#عشق_والمستحيل

الجزء ال 23/خطوبة عشق

#الحب والمستحيل 23
#قصة عشق@
جلال مثل كل مرة كاشخ ومرتب واني مبهذله نفسي وبعدني ماذبيت الاسود ابتسم من شافني
شلونها حبيبتي
هلو جلال
فتحت الباب كتله تفضل على ما اغسل
كعد بالصاله
دخلت دقايق غسلت وبدلت ملابسي طلعت جبت مي وفواكه من الثلاجه
كعدت كباله
جلال رجاءا انطيني وقت ارتب نفسي على اساس اليوم اتصل بريم واحاول اذب الملابس السود واغير شويه
يالله صدك !!
فرحتيني ..
بس اني اجيت هسة علمود احدد يوم زواجنا
اعتقد كتلك البارحه خليها بس خطوبه بالبداية
شكد يعني تريدين الخطوبه ؟
مااعرف بس نسوي حفله صغيرة وبعدين الايام تقرر من اعرف كلشي عنك موبس انته تعرف كلشي عني
اوكي يومين وانتظرج والحفله ببيتنا
راح اخابر ابو ريم واتفق وياه كام عدل نفسة ويباوعلي ظليت كاعدة
نتلاكه بيوم الخطوبه
وطلع طبك الباب
اففف شكد اختنگ من اشوفه ..
حسيت بداخلي ألم ماادري حزن جبير
جلال مناقصة شيء بس اني احس بنقص وفراغ بداخلي ماادري ليش احس بروحي رايحه لسجن موقصر ونعيم وزواج ..
خايفه يارب
بصلاتي وبدعاءي ادعو الله يسببلي معجزة ماريد جلال ..
كمت جبت موبايلي لكيت مكالمات من ريم خابرتها فتحت كاميرا وحجيت وياهة سولفتلهة على كلشي صار البارحه وعلى تعب الشغل اليوم وهسة جلال دايجبرني استعجل بالزواج
ريم كالت عشق لازم تاخذين اجازة من الدوام ترتاحين وتستعدين للي جاي ..
ومن يجي علي اخلي يجيبني يمج ارتب ملابسج ونشوف المناسب شتلبسين
ويوم الخطوبه نطلع نروح للصالون تعدلين نفسج لان يومين منلحك بعد
اجت ريم وعلي والجهال كعدوا بالصاله ريم دخلت لغرفتي طلعنا الملابس الالوان حسيت بحسرة على بابا جنت أتمنى ماانزع الاسود بس الضروف حكمت انجبرت
وحزني يبقى بداخلي
جلال جايب ثياب وفساتين كلش حلوة والوان هادئة بدلت حسيت شكلي تغير
ريم تواسيني دائما وتحاول تقنعني .
صدكيني بابا يكول متلكه واحد يحبها بكد جلال شوفي شلون التزم بوعد ميقترب منج لحد ماتخلص دورة السنه
والكلام بيننا علي هم هددة اذا ياذيج يموته كتل
احاول أبين لريم اضحك واتشاقه بس اللة يعلم الحسرة والغصة اللي بقلبي وافكاري شكد مشتته
ابو ريم كل شويه يتصل علمود موعد الخطوبه بس جلال مااتصل بعد
اخذت اجازة من الدوام كلت ارتاح
صار الموعد
اخذنه علي رحنا للصالون عدلت حواجبي وحفيت
وعلمتني شلون اخلي مكياج وسويت تسريحة لبست بدله قصيرة من ريم كريمي بيها تور وربع ردن مخصرة
ريم أطول مني  فصارت مناسبه اللي تقريبا ومكياج خفيف والذهب اخذته طلعنا سوة عمو عبد الله وزوجته وأبو ريم وعائلته كلنا دخلنا ببيت جلال طبعا الكل مذهول لفخامت البيت وبناءه
رحنا العصر الكل متحضر وام جلال موجوده لابسة فستان طويل ذهبي حلو هي اصلا حلوة والكل أتعجب بيها
ام كريم تهلهل وتهوس وتطش الجكليت
جلال تلكاني لابس قاط اسود وقميص ابيض
اخذ ايدي من ابو ريم وباسني بكصتي كعدنا بالصاله مخلين كراسي اثنين
كلي تخبلين حبيبتي مثل الشمس طالعه
انطته ريم التخم لزم ايدي ولبسني الحلقه وبعدين الكلادة والسوار والتراجي
متوتر جان بس يضحك ممصدك
وام كريم تهلهل طرشتنه بالهلاهل
أم جلال شغلت جهاز سيدي اغاني اليسا
الموجودين كلهم باركولنه
إحساسي غريب مافرحت ابد اريد بس ابجي وريم كاعدة بصفي وتشاورني ضحكي فدوة عشق العيون كلها عليج ابتسمي
جلال نضراته تكتل احسة لو محد موجود جان أكلني
جابولنه عصير وكيك وحلويات
ساعة تقريبا ودخل الحارس أبو مريم وياه الشيخ وبيده اوراق
الكل كاعد جان كمت من مكاني
باوعت لابو ريم  متفاجئة !
