#الحب والمستحيل 27
#قصة عشق@
رجعنا لبغداد
عشرة ايام كبرت بيهن عشر سنين وخسرت كل احلامي اللي حلمت بيها مايخلصني من جلال غير معجزة ..
دخلنا لبيت أهل جلال
أم كريم كالعادة تلكتنا تهلهل
ام جلال موجوده استقبلونه كلهم
اشرت لجلال صعدوا اثنينهم لغرفه المكتب فوك وام كريم والحارس صعدوا الجنط والعلاليك لغرفتنا
اني كعدت بالصالة تمددت طلعت موبايلي
راسلت ريم كتلها وصلت
شويه واسمع عياط وصياح جلال
ضميت الموبايل وركضت لفوك شفته دخل للغرفه مادخلت وراه خفت يطلع حركته بيه رحت لام جلال لغرفتها جانت مقهورة كلش
كالت اسفه ماما عندي طلعه هسة من ارجع نحجي خذت جنطتها وطلعت
خفت شنو هاي شنو الموضوع !
مشيت على كيف سمعت جلال يحجي ويه أم كريم بغرفتنا
تصنتت بس ارجف
اسمعه يكلها
مكدرت شلون يعني اجبرها متقبل حاولت بكل طريقة متتجاوب وياي
تصدني وتعاندني
أم كريم تهديّ بي
يمه خل توليّ عدك الاحسن بس انته مخبل عاميتك ماادري ساحرتلك
اني صدك ضجت منها
وعرفت ام جلال تعاركت وياه علمودي طلعت صوت عمدا سويت نفسي ستوني اجيت
أم كريم ارتبكت كالت ربع ساعة واصعدلكم الاكل
والثلاجه مليانه فاكهة وعصاير وراحت
كعدت على الجربايه نزعت حذاءي وكمت اخذت ملابسي لزم ايدي
شنو مامالي عينج لوتسوين نفسج متشوفيني !!
شنو جلال خير !!
شصار هسة !
شبكني اذا تنفستي اخنكج كافي هوايه انطيتج مجال
خليت عيوني بعيونه
اذا اني بنظرك خاينه واني كلشي ممسويه وانته خاين وشراب عرگ
وتريدني انسى منظرك اليخزيّ ويه الالمانية
دفعني
افف منج حتى لو عدي رغبه بيج سديتي نفسي
اني طالع واتاخر افتهمتي
طلع وطبگ الباب حييل
سديت اذاني
الله ياخذك شكد سافل
سبحت وبدلت لبست الثوب العسكري اللي اشتريه كلش حلو وانيق لايگلي
اتصلت بريم فتحت كاميرا تخبلت ولج عشق شنو هالجمال والاناقه
شكد مشتاقتلج
شفت جهالها يخبلون ريم تعالي جلال طلع ويتاخر حبابه
خلي علي يجيبج هسه
قنعتها كالت اشوف علي بلكت يقنع
اجت ام كريم جابت العشة
كتلها شويه وتجي صديقتي وزوجها صعديّهم وجيبي بعد عشة اضافي
وكعدت اخلي مكياج
ضلت واكفه وراي
درت وجهي نعم محتاجه شئ !!
بنتي اللة يوفقج ارحمي الولد خبلتي
لاباللة !
هو شكالج مني !
يمه صارلكم 11 يوم متزوجين وماداخل بيج
كمت على حيلي
اسمعي
اني محترمتج لخاطر شيبتج
من البداية مامرتاحتلج
لاتتدخلين رجاءا
روحي يلا جايني خطار هسة
شفتها انقهرت مني كلش
راحت طلعت
عطرت الغرفة وشغلت الاضويه وفتحت باب البالوكونه لازم اعيش حياتي وجلال سلمته بيد اللة يخلصني منه
ساعه ودخلت ام كريم كالت اجو ضيوفج
ريم وجهالها حضنتها وبجيت كلش مشتاقتلهم والجهال يربي شكد حلوين يخبلون وعلي اجه صافحني وكلي شسويتي بينا
بغداد ظلمه لحد ما رجعتي
فرحت لشوفتهم
تعجبوا بالغرفه كعدتهم بالصاله وتعشينه سوة وضحكنه ونتشاقه وحجيتلهم عن الاوبرا والمسارح والجسر وقاعه الازياء والمشاهير اللي شفتهم تخبلت ريم وغارت
تندس بعلي وتكله حباب خلي نروح
اتصلت بغصون وناديه وسوسن وفتحت كاميرا شافن الغرفة والهدايا
علي عجبه القميص كال اروح اكدرة دليته بالحمام والجهال يلعبون فدوة غادة تجنن صايرة تزحف
ريم ندستني عشق واتشرليّ
اعرف قصدج ريم ماكو شي لسه بعدنه
لطمت على خدهة ياا !!
