#الحب والمستحيل 21
#قصة عشق@
خلصت السنه وتخرجت ريم تحضرنا حتى نروح لحفل تخرجها
ترددت بالبداية بس مكدرت ماروح خفت ريم تزعل مني لبست فستاني الاسود اللي اشتراه جلال ورحت ويه اهل ريم كلهم وعلي وامه وكوثر وزوجها
انجمعنه بسيارة ابو ريم وسيارة علي رحنا للجامعة دخلنه حسيت بذكريات مؤلمه انعادت ومرت بخيالي بكل مكان كعدنا ودرسنا وضحكنا
وهيثم صورته وخياله مفاركتني
بكل مكان اتخيل صوته وشكله.. .
انقهرت على بابا اللي محضر اخر حفل تخرج الي وجان مريض بوكتها
وجنت مادري بي
علي جاب هديه كلادة ذهب لبسها لريم بالحفله وكلش فرحانين جانو لزمت كلادتي بيدي غمضت عيوني
وحدة بيها فراشة ووحدة قران صغير ذهب جابهن بابا تذكرت كلشي اختنكت طلعت من القاعه كعدت برة بالحديقه انشغل الطلاب بالصور والاحتفال صدفه شفت الأستاذة ام سمير تعجبت من شافتني حضنتني وخذت من خاطري واعتذرت لان محضرت للفاتحه وحجينه بالشغل وشكد تعذبت بالدائرة المدير صعب ميتساهل وياي
حجيتلها عن جلال خطبني
كالت ليش وافقتي بنتي
شكد حذرتج منه وشكد خطبتج موافقتي جان هسة متزوجه وعدج اطفال
كتلها ست الظروف جبرتني
غيرت الموضوع وصيتها على نقل لغير دائرة كالت انطيني رقمج
اوصيلج اخوية استاذ حمزة بوزارة العدل يشتغل هناك وعندة معارف كبار ومسؤولين
فرحت صدك
يارب واخيرا راح احصل وضيفه غير هاي وارتاح ..
رجعنة والكل فرحان بتخرج ريم وحمودي كبر وكام يمشي ظليت منتظرة تخابرني ام سمير وبنيت احلام هوايه
ورة الامتحانات بكم يوم صارت ولادة ريم جابت بنيه كلش حلوة سموهة غادة
جنت اروح ويه ام ريم نزورها وناخذ حمودي لاياذي الطفله ومرات اجيبه يمي بالبيت تعودت عليه فدوة شكد محبوب
عمو عبد الله كلما يجي يجيبلي المسواك لو يدفع ورقة الماي والكهرباء
ومرات يدفع فلوس المولده
ماعندي غيرة يساعدني
بس بمرور الايام يبدي يسمعني كلام شلون بيج ياعمو وحدج وليش متقبلين تتزوجين وشكد خطبوج ورفضتي وصعبه تبقين وحدج وانتي حلوة وصغيرة ..
عمري صار 24 سنه وتحملت مسؤؤليه
جبيرة وماعندي مكان بگلبي للزواج ولا احد يملي عيني
حتى موضفه وياي تلمحلي تخطبني لكرايبها رفضت ومنطيتها مجال
وجلال اختفى بعد اخر مرة ماشفته
صارت دورة السنه لبابا تحضرنه وانجمعنه نروح للمقبرة اخذت اجازة من الدوام
بس علي وريم وامها ماراحو موزين على الطفله على اساس
بالمقبرة منظر مؤلم
رجعت لاحزاني وآهاتي ..
وبجيت ولطمت
بعد شيفيد لو بيدي انام وياك بلحدك واشبع منك واخلص من هالدنيا الصعبة بعدك يابابا حسن
كوة رجعت تمنيت ابقى بس مقبلوا وكلمن عندة مشاغل منو يبقى وياي
رجعت منهارة كوة اتحرك ياريت مارحت وظليت ناسيه
سبحت ونمت بدون اكل للمغرب كعدت صليت وقريت قران أهدي ثوابه لبابا الله يرحمه
اندكت الباب طلعت من غرفة بابا فتحت شفت ام ريم وام عبد الله
دخلن يواسني ويحجن وياي
حسيت اكو شيء غريب من كلامهن
شلون البنية مصيرها تتزوج ومايصير تبقين وحدج وبعد ماعدج عذر واحنا نخاف عليج والدنيا مترحم والناس لسانها متبري منها وووو ....
لزمت راسي وصرخت سكتن !
بجيت بحركه وغصه شتريدون هسة تزوجوني ! والمن !
