#عشق_والمستحيل

الجزء ال 30/خطة عشق

#الحب والمستحيل 30
#قصة عشق@
الفجر كعدت صليت
وعلى السجاده ابجي وادعي
كتله ربي هذا سبب سببته اللي ويجوز بي صالح واخلص من جلال
بس جروحي زادت وتعبت من عيشتي انذليت واريدك تعجل بخلاصي منه
طلعت موبايلي لكيته مخابرني غلقته الجهاز ورجعت نمت جوعانه بس مااكدر اكل اصلا نسدت نفسي اريد بس تروح ام جلال حتى اطلع منا شيصبرني
الصبح ام كريم دكت الباب يمه نزلي تريكي
وتتوسل بيه
مارديت عليها
سبحت وبدلت وطلعت شفتها تنظف بالصاله ركضت لزمتني من اجيتي لسه البيت جحيم وجلال بسببج البارحه موتها كتل لأشواق
لوما يتدخل اخوهة جاسم والحارس أبو مريم
جان ماتت جوة أيده
ايي وهسة شتريدين مني !!
ترضين بنصيبج وتتقبلين الوضع أشواق زوجته مثلها مثلج بس الفرق ماكو عقد محكمه بس تروح أم جلال اقنعه يعقد عليها بالمحكمه بس بعد سوايتج امس ..
صحت بيها اششش بس كافي
تحسييني بذنب خيانتهم فوگ ماسترت عليهم ومافضحتهم
ماريد اسمعج سكتي
دخلت للمطبخ اخذت اكل وصعدت لفوك
قفلت باب الغرفه
اختنكت افف
ياربي الصبر دخيلك
خابرت ريم محجيت شي كتلها تعبانه ريم بعدين احجيلج بس انتي لاتخابرين هذا الرقم راح اكسرة
عشق ممرتاحه لوضعج احجيلي
فدوة ريم بعدين
سديته
طلعت دفتر كتبت الارقام كلها وطلعت السيم كارت كسرته وذبيته بسلة الزبل
شغلت الجهاز فتحت بس انترنت وسليّت نفسي اغاني وموسيقى
كضيت اليوم كله بالغرفه سمعت صوت جلال بالباب عشق فتحي
امي تحس هيج حبابه فتحي
فتحت الباب ورجعت خليت سماعات باذاني ومشغله موسيقى واغاني أجنبيه احبها وارتاح شويه من لغوة راسي
حجه وياي مسمعته
جر ّ السماعات
ليش جهازج مغلق !
مرديت عليّه
عشق لاتعاقبيتي هيج أموت
يالله ياريت هيج وأخلص منك بسرعة
صدك تحجين أنتي !
اللي يشوفج قبل يومين
من تغسليلي وتنامين بحضني وجوة شفايفي عيشتيني سلطان
شمرت الموبايل وصرخت ببوجهه
وشنو مكافأتك الي حضرة السلطان؟؟
طلعت متزوج قبلي ب ٦ سنين
واللي ما اعرفه عنك شنو ؟
هذا بس اللي شفته بعيني
اللة يعلم شضام عليه بعد
تقرب يمي رجعت لورة
دير بالك تسوي أي شي افتهمت
مع الاسف عليك اصلا متستحق اباوع ببوجهك
متحملتك لحد ما تروح امك واتصرف وياك باللي تستاهله
شراح تسوين يعني !
روح جلال مالي خلك هسة واذا احتكيت بيه لو فكرت تقترب ما اتردد لحظه واكول لامك حتى لو سافرت وشوف شراح تاخذ منك وشلون تعاقبك
شفته خاف مني دخل للحمام سبح وظل بعيد حتى ميباوعلي
مر الاسبوع ببطء شبعت بي قهر واني كل يوم بالنهار وحدي وبليل افزّ من نومي اشوف مكانه فارغ وتقتلني مجرد فكرة انه نايم وياهة
لو اتذكر وقت اللي ردت اسلمه نفسي كشفت خيانته بالله لو متمم زواجه مني وهو سافل وخادعني وعنده زوجه قبلي؟؟
مجرد التفكير بالموضوع يتعبني
صار موعد السفر سلمت علينا ام جلال وراحت للمطار ووصت جلال بالاملاك كلها قبل لاتطلع كالت مخليه هوايه عمال وموضفين يتابعوك جلال
اي مبلغ ينسحب لازم عدي علم بي
واراقب الشغل مناك
من راحت أم جلال طلع جلال وراهة صعدت للغرفة
اخذت بس هدومي اللي اجيت بيها خليتها بجنطه
جلال موصي أم كريم متخليني اطلع
اجت شافتني كالت وين ؟
معليج موشغلج
جرت مفتاح الغرفه مشكل بالباب وطلعت قفلتها من برة مالحكت عليها
تخبلت
كسرت الباب دگ فتحيها أكلج
_ تبقين هنا محبوسه علما يجي جلال
_شلون هسة الله لايوفقج
حتى رقمي كسرته جان خابرت ابو ريم
ركضت فتحت انترنت ماكو الظاهر مطفيته من جوة
شلون يربي
صدك انجنيت
لزمت راسي
احتاريت
شسوي هسة انتحر !
لا ..
