တစ်ပတ်ကြာအောင် ကျောင်းနားပြီးနောက် ယနေ့သည် ကျောင်းပြန်တက်ရမည့်နေ့မို့ မြင့်မိုရ်တို့ နှစ်ယောက်လုံး အလုပ်များနေသည်။ ဘေစင်ရှေ့တွင် နှစ်ယောက် ဘေးချင်းယှဥ်ရပ်ကာ သွားတိုက်နေကြပြီး မှန်ထဲတွင် မြင်ရသည့် ဆင်တူညဝတ် ဝတ်စုံ အနီနှင့်အစိမ်းအကွက်လေးကို ကြည့်ပြီး မြင့်မိုရ် ပြုံးလိုက်သည်။
" သွားကို တအားဖိမတိုက်နဲ့ ... သွားကြွေတွေ ကွာကုန်လိမ့်မယ်။ "
" အင်း "
ဥဂ္ဂံက သတိပေးမှ မြင့်မိုရ်က ဖန်ခွက်ထဲမှ ရေကို ငုံကာ သွားတိုက်ဆေးအမြုပ်တွေအား ထွေးထုတ်လိုက်သည်။ မျက်နှာ ခပ်သွက်သွက်သစ်ပြီး တဘက်ဖြင့် မျက်နှာအား ဖိသုတ်လိုက်လေတော့ နုငယ်ဖြူဖွေးနေသော မျက်နှာလေး ပေါ်လာသည်။
" ဒီနေ့ ကိုယ်ကျောင်းကို စောစောသွားရမှာမို့ မိုရ်ကို့ကို ကျောင်းလိုက်မပို့တော့ဘူး။ ကိုကိုနဲ့ အတူသွားလိုက်တော့နော်။ "
လက်ကို ဆပ်ပြာဖြင့် ရေဆေးနေရင်းမှ မြင့်မိုရ် အသံပြုလိုက်သည်။
" အင်း "
" ထမင်းစားခန်းမှာ ထမင်းချိုင့် အဘွားပြင်ပေးထားတယ်။ ယူပဲသွား ... မကြိုက်ရင် ကျောင်းမှာ ဝယ်စားနော်။ ကျောပိုးအိတ် အရှေ့အိတ်ထဲ ငါးသောင်းထည့်ပေးထားတယ်။ ညနေတော့ ကိုယ်လာကြိုမယ်။ တစ်ခါတည်း HVPဆေးလည်း သွားထိုးရအောင်။ "
HVPဆေးဟု ပြောလိုက်တော့ မြင့်မိုရ်၏ မျက်နှာမှာ အနည်းငယ်ရဲသွားသည်။ လက်နှစ်ဖက်ကို အားဖြင့် ပွတ်တိုက်မိနေ၏။ ဥဂ္ဂံက အသံတိတ် ရယ်လိုက်ပြီး မြင့်မိုရ်၏ နဖူးအား လက်ဖြင့် တောက်လိုက်သည်။
" လျှောက်တွေးပြီး အကြာကြီး လုပ်မနေနဲ့။ ရေမြန်မြန်ချိုး။ လေဖြန်းနေမယ်။ "
" ငါ သိပြီ ... ဒါနဲ့လေ ငါတို့ မင်္ဂလာဆွမ်းကပ်အတွက် ငါ့အဖေနဲ့ စကားပြောပြီးပြီလား။ အန်တီနှင်းတို့ကို မေးရမှာကျ အားနာလို့။ "
" မမေးဖြစ်လို့ မသိဘူး။ "
ဥဂ္ဂံ၏ သာမန်ကာလျှံကာ အဖြေကြောင့် မြင့်မိုရ်၏ မျက်နှာတွင် အလိုမကျသလို အရိပ်ကလေး လျှံထွက်လာသည်။ ဥဂ္ဂံက မြင့်မိုရ်အား ကျောခိုင်းလျက်ဖြင့် ပြုံးလိုက်၏။ ဘောင်းဘီအိတ်ကပ်ထဲ ထည့်ထားသည့် ဖုန်းမှ ဖုန်းခေါ်သံကြားသည်နှင့် ဥဂ္ဂံက အလျင်အမြန် ကိုင်လိုက်သည်။ ဖုန်းခေါ်သံကို စောင့်နေမှန်း သိသာလှ၏။
YOU ARE READING
Youth , Sweet Love
RomanceMyanmar×OC Fic cover crd to pinterest နုနုပျိုပျို ချစ်ခြင်းလေးတစ်ခု ႏုႏုပ်ိဳပ်ိဳ ခ်စ္ျခင္းေလးတစ္ခု 11.4.2024 _
