#الحب والمستحيل 11
#قصةعشق@
انتهت هاي السنه على خير وسلامة
واكو هواي تفاصيل ماذكرتها بخصوص الدراسه والندوات والبحوث والامتحانات والمحاضرات والوضع الأمني ببغداد اللي صادف وقت دراستي ...
المهم خلصنا والحمد لله ..
بدت تحضيرات الحفله للسنه الثالثه لجميع مراحل الدراسة ولكل الأقسام وجانت مميزة اليّ هالمرة تتطور جبير نجحت بتفوق واقتربت كم خطوة بعلاقتي من هيثم
وجلال ماضايقني هالسنه قليل من بعيد يباوع
بس سمعت فسخ خطوبته من بنت العميد ..!
حضرنه بالحفل والشعراء والمحفل مميز وامين بغداد موجود وكرّم الطلاب وحسيت بفخر مينوصف وبثمرة تعبي واجتهادي وهيثم جان كلش فرحان والملابس مطلعته كأنما ملك يجنن ..
اخذنه الصور اشرتله اجه يمي !
ابتسملي ووكف بصفي وهاي المرة الثانية جانت الاولى بالمرحلة الاولى صدفة وهالمره
بعد صبر هواي وعناء اقترب مني ..
جلال مخبوص ومتوتر وكل شوية يتعارك ويه طالب وعاف الإحتفال وطلع من الجامعه ..
احنا ظلينه لنهايه الحفل تأخرنا للعصر
تونست بيها كلش بس غصون ممرتاحه لان جاييهة خطابة غربة واهلها مصريّن ينطوها
ومتعاركه ويه غيث
مااعرفت اللي صار بالضبط
الظاهر هوسة صايرة عليها
نادية فرحانه مابقه بس سنه وتتخرج وتتزوج من حسام
وسوسن ولؤي اعتقد صار بينهم شئ !
انتبهت اعجاب ونظرات وأخيراً
الحمد لله سوسن حالفها الحظ ولؤي كلش فقير وحباب ويستاهلها ..
رجعت للبيت هلكت تعب من الحفله وكملنا ظميت غراضي بصندوگ
كتب شكر وتقدير وشهادات وبحوث التخرج وصور التخرج تبقى أحلى ذكريات لطول العمر ..
العطله هالمرة تختلف اتصل بهيثم ونسولف بس منحجي اي شئ خارج حدود الصداقه العاديه
كلام عادي جدا وهو دائما يكول عندي شغل ويروح بسرعه
عرفت يشتغل بمحل الكترونيات ويشد ستلايت وشبكات نت بالبيوت والمحلات
ورغم هذا متفوق جدا بالدراسة
يعني شخص مثالي وماكو مثله بهالوكت شخص يكد ويتعب ويشتغل ويدرس وينجح بتفوق بنفس الوقت ..
بالإضافة كونه هادئ وخجول واخلاق عاليه واشوفه اجمل شاب بالكون بعيني ..
اتصلت بغصون اريد اعرف شصار
تفاجات بيها تبجي وتكول اهلي رفضو غيث وتلطم راح اموت وراح انتحر !!
يمعودة غصون !
البنات اتصلو بيها نفس الشي ومنكدر نساعدها
لؤي تقدم لسوسن وعلنو خطوبتهم بس نيشان وعقد والزواج بعد التخرج ..
بيوم من الايام
ريم اتصلت بيه تبجي وكلشي ماافتهمت منها ..!
واسمع حمودي يبجي ويصرخ ..!
ركضت لبابا كتله كال بنتي روحي شوفي شبيها ..
بدلت على السريع واخذت تكسي دخلت لبيتهم
ام علي تصيح وتحجي بصوت عالي ..
خبلت الطفل سودنت ابني هالعرمة !!
كتلها خاله على كيفج شنو الموضوع !
روحي عشق شوفيها لصديقتج المسودنه خبلت الطفل وابو ..!
ركضت غرفة ريم فوك الباب مقفول وحمودي يبجي ادك متفتح !
ريم اني عشق فتحي
كوثر اجت كالت من الصبح لسه قافله الباب وتعاركت ويه علي وطلع وعافها منهارة ..
لاطلعت ولاترضى تفك الباب
وامي بس تفرفح ظلت ..!!