معجبتني الشغلة
جلال هم وكف كلي بصوت ناصي كعدي عشق لاتفشليني
باوعتله وحجيت بصوت مسموع وعصبيه شنو جلال مااتفقنه نعقد كتلك بس خطوبه 
ام جلال طفت جهاز السي دي
..  لحظة شيخنا تفضل اجت يمي تخنزر عليه شنو خير شكو ممتفقة ويه جلال قبل !!
ريم اشرت لابوها
كللها من فضلج اختي لحظة سوء تفاهم ماكو شي هسة نتفق اخذني وريم وعلي هم اجه ويانه برة طلعنا للحديقة بعيد عنهم شويه والبقية ظلوا جوة
نظرات ام جلال جانت مقهورة وأعتقد رزلته لجلال
حجوا وياي على كيفهم
ورادوا يقنعوني وعلي يصيح بيهم
كلي امشي عشق ارجعج اللي ميعجبه براحته شنو غصب !
ابو ريم صار عصبي علي اسكت لاتخربها فوك خرابها
بنتي اللة يوفقج أنتي مؤمنه وتعرفين الحلال والحرام وجلال يعتبر غريب مايصير يدخل لبيتج لو ينفرد بيج بدون عقد شرعي وكلام الناس وشرع اللة
اول مرة اشوفه هيج عصبي واني حاصرتني البجيه بجيت ريم حضنتي بابا عوفهة
كلها اخذيها لمكان ترتب نفسها وتجي نعقد افتهمتي
دخل ويه علي وظليت بس اني وريم
عشق فدوة هاي مو نهايه الدنيا امشي وياي
اجت أم كريم شافتني تباوعلي صفح
الكحله سالت وتخربط مكياجي دخلتنه من باب ثانيه على المطبخ واكو حمام ومرايه طلعت ريم مكياج وعدلتلي لزمت ايدها ريم حبابه ماريد جلال
واللة مو بيدي عشق ارحميني وارحمي نفسج والناس مترحم فدوة سلمي امرج لله ضليت اشهك اختنكت من البدله عدلتلي ريم وطلعت للصاله
شفت جلال عيونه حمر ويفرك بيده وام جلال وكفت بعيد عنه ومعاجبهة الوضع رجعت كعدت بصفه الشيخ سألني بنتي اذا تريدين تاجلين العقد لغير يوم ماكو مشكلة
ابو ريم كله توكل بالله شيخنا وانطاه جناسيهم كشهود وبقية مستمسكاتي وجلال طلع هويته
ظليت محتارة وضجت من تصرف أبو ريم يعني طلع محضر كلشي حتى اوراقي ومتفق ويه جلال !!
كمل الشيخ وسألني
ريم وامها يندسن بية كولي نعم وانت وكيلي لساني نعكد غمضت عيوني كوة طلعت مني الحجاية واحس بغصه
من كملوا أم كريم وام عبدالله وام ريم كلهن يهلهلن
جلال باسني بخدي ولزم ايدي عصرها مثل اللي يتوعدني ينتقم مني على تصرفي هذا
حسيت بروحي اختنكت كلش
طلعوا الزلم لبرة
بقيت وحدي ويه جلال وريم معافتني خريت بالكاع ماعت روحي صرخت ريم واتذكر جلال شالني حضني دخل علي بسرعة دفعة حيل لورة واخذني منه 
ام جلال تهز بيدهه ظلت وام كريم جابت مي غسلولي
كتلهم اختنكت مااكدر أتنفس
ام ريم كالت اكيد من البدله ضيكه
ابو ريم اجه هم شافني اشرّ لعلي ياخذني واعتذر من الموجودين
وطلعنة بس ام كريم طلعت ورانه تركض وكالت باستهزاء خابرونه نتطمن
صعدت بسيارة علي وريم يمي بتهم غاده يم ام ريم ظلت بس حمودي ويانه
طول الطريق مختنكة واريد ابجي مااكدر
علي كلش مقهور عليه ويكول كله من ابوج ريم شوفي وين راح يوصل البنيه
ظلوا يتعاركون صحت بيهم كافي نزلوني وروحوا
كاااااافي
واصرخ
ريم تتوسل بيه عشق وين تنزلين صبري هسة وصلنه  فتحت  الجامه اجر ّنفس شويه ووصلنة كتلهم روحوا ماريد اشوف احد اخذت جنطتي ونزلت وركضت للبيت وقفلت الباب كعدت بالكاع انهاريت فتحت سحابه البدله اختنكت بدلت هدومي ونزعت الذهب لبست تراك بجامه وفانيله وغسلت وجهي
موبايلي يدك بالجنطه ماطلعته عفته
غطيت راسي بالمخدة ماريد اشوف احد ولااحجي ويه احد كلهم يصيرون براسي يحللّون ويحرمون ومحد يهتم بمشاعري ومحد يعرف بگلبي ماكو مكان للحب والزواج
گلبي اصلا ميت ومشاعري مدفونة بگبر حسن
للفجر كعدت صليت ودخلت لغرفة بابا تذكرت ايامنة الحلوة لو جان بابا موجود مستحيل يفرض عليه رأي لو يصير بيه كل اللي صار ..
