حب أو حرب

البارت 46

بعد ساعتين كانت واقفة تستنى فالطبيب يخرج عندها وقلبها يخبط بسرعة خايفة يموت وماتوليش تشوفو . الندامة والخوف ينهشو فيها مزال مش مستوعبة واش صرا؟ا وشكون  نقذهم بعدما فقد الوعي هيثم وهي قعدت تعيط باش يعاونوها فجأة تحل عليهم الباب ودخل واحد ملثم هز هيثم واوما لها تبعو دخلو لسيارة الإسعاف وركب طنوبيلتو وراح . والغريب انو مكانوش لي كارد فالفيلا كانت خاوية وكأنها مهجورة ..
شويا حتى خرج طبيب وطمنها انو خرجو الرصاصة ورح يخليوه فالعناية المشددة حتى يتجاوز مرحلة الخطر ..

في جهة اخرى . كانت ماشية جاية حتى دوخاتو وعيط عليها
_احكمي لرض دوختيني راني طمنت على حالتو خرجو الرصاصة وراهو مليح متخافيش
_ منيش خايفة على حالتو راني نخمم كيفاش ندير فهاد المشكل . اكيد منذر رح يرجع ويلقا هيثم اختفى ويعرفني مور الحكاية . مزال مش الوقت المناسب باش يتفضح السر
_نموت ونعرف كيفاش خرجتيه من الفيلا بيه بكلابو كامل
_ههه عيطتلو سمرا قالتلو ارواح وراح عندها اما رجالو تكلف بيهم ماثيو بعتلو حتى هو فيديو تاع ياسمين وجا يجري قتلهم كامل على جالي😍 فلخر مالقاهاش مسكين😔
_اووو نتي ينخاف منك انا ماخممتش فيها كامل
_كنت مجبورة ندير هك غي وصلتني اشارة هيثم وشفت الكاميرات لي فالفيلا اول حل خممت فيه هو هذا . عارفة انو سر سمرا هو نقطة ضعفو .مي  لازم  نعرف واش مخبيين عييت من هاد اللعبة وحابة نرتاح
_قريب ان شاءالله يخلاص كلش
_ان شاءالله

فالقصر كانو قاعدين صوفيا ومنصف فبيتهم حتى جاهم اتصال من منذر وصدمهم* عيطتلي سمرا وقالتلي لازم نروح عندها والا تفضح كلش* الجملة مزالها تتردد فمسامعهم مش مصدقين كيفاش مزالها حية وهوما دفنوها بيديهم  . وقفو بدهشة كي شافو ماثيو واقف قدامهم وعلامات الغضب والإستغراب على وجهو
_ شكون سمرا وواش علاقتكم بيها
بقاو متصنمين فبلاصتهم حتى نطق مرة أخرى
_ وعلاش قتلتوها واش بينها وبين ياسمين اهدرو😡😡😡
قربت عندو صوفيا جات تشدو من يدو تهديه دفعها بإشمئزاز
_ نتي ماتقيسينيش . اهدرو شكون سمرا
_ولدي واش راك تقول شكون هدي سمرا
_مانيش كافي باش تحشيلي . عارف انكم قتلتوها  او بالأصح دايرين فبالكم بلي قتلتوها مي واش حكايتها . واحد مايخرج منا حتى تحكولي كلش .. قاطعو صوت تلفونو . هزو لقا ميساج من مجهول *مزال مش الوقت المناسب باش تعرف الحقيقة  * شاف فيهم وخرج . دار مكالمة لعادل
_ عادل رح نبعتلك نيميرو وجيبلي باسم شكون مسجل
_اوكي
شويا رد عليه انو الرقم غير مسجل تأفف بملل . باغي يعرف شكون لي راهو يلعب معاه هاد اللعبة ركب طنوبيلتو وراح لوجهة عارف انو رح يلقا فيها كاش معلومة. وقف عند الباب دق بهدوء وكأنو مش هو لي شاعلة فقلبو نار . لداخل كانو يخدمو على لبيسي بتركيز تام حتى تفاجأو بدق الباب شاف فبعض باستغراب حتى نطق سامي
_شكون رح يجي .مكان حتى واحد عارف لبلاصة هدي
_يمكن ماركو رجع . راح باتجاه الباب فهدوء بلا مايدير الحس فتحو ببطء حتى تفاجأ بماثيو تحلو عينيه بصدمة وضربات قلبو تسارعو طاحت دمعة من عينو وتبعوها دموع حارين حتى رفع ماثيو يدو ومسح دموع بحنية ونطق بنظرة فيها بزاف الم وشوق
_ياسمينتي...

