Unicode
လမ်းမထက်တွင် အမောတကော ပြေးနေသည့် မိန်းကလေးတစ်ဦး။ လက်ထဲတွင်လည်း မွေးကင်းစကလေးလေးကို ပွေ့ချီထားသည်။
ကလေးမွေးပြီးပြီးချင်း ပြေးနေရသဖြင့် သွေးများပင် မခြောက်သေးသည့်ပုံစံဖြစ်သည်။ ခြေထောက်တစ်ချောင်းလုံးတွင် တစ်စက်စက် စီးကျနေပါသည့် သွေးများက သက်သေဖြစ်၏။
တစ်စုံတစ်ယောက် သူ(မ)၏ အနောက်မှလိုက်လာနေသည့်ပုံစံပေါ်နေကာ မျက်ရည်များသည်လည်း အဆက်မပြတ်စီးကျနေခဲ့သည်။ ကြောက်ရွံ့နေဟန်လည်းပြသည်။
ထိုမိန်းကလေး ပြေးလာရာလမ်း၏ တစ်ဖက် တစ်ချက်စီတွင် သစ်ပင်ကြီးများ ရှိနေပြီး လမ်းမကြီးအား အုပ်မိုးထားသဖြင့် မှုံမှိုင်းမှိုင်းဖြစ်လို့နေသည်။
မိန်းကလေးငယ်သည် သူ၏ မျက်လုံးများကို ဘေးဘီဝဲရာသို့ ကျီးကန်းတောင်းမှောက်ကြည့်
သကဲ့သို့ ကြည့်ကာ အကူအညီရလို့ရညှား ရှာနေခဲ့သည်။
မိုင်အဝေးကြီးမှ ပြေးလာရ၍ မောပန်းနွမ်းနှယ်နေသော်လည်း ကြိုးစားပြီး ဆက်ပြေးနေသည်မှာ တစ်စုံတစ်ရာကို ကြောက်လန့်နေပုံပေါ်သည်။
ထိုအချိန် ကားတစ်စီးမောင်းလာသံကြားသည်မို့ အနီးအနားရှိ သစ်ပင်ကြီးနှစ်ပင်အကြား အမြန်ဝင်ကာ လာနေသည့် ကားအား လှမ်းကြည့်နေခဲ့သည်။ အပင်များအုပ်မိုးထား၍ ခပ်မှိုင်းမှိုင်းဖြစ်သော်လည်း နေ့လည်နေ့ခင်း ဖြစ်သည်မို့ ကောင်းစွာမြင်ရသေးသည်။
ထင်ထားသည့်ကားအရောင်နှင့် နံပါတ်မဟုတ်သည့်အတွက် အကူအညီရစေရန် လမ်းမပေါ်သို့ ပြန်ထွက်ကာ လက်တားလိုက်သည်။ ဂေါ်ဖီထုပ် တင်လာသည့် ကုန်တင်ကားအသေးလေးသည် ထိုမိန်းကလေး၏ အနားတွင် ထိုးရပ်သွားသည်။
ကားခေါင်းခန်းမှ အပြေးတစ်ပိုင်းဆင်းလာကြသည့် လူအိုလင်မယားနှစ်ယောက်။ မိန်းကလေး၏ မျက်လုံးများ ဝေဝါးလာသည်။ သို့သော် အားတင်းကာ ကလေးငယ်အား ချီထားသည်။
"ကယ်ပါ၊ ကယ်ပါ၊ ကလေးကို ကယ်ပေးပါ"
အသက် ၅၀အရွယ်ကျော် အဘိုးအို လင်မယား အနားရောက်လာသည့်အခါ မိန်းကလေးငယ်သည် တိုးလျလျ အသံဖြင့် တောင်းဆိုနေလေသည်။
