' الفصل الثـالث'
منتصف الليـل ..
بين اشجار النخيل وبالهواء الطلق جـالس بالجلسة الخارجية غير مهتم بالجو وبرودته بتيشيرت صيفي رغم انهم بعز الشتاء
سحب جواله بابتسامة مستمتعه وهو يناظر قائمة الاتصال '' سلمان الكلب .. مهند اللبناني .. عبدالصمد 7 .. كاميرا التجسس سامي ٫ هذا المطلوب اتصل فيه طول مارد لكن بالنهاية رد
سمع صوته المتهجم : نعم
لكنه رد باستهبـال واستمتاع : الله ينعم عليك وينك سويمي اشوفك ماعاد تزورني بالمزرعه
ولا التكريم خلاك تغتر بنفسك ترا ما صَقل موهبتك غيري
سمع تنهيدة سامي الطويلة : خير انت هالحين وش تبي اخر الليل تدق ماوراك شغل
ضحك بصوت عـالي : شغل اي ذكرتني .. مجهز اربع سطول قبل ساعة لازم اعلمهم يوصلونها قبل..
تغير مزاج سامي بثواني لفرحة من بعد كلامه واخيرا مسك طرف دليل ونطق باستغباء يجره للاعتراف لان مكالمتهم مسجلة : سطول ايش
ابتسم : سطول زيت الزيتون .. يالله فمان الله بكرة تعال بنسوي نفسنا ماندري عنك
سمع همس سامي المسموع : بياع ذكي لكن غلطة الشاطر بعشرة
قفل المكالمة مثل مابدأها .. تذكر الكلام الي وصله من احد الشباب والي عكر مزاجه ظهرًا
سابقًا ٫ الظهـر
في احد معارض السيارات كان جالس بمكتب صاحب المعرض والي هو صديقه خرج من المعرض واستغرب من وجود مشعل بطريقه .. : هلا مشعل شلونك
ابتسم مشعل : هلا هلا جابك الله في دربي عندي لك خبر بس كم تدفـع؟ تعرف لازم اضمن مصلحتي بالاول
رفع حاجبه بتعجب من تحت النظاره الشمسية ثم ضحك ضحكة قصيرة : خلصني بس وقله وبعدين افكر كم اعطيك
مشعل بابتسامة منتصر وكانه يقول انجاز : راقبت لك سامي النشبه الضعيف زوجته هجت من البيت ماعاد تبي تسكن مع اهله
شد على فكه وهو يبتسم : تدري وش بعطيك .. تفل بوجه مشعل الي انصدم وطارت عيونه
: يالله فارقني
و اكمل طريقه يتمتم :مع ذا الظهريه رايح يراقب الحريم من زين وجهه يكملها بشين اخلاقه
..
بطريق مظلم
كان الصمت يعم السيارة الصوت الوحيد هو قطرات المطر على زجاج السيارة قاطع هذا الهدوء
سؤال سعـود : متى اختبارك التحصيلي
ليـال وهي تتأمل الطريق وبصوت منخفض : بعد اسبوعين
سكت وهو يهز رأسه وأكملت ببطىء: بالرياض
التفت عليها : ليه.. جامعة الدوادمي وش فيها
نزلت كوب الشاهي البارد الي كانت تستمد منه الدفىء لكفوفها وبهدوء وهي تمثل عدم الاهتمام
: صديقاتي بيروحون هناك وابي معهم وبعدين بوقت زيارة امي
كان بيناقشها في بداية كلامها لكن من كلامها بالاخير سكت دق جواله واتصال احد اصاحبه كانت افضل حل ٫للانشغال بعيدًا عن هذا الموضوع الي مو عاجبه رد وأخذتهم السواليف ٫ مع انشغال سعـود بمكالمته فتحت ليـال جوالها وهي تصور الطريق وتكتب تحتها ' جهزوا فراشي على اليمين جايتكم ' وأرسلتها وقفلت الجوال
بعد ثلاث ساعات انتبهت للوحة الي مروها ولاحظت انهم جددوا اللوحة واصبح اسم الديرة اوضح لان سابقا كانت لوحة حديدة قديمة مهتريه ومصدية ومايبان غير ثلاثة حروف من اسم الديرة
وعلى مدخلها كان نقطة تفتيش ٫ توقفت السيارة واعتدلت بجلستها ولبست نقابها فتح سعـود الشباك وكان امامه الضابط الي كان مركز في الورقة الي بيده و رفع حواجبه بصدمة وسرعان ما أبتسم و يرفع صوته : يامرحباا ومسهلا يابو متعب
نزل سعود من السيارة وسلم عليه وسلم على باقي العسكر .. ناظرت لهم ليـال وهي تسمع تعريف الضابط عن سعود والصله الي تجمعهم : زوجة عمه خالتي ..
