#الحب والمستحيل 5
#عشق@
..
من راح شفته من گفاه
طويل وقميصة ابيض
كمت ارجف
طوله وهيبته
يربي هذا هيثم !!
شجابه هنا
وشنو من صدفه !
خجلت كلش لساني انعكد وهو مالتفت وراه
راح ..
اخذت المنديل مسحت بي ورجعت
البنات شافني حاولن يحاجني ويعتذرن اني ساكته
وبالسيارة ماحجيت شي
ريم تتشاقه وتضحكني اني لازمه المنديل وسارحه بعالم ثاني
معقولة مراقبني !
شجابه لهنا شلون اندلني مكانه المفضل بالمكتبه العامه زين سمع كلامنه ويه البنات جنه نصيح ونحجي بصوت عالي !
الف سؤال ببالي علما وصلت للبيت سبحت ورحت لغرفتي
بابا مشغول بالمحل ومرات تجي طلبيات لمناسبات يجيب كميات حلويات هوايه وعمال عدة يوصلون طلبيات
الحمد لله مشغول عني لو يشوفني هيج حالتي يعرف بيه شي
مافتحت نت وجهازي اغلقته
ومالي خلك كلش
افكر بهيثم ماكو هيج برود عده اني محتركه عليه وهو بارد ثلج وارجع اصفن اتخيل شكله والمنديل بيدي
الله شكد حلو طوله
اوووف ..
تاليهة شلون بي هذا
شبكت المخدة ونمت
غفيت ورة كم ساعة صحيت لكيت بابا مخليني بحظنه وغافي
حضنته وشميته الله شكد دافي حضنك باباتي وابوس بي
فز وشبكني
كال دخلت شفتج نايمه مثل الملاك تذكرت حوريه وحضنتج
باوعت عيونه الظاهر جان باجي سودة عليه
بابا شوكت تنساهة الله يخليك مو مردت صحتك ..
بابا يضوج من احجي هيج ويرجع يذكرني بان هيه انطتني الحياه وراحت
وهي احلى شي صار بحياته
بس هالمرة ضاج كلش
كلي من تحبين بصدق راح تحسين باحساسي واذكرج
طلع من الغرفه رحت وراه
بابا سامحني ارجوك انته كلشي بحياتي وداشوفك تتعب وتمرد صحتك علمود ذكريات سنين هوايه مضت وانتهت
لااا بابا ماانتهت ..
حوريه تعيش بدمي و كل صلاة اطلب من ربي يقرّب موتي واروح يمها
اني حضنته كتله بابا إسم الله عليك ليش هيج تحجي فدوة اموت من الخوف وتعوفني المن ؟
أبتسم وباسني بكصتي وكلي اللة كريم بنيتي ربج ماينسى عبده ..
اني ظليت بيومها كلش متاثرة ودايخه بالأحداث الاخيرة اللي صارت وياي بين كلام بابا وكلام صديقاتي عن جلال المغرور وتفكيري بهيثم راح يقتلني ..
فتحت موبايلي ودخلت عل نت لكيت البنات خابصات الدنيا رسايل ومسجات ومقاطع صوتية ومكالمات كوومه !
شافني فتحت الرسائل نخبصن بالملصقات
ولجن شكوو !
ظلن يتعذرن مني وريم كتلت نفسها ومقهورة
عشق أني ولايوم زعلتج انتي موبس صديقتي انتي اختي ورفيقة دربي وبيننا سنين طويله ..
فتحت كاميرا وماجبت طاري سالفة الوكعة بحديقة الجامعة وتصرف هيثم وياي ..
سولفنة عادي وظليت احذرهم لايفتحون موضوع جلال كلش يضايقني ومجرد يجي طاريه انزعج متشوفنه شلون يضحك على البنات وماظلت وحدة ممصادقها
وعيونه زايغه يباوع لكل البنات
ونظراته شلون شيطانية
وعدّني صديقاتي يحاولن يبعدنه عني بأي طريقة
ريم كالت خلي نطش خبر بالكليه انو انتي مخطوبه ونخلص منه
غصون تكلها لا عليمن نكذب علمودة اخلي حبيبي غيث يفلش سيارته تفلش ويشغله بيها لو يذبه ببلوة ..
ناديه هم تحجي شكل ..
سوسن كالت ترة انتن مكبرات السالفة عشوقة متردين تعرفين شراد جلال ؟
كتلها شراد بالله
كالت يريد توافقين على طلب الصداقة بالفيس وتحجين وياه مثل كل البنات عادي ليش تتجنبني يكول شبيه أني ما اعجبها ؟
وأني گتله اوصللها الرساله بس ماوعدك برد
اني صفنت
بالله هذا صدك يحجي !!
شرد عليه هسه !
