားလေးက အဓိပ္ပါယ် သိပ်ကိုလေးနက်ပါသည်။ တစ်ခုခုကို ရင်ထဲမှာမျိုသိပ်၊ ဆိတ်ဆိတ်ငြိမ်လို့ အဆင်မပြေတဲ့ ဘဝမှာ ငါတို့ဟာ ဒီလိုပါပဲ။ အဆင်မပြေလည်း ဘ၀တွေဟာ 'ဒီလိုပါပဲ' ဆိုတဲ့ စကားလေးနဲ့ ချွေးသိပ်လိုက်ရတာ ... ။ လေယာဥ်သည် မြေပြင်မှ တဖြည်းဖြည်းချင်း မြင့်တက်လာခဲ့၏။ တိမ်ပါးပါးကြားကနေ အောက်ကို လှမ်းမြင်ရသမျှမှာ ပင်လယ်၏ နက်ရှိုင်းသောအပြာ၊ ပင်လယ်ပြင်နှင့် ကပ်လျက်က အရောင်အသွေးစုံသော မာဆေးမြို့ကို ရေပေါ်ရှိ Boat ကလေးများနှင့်တွဲ၍ စီတန်းစွာ တွေ့ရ၏၊ တစ်နှစ်ပတ်လုံး နေရောင်ခြည်ကောင်းမွန်စွာ ရရှိသဖြင့် ပင်လယ်နှင့် ထိစပ်လျက်ရှိသော မြို့သည် အမြဲပင် သစ်လွင်စွာ လှပသည်။ ဟော ... ဟိုမှာ Notre-Dame de la Garde ... ။ အဲသည်နေရာလေးကို မြင်လိုက်တော့ မပေါ်လိုသော မှတ်ဉာဏ်တစ်ချို့က ခေါင်းထဲ တိုးဝင်လာသဖြင့် ချက်ချင်း အကြည့်လွှဲလိုက်ရလေသည်။