36 Letters

Letter 22

"ටිකක් තිත්තයි"

කෝපි වැඩී නොකියා එතිශ්ය ටිකක් තිත්තයි කිව්වෙ මේසෙ පැත්තකින් වාඩිවෙලා කොල්ලා දිහාම බලාගෙන ඉන්න දෙහාරට. එතිශ්ය කියලා තත්පරයක් යන්නත් කලින් දෙහාර එතිශ්ය බිව්ව කෝපි කෝප්පෙ අතට අරගෙන උගුරක් බිව්වෙ කෝප්පෙ අයිනට තොල් තද කරලා ඇස් පියාගෙන කෝපි උගුරක් බොන දෙහාරගෙ ලගම එතිශ්යගෙ ඇස් නැවතිලා තියෙද්දි.

"ම්හු.. මේක කෝපි රසයි ගවේශ්. අඩු සීනි තද රස්නෙ කෝපි මල් සුවඳට වැඩි කෝපි හරි රසයි.. ම්.. ඇස් පියාගෙන බීලා බලන්න"

මේසෙ දිගේ ආයෙමත් එතිශ්ය පැත්තට කෝපි කෝප්පෙ තල්ලු කරන ගමන් දෙහාර කිව්වෙ හිමින් වහගෙන හිටිය ඇස් අරින ගමන්.

"මට වෙනසක් නෑ. තිත්තයි දෙහාර!"

ආයෙමත් කෝපි ටිකක් උගුරෙන් පහලට යවාගත්ත එතිශ්ය ඇස් දෙකත් තද කරගෙනම කියලා කෝපි කෝප්පෙ තල්ලු කරේ දෙහාර පැත්තට.

"මට එපා. ඔයා බොන්න"

'සාමාන්‍ය අංකනය අනුව ABC ත්‍රිකෝණයක...' ලස්සනට පොඩි අකුරෙන් ටයිප් කරලා තියෙන අකුරු වලට එතිශ්ය අවධානය දුන්නෙ ඇස් හීනි කරගෙන. දෙහාරත් පාඩුවේ කෝපි කෝප්පය හිස් කරේ ඇරුණු ජනේල වලින් නුවර වැව පැත්තෙ ඉදන් ආව සීතල හුලග විදින ගමන්. ඒත් අනේ මන්දා. උඹ කියනවට වඩා ඔයා කියන වචනෙ අමුතු වෙනසක් දෙහාරට දැනුනෙ. ඒත් එකක් තෝරගන්න කිව්වොත් සීයට දාහක් විශ්වාසයි එතිශ්ය හදන ගමන් ඉන්න දෙහාර දැනට සම්පූර්ණයෙන් නොදන්න ත්‍රිකෝණමිතිය ගාන හදන එක දෙහාරට ඊට වඩා ලේසියි.

ඉතින් මේ වතාවෙ ඇස් පියවිලත් නැහැ. දෙහාර කෝපි කෝප්පය හිස් කරේම ත්‍රිකෝණමිතිය ගානක් එක්ක හරි හරියට ඔට්ටුවෙන එතිශ්ය දිහාම බලාගෙන.

"කම්මැලිකමේ ඉන්න වෙනවා කියලා දැන දැන ඇයි උඹ ආවෙ?"

එතිශ්යගෙ පෑන සුදු කොලේ උඩ හරි වේගෙන් එහෙ මෙහෙ යද්දිම කොල්ලා ඇහුව දෙහාර දිහා නොබලා. එතිශ්යට තාමත් මතකයි ආෆ්ටර් පාටි එක ඉවරවෙලා කෙනුල් දෙහාරගෙ බයික් එක ඉල්ලුව පමාවට දෙහාර කොල්ලාගෙ අතේ යතුර ගුලි කරපු හැටි. කී ටැග් එකත් එක්කම! සමහරවිට ඒ කෙනුල්ටත් සමහර මතක මගහැරුනු නිසා වෙන්න ඇති. එහෙමත් නැත්තම්... නැහැ.. එතිශ්යට කොහොමටවත් හිතන්න ඕනි නැහැ ඒ විදිහට. ඒත් දෙහාර කෙනුල්ගෙ අතේ යතුර ගුලි කරලා අනිත් පැත්තට 'මට ආසයි උඹේ බෝඩිම බලන්න' කියලා හැරිලා කිව්ව විදිහ කොල්ලාට තාම මතක් වෙනවා මතක් වෙනවා වගේ. වෙලාවෙ හැටියට 'මේ රෑ?' කියලාවත් අහන්න කට ඇරුනෙ නැහැ එතිශ්යගෙ. හැබැයි හා කියන්න ඔලුව නම් හෙලවුනා වගේ මතකයි කොල්ලාට.