ပန်းဖြစ်ရုပ်ကြွင်း {ပန္းျဖစ္႐ုပ္ႂကြင္း}

အမှာစာနှင့် ကျေးဇူးတင်စကား

အမှာစာကို ဘာလို့ နောက်ဆုံးမှ ရေးရသလဲလို့ မေးရင် အဲလို ရေးရတာကို ကြိုက်လို့လို့ ဖြေရပါမယ်။ ;)
နောက်တာပါ။ အဲဒါအပြင် ဇာတ်လမ်းအကုန်လုံး ပြီးသွားမှ 'ဒီနေရာမှာ ဒီလိုရှိတယ်'ဆိုပြီး ဇာတ်လမ်းရဲ့အကြောင်းကို ပြောလို့ကောင်းတာမို့လို့ နောက်ဆုံးမှ ရေးလိုက်တာပါ။ မြန်မာနိုင်ငံမှာ အခြေတည်တာလည်း မဟုတ်၊ မြန်မာမပီသတဲ့ ၀တ္ထုလည်း ဖြစ်တာကြောင့် ပန်းဖြစ်ရုပ်ကြွင်းနဲ့ ပတ်သက်ပြီး ကျွန်တော့်မှာ ပြောစရာတွေ ရှိပါတယ်။

ဒီ၀တ္ထုကို ရေးဖြစ်ဖို့ စိတ်ကူးရလာတာကနေ စ ပြောကြရအောင် ... ။

'ချစ်သူလား စကားတစ်ပွင့်ပွင့်ခဲ့တယ်' ဆိုတဲ့ ဆရာမဂျူးရဲ့ ဝတ္ထုလေး ဖတ်ဖူးတဲ့သူ ရှိကြလားမသိဘူးနော်။ အဲဒီ၀တ္ထုက ကျွန်တော့်ကြိုက်ဆုံး ဝတ္ထုတွေထဲက တစ်ခုပဲ။ အဲဒီဝတ္ထုထဲမှာ စကားပန်းတွေရဲ့ မျိုးစိတ်အမျိုးမျိုးကို တစ်ခန်းချင်းလေး ထည့်ရေးသွားတာ ... ။ ကျွန်တော်လည်း တစ်နေ့ကျရင် ပန်းတွေကို နောက်ခံထားပြီး အဲဒီလိုမျိုး ရေးမယ်ဆိုပြီး စိတ်ကူးရှိခဲ့ပါတယ်။ စိတ်ကူးသာရှိခဲ့ပြီး တကယ့်တကယ်မှာတော့ ချမရေးဖြစ်ခဲ့ဘူး။ တော်တော်လေး ကြာမှပဲ ဇာတ်လမ်းလေးတစ်ခု ခေါင်းထဲကို ရောက်လာတာကြောင့် ထ,ရေးဖြစ်ခဲ့တယ်။

တကယ်ရေးဖြစ်တော့ လာဗင်ဒါပန်းတွေကို နောက်ခံထားဖြစ်ခဲ့တယ်။ ဒါနဲ့ လာဗင်ဒါပန်းတွေအကြောင်းကို လေ့လာရတော့တာပေါ့နော်။ လေ့တာတဲ့အခါမှာ ပန်းမျိုးစိတ်တွေက တအားများလွန်း၊ အခေါ်အဝေါ်တွေကလည်း များတာရော၊ မတူတာတွေရောကြောင့် အတော်လေးကို ခေါင်းခြောက်ခဲ့ရပါတယ်။ ဒီလိုလေ့လာရင်းနဲ့ တစ်နေ့မှာတော့ စာကြောင်းလေးတစ်ကြောင်း သွားတွေ့တယ်။ အင်္ဂလိပ်လို တွေ့ခဲ့တာပါ။ ဒါပေမဲ့ အင်္ဂလိပ်လို မမှတ်မိတော့ဘူး။ TT

'လာဗင်ဒါတွေအကြောင်း ပြောနေတယ်ဆိုရင် ပြောတဲ့လူ၊ ပြောတဲ့နေရာလိုက်ပြီး အခေါ်အဝေါ်တွေ ကွဲပြားနိုင်ပါတယ်' တဲ့။

ဒါကြောင့် တချို့လာဗင်ဒါတွေမှာ နာမည်က သုံးလေးခုလောက် ဖြစ်နေတာကိုးဆိုပြီး တွေးလိုက်ပါတယ်။ ကျွန်တော် ချရေးတော့ အသုံးများတဲ့နာမည်တွေကိုပဲ ရွေးယူလိုက်ပါတယ်။ (ကျွန်တော့်ဇာတ်လမ်းထဲမှာ ဥပမာ အင်္ဂလိပ်လာဗင်ဒါလို့ သိထားပြီး တစ်နေနေရာမှာ ပြင်သစ်လာဗင်ဒါလို့ ခေါ်တာမျိုး ကြုံလာခဲ့ရင် ရှုပ်သွားမှာစိုးလို့ ရှင်းပြတာပါ)