(نسيت اكللكم كوثر مخطوبه وقريبا تتزوج من زميلها بنفس القسم وياهة )
شويه وريم فتحت الباب
دخلت وسديت الباب شلت حمودي حضنته هدأ وسكت ..
وريم كاعدة بلكاع مملخه نفسها تبجي وتنحب .. !
ريم شصاير يمعودة !
متقبل تحجي وبس تشهگ ..
اخذت حمودي وقوطيه الحليب والممه انطيته لكوثر كتلها بس احاول اهدأ من حالة ريم عفية خلي يمج خذته ونزلت
رجعت لريم اخذتها لحمام غرفتها غسلت عيونها مورمه من البجي نشفت وجها وبدلت هدومها
ريم اتصل بامج ؟
لا .. عشق ماريد احد من اهلي يشوفني هيج ؟
زين فهميني شصار !
عشق جنت غلطانه !
شلون يعني فهميني !
غبيه وساذجه وكل اللي يصير حيل وياي ورجعت تلطم
وخرت ايديها اهدي ريم فدوة اروحلج
ريم مسحت وجهها بالمنشفه وتنهدت ..
عشق الزواج مسؤولية كلشي مطلوب منج تربيه طفل ومداراه الزوج وشغل بالبيت وطبخ ويه العمه وتنظيف وغسل ملابس وكوي واهم شي كون تظلين نظيفه ومرتبه وممكيجه وراشه عطر وتونسين الرجال بليل
ورجعت تبجي
اني ضحكت ريم انتي لا اول ولا اخر زوجه بالدنيا هية هاي سنه الحياة
عشق ماريد بطلت تعرفين شنو بطلت هاي الحياه ماريدها راح انتحر واخلص
موبايلها يدگ ماردت
ركضت وفتحت باب غرفتها وذبت نفسها من الدرج عالي جان كلش وصرخت !!
اني متت خوف ورجليه يبست حتى لساني انعكد !
طلعت ام علي وكوثر من المطبخ وظلن بس يصرخن ويلطمن ركضت الدرج كله ماتذكر شلون نزلت من الصدمه والخوف على ريم شفت دم بالكاع وريم مايعه روحها !!
نسيت جنطتي فوك كوثر ركضت اتصلت بعلي وام علي جابت مي غرگتنا كامت ترش علينا وتصيح
اني ارجف من اللي شفته وتيبست
ومااعرف شسوي الخوف اخذني
اتذكر بس كلت (ماتت ريم)!!
الأحداث توالت نص ساعة اجه علي شالها وصعد بسيارته واني ورة كعدت
ماادري شلون تحملت المنظر يمكن دمي خلص بوقتها ..
وام علي ظلت يم الطفل وكلهة اتصلي باهل ريم
كوثر جابت جنطتي وملابس لريم من فوك وصعدت ويانه بالسيارة
وصلنا للمستشفى اجت الممرضة تلكونا بسديه متحركه وعلى الطوارئ
كعدت على الكرسي انافت وگوه اشهگ النفس ميته خوف وارجف
علي راح للاستعلامات وكوثر الله ينطيها جابتلي مي شربت وغسلت
كالت عشق شصار !
ماكدرت احجي الموقف صعب جان الصدمه شلّتني ..
اجه علي يرجف خطيه جان ديخابر ويصيح
ظل يباوعلي
سد موبايله ويحجي ويه كوثر وعينه عليه
اجه يمي كال عشق احجي شصار !!
بقيت ابلع بريگي وارجف
كوثر كالت علي لاتصيح البنيه انهبطت كلشي صار گدامها واخترعت
ظل يضرب بالحايط ويركع براسه وعصبي كلش گوة هدأته كوثر ..
تاخروا بالطوارئ ورة نص ساعة طلع دكتور كال ماكو شي كدمات بجسمها ونزف خفيف توقف بس الجنين مات ودزينه على دكتورة تسويلها عمليه كرداش !!
علي كعد بالكاع خطيه انهبط
اني صفنت ياجنين !
حمودي عمرة شهور خطيه !
