#الحب والمستحيل 38
#قصة عشق@
طول فترة الاجازة عايشة على المهدئات والمسكنات واراجع دكتور اعصاب كضيتها رعب وخوف
منسيت الصار
بليل اشوف كوابيس
ومنظر جلال من يضربني ويصرخ
افزّ ابجي ..
هيثم من سافر ماعرفت عنه اي شي بعد
يمكن خاف عليه ياذيني جلال
هاي ثاني مرة تصير وياي بسبب هيثم
خرب لي حياتي مرة وهسه رجع خربها مرة ثانية بس المرة الثانية جانت من صالحي الحمد لله والشكر صار سبب بخلاصي من جلال الحيوان
زين شلون اتواصل وياه
ماسأل بعد ولا اتصل
لايعرف رقمي
ولا عندي رقمه الجديد واخابرة
بس هو وعدني يرجع
واكيد راح يرجع ..
انتظره ..
مستحيل اكرر غلطه جلال
ومستحيل ارتبط بعد بأي شخص
ولاافكر بالزواج
عشت وحدي هسة بس ذكرياتي ويه هيثم تسليني
كل كلمه وكل سالفه احس بيها وتصبرني على فراك وشوگ وبعد ...
بقيت وحيده
بس بقيت اخاف من تندگ الباب
بعد ما رجعت لريم لبيتها تعبت وجهالها تبهذلوا
طلبت من ابو ريم يستنسخ مفتاح البيت ويخلي نسخه عد ريم ونسخه عده
اخاف من تندگ الباب
ورجعت لجهازي القديم ولابتوبي طلعتهن واشتريت رقم جديد واكدت على الكل مينطون الرقم لأحد غريب
مرّت ايام
طلعت ويه ريم وبعت الذهب والنيشان كله والفلوس العدي فتحت حساب بالمصرف وانطيت علي فلوس يشتريلي سيارة صغيرة اروح بيها للدوام
بمرور الايام ..
خلصت الاجازة ورجعت لدوامي بالنقابة
مكاني كلش زين ومرتاحه وغرفه وحدي وشغل على الخفيف
اتصلت باستاذ حمزة تشكرت منه
ورحت لمكتب سوسن ولؤي يكعدون سوة شكد مشتاقتلهم
حضنتهم وبجيت وتذكرت شكد بفضلهم خلصت من جلال وشكد ساعدوني
بالمحكمه وبقضيتي
وبشروني بزواجهم قريب كلش
فرحتلهم ورجعت لمكتبي عندي حاسبه ادخل على قضايا اتابعها واسجل تواريخها واسماء وشغلات
مرت اسابيع بالشغل اروح بسيارتي وبليل اخابر الكل واطمنهم
ومرات يزوروني ويتعشون يمي
رغم وجودهم يمي بس الوحدة تقتل
بس مهما كان احسن من عيشت جلال وضيمة
بيوم دخلت لغرفه بابا
المغرب داصلي مثل كل مرة بسجادته
كملت واتذكرته
بجيت لفيت نفسي
وغفيت شويه بمكاني
شفت بابا لزمني وهمس بأذني
باباتي حبيبتي
باسني بخدي
فزّيت !
لكيت نفسي عركانه وارجف
ايدي وخدي بيهن دفو !!
صحت بابا !
كمت مسحت وجهي واصيح بابا وينك !
اكو شيء غريب
طلعت من الغرفه دورت البيت كله
ريحه بابا اشمها وبوسته بخدي حقيقية موحلم !
كعدت بالكاع ولزمت راسي
من الحادثة بدى يصير عدي صداع ودوخه
ظليت اقرة آيات واتعوذ من الشيطان
شسوي يربي دائما اشوف بابا بالحلم
بس اليوم رؤيه يمكن مااعرف
احس روح بابا هنا موجوده !!
راح انجن !
رجعت لغرفه بابا
فتحت كنتورة وطلعت دشاديشه اشمهن واحضنهن وابجي حسيت اكو شيء بجيب الدشداشة !
طلعته اوراق متطبكه
فتحتهن انصدمت !
تقارير طبيه لماما واله من مستشفى بالسليمانيه وبيهن ختم !
وتاييد وسندات سكن هناك ونسخ هواية منهن
دورت بعد بكل ملابسه
لكيت كارتونه جوة طلعتها
فتحتها اوراق هوايه وصورة لماما !
تشبهني بس حواجبها شگرة وخفيفه
شهادة وفاتها
حضنت صورتها وبجيت طلعت ملابسها
شميتها وصدك ريحتها طيبه
أول مرة اشوف اغراضها
عمري ماطلبت من بابا اعرف شئ عن ذكريات ماما
طلعت شالات وحجابات ماما لبستهن ووكفت كبال المرايه
نسخه من ماما بس الفرق
ماما شكره
حسيت بإحساس كلش غريب
مفكرت بيوم اتحجب
اصلا ملابسي دائما احافظ على نفسي ومستورة بس الحجاب آخر شئ افكر بي قررت من اليوم البس الحجاب
ظليت ساعات اطلع بغراض بابا اكو فلوس وذهب بصندوك ومحبس ماما
اتذكر صوت بابا بأذني من كلي من تحبين الشخص المناسب تلبسين خاتم حوريه لبسته بصبعي وبجيت لزمت صدري اختنكت وتعبت من البجي
لكيت بعد غراض هواي
وماعرفت شنو
كمت لمكتب بابا اتذكر اشوفه يكتب
فتحت مجرات دفتر جبير كعدت على الكرسي فتحته
مذكرات بابا !!!
لطمت على وجهي
كلبت بي ودموعي تنزل وحدها
متت من الحسرة
بابا كاتب كلشي
من جان صغير واسماء وتواريخ وعنواين واسماء كل مدرسه درس بيها لحد اعداديه الصناعه
وبدايه سفرته للشمال
وشلون تعرف على حوريه وشلون رجع لبغداد ومن ماتت ماما
كلشي كلشي ...
يربي
راسي افتر دخت
حسيت بصداع قوي كوه وصلت لغرفتي اخذت علاجي وشربت مي
ارجف
فتحت موبايلي
خابرت عمو عبد الله كتله عمو فدوة تعال انته وام عبدالله
خيرج بنتي شصاير !
أيدي ترجف رديت باب البيت
ورجعت كعدت بالصاله لافه شعري بحجاب ماما وارجف ماادري بردت وصخنت ماادري خوف
دخل عمو عبد الله وزوجته ركض
لونهم مخطوف
اسمعهم يكولون اسم الله شبيج ناخذج للمستشفى
ام عبدالله شافتني لابسه حجاب ظلت تسوي اللهم صل على محمد وال محمد
وشبكتني وبجت
كعدوا يمي اهدي بنتي شفتي كابوس مثل كل مرة !
شلت راسي ابجي واشهك عمو ليش مكتلي !
ها عمو عرفتي !
اي عمو عرفت
بنتي كتلج من خلصت الفاتحه دخلي لغرفه ابوج ودوري بغراضه
ماعندي جراءة احجيلج
ابوج اللة يرحمه وبجه
عمو احجيلي كلشي
بنتي ابوج انتظر تتخرجين وتتعينين وتلزمين قضيته بيدج انتي تاخذين حقه من ولد عمه
مسحت دموعي
تفاجأت !!
عمو فدوة احجيلي بالتفصيل
..
...
يتبع
#قصة عشق@
أنت تقرأ
#عشق_والمستحيل
Fiksi Umum#قصة فتاة عاشقة فعلت المستحيل لتحضى بمن تحب حصلت لها مفارقات وصراعات مع الحب والمستحيل بعض الأحداث 🔞
