#الحب والمستحيل 10
#قصةعشق@
بدايه المرحله الثالثه ..
داومنة ومتشوقين كلنا
جانت مرحله تخصص وبحوث وتجريب عملي ونظري
والدراسه أصعب صارت بيها
وتختلف عن المرحلتين السابقة
الاساتذة ياخذونه رحلات تطبيق بالمحكمه وللنقابه وقاعات ومؤتمرات
وندوات ..
وسمعنا بان راح نلتقي بشخصيات سياسيه وسفراء من دول الجوار ..
ريم حامل وداومت
صعب عليها بس اكيد علي يدعمها ويتابعها واحنا صديقاتها وياهة ماعفناهة ابد ونشجعها
غصون يربي شوكت اتزوج واحبل ..
وناديه هم متلهفه للزواج واني وسوسن بقينه
ماعدنه حظ بالحب ..
جلال سمعت خاطب بت العميد وديحضرون للزواج بس هم ماخلصت منه بعدة يباوعلي بحقد وغضب كلما تصادفنه بطريق ..
هيثم اشوفه من بعيد وقليل كلش
اصلا اسوي نفسي ممهتمه اله
وهو هم أحسه يتجاهلني ..
مشت الايام بين محاضرات ونصعد بسيارات الخط ننروح اماكن ياخذونه حتى نسوي بحوث ودراسات حتى أيام ماشوف هيثم نهائيا
يمكن يتعمد يصعد بغير سيارة ..
مرة مطرت مطر قوي ..
كمت ابجي وصديقاتي يهدئون بيه يعرفون المطر يذكرني بهيثم ..
هيثم من مطرت مرة كان قريب كلش مني لدرجه تنفسنا انفاس بعض ..
أحس ببروده هسه بغيابه ..
اووف ..
مااعرف ..
اعتقد كبرياءة وطموحه اكبر من أن يحب ويعشق ويتنازل ..
حاولت اكرس نفسي هالسنه اريد اتفوق بيها وساعدنه ريم هواي نكتبلها المحاضرات كلما تتقدم شهور الحمل تتعب ومكضيتها إجازة مرضية بس تريد تنجح وساعدتنا ام سمير هواية ماعافتنه أبد ..
لؤي" زميل جديد ويانه اجانه نقل من غير محافظة كلش حباب ومرح
فقير بسوالفه
ويه الكل يتشاقه مامنتبه إله بس صديقاتي نبهوني ..
يحاول يقترب ويسولف ويتشاقه وياي ..
يركض وراي يكلي عشق احبج !
ضحكت عليه كتله شعرفت عني لؤي انته ماصارلك شهر !
يلح .. يلح احبج واريد اخطبج ..
يمعود منين طلعت انته
صرت كوة اخلص منه لزكه
البنات ينكتن عليه ولج عشوقة هو هذا فارس الأحلام الموعود لا والقسمه ويتشاقن وياي
واني بداخلي اضوج كلش لان ماعندي مشاعر تجاه احد وماريد اتزوج شخص واني ماحبه..
وبعدين بقت سنتين واريد اتفوق بيهن
صارحته للولد وگتله لؤي انته خوش ولد وألف وحدة تتمناك ..
كال ماريد الف اريدج انتي
ويريد يبجي كسر خاطري
_ زين شنو رايك نكمل هالسنه ونفتح مكتب محاماه ببغداد ونشتغل سوة؟
شفته فرح خطية يريد يشبكني من الفرحه
بس توعدني تعوف سالفه الخطوبه وتفكر بالدراسة وبس
اتفقنة ..؟
أقتنع وظل وراي مثل خيالي ويانه يفتر
البنات يحبن سوالفه حباب ومايع كلش
وماردت ينجرح
استمرت حياتنا بهالمرحله تعبت من تسجيل المحاضرات ولابتوب عندي انسخ واصور وبحوث وحتى لريم خطيه بعد امتحانات الكورس الاول ولدت بالمستشفى
ورحنا اني وصديقاتي وحتى ام سمير لبيت زوجها واخذنا هدية للنونو يجنن سمته محمد" شكد ناعم وبي براءة ومن شلته وبسته حسيت بإحساس مميز وغريب
ريم وعلي فرحانين وام علي تهلهل كل شوية وتركص
فرحتها بحفيدها متنوصف ..
بيوم ودونه بالجامعه لقاعه المؤتمرات اكو ندوة والأساتذة طلبو منو نسجل ملاحظات وبحث نسوي تحضرنه كلنا بس ريم مراحت خذت اجازة صعدت بالسيارة وغصون وناديه وسوسن كعدنا سوة لفتت انتباهي هيثم كاعد وصافن بالجامه رايح لعالم ثاني محاس بوجود احد وحتى مانتبهلي ..!