استغفرت ربي شلون انتحر واخسر الدنيا والآخرة علمود هيج بشر
عبالك مافيا عصابه مسوين
الله ينتقم منهم كلهم
وهسه يردون يموتوني
نهار كامل ظليت بلااكل كمت ارجف يمكن صخنت تلفلفت ونمت على الجربايه
اخ بطني لزمني مغص راح اموت من الألم
سمعت الباب انفتح دخلت ام كريم شافتني اهذي وادعي عليها لزمت راسي مصخنه خابرت جلال
ماادري شكد واجه جلال
ظل يحجي عليها مااتذكر شكلها
لأن دايخه وراسي يفتر
شالني خلاني بالبانيو وصب مي بارد كمت اصرخ وابجي
لفني بمناشف ظل شايلني ام كريم بدلت الفرشة ورجعني على الجربايه
وخلاني بحضنه
بعدين جابت ام كريم شوربه وكلني بيده وعصير شربته
بلاوعي حضنته حيل وغمضت ظل يبوس بيه
اسمعه يرزلها لأم كريم
ويغلط عليها
يكلها اموتج انتي وبت اخوج
تكله لو مخليتها منهزمة مو احسن
بعد مترجعلك اذا طلعت منا
صاح بيها روحي طلعي برة وحضري اكل مشويات زين الها يلا بسرعة
لزم ايدي يشمها ويبوس
ويبجي
حبيبتي عشق ليش هيج تسوين تريدين تعوفيني وحدي ماصدگت تصيرين حلالي
شتريدين اسويليج هسه شال راسي حبيبتي بس اطلبي اي طلب انفذه الج
بس لاتعوفيني حبابه والله أموت
باوعت بعيونه حسيته صادق
اني تعبانه ودايخه
بس وعيت انتبهت شويه جنت بحضنه دفعته وكوة حجيت
ابقى هنا جلال بس عندي شروط
هز براسه كولي شنو شروطج انفذهن
لزم ايدي سحبتها
اول شرط متلمسني وتنام برة
وارجع لدوامي وتبطل تشك بيه وتراقبني وين مااروح اروح معليك وعصابتك مالهن شغل بيه
واريد مصروف كل يوم تنطيني
سكت مارد عليه
كام طلع ملابسه ودخل للحمام
رجعت لفيت نفسي بعدني مالي خلك
من طلع باوعلي
كال يعني مصرّة !
اي مصرّة
واوعدك ماانهزم ولااطلب الطلاگ منك ولاسويلك مشاكل اذا التزمت انته
ماشي عشق بس للدوام ابو محمد يوصلج ومتروحين منا منا لاي مكان
وبالنسبة لام كريم واشواق هسه أأدبهن ومايتعرضلج ابد
ومصروفج من اليوم شكد تريدين انطيج
بس شغله ماالمسج مااكدر حبيبتي اموت والله
تنهدت حيل وليش تموت يابه عندك زوجتك الاولى مناقصها جمال وجسم وحلالك تموت عليك وتشبعك
عشق شدتحجين !
وروح ابوج مالمستها من خطبتج لحد ماشفتيني ذاك اليوم
جبرتني وظلت تتوسل وهددتني تفضحني
ميهمني جلال
اطلع برة هسة
صيح ام كريم تاخذ كل غراضك متبقى هنا
عدك اي غرفه روح بيها
وباجر اطلع اروح للدائرة واحتمال أتأخر
ومنين اخابرج بالله اذا كسرتي السيم كارت؟
وشكو تخابرني !
اصلا كسرت الرقم حتى اخلص منك
أي شيء يصير خابر ابو محمد
وتأكد مااشرد منك
ولهّي نفسك عني بالشغل كافي اختنكت منك ارحمني
مرّت الايام ورجعت لشغلي تعبت كلش لان اجازتي خلصت من زمان والمدير سوالي مشاكل
اتصلت بسوسن ولؤي ساعدوني دبرلولي كتاب من الوزارة ورحت للمستشفى سويت اجازة مرضيه
ورجعت لتعب الدوام وارهاق الشغل وبليل اخذ اكل من المطبخ واصعد لغرفتي
ام كريم بعد آخر مرة تتجنبني ومن تشوفني تشرد تخاف من جلال
بس أشواق كل ماادخل للبيت تتصرف بحرية كاعدة بالصاله الجبيرة
وتظل تبوس بجلال وتضحك بصوت عالي حتى تقهرني
وتتعمد مرات متخليلي اكل واضطر اشتري من برة لفات
جلال مشغول بالعمارة والمكاتب ومن تتصل امه يجي بالغرفه يمي بس اسلم عليها وتسألني ماكو شي بالطريق !
متدري بابنها شسوة وراهة
مضطرة اتجاوب وياه بس من تخابر امه
وسمعت من كلامه ويه امه اكو على اساس مشروع عدهم مخططيله
وجلال يسحب فلوس من المصرف ويشتري أجهزة ومعدات رياضية ماافتهمت وين
وميهمني
بس بقه ميت عليه ومتلهف بس احجي وياه لو اسامحه
يتوسلي شكد مكدرت اتنازل
مرات الكه ورقه بباب الغرفه بيها اعتذار وسامحيني حبيبتي
لو يجيب ورد ويخلي على الجربايه
مااكدر اتنازل صعب
وخاصة كمت اسمع صوته بغرفة امه ويه اشواق وتتعمد ترفع صوتها وتغني وتركص بليل حتى تقهرني
..
يتبع
#قصة عشق@