اجه علي شبيجن !!
يمعودة عشق سكتي
اليوم ماتنيمني الا اوديها لألمانيا
الحمد لله ماعرف عليمن حجينه
ضحكنا صدك ارتاحيت شويه وياهم
ام كريم كل ربع ساعة تسوي حجه تدخل للغرفة وتباوعلنه
جمعت الهدايا كلها كتلهم وصلوها حتى هدية عمو عبد الله وزوجته وهدايا اهل ريم وهدايا البنات
بوست ريم والجهال وسلمت على علي دخل جلال شافني فرحانه ولابسة ومخليه مكياج معجبّه الوضع
وسلامه ثكيل دخل للحمام حسّوا بي وطلعوا
فشلني گدامهم
وماريد احاجي مالي خلكه
يخرب فرحتي
أم كريم طلعت الاكل بعربانه متحركه عدهم طلعت بالبالوكونه كعدت على المرجوحه اجه جلال سحبني من ايدي ويباوعلي من فوك لجوة ويصيح
شنو هيج كاعدة يم رجال غريب وشنو هالمكياج والعطر !
هدّ ايدي جلال
حرام عليك تدري بيه ماعدي اهل يعني شلون حتى اصدقاءي ماشوفهم حتى ترتاح
سمعي لج صديقاتج اي
بس هذا علي ممرتاحله احذرج لاتخابري ولاتجيبي لهنا اموتج
لا جلال لاتحذرني ولاتموتني
اني اعوفلك كلشي وارجع لبيت بابا احسنلي اخلص منك ومن جحيمك
جرني من شعري واني اصرخ هسه صار جحيم !!
شعري جلال حباب عوفني بجيت عافني ودخل جوة
كعدت اجرّ نفس يربي شلون بي هذا مو عيشه هاي لازم الكه حل دخلت بالغرفه مموجود
طلعت بسرعة لازم اروح لامه واحجيلها على سوالفه رحت للمكتب دكيت الباب ماكو احد
رحت لغرفتها سمعتها تخابر
استأذنت منها اشرلتي تفضلي
كعدت بغرفتها هم جبيرة وحلوة ومرتبه
كملت اتصالها طلعت عصير من ثلاجتها انطنتي شرّبت
عجبها ثوبي
ذوقج راقي عشق حلو ثوبج
اشكرج
خاله فدوة هوايه شغلات صارت لازمّ ...
سكتتني
ادري ..
خاله سمعي مني لأن جلال ..
اشرتلي اسكت مرة ثانية فشلتني
اسمعيني عشق
جلال مدلل وبسبب دلاله واجهت صعوبات هوايه وصغّرني كدام الكل سنين
وحاولت اختارله اجمل البنات مايطوّل وياهة شهر
حتى هو جابلي بنات وجبرني اوافق عليهن وهم ماطوّل وياهن
وكل مرة يكلي اريد عشق ويلج ويلحّ لدرجة خلاني كدام الأمر الواقع وراد ينتحر علمودج يلا وافقت عليج
وشفت بعيني شكد حبج مسيطر عليه لدرجه مايكدر ياخذج ويكمل زواجه منج لان مسيطرة عليه
خاله فدوة انطيني فرصة ابررّ تصرفاتي
ماكو مبرر وماريد اسمع
كومي روحي لغرفتج
كمت وكتلها بس انتي جنتي قويه وماخليتي ابو جلال يتحكم بيج وهسة كلشي بيدج
رفعت حواجبها !
ابنج مريض مومدلل واني ماعدي استعداد اعيش ويه واحد مريض
اذا مايطلكني اضطر ارفع عليه دعوة قضائية بالمحكمه عنف أسري
شوفي شعري تهلسّ من كد ما يملخني شوفي ايديه مورمه من يلويها ويجرّها واذني لسه توجعني
ماكو شي يجبرني اكمل وياه
ماريده
سمعي ماما فكري زين بكلامي طلاگ ماكو وجلال ميعوفج افتهمتي
تدرين عرسج شكد كلفنه والناس والكبار اللي اجو شنكول للعالم
قصدج دكتور سامي شيكول !