اشرت للبنات فهمني
كعدت بصفه سويت اححح" ..
نز ّ..
بيده دفتر الملاحظات الجلد نفسه ومفاتيح وموبايل ..
توتر ظل يحوس بمكانه ممرتاح ..
تفاجأت ..!
تصرفه غريب !
باوعت عليه ..
اضايقك هيثم !!
هاا لا ..لا
مامضايقتني ..
حسيت بنفسي ثكيله فشلني ..
ادنيت شويه عنه ودرت وجهي
تحركت السيارة ..
حسيته تقرب مني كلش صار جسمه أيدة ورجله لزكن بيه ..
ماادري شحسيت متت من الخجل همس باذني آسف عشق .. ي !
وبلع الكلمه ماسمعتها زين
درت وجهي اله متعجبه من تصرفه عيونه حمر وتلمع وبيهن كلام !
هيثم شنو كلت هسه ماسمعتك !
_فدوة عشق سامحيني ..!
حسيته متوتر جان كلش
هيثم ممكن نحجي او نتصل من نرجع؟
تردد بالبداية ..
هاا أي ميخالف بعدين اني بليل اتصل بيج عل الماسنجر اذا ماكو ازعاج !
جاوبته بعصبيه لا .. ماكو أي ازعاج
نزلنه وحضرة الندوة كلشي ماافتهمت ولاسجلت اي ملاحظة
بالي بس باللي صار بيننا قبل شوي
شخصيات دينيه وسياسيه موجوده وكاميرات والطلاب كلها مركزة بالمحاضره بس اني جنت مرتبكة واحساسي بعالم ثاني أول مرة نحجي إني وهيثم جمله مفيدة بعد ثلاث سنوات قضيناهه سوية
خايفه يربي
من يتصل راح اكدر احجي وياه؟
لو ينعقد لساني !
ظليت احسب الدقايق لحد مابليل داخله ماسنجر ومنتظرة يراسلني
يطلع متصل ..
ديلا راسلني فدوه
ياربي شلون بارد هذا ثلج
راسلوني البنات كتلهم تعبانه وعفتهم ماردت انشغل بغير شئ اريد اعرف شراح يكلي هيثم وشلون راح احجي وياه ..
بين الانتظار مليت نعست عيوني ظليت اغفي انام وافز ماكو رساله ..!
بالواحدة بليل اجتني رساله ..
مساء الخير ..
رئسا اتصلت بي ..
دگ دگ ماكو رد ..!
رجع كتب ماريد اسبب احراج او مشكله وياج لاهلج !!
ظليت الطم !
يبوووو افف منك
شنو انته !
غلقت جهازي وعفته ..
تعبت منه ..
ماكو هيج بشر ..
بجيت ونمت للصبح كوة كعدت ..
شحنت جهازي ومارحت للكليه
سبحت ونظفت البيت وطبخت غده
فتح الباب بابا ودخل تفاجا بيه !
شنو هاي بنتي شتسوين هنا !
بابا مارحت !
ليش بابا !
حضنته ماكو شي بابا بس دنتعب بالمحاضرات واحتاج شويه وقت أرتاح
خله ايده على كصتي وعلى ايدي خاف مصخنه بابا اوديج لطبيب ..!
لابابا مو لهالدرجه ارتاح اليوم وباجر اداوم وشويه واتصل بزميلاتي اسألهم على المحاضرات ..
خلص اليوم للمغرب اتصلو بيه غصون وناديه وسوسن سون هجوم شبيج عشوقة يمعودة خيرج !
كتلهن ماكو شي الظاهر البارحة تعبت من الندوة وكتبت محاضرات اليوم وساعدوني بملاحظات الندوة مالت البارحة ودرسنا سويه
ناديه رادت تكول شي غصون سكتتها
حسيت اكو شيء صاير !
سديت الإتصال وياهن ورجعت اتصلت بناديه وحدها ..
قبل لا اسال كالت عشوقة ترة هيثم كل شويه يجي يمنا ويدور عليج
على طول وقت الدوام يفتر مثل المتيه ..
اتنهدت بحسرة والم
خبلني هيثم ليش هيج يسوي
مد وجزر وياي كرّ وفرّ
ماحجيت شي ولاكتلهن وعدني يتصل وتردد اصلا فشله عليه اني مجلبه بي وهو ممهتم بيه ..
ثاني يوم رحت للدوام كاعدة بالقاعة
جلال يوم يداوم وعشرة لا مكضيها ونسه صديقاتي فرحن
وظلن يبوسن بيه
أنت تقرأ
#عشق_والمستحيل
Tiểu Thuyết Chung#قصة فتاة عاشقة فعلت المستحيل لتحضى بمن تحب حصلت لها مفارقات وصراعات مع الحب والمستحيل بعض الأحداث 🔞