ام ريم ..بنتي فدوة اروحلج والله لو ريم هم جان حجيت وياهة نفس الحجي أسم الله على ابو ريم
وانتي لا ام ولا اب
خاله انتي عشتي وياي وتعرفيني شنو ماعدج ثقه بيه
لابنتي شنو هالحجي انتي تربية حسن والنعم منج بميت رجال
صدك انقهرت لهاي الكلمه لان سمعتها من بابا شگد بآخر ايامه
أم عبدالله كالت ستار شلون ولد شاغول وحباب بس ابو عبدالله مقبل اللة يسلمه
كتلهم ستار منو !!
يعني صرت سلعة ومسوين عليه مزايدة !!
شوية واجه ابو ريم الباب مردود دخل وسلم هم حجة نفس كلامهم
أني تعبت كلش دنكت بالكاع وظليت ساكته لان متعودت اجادل الكبار لو افرض رائيي
ابو ريم كال بنتي اني اشوف لو ترضين بجلال الولد شاريج ومستعد ينتظرج بعد واحنا انطيناه كلمه
من كال جلال رفعت راسي عمو وين شفته لجلال !
اشرّ لام ريم اخذت ام عبد الله وطلعت
بنتي تتذكرين من رحت اني وعلي لجلال
ايي عمو اتذكر
الولد يريدج ويحبج بنتي وكال شتريدون اني حاضر ومستعد انتظرها عمري كله شرطنه عليه مايتصل بيج ولايجي يمج ولايضايقج لحد ماتخلص دورة السنه
وعدنا الولد وكال راح اسافر لالمانيا سياحه وشغل ومن يجي يتصل بيه
اخذ رقمي
ايي عمو واتصل !
اتصل وكال جاي بليل اليوم يخطبج
صدك توترت وحسيت بصدمه
كتله عمو ليش مكلت من البداية وليش تلفون وتتدورون !
بنتي لان اعرفج متحبين جلال ريم كالت وعرفت انتي كايله لو يبقى آخر واحد بالدنيا متوافقين عليه
بس مو من مصلحتج والناس مترحم
وروحه لابوج ياعشق لو عندي بنية وخطبها واحد مثل جلال اوافق ومااتردد واخلي الشروط التعجبني
مدام متعلق بيج هيج وسنين منتظرج غصبن عليه يوافق على شروطج
فرصة ومتكرر والبنيه الشاطرة تروض الرجال وتملكه وهذا وحيد لااخوة ولااخوات وبيتهم قصر واملاكهم ملك سليمان يعيشج ملكه
صفنت وكلام ابو ريم جان معقول
وفعلا محد يرحمني بعد ماعافني بابا كلها تريد تتولاني وتتحكم بيه
كتله عمو انطيني فرصه افكر واذا اتصل بيك اجل الموضوع كم يوم
كام كلي بنتي الجمعة كلش مناسب فكري بسرعة وحضري شروطج من هسة حتى تضمنين مستقبلج باسني براسي وطلع كمت وراه قفلت الباب ودخلت غرفتي شبعت بجي خابرتني ريم فتحت كاميرا اخترعت
ولج هاي شنو طالعه من انفجار شمسويه بروحج سولفتها ورغم ماهي عاشت وياي وتعرفني كلش زين وتعرف شكد اضوج من جلال
كالت عشق جلال احسن من غيرة متعرفين منو مضموملج ومنو راح تنجبرين عليه بعدين على الاقل هذا يحبج ومن كلام علي وبابا حجالهم شكد متابعج ومجنون بيج بس علي ممرتاحله جان
حجينه هواي وكتلها راح افكر
توقعت جلال راح يخابرني بس الظاهر يوفي بوعدة لابو ريم من وعده
وصارله شهور ملتزم معقولة هالكد يحبني ومصرّ يتحملني شكد صديته !
مر كم يوم اجه يوم الجمعة ام ريم جابتلي مسواك وجكليت وثوب جديد كالت خاله لازم تتذبين الاسود مايصير بعد خلصت دورة السنه وابوج يظل يتعذب بقبرة
مقبلت انزع الاسود مستحيل بعدني ممقتنعه اصلا
رتبنا البيت ونظفنا
بس اني ممرتاحه كلش واحس بصراع بداخلي
اني لابسه ملابسي السودة العادية
اجه ابو ريم وعمو عبد الله ومرته وام ريم متحضرين ورة شويه اجت ريم وعلي واطفالهم ابو ريم حجة ويه ريم اشرتلي ودخلنه للغرفة بجيت وحضنتني
اشش كافي عشق فدوة اروحلج شوفي روحج شلون صايرة بعد كم سنه محد يخطبج وتعنسين يعوبه وتتشاقه وياي
ريم مو جلال تعرفين يعني شنو جلال يتزوجني !