ريم كالت عوفي عشق وغلسّي
سوسن كالت اني لو بمكانج اتنازل واوافق ..
كتلهن اهووو هم رجعنا
لالا عشق يمعودة لاتزعلين فدوة خل يولي علمودة تصير مشاكل بيننا ..
بعد هالكلام كتلهن غيرن الموضوع اصلا ماريد تكررن السالفة هاي
بعدين ضليت اشكيلهن عن بابا كلش حبو يسمعون قصته ويه ماما حوريه
حجيتلهم السالفه كلها ..
وكل وحدة منهم تكول اكيد فد يوم راح نحب مثلهم ونصير عشاق واقرب مثال وئام"
.. صدك شو اليوم ماكو وئام !
اكيد داكتها حب وغرام وغزل ويه رحيم
وختمت وياهن الكلام ونمنا وثاني يوم عدنا اوف عطله صادفت جمعة
انشغلت بتنظيف البيت واسوي كبه وبورك اضم بالمجمدة خاف مالحك بايام الدوام واكيد شغل البيت ميخلص وغسل ملابس وكوي لليل يالله خلصت هلكت
واراجع محاضرات الإسبوع اريد اتفوق بهالسنه وافرح بابا خطيه تعب عليه هواي
بس بابا بوقت الفراغ يكعد على مكتبة صغيرة عنده بغرفتة يطلع اوراق دائما اشوفه يكتب
ويطلع صوت اثناء الكتابه
ومرات يبقى يوّن من البجي
عمري ماحاولت اتتدخل لو اسأله
لان اخاف تهيج مشاعرة ومتخلص آهاته وحسراته واحساسه بفراق ماما سببله ألم جبير
اشوفة يصلي ويقرة قرآن بصوت مسموع شگد حلو صوته
اعوفه واخلي براحته لحد ما يطلع ويجي لغرفتي وناكل سوية
مرات نظل ندردش ويبوسني ويطلع للمحل وعلى هالحال كل يوم
وبليل ارجع لصديقاتي نسولف قبل جانت بس ريم هسة صارن خمسة ..
..
بيوم من الايام بالدوام رجعنا عادي ماببالي شي ومنديل هيثم غسلته ونشفته وخليته بجنطتي كلت بلكي احصل فرصة وارجعه والگاهه فرصة احجي وياه ..
تفاجأت بوئام خطية مامدوامه رحنا للأستاذة ام سمير ويه البنات خفنا وقلقنا عليها حتى ماتصلت ويانه بيوم العطله والجمعة
رجعت لأهلها بالحله والظاهر صايرة مشكلة
دخلنه لغرفة الاستاذة لكينا رحيم مخبوص خطية ويتوسل بأم سمير
سلمنه وكعدنه افتهمنا ان رحيم أخذ أمه وراح لبيت أهل وئام
وماشاف ترحيب منهم لأن هو سني ومن غير محافظة وظلوا يتحججون ورفضوا
گلوله انهم يردون وئام تكمل دراسة وماقبلو نهائيا
زين شلون ووئام وين ليش مداومت !
الاستاذة هدئّت رحيم كالت اصبر ابني خليها عليه واني اتصرف
رحيم خايفه عليها يأذوها وكلش متوتر خطيه
زين ارجوج خليني اسمع صوتها خابريها ست فدوة اريد افتهم السالفة منها
قلق جان كلش ومتوتر ..
اني والبنات بس صافنات يمه الحب يمه
اكو هيج علاقة وشوق !
ريم تندس بيه ترخصنا وطلعنا
كلهن نفس الكلام ولجن شنو هالحب
كتلهم خطية وئام منعرف اهلها شمسوين وياهة وانتن حاسداتها شبيجن
بين نضحك ونتشاقة بالممر طالعين من غرفة الاستاذة أم سمير
ضيق جان ..
اجه جلال سلم اني دنكت ومشيت بسرعة غمز ل سوسن
احنا رحنا الحمد لله صديقاتي يعرفن طبعي متفقين سوة نظل منفترق
اتلفت بس ارد اشوف هيثم
دقائق على المحاضرة دخلنا القاعة
اجت سوسن دنت يمي وهمست يريد يحاجيج ضروري عشق شگلله !
عضيت شفتي وكتلها عوفي خلي يولي
دخل هيثم صار وراي الحمد لله من شفته عبالي مجاي
الابتسامة ونظراته بيهن سحر وكلام هواي بعيونه من يباوعلي ..
جلال شايف نفسه مقهور لان مانطيته مجال وميهمني أمره اتضايق منه كلش موبيدي احسه ثگيل ..
ريم لزمت ايدي ارجف اشرتلي شبيج ! كتلها احس هيثم وراي يباوعلي ويراقبني !
ابتسمت وظلت لازمه ايدي طلعنا من المحاضرة ظليت كاعدة بالكرسي الم غراضي اجه جلال ..