بقات متصنمة فبلاصتها مش عارفة واش دير حتى جبدها عندو مدخلها فصدرو وراسو فشعرها يستنشق ريحة شعرها وكأنو أكسجين .وهي دموعها ويدان مكنتش متوقعة رح يلقا بلاصتها ومش موجدة لهاد اللقاء كانت مخططة تنتقم منبعد تتلاقاه . هزت يديها بتردد وحطتهم على ضهرو مبادلاه العناق ونطقت بهمس فوذنيه
_توحشتك ماثيو🥺
بعد عليها شوي وشد فوجهها بيديه زوج وشاف فعينيها بعمق ونطق بحب
_ياروح ماثيو ياقلب ماثيو . واخيرا قلبي ارتاح شهور وانا نتعذب ونتي بعيدة عليا 
_سامحني كنت مضطرة ندير هك
_لالا نتي لي سمحيلي اذيتك بزاف مي مش من حقك تبعدي عليا هاد الفترة كلها
_كيفاش عرفت بلاصتي
_(مسح على شعرها بحنية وعينيه يلمعو بفرحة )مايهمش .المهم اني لقيتك وجامي نزيد نخليك مرة اخرى كون نعرف نموت .. حط جبهتو على جبهتها وقعدو فترة يشبعو من بعض حتى سمعو صوت سامي قاطعهم من الخلف
_احممم تسكنو فلباب؟؟؟ . شافت فيه بابتسامة حتى حست بماثيو باسها فخدها ودخلها حاط يديه على خصرها بتملك
_(هدر بغضب مزير عليها حتى تألمت) شكون هذا ؟؟؟ عايشة معاه ووحدكم؟؟
_(شاف فيه سامي وهدر وهو خارج من الكوخ )ياسو اختي لي ولدتهالي الدنيا اونبلوس انا راني متزوج منبعد نكملو ياسو باي
_(شاف فيها رافع حاجب) ياسووو!!!!
شدت فيدو بحنية وقعداتو فالفوتاي وحطت راسها على صدرو
_دوك نفهمك كلش خليني نشبع منك قبل
ضمها عندو ويدو على شعرها ...بقاو على هاد الحال لمدة طويلة بلا مايحسو بالوقت . حتى بعدها من حضنو رفع ذقنها بيدو وشاف فعينيها وهدر بهيام وعينيه يلمعو
_يمكن انا اذيتك وجرحتك بزاف ندمت ندمت بزاف وعارف انو الوقت فات على الندم ولكن صدقيني باغي نصلح أخطائي كلها عطيني فرصة خليني نعبرلك شحال نبغيك وشحال تسواي عندي نبغيك اياسمين نبغيك اكثر ماتتصوري
غمضت عينيها نازلة دمعة حارقة من عينيها وهو مسحها بصبعو قبل ماتهبط وقربلها باس عينيها بحنية وهدوء .حط يدو على خدها يمسح عليه بلعقل وعينيه ماتنحاوش من عينيها
هزت يدها تلعب فخصلات شعرو مرورا بجبهتو ، حواجبو، نيفو، واستقرت عند شفايفو قربت وباستو بوسة سطحية وهدرت بهمس
عارفة شحال تعذبت فغيابي ونظن انو هداك عقاب كافي خلينا نبداو صفحة جديدة غير انا وياك باسكو حتى انا نبغيك يا أمير
_(حل عينيه مصدوم ) كيفاش عرفتي اسمي الحقيقي
ردت عليه بهدوء وهي تلعب باصداف الشوميز لي لابس
_من لول كنت شاكة انو اسمك مش ماثيو كي حوست لقيت اسمك امير وبدلتو كي دخلت للمافيا نتا وماركو😉
سقم قعدتو وشاف فيها بجدية .
_ ليوم لازم تحكيلي كلش حاب نعرف واش راه مخبي واش الشي لي خلاك تختفي كل هاد المدة وشكون هداك ال###لي كان معاك هنا ...
_(شدت فيدو ) اهدا بالعقل عليك رح نحكيلك كلش ....
بعد مدة كان قاعد وشاد فراسو من الأحداث لي حكاتلو ياسمين مكانش متوقع هاذ الشي كامل كان مخبي عليه وهو مش عارف سنوات من عمرو ضاعت وهو عايش فالكذب . وقف جا رايح شدت فيدو
_ماثيو وين رايح .مزال ماكمل..
_(حاوط وجهها بيديه )انا رح نجيبلك حقك منهم نتي ارتاحي وخليني نتكلف اوك حبيبي
تبسمت كي سمعت كلمة حبيبي ووقفت معنقاه خاشية راسها فصدرو وهو مزير عليها
_حابة نشوفهم يتعذبو كيما عذبو امي حابة نشوفهم يموتو قدامي باش نرتاح😭😭😭
شدها من كتافها وهدر بجدية
صاي خليها عليا نتي ارتاحي وثيقي فيا
باسها بوسة طويلة على جبهتها وخرج من الكوخ  متوجه للفيلا تاع باباه . وهي عطيت لماركو تعلمو باخر التطورات...