ظلت تقنع بيه سمعنه صوت عرفنه جلال اجه ركضت ريم عدلت شعري وادفع بيها ماريد وخري
لخاطري عشوقة وتبوس بيه والله يخترع الولد وتضحك خلتلي كحل وفتحت شعري وشويه باودر من جنطتهه طلعنة سلمنه جلال شافني وكف مد ايده صافحني وعيونه بيهن لهفة وشوگ
جان لابس قاط رصاصي ومتأنق والعطر ماركة وشفت الصاله مليانه علاليك وجنط وغراض تعجبت
كعد كال جبت جهاز عشق كله من المانيا وروما وبيده علاكه فتحها طلع علبه بيها تخم ذهب ومطعم بالماز سيت كامل كلش راقي سعرة فوك ال 10 ملايين
الكل تعجب ام عبد الله وام ريم هلهلن وسون صلوات شفت جلال يضحك وفرحان بس اني معبسه وجهي
اباوع بالوجوه وبداخلي ألم وحسرة هيج باعوني بسهوله !
والمن لجلال !
بس علي جان كلش مقهور
أبو ريم وعمو عبد الله فرحانين
كلهم باركولي وابو ريم كال تبقى العروس عدها شروط لازم تنفذها ابني
باوعلي كال تأمرني العروس طلباتها اوامر وباجر كلكم تجون للبيت تشوفون غرفتها جديدة من المانيا عفت العمال يركبوها هسة وبعد اي نواقص نبهوني عليها وغداكم هم يمنا بالبيت
تشكروا منه بس علي مانطق بكلمه
ابو ريم كله باجر تاخذ عروسك وتروح تراويها كلشي وشروط العروس بيناتكم
كام باسني بكصتي وسلم على الكل وطلع من طلع بجيت حييل وبصوت عالي وركضت لغرفتي سديت الباب حسيت نفسي شكد ماعندي شخصية وشكد ثكيله عليهم وماصدكو خلصو مني
ريم بقت ويه علي وجهالهم وسمعت البقية طلعوا
ريم دكت باب غرفتي عشق الكل طلع فتحي الباب
فتحته ورجعت كعدت
عشق وتاليهة
ميفيدج عنادج هسة كافي رحمي نفسج لاانتي اللي حافضتي على أمير وجان أكثر شخص يستاهلج ولاعندج حظ بالحب ل...
افف بعد لاتخسرين اخر فرصة اجتج من جلال دشوفي الذهب والغراض الجابهن تحلم بيهن كل بنية
وغيرج مالاكيه ربع جهازج
عيشي حياتج شوفي هاي المدة كلها التزم بوعد حتى يحافظ عليج
علي استأذن ودخل يباوعلي مقهور كلش كال ريم راح اخذ محمد واروح انتي ابقي هنا
لا خلي محمد روح عندك دوام الصبح
الجهال نامو بالصالة
كتله علي ليش محجيت شي !
كلي ماعندي رأي بعد رايج وانتي لازم تختارين مايصير تبقين وحيدة واول وتالي تتزوجين
بس احسك ماراضي !
ريم.. عوفي يمعودة هو دائما هيج
ميرضى عليمن؟
لزمت ايد ريم روحي ريم جهالج يظلون يبجون اخذي علي وروحي ان شاء اللة الصبح افكر بحياتي الجديدة
لا عشق شلون اعوفج وحدج
دفعتها روحي ريم تصبحين على خير
ماشي بوستني وطلعت قفلت الباب ورجعت لغرفة بابا حتى الغراض عفتهن مافرحت بيهن
نمت على سجادة بابا بليل والصبح رحت لشغلي وكلش مالي خلك رجعت الظهر لكيت عمو عبد الله بالباب كتله تفضل عمو كلي بنتي سامحيني لاتاخذين بخاطرج
انتي غاليه عندي ومايهون عليه اشوفج تبجين
ضحكت لاعمو اسفه جنت عصبيه
والبارحه رحنا للمقبرة ونفسيتي تعبانه بنتي لو ابوج عدل هواية امور تتغير
سامحيني بنيتي وباسني براسي وراح
دخلت للبيت شفت غراض جلال بعدهن بالعلاليك والجنط المفروض جهاز عرسي وافرح
عفتهن سبحت وتغديت بس جلال مااعرف بعد شضاملي
لااتصل ولاراسلني !!
يتبع
#قصة عشق@
أنت تقرأ
#عشق_والمستحيل
Fiksi Umum#قصة فتاة عاشقة فعلت المستحيل لتحضى بمن تحب حصلت لها مفارقات وصراعات مع الحب والمستحيل بعض الأحداث 🔞