مرحبا عشق !
مارديت ..
ريم اقتربت منه جلال عشق متفيدك رجاءا لاتلح !
رفع حواجبه بغضب..
طبعا اني التفتت هيثم موجود واعتقد مندهش لتصرف جلال ..
غصون وناديه وسوسن سون حلقة
على اساس يلهن جلال
اني فلتت ويه ريم ارد اطلع من الباب ركض هيثم حسيته تعمد ردمني بمتنه
كال (اححح) تنحنح يعني ..
اني كتله شكرا هيثم وفتحت جنطتي اريد انطي المنديل ..
اشرلي بيده وهمس باذني خلي عندج تحتاجي أكثر مني !
وراح ..
اني صكيت بمكاني وأخيرا حجه وياي ريم صافنه عليه !
شنو عشق شگال ؟!
ضحكت حسيت بإحساس غريب بعد شهور من اعجابي بي أول مرة يحاجيني
كتلها هاا لا ماكو شي بس سلم عليه
حسيت بريم ضاجت من تصرفه
طلعنا أهم شي خلصنا من جلال
رجعنا لمكاننه بالكافتريا اجتمعنا نشرب عصير وندردش وعيوني تتدور على هيثم وبس بينما جلال المزعج كل شويه وصار كبالي
ويومية طلابه وهوسه مسويّ
بمرور الايام بين امتحانات ومحاضرات
فد يوم سمعنا لغوة صايرة جلال ويه طالب من مرحله ثانية بكليه الاداب
مبين السالفة جبيرة كل الطلاب يسولفون بيها واشاعات صارت وحجي بين الطلبه والاقسام كلها
اجت ام جلال للجامعة سيارتها احدث موديل
انسانه مثقفه ومرتبه وأنيقة ماادري شلون هذا الهمجي ابنها ..
تتدخلت ام جلال راحت للعمادة ورئاسه الجامعة الظاهر معارفها هناك هوايه لان هية استاذة قديمة بكليه الفقه
وانتهت السالفه على خير ..
غصون جانت حشريه كلش تندحس بالطلاب وتشمشم اخبار بعدين عرفت وافتهمنا منها السالفة
ان جلال مسوي علاقة ويه بنية أسمها حنان اخوها بكليه الاداب مرحله ثانية وعلى أساس ماخذها لغرفه وحدهم مصورها بالموبايل والبنيه اخوها متتدخل متضاربين بالكليه ومتتدخل الامن وصلت للعميد ...!
الحمد لله اجته بلوة لجلال انشغل عني لان جزعت كلش منه
رسائل شكثر على الماسنجر يدز ماافتحها ولا انطي مجال ابد ..
ميعجبني هيج شاب طايش ومتهور ومايهمه علاقه جديه بس يتملعب ويقشمر البنات ..
بس ورة هالحادثة صار وحدة بالكليه محد يقترب منه والكل يخافون منه حتى البنات من يشوفنه يشردن وذيج البنيه حنان تشوهت سمعتها بسببه
طلبت نقل لجامعة ثانيه بغير محافظة..
رغم هذا مانكسر جلال ابد ظل يدور على فرصه يتقرب بيها مني ..
زادت نظراته ومضايقاته الي بس من بعيد لبعيد
وهالمرة يخوف صار لأن وحدة الكل مبتعد عنه محد يتجرأ من الطلاب ويتقرب يمه ..
خلصت الامتحانات وانطونه النتائج الحمد لله ناجحة بتقدير جيد جدا
وريم هم وكل صديقاتي
وئام طلعت مقبول خطية تجي يومين بالأسبوع وضعها حرج كلش واحنا نكتبلها المحاضرات وام سمير ساعدتها من دزت على اهلها جانو متعصبين ورافضين رحيم
ورحيم حالته صعبه كلش بقى يتواصل ويه وئام من بعيد وجان مثال للعاشق الصادق ماحب غيرها أبد وبقى منتظرها ..
قصة حبهم مؤثرة جدا وتستحق التتويج بالزواج بس العادات والتقاليد بالمجتمع أقوى من الحب ..
جلال سمعت ناجح مقبول ..
وهيثم بتقدير ممتاز" يستحق لان فعلا مجتهد جان ..
بعد كم يوم ونحضر لحفل التخرج الخاص بينه ..
...ونختم هاي السنه على خير وسلام
يتبع..
#عشق@
تم رفع الرواية إلى موقع دريم writting start
حقوق النشر محفوظة
الكتابة #ملكه_العاشقة
أنت تقرأ
#عشق_والمستحيل
Ficción General#قصة فتاة عاشقة فعلت المستحيل لتحضى بمن تحب حصلت لها مفارقات وصراعات مع الحب والمستحيل بعض الأحداث 🔞
