كلشي كيتعرف ديرها غير زوينة
لمذكرة 115
وقبلت بحفيظ ! وماعارفة لا علاش و لا كيفاش حتى جلست معه و دويت معه و خليتو صارحني بشنو كيحس ! لقيتو هاز معزة كبيرة من جهتي من نهار تلاقاني فالجامعة اول مرة ! واستغربت كيفاش ماشكيتش فمشاعره اتجاهي ! إما انا لتركيزي مع هارون خلا جميع الرجال قدامي يبانو لا صورة لا صوت او هو لأكثر مني فإخفاء مشاعره و اتقان فن التمويه !
الحقيقة قبولي بحفيظ ماكانش عبثي انما جاني فلحظة كنت كارهة فيها راسي و كارهة حياتي و خيبات الامل لوصلت ليها فالاعوام الاخيرة ! منين ما دزت كلقاها معكلة ! مستقبلي ! سمعتي ! عائلتي ! هارون ! كلشي ! كالغريقة كنقلب على حبل نجاة نتشبت بيه كيما بغا يكون ! المهم شي حد يخرجني من هاد الضيق !
حفيظ لقيتو اقرب ليا فالتفكير و فالمعاملة ! بعيد على حومتي و على شنو كيدور فيها ! وماغاديش ننكر حفيظ راجل يعتمد عليه و ادا وزنتها بالعقل وكنت كنقلب على تكوين اسرة سليمة و نعيش زوجة لرجل كيبقى هو الخيار الافضل من هادوك لي جاو قبل هارون و بعده ! على الاقل كيحترمني و كيقدرني و فوقما وقفت عليه كلقاه !
الصراحة قبولي بالارتباط به ماخدمت فيه لا عقل لا قلب ! حيت بزوج معلقين ليا فهارون ! وانا للأمانة كنت صريحة مع حفيظ و عاودت ليه شنو كاين باش مانكونش كدابة او نضرو كيف ضريت عبلة نهار خبيت عليها ! واعدت نفسي عمري نكدب فمشاعري لهذا قلت شنو عندي واني قبلت بيه حيت كنشوفو انسان رائع ممكن مع الوقت نعرف قيمتو و ننسى اي حد وهنا اكيد قصدت بيها هارون !
حفيظ تقبل صراحتي و واعدني مع الوقت غادي يساعدني نتخطى اي شعور و اي صدمة دزت منها ! كما انه مخطط لمستقبلو و دارس كل خطوة باش يحقق داكشي لي بغا و مايخلي لا والديه لا انا لا اولادو مستقبلا محتاجين شي حاجة ! عندو الطموح ! المحنة و العقل و يمكن خاصني غير شوية الوقت و نبغيه او يمكن مع العشرة ينسيني فهارون و فأي امل ربطتو بيه !
ماما عاد ارتاحت و بدا يرجع ليها شوية الضو فوجها من بعد ماكانت مفرشة لينا الكٱبة و مغطيانا بالردود الباردة و الصمت العقابي ! بابا كذلك ارتاح كون حفيظ منين مشا عندو للحانوت يطلب الاذن باش يجيو للدار عجبو و لقاه ولد الناس و نقي و يمكن هادشي لزاد شجعني !
====================
شريفة : هادشي لكاين ا خالتي سعيدة ! من هنا يدخل الصيف و نتكاتبو انشاء الله !
سعيدة : (تنهدات) الله يسهل عليك ا بنتي ! الحمد لله ربي نصرك عليهم ! و احسن حاجة هو بعيد على هاد الحومة المنحوسة !
شريفة : الله يخلص كل واحد على هضرتو ا خالتي ! و گاع لكلاو فيا انا وعبلة مانسمحش ليهم حتى لعند الله ! (طلعات لها البكية) هضرتهم ماضراتنيش غير انا انما قاصت حتى والديا و راك شفتي ماما كي ولات ! حررو فينا العيشة الله ياخد فيهم الحق !
أنت تقرأ
مذكرات شريفة | Sharifa's Notebook
Fiksi Umumاخشى ان استيقظ في الاربعين لأجد انني ضيعت حياتي بسبب خيار خاطئ اتخذته و انا في سن العشرين ....! (د.ا.خ.ت)