كوثر كالت ماشي دكتور أهم شي صحه الام وسلامتها
طلعنا برة بحديقه المستشفى اختنكت من ريحه المستشفى
غسلت تنفست هوة نظيف
وعلي ظل جوة
طلعت موبايلي خابرت بابا كتله اللي صار كال بابا ابقي ومن يجون أهل ريم رجعي وياهم
ماكو دقايق واجو أهل ريم وام ريم تبجي وابوهة سألوني كتلهم ردنا ننزل من الغرفه تزحلكت رجلها من الدرج ووكعت
ابو ريم كال بالله لو جان محمد بيدها
الله ستر على الطفل
ام ريم تكله بنتي راحت يمه وتلطم وتبجي
ظلينه لوقت المغربية هلكت من التعب والجوع بس اريد اشوف ريم واطمئن عليها ..
كوثر كالت اكو شرطه وضابط تعالي يسألون عالحادث
توترت مااكدر احجي شي خاف يأثر على علاقتها بعلي ويعتبرة تعمد تقتل اللي ببطنها
الضابط كلش حلو وبعده شاب شافني من بعيد انتبهتله مثل اللي عدل نفسه وانعجب بيه الظاهر بس اني بيا حال ومماكله شي من الصبح وريكي ناشف وانهبطت
كلي تفضلي استريحي وكعد بصفي وبيده دفتر يكتب وظل يسأل
اسمج وعنوانج والمريضة شنو تقربلج ووقت الحادث واسأله هواي سطرني
ويحجي ويباوع بعيوني اجه علي وكف بصفي توترت
الضابط كال منو موجود بوقت الحادث ويباوع على علي
المهم جاوبته بإختصار
بعد ماخلصت التحقيقات ماحجيت اللي صار بالحقيقة
خفت على ريم ويمكن يعتبر إنتحار
كتلهم حادث عابر تزحلكت من نزلنه من الغرفه ومالحكت الزمها ..
انتظرت ريم تصحى من البنج الطبيب منع اي واحد يدخل عليها
رحت للطبيب كتله فدوة لازم اشوفها توسلتله قبل دخلني كلي بس بسرعة طلعي
دخلت الكل مشغول وممنتبه
ركضت ريم تون من الألم
وتبجي ادنيت يمها كتلها ريم ليش هيج سويتي حرام الطفل اللي ببطنج وحمودي شنو ذنبه !
بجت أكثر وماحجت شي بعدين فهمتها اللي كلته للكل وللشرطه
ووصيتها لاتكول غير شئ وتخرب حياتها أكثر
وسلمت عليها وطلعت من الغرفه شفت الكل مخبوص ومتوتر وعلي كل شويه يخابر
شفت ابو ريم كتله عمو توصلني للبيت ؟
كال عمو شوية بس اشوف ريم واتطمن
عليها وارجعج وياي كتله زين اروح اشتري شي متت من الجوع
نزلت بالمصعد غرفة الاستعلامات سألت على كافيتريا اي شئ دلوني رحت اشتريت بسكت وعصير لكيت الضابط يمكن نفسة
منتبهت هالكد
كعدت بكراسي اكو فتحت البسكت على السريع اكلت من الجوع ماشوف بعد وشربت بالعصير اجه الضابط سلم عليه رديت السلام
وحلكي مليان بسكت كوة حجيت ..
ضحك كال على كيفج لاتغصين
استحيت وظليت ابلع شوي شوي
وعفت باكيت البسكت شربت بس العصير ..
_اعرفج بنفسي (امير حسنين) ومد ايده اني هم صافحته كتله اهلا
وكمت عدلت جنطتي وردت اروح كام وكف كبالي كال العفو ضايقتج !
دگ موبايلي
ظل يباوع
فتحت جنطتي لكيت اتصال من بابا ..
عمدا رفعت صوتي كتله الو حبيبي !
الضابط رجع لورة
ابتسمت ورحت
همست بالحجي كتله هسه ابو ريم شويه ويجيبني
ورجعت صعدت بالمصعد طلعت البسكت اكلت شلون فشلني هذا بالله
بس شكد انيق وملابسه حلوة لو صديقاتي يشوفنه يتخبلن
شفت ابو ريم ببوجهي كال امشي عمو ارجعج واجيب غراض وارجع
كتله وريم
كال دخلنه شفناهة والدكتور كال تبقى للصبح وانطلعها
بعد ماحجيت كلت من ارجع اتصل واسأل عنها
رجعنا هلكت بابا محضرلي العشه فدوة اروحله لو ماهو شلون حالي جان تعشيت وشربت جاي وارتاحيت
حجيت كلشي لبابا انقهر على ريم كال بابا حقها
تعجبت !
