من عينك النجلا غدى القلب مسلوبيا كوكب ذري ضوى نورك أعيان

٤٣

مرت الايام وعائله عبدالله يساندون امل تنسى خوفها وقدرو يحتوونها فعلاً والهنوف ونجلاء الي من تصبح لين تمسي وهم بالسوق ينجزون اغراضهم
صباح يوم الزواج
من الفجر صحيت القرية بمقفلها الصغار قبل الكبار والفرحه معبيه قلوب الكل وهم من زمان ماصار عرس بالقريه وبالإتفاق بين ابو فلاح وابو فهد قررو يقيمون الزواج بالقريه وبطابع الناس البسيطه بدون حجز قاعه وزواج حديث
هالشي اسعد ام نجلاء مره وأسعد نجلاء اكثر كونها كانت تميل للبساطة وماتحب التكلف وام فهد ومزنه هذا الي يبونه يبون يرجعون يعشيون طقوس الزواجات زمان
الحاره كانت تعج باصوات الرجال وتحديدا الشباب اللي مجتمعين كلهم بطرف الحاره ينصبون الخيام ويفرشون الزل والاطفال الي صوت غناهم وضحكهم ولعبهم معبي الحاره وبيت ام نجلاء الي بابها مفتوح ماتقفل والحريم طالعين داخلين وام فهد نفس الطريقه
اجتمعو العايلتين ببيت ام نجلاء يفطرون مع بعض وبحضور ام فلاح المطبخ مكتض زحمه باصوات البنات وهم يجهزون الفطور والحريم بالحوش سوالفهم وضحكهم عالي كانت ام نجلاء توقف كل شوي تشرف على البنات بالمطبخ
نجلاء قررت تعيش يومها وتطلع للناس بصباحيه عرسها وتساعد امها وساره
بالمطبخ
ام نجلاء تدخل:ي الله ي بنات وين وصل فطوركم
نجلاء:ي الله يمه بس لوتفكنا ام لسان من سوالفها انجزنا
ساره:افا جحدتي مساعدتي
نجلاء:تراه اخوتس يعني تخدمين بعرسه
ساره:ومو عرستس انتي بعد
ام نجلاء بحراره:الحين بتطولون تهذرون
نوره:خلاص دقايق يخاله
ام نجلاء:محد مبرد تسبدي غيرتس
عطوني دله القهوه
نوره:أنا اجيبها ارتاحي ي خاله أنا أصبها
ام نجلاء تبتسم:الله يسعدتس ويعطيتس العافيه
طلعت ام نجلاء وناظرت ساره بنوره:نفهم انتس تزبطين العلاقه هاء
نجلاء:شكلها ترا أنا اخته بعد زبطيني
نوره توترت:علاقه وش
ساره:علينا يعني الحين مسوي روحتس بريئه
نوره بتهرب:اقول عطيني الدله بس
طلعت نوره والبنات يضحكون عليها عارفين انها تتهرب وتقدمت للحريم تمر بدله القهوه عليهم تقهويهم ودقايق وبدت مراسم الفطور عند الحريم

عند الرجال
كان وليد مشرف على الشباب بالديوانية يجهزون فطور العرس ويرتبون الوضع من حيث استقبال الضيوف وإكرامهم
فز ابو فلاح وابو فهد من الديوانيه تاركين ابو وليد يتولى مهمه الرجال وإكرامهم مع ولده واتجهو يشوفون ترتيبات المخيم للزواج المساء