فتحت موبايلي شفت مكالمات من ريم وامها وابوها وعلي هم متصل ورسايل طمنينه عليج وظل بالهم يمي خطية
استغربت جلال متتصل !
رجعت نمت الصبح الباب تكسر من الدك كعدت كوة امشي فتحت لكيت ابو ريم
دخل ومتوتر شفته كعد ليش بنتي قلقتينه البارحه خفنه تسوين شي بروحج
اسفه عمو جنت منهارة
وتصرفك البارحة صدمني
شلون تتفق ويه جلال على عقد الشيخ واني شنو مالي رأي
بعصر الجاهلية احنا !!
اني احترمك واقدرك بس مو مال تتحكم بحياتي
ابو ريم كام
بنتي اسف اعتذر منج واوعدج بعد مااتدخل بس خليها ببالج محد يرحمج بعد وتظلين تحت رحمه كلام الناس واني ماريد ابوج بقبرة تجي مسبه من وراج لو يكولون بت حسن تلعب بكيفها ورجال غريب يطب ببيت ابوها
على الاقل من يشوفون حلقه بيدج وعقد شرعي عندج محد يفتح حلكه بكلمه
طلع اوراق وانطاني هذا العقد استنسخته ونسخة عند جلال ومستمسكاتج ضميهن 
واللة يسعدكم باسني بكصتي وطلع
احتاريت يربي ماادري تسرعت بكلامي ويه ابو ريم تندمت شسوي هسة ظليت محتارة
لا فوكهة جلال اكيد هسة انزعج حضرته من تصرفي بس اني فعلا تصرفت بوقاحة
اتصلت بزميلتي ام كرار بالدوام باركتلي على الخطوبه وكالت المدير معاند وياج واحتمال يسويلج عقوبة لان ماجيتي للدوام
ضجت كلش كتلهة اخذ راتبي هالشهر واقدم نقل ماريد ارجع للدوام 
اتصلت بنادية وغصون وسوسن كتلهم على الحياة السعيدة اللي تنتظرني ويه جلال وظليت ابجي ويواسوني ويكولون شتسوين عشوقة اتحملي وصبري على ساعه تفرج
هو هذا خلاج بباله لو تنكلب الدنيا ميعوفج شكد رفضتي معافج
جربي حضج وياه واللة يفرجها
كتلهم ياريتكم يمي تخففون من هميّ
لان انشغلو بحياتهم
ناديه صار عدها بنيه .
وغصون جابت توؤم ولد
وسوسن بعدها مخطوبه من لؤي
ووعدوني يجون للعرس 
ريم اتصلت وجانت مقهورة مني ليش عشق تدرين البارحة شلون خوفتينه عليج وعلي تعارك وياي علمودج واخترعو الجهال من صوته وصراخة وراح نام يم امه وبابا كل شويه يخابرني وقلق عليج
ريم اللة يخليج لاتلحين وتزوديها عليه اصلا اعصابي تالفة واني عذبتكم وياي منا ورايح اني اتصرف روحي صالحي علي خطية لاتتخاربون علمودي فدوة
رحت بدلت ملابسي لبست شيرت فانيلا طويل وردي وبنطرون وطلعت كلت اروح للوزارة اسال على استاذ حمزة بلكي يساعدني بنقلي من طلعت اريد اتوجه للكراج لكيت كبال البيت جلال بسيارته !
اكيد من الصبح واكف هنا
هاي اذا ماطلع من امس جاي
اجيت يمه ظل بمكانه مانزل من سيارتة وعيونه حمر صايرة
دكيت الجامه
دار وجهة عود زعلان وفتح الباب
صعدت بصفه صباح الخير
مارد ويتأفف
براحتك لاترد اني هم انزل لان عندي شغل قفل الباب
جلال لخاطر اللة شتريد مو ردتني بالحلال هسة اني زوجتج وبعدين شنو !