بابا شلون حقها تسببت بقتل طفل ببطنها واللة ستر عليها ماماتت !
كام كعد بصفي كال بنتي المرأة ضعيفة وبسرعه تقنع وتحب اللي يهتم بيها ويدللها
صفنت على كلامه !
علي" اكيد هاملها ولايطلعون ولايتونسون الحياه تغيرت المولات والكافيهات ومكانات ببغداد للترفيه يعزمها على عشه برة ياخذهة سفرة لو زيارة
تذكرت فعلا ريم من تزوجت ماحجتلي بيوم عن طلعه لو سفرة ويه علي
اكيد نفسيتها تعبانه ومنا حمودي بس يبجي وشلون تحمل المفروض تسوي منع حمل ..
اتصلنا بالمستشفى طمنونا عنها ودخلت غرفتي فتحت انترنت شفت رسائل من هيثم والبنات صديقاتي عفت هيثم واتصلت بالبنات حجيتلهم حالت ريم واللي صار تخبلن عليها اتفقن يزورهن من تطلع ببيت علي وتعجبن من اهتمام الضابط بية
وظليت بس احجيلهم عنه
غصون كالت عشوقة يجوز هو هذا فارس الأحلام
وتعوفين تفكيرج بهيثم ميفيدج !
غصون اكو شيء تعرفه عن هيثم بس مداعرف شنو ومتقبل تحجيلي
اني بصراحه مهتميت وما اخذت الموضوع بجديه لان ماشوف بعيني احد غير هيثم وصار ثلاث سنوات اعشقه وكل يوم احبه أكثر ومااعرف شلون اوصله ..
رجعت قريت رسايل هيثم شلونج ووين اليوم !
سلمت عليه برساله كتله ريم متخربطه وبالمستشفى جنت وغلقت الجهاز ونمت
..
الصبح كعدت متأخرة تعبانه جنت من البارحة ..
لكيت جهازي مغلق شحنته ورحت سبحت وبدلت
بعدين فتحته واتصلت ببابا كتله راح اروح لريم
كلي بابا ريم هنا عد اهلها قبل شوي اتصلت بأبو ريم وكال جبناهة يمنا ترتاح واني دزيتلهم كيك وحلويات لسلامه ريم
كتله ها بابا لعد اطبخ الغدة والعصر اروح
مانتبهت للرسايل بعد كملت شغلي وطبخت على السريع اجه بابا تغدينا
وشربنا جاي كتله بابا حروح لبيت ريم
كال بابا عشق اريدج تحجين ويه علي
شنو بابا يا علي !!
شبيج بابا زوج ريم !
كتله لا بابا اخجل منه
بنتي انتي بميت رجال وقويه وشجاعه
ضحكت كتله بابا انتي حاجي فدوة لو ابو ريم
بنتي انتي تحاجي وتعرفين شتكولين ماشي !
باسني وكلي اخذي مفاتيح البيت خاف يصير عندي شغل اليوم واتاخر وطلع
هاي شلون سالفه !
كعدت افكر شراح اكله هذا وشحجي !!
بس باوعلي بالمستشفى ارتبكت وراد يعرف اللي صار انعكد لساني
شلون !
دخلت غرفتي بدلت فساتيني كلها طويله لبست فستان ازرك ومشطت قبل لا اخلي الموبايل بجنطتي شفت رسايل
فتحتهن ريم كاتبة
شكرا عشق انتي فعلا صديقة وفيّه واختي اللي ماولدتها امي
وهيثم كاتب حمد لله على سلامه ريم طمنيني عنها
بعد رساله من رقم مجهول !
احبج عشق واتزوجج غصب عنج رضيتي ولا رفضتي متكونين لاحد غيري !!
تعجبت منو هذا الخبل !!
هزيت بأيدي ومسحت الرساله وطلعت
رحت مشي بيت ريم قريب
شفت من بعيد سيارة مانتبهت هالكد الجام مضلل
بس اعتقد منتظر احد جان ودگ هورن
مشيت بسرعة وملتفتت اجه ببالي جلال الحيوان
باب اهل ريم مفتوح دخلت بسرعة
...يتبع
#قصةعشق@
أنت تقرأ
#عشق_والمستحيل
Ficción General#قصة فتاة عاشقة فعلت المستحيل لتحضى بمن تحب حصلت لها مفارقات وصراعات مع الحب والمستحيل بعض الأحداث 🔞