عندالعيال بالمخيم كان فهد يكرف بفرحه تعتريه مو مصدق ان اخيراً هاليوم جاء وراح يجتمع بالبنت الي قدرت تغيره ميه وثمانين درجه الوحيده الي كان وقعها بقلبه له اثر كبير والوحيده من بد الحريم الي قابلهم كانت له المكانه الأعظم بقلبه
بقي عليهم تركيب العقود
مشاري:فلاح اجلس يرقى فهد على ظهرك يثبتها بالعمود
فلاح:لا والله تبون تكسرون ضهري قبل دخلتي ليه ماتشيله انت
مشاري:شايفني ماسك العقود من الطرف الثاني
فهد:اجلس ي رجال خلنا نخلص
فلاح:انت اجلس وانا برقى
فهد:أنا أطول امش
سحبه فهد يطلع على ضهره يركب العقد وفلاح يشوف اباءئهم جايين وكتفه تعب من ثقل فهد:اخلص علينا قصمت ضهري
فهد ضحك:هذا درس لك عشان ترتكي وتشيل الحمول الثقيله
فلاح:والله الحمول الثقيله شلنها لكنها اخف منك ي الدب
ضحك فهد:اصبر قربت اخلص
فلاح:ولد انت متوتر نفسي
فهد:لا انت ليه متوتر
فلاح:بعرس اكيد بتوتر
فهد :قلته عرس مو حرب
فلاح:والله مفروض انت تخاف اكثر مني وتحسك بحرب دام بتاخذ نجلاء
ضحك فهد:تهقى
فلاح ضحك:والله صادق
بدت موجه الضحك بينهم ومن التوتر بدت ضحكه بسيطه لضحكة قويه يرجف منها فلاح الي عجز يسيطر على نفسه وصار يتحرك بعشوائية وتعرقلت رجله بطرف الزل طاح يسقط فهد عليه وفزو العيال بخوف وابوفلاح وابو فهد انطلقو لهم ركض خافو على فلاح تعور
حميد:ي قدرة الله وش بلاكم انتم بخير
سلطان:وش علمكم ياولد
وقف فهد وفلاح يفكون ثيابهم المربوطة على خصرهم:تمام حن تمام
كانو يكبحون الضحكه لكن طلعت من فم فلاح يدقه فهد وانفجرو العيال الي يساعدونهم يضحكون
مشاري بضحك:والله انكم معاريس غفله
سلطان:اركدو انت وهو هذا شنبكم تارس وجيهكم ماتعرفون تربطون عقد
فهد:سم ي ابوي بالغلط
حميد:الحمدلله على السلامة وانتبهو
سلطان:انجزو الرجال وصلو وأنتم باردين
فلاح وفهد:ابشر
اتجه حميد وسلطان يشوفون باقي الترتيبات وفلاح وفهد يشتغلون وهم كاتمين الضحكه لايفصل عليهم زياده ابوه
خلصو يتجهون لمجلس الرجال يمدون الفطور يقلطون الرجال عليها وبنص جلستهم على الفطور فزو من دخل رجال يرفع صوته الضخيم يسلم الكل توجه نظره له وعرفه عبدالعزيز انه خاله فز له ناظره عبدالله وهو عارف ان جيته عشان اخته بس رحب فيه واستقبله بوجهه بشوش مايبي يلفت النظر
عند الحريم كانت الأجواء منجد حماسيه بأغاني العجيز وصوت الديجيه عامر
لفو من دخلت حرمه وفزت عبير تستقبلها لكن انصدمت من تركت غطاها وهي تشوف ام امل واقفه الكل ناظر فيهم وصارو يتهامسون مابين غريبه جايه وين كانت مختفيه اكيد بتطردها
كانت الصدمه للكل واولهم امل لمن استقبلت عبير ضرتها بكل صدر رحب وبسلام حار تجلسها وتضيفها لكن ام امل ابد كانت بارده ولافرقت معها نهائي وببالها خطتها الخبيثه حتى تدمر فرحه عبير
دخلت ساره الغرفه تشوف البنات جالسين يرتبون امورهم قبل يحطون الميك وهي تأفف
الهنوف:خير وش فيتس
نجلاء:دام وجهتس معفوس اكيد به سالفه
ساره:إلا مصيبه
فزو البنات بخوف يجلسون قبالها:وش فيه
ساره:توقعو من جت ؟
صفقت نجلاء راسها ساره بالم:ااااي
نجلاء:وقت حزازيرتس انطقي
ساره:عمتكم المصون
ناضرت نجلاء بالهنوف:مين عمتنا
ساره:ام امل نسيتوها
نجلاء رجعت على ورى وهي تعرف قد ايش عمتها خبيثه
الهنوف:يكفينا شرها
ساره:عاد وصاتي تنتبهون لنفسكم ومو اي شي تأكلونه
الهنوف:اكيد
ناظرت ساره بنجلاء الي صافنه:هي أكلمتس
نجلاء ينقطع شرودها:هاء ايش
ساره:مو كل من ضيفتس لطيتيه انتبهي
نجلاء:هههههههههههه ماني غبيه بس جيتها بهاليوم غريبه والله احس قلبي مو مرتاح
ساره:والله الجو توتر مره
فزت نجلاء:نادي نوره
ساره:ليه
نجلاء :نفذي بدون كلام
وقفت ساره تنادي نوره وهمست نجلاء لها تكلم فهد ينتبه على روحه ويشوف اي شي مو طبيعي بالعرس