انتي تدرين بسببج البارحة اني بتت بالشارع وأمي تعاركت وياي تكلي هاي اللي سنين رفضت كل البنات علمودها وام كريم تكلي عوفها وازوجك اربعة ببدالها من غير فشلتي كدام الحارس والخدم
صدك انقهرت عليه
اسفه جلال
الموقف صعب احنا اتفقنا بس خطوبه وتلبسني النيشان تفاجأت بالعقد
المفروض تنطيني علم
ظل يضرب بالهورن صميت اذاني وصحت بي كافي جلال لزمت ايدة بس
تعبتيني عشق ارحميني
انتي كافي
وبس
بس تذليني
شفتيني احبج واستغليتي مشاعري وضعفي صغرتيتي كدام الكل
انته شتريد هسة !
اريدج
تنهدت بحسرة ..
بعد جلال فدوة اصبر صبرت كل هالسنين اصبر بعد
ظل يباوع لايدي بس حلقة لابسة
ليش ملابسة الذهب ؟
جلال اريد اروح للشغل مو وكته الذهب واريد اجيب كتاب من الوزارة وانقلّ
عوفي الدوام وراتبج اضعافه يوصلج وانتي كاعدة
موهيج الحياة جلال
تتصور تشتريني بفلوسك يعني !
انتي هسة زوجتي شرعا وشوكت تقررين نروح للمحكمه نعقد والعرس بارقى قاعه ببغداد شتريدين بعد
واخذج لأي دوله تحبين
انتجيت على الكرسي
جلال كافي تحلم مو أول مرة احبك يالله اوافق نتزوج
وشلون وشوكت تحبيني بالله !!
افعالك تقرر
بالله انتي صدك ماعدج احساس
من البارحه بايت بالسيارة وبلا اكل وعايف اهلي وشغلي ومكابل بابج شوكت تفتحيها
من اجه أبو ريم شفته !
ايي ..
وحجيت وياه واعتذر مني على تصرفج البارحه
باوعت للساعة جلال تاخرت بعدمالحك باجر اروح تعال للبيت اسويلك ريوك فتح عيونه صدك والله !
ضحكت بس تصير حباب ماريد سالفه منا منا اضربك بالطاوة
طلعنا من السيارة قفلهه ودخلنا للبيت طلعت بيض كتله تغسل ؟
اي ياريت نزع سترته وفتح زرارات قميصه والردان عضلاته وجسمه حلو كلش واجه يمي بالمطبخ
لحد هسة ماكلت من طبخج
هسة راح اسويلك مخلمه وجاي وترتاح
صدك عشق تسلميلي عبالي ماعدج احساس وقاسيه
والله جوعان
مو مخبل انته لو متصل بيه جان حضرتلك ريوك من وكت
كملنه الريوك وكعدنة سوة حسيته مثل الطفل يضحك وفرحان شكد جان مقهور مني بالبداية وضايج بس هسة تغير ياكل بلهفة ومن يحجي فرحان ويتشاقه صار الظهر تمدد كال انام والعصر اروح مرفضت لان حسيته وعدني ماياذيني فرشلته ونام ظليت صافنه عليه 
تذكرت قبل بالجامعة شكد جنت مااطيقه واضوج منه
يعني لو واحد جايني وحالفلي بان جلال بالمستقبل يصير زوجي مااصدكه
سويتله اكل العصر كعد يصيح اااخ تكسرت ممتعود انام بالكاع لزمت متنه كتله هسة مساج وتصير اوكي لزم ايدي باسها احبج عشق اموت عليج
واتحمل كلشي واواجه العالم علمودج
غيرت الموضوع جلال تعال ناكل انتظرتك ماكلت
يباوعلي ملهوف عشق انطيني بوسه حبابه
لا جلال اذا حبيبك من عسل موتخلصه وضحكت
والله الا اريد اخلصه كله
وركض وراي ظلينه نتشاقه ونركض ونضحك لزمني من بطني وشالني لفوك
لا.. بس جلال حباب
دك موبايله اشرلي بعدني اطلبج بوسه
رد ام كريم جانت تسأل عليه كلها اني يم زوجتي هسة تريكت و راح اتغدة ظل يصيح عليها شلون يعني وطبك الموبايل
عشق انطيني سترتي دا اروح  
ليش جلال والاكل هسة اصب
شغله مستعجله صارت عندي حبيبتي بس اخابرج موتخلين جهازج صامت لوبعيد عنج بسرعة ردي فدوة
ويبوس بالهوة طلع سديت الباب وراه واحس باحساس غريب بداخلي
تغيير جبير صار بحياتي
وتنازلت
بس مستحيل اكدر احبه لجلال مستحيل ..
يتبع
#قصة عشق@