دققت بالضابط الي كانت تعرف من هو ' زيد ' اخو نجلاء الكبير ومرعبهم الاول هي والبنات
كان رجل شديد و متحجر لكن لا يفوق على ابوه الي اضن حتى المجرمين يتمنون الاعدام ولا لقائه
وعلى وصف نجلاء ان يد ابوها ثقيله مثل الصخر وضخمه مثل ضخامته ضربته كانت كافية بان تسمع بعدها اسأله القبر مباشرة .. ركب سعـود السيارة بعدم ماوعد زيد بتوصيل اهله - اخته - ثم الرجوع لهم لقضى باقي الوقت معهم ثم المغادرة بعد صلاة الفجر ٫ فتحت الشباك وهي تناظر الشوارع ومحطة البنزين وبجنبها مطعم وبقالة حفظت اسعارهم المبالغ فيها من كثر هروبها هي والبنات لشراء أغراض سهرتهن
توقفت سيارة سعـود مره ثانية لكن هالمره قدام بيت عمهم عبدالله كان بيت دور ارضي كبير نوعًا ما
و بتصميم جديد كانت الحارة مافيها غير ٧ بيوت او ٨ جديده ومسجد خلف بيت عمي لانهم بمخطط جديد وحواليها مخططات جديده أغلبها فيها بيوت قيد الانشاء وسوبر ماركت له سنه متوقفين عن إكماله ممكن صاحبه يمر بأزمة ماليه .. صحيت من شرودي على صوت سعود وهو يلتفت علي بعد ماطرق الباب الاخرى وبيده شنطتي : مايفكون شكلهم نايمين !
نزلت قبل لا يقترح علي ننام بشقة بالعمارة الوحيده بالديرة ٫ ما اقدر اقيمها من بشاعتها وقذارتها واستغلال أصحابها : لا لا
طقت الباب بشكل اقوى .. وانفتح الباب سحبها سعـود وتقدم بدالها اول ما أنتبه ان ثـامر الي فتح الباب
سلم عليه ثامر : سعـود .. يالله حيه اقلط اقلط
: الله يبقيك
دخل سعـود وبيده شناط ودخلت ليـال بخلفه ٫ نزل الاغراض سعـود وهو مستغرب من توجه ليال لخلف الحوش .. ثامـر : اقلط بالمشب مافيه غير العيال عمك وعمك راقد
سعـود : الله يعافيك انا والله ماشي
ثامـر : انت اجلس نتقهوى ثم نصلي الفجر والله يستر عليك تجي صد و رد مرةٍ وحده
سعـود : كثر الله خيركم والله عند ابوي فطور الصبح وابي الحق عليه وزيد حالف علي امره ونصلي الفجر سوى .. يالله فمان الله سلم لي على عمي
ثامر وهو يتبعه للباب : يوصل الله يستر عليك
قفل ثامر الباب بعد خروج سعـود .. وسمع صوت صراخهن من خلف الحوش : اجتمعن الله يكفينا شرهن وشر مقالبهن
..