شنو !
ردت اطلع وكفت ببوجهي شنو قصدج !!
جلال حجالي عن الدكتور روحي شرحيله فهمّي شنو علاقتج بي
لان بسببج دمرني اللي
ومن اكلج مريض تصدكين
يكلي انتي مثل ماما خانت بابا وباعتقاده راح اخونه ومتحضر يريد يموتني
شفتها توترت والحزن بيّن بعيونها
عافتني وطلعت موبايلها
واني طلعت
رجعت لغرفتي اتنفس بصعوبة معقولة !
شلون واجهتهه وشلون هيج حاجيتهة !
دخلت لغرفتي تاخر الوقت لبست سيت النوم دا ابدل درت وجهي اخترعت
جلال وراي نززنّي
لزمني من متني
جلال والله ايديّه توجعني عوفني حباب
شبكني حييل واعوف هذا الجمال تدرين جسمج يخبل ظل يتلمس بيه ويشمني ويبوس دكت الباب ام كريم تصيّح عافني حاجته راح وياهة. ..
الحمد لله اجت بوكتها تغطيت بشرشف وظليت اقرة آيات (وجعلنا من بين ايديهم سدا ومن خلفهم سدا ...)
ماريده يلمسني دخيلك ربي
ريم راسلتني تعتذر وخايفه سببتلي مشكلة ويه جلال
رديت عليها
بعدني دا كتب سمعت صياح
هذا شنو مايملّ دخيله شكد مزعج !
طلعت اسمعه يكول لامه كافي ذليتيني معيشتني بعذاب سنين روحيله خلي يفيدج
ماريد اشوفج عوفيني
ونزل من الدرج يركض وأم كريم تلطم وتصيح يمه وين تروح الدنيا ليل
ام جلال تبجي سمعتها وام كريم تهديّ بيها مدا فتهم شنو السالفة بالضبط بس مبين جلال كارهه لأمه بسبب دكتور سامي
ومجبور يسكت خاطر الأملاك
يخاف منها لان مصدر الفلوس منها
لو تتطرده
يومين جلال مختفي
بصراحه ارتاحيت منه شوية اطلع بالحديقة واخابر صديقاتي براحتي ومن انام اقفل الغرفه اخاف يهجم عليه
بس البيت مشحون كلش أم جلال كل شويه تخابر واحد وحتى دكتور سامي كل شويه اسمع صوته جوه
وام كريم ميته قهر وتبجي وتعاينّي بحقد كلما تشوفني تطكها ببجيه ويمه وليدي راح
من ورة عناده بعد ما شوفه
وتلطم
دخلت للمطبخ شفت البنيه اللي شفتها بالبداية جانت تنظف وتمسح بالكاع
شكلها يخزيّ
شلون ملابسها فاضحه رغم العمال موجودين والحارس وجلال
شلون هيج صدرها نصه طالع وجسمها مليان وسمينه ودشداشه كصيرة وخفيفه
سألتها منو حضرتج !
ردت بصوت مايع اني اشتغل هنا
ظليت اباوع عليها شلون صلفه تعلج وتهز بجسمها !
لويش تريدين شي !
هزيت براسي لا .. ورحت دخلت للصاله سلمت دكتور سامي موجود وام كريم كاعدة بالكاع وتبجي
كلي عمو متعرفين وين جلال هسة ؟
كتله لاعمو مااعرف
أم جلال طلعت ويه الدكتور سامي
وأم كريم كامت اجت ببوجهي
اذا صار بي شي انتقم منج أنتي افتهمتي !
هزيت بيدي واني شكو المشكلة اساسها ويه امه مو وياي
خنزرت عليه وراحت للمطبخ
اني ممهتمه اصلا ابدل واتمكيج واتعطر احس بخلاصي من جلال اقترب من نهايته ...
ملاحضه..
«القصة حقيقيه لكن
التفاصيل الدقيقة والحوار الخاص سرّد اضافي من الكاتبه لتغطيه الشخصيات الحقيقية »
توقعاتكم ؟
يتبع ..
#قصة عشق@
أنت تقرأ
#عشق_والمستحيل
Ficção Geral#قصة فتاة عاشقة فعلت المستحيل لتحضى بمن تحب حصلت لها مفارقات وصراعات مع الحب والمستحيل بعض الأحداث